1 Samuel 21

1Míǹ boonee ní Daafiidi#21.1 Tigbɔn tiba poonee, 21.1-16 sá 20.43–21.15 ní. kíĺ nsan ki nín cá, ní Joonatan mun nín gítiń mmɔŋki.

Daafiidi bí Noob tiŋki usaraaŋakpil Ayiimeeleeki cee

2Daafiidi búntì Noob tiŋkin usaraaŋakpil Ayiimeeleeki cee. Ní úǹ sáǹní u-wunti jìkì ki dɔ́miń ki túŋkì-u, ki bālifì-u yii: «Ba ŋá ní a nóoń a-baba ubɔ kaa céeǹní-si?» 3Ní Daafiidi kíí usaraaŋakpil yii: «Ubɔti tú-mi ní ki tīī-mi mara ki lī yii: <Ubɔ ń taa béé tibɔti tin pu m tú-see.> An puee m dàkā m-naacimbi laakin bi làá kíntí-mee. 4Too, ba jinti di bí a-cee á tīī-mi? Tīī-mi kpɔnɔb biŋmoo àá tin a yaa pée kée.» 5Ní usaraaŋakpil kíí-u yii: «Maa cáá kpɔnɔfantanti, see kpɔnɔb bin bi cáań ki ŋá saraayee#21.5 kpɔnɔb bin bi cáań ki ŋá saraayee: kpèè Akoo 24.5-9.. M ŋūǹ kí dū-bi kí tīī-si a-naacimbi yaa kaa gbēē binimpoobi.» 6Ní Daafiidi kíí-u yii: «Taa gbēē binimpoobi, kii ti nín yaa cá kujaau, taa cáá nsan kí gbēē binimpoobi puee ní. Kí kūtèe, m-naacimbi janjawanti bí circir. Báà ti yaa kaa bíi jáà kujaau nee nì Unimbɔti yindi puɔɔɔ, tijanjawan nín pée gíti dáá bí circiree, ku mun kpántì circir dee.» 7Niinee usaraaŋakpil dū kpɔnɔb bin bi cáań ki ŋá saraayee ki tīī-u, kun puee kpɔnɔb biba mun kaa nìn gíti bí. An nìn sá kpɔnɔb bin bi nìn páatì ti-Dindaan nimbiin kí fàtīí dū bipɔmbi bin bi dáá púĺee kí páańee ní#21.7 Kpèè Maat 12.3-4, Maar 2.25-26, Luuki 6.3-4..

8Yaadal wiiŋŋuee, Saayuul tɔntɔnliu ubɔ nìn bí usaraaŋakpil Ayiimeeleeki cee kí ŋá saraa. Bi nìn yíì-u yii Dooweegi, u sá ueedoomja ní ki nìn sá Saayuul naakpaakpiliu#21.8 Dooweegi : kpèè 22.6-23..

9Daafiidi gíti bālifì usaraaŋakpil yii: «Aa cáá kikpaŋ àá kitàataajiki kiba a-cee doo kí tīī-maaa? Ubɔti bɔti tin pu u tú-mee nín páb́ puee, maa ti ká mpaan kí yòon̄ m-tàataajiki àá tijanjawan.» 10Ní usaraaŋakpil bí-u yii: «Gooliyaati ufiiliistiija un a nìn kūū Teereebinti tantakalinee jiki di bí. Ti dū dibɔkutil ki fìn̄-kì ki dūu dīntì Eefoodi boon. Tijanjawan tin baba pée bée dee. A yaa là kí yòon̄aaa, a ŋūǹ kí yòon̄.» Ní Daafiidi bí yii: «M là, dūú tīī-mi, kitàataajiki gbanti kaa cáá juti.»

Daafiidi bí Fiiliistii yab bin bí Gaatee cee

11Yaadal wiiŋŋu ní Daafiidi yíkì niin ki sáǹ kaa ti pìlīǹ Saayuul. U nìn dūu bàn̄ Gaati yab bɔtiu Akiisi cee. 12Ní ubɔti Akiisi kàliŋkpilib bí-u yii: «An kaa sá Daafiidi, Isirayeel tiŋki bɔtiuaaa? Un bi gà ilan ki ŋōō yii:

Saayuul kūū binib kutuku

ní Daafiidi kūū binib cutimaanyeeee#21.12 Kpèè 18.7, 29.5!»

13Daafiidi gbìl̄ mimmee ní ki fāŋkì Gaati yab bɔtiu Akiisi tikpil#21.13 Kpèè Ilan 56.1.. 14Ní Daafiidi gíiǹ u-ba kii uwaatee, ki sòoǹ fám fam, ní ki yú ki lùtī mpunyɔmu pu, ki yàntī timɔtan kɔ̀tifī u-nyimpul pu#21.14 Kpèè Ilan 34.1.. 15Akiisi bí u-kàliŋkpilib yii: «Ni ká yii unil nee sá uwaati ní. Kin ba pu ní ni cáań-u m-cee? 16Maa cáá biwaatiibi doooo? Kin ba pu ní ni cáań-mi unee ú nīn bí ki ŋáań u-waatitundi m-nimbiin? U-taal kpá kí tāā m-dumpu!»

Currently Selected:

1 Samuel 21: BASSARDC

Highlight

Copy

Compare