1 Samuel 1
1
Aana bí circir kɔŋkooŋŋun Siiloo paaŋŋu pu
1Uninja ubɔ nìn bí bi yíì-u yii Eelkana. U nìn kóò Raama Suufi tiŋkin, Eefiraayiim jooŋŋin. U nìn sá Eefiraayiim naakookun ní. Bi nìn yíì u-baa yii Jeeroowaam ní ki yíì u-naanjab yii Suufi nì Toowu nì Eeliiwuu. 2U nìn cáá binimpoobi bili: bi yíì ubɔ yii Aana ní ki yíì un kíǹee yii Peeniina. Peeniina nìn cáá mbiyaamu, ama Aana úǹ kaa nìn cáá.
3Dibindi kamaayee, Eelkana nìn yíkí Raama kí cù Siiloo kí jāam̀ ti-Dindaan Unimbɔti Mpɔŋkɔdaan, kí ŋá saraabi kí tīī-u. Eelii nìn cáá jipɔmbi bili, Oofinii nì Fineeyaasi. Bi nìn bí niin ki sá ti-Dindaan saraaŋaliibi. 4Eelkana yaa nìn ŋá saraayee, u nín nìn ŋáań puee di sá u nìn lèekī u-nimpuu Peeniina yati kí tīī-u, ní kí lēē u-jipɔmbi nì u-bisalib yati kí tīī-bi. 5Ama u nìn tìì Aana dijandi din ŋān̄ tikpilee, di sá yii u nìn néeń-u tikpil, nì min kamaa ti-Dindaan kaa nìn pú-u mmaalee. 6U-yɔnti Peeniina nìn pée nyàab̀-u tibɔti kí kɔ́ǹ-u diŋuul, kun puee Unimbɔti kaa nìn pú-u mmaal. 7Abintil kɔkɔee, míǹ ní an nìn bí. Aana yaa nìn pée cūtì ti-Dindaan circir kɔŋkooŋŋunee, Peeniina nìn pée nyàab̀-u tibɔti ní.
Bi tí cūtì dibindi dibee ní Aana bíi sūǹ kaa là tijin. 8Ní u-cal bālifì-u yii: «Aana, ba ŋá-si ní a sūǹ kaa là tijin ní? Ba yì-tì ní a bí kunimbaaun míǹ? Mimmee maa jítiǹ jipɔmbi saalaa pu a-ceeee?»
9Bi jíń ki nyùn̄ míǹ ki dóò Siiloo tiŋkinee, ní Aana yíkì ki cūtìi bíi mèé. Usaraaŋakpil Eelii nìn kā u-jal pu circir kɔŋkooŋŋu nyɔkɔpu. 10Aana nìn bí kunimbaakpaaŋŋun. U nìn bíi mèé ti-Dindaan ki sūǹ lòoloo. 11U nìn pōoǹ ti-Dindaan yii: «Ti-Dindaan Mpɔŋkɔdaan, kpèè man a-tɔntɔnliu falaau. Téetí m-pu, taa súntí m-pu. A yaa tīī-mi kibininjabikee, m làá dū-kì kí sú sii ti-Dindaan ní. Ki-maŋfal wiiŋyi kɔkɔ poonee, bɔlfi kpá kí gbēē ki-yikpiti#1.11 bɔlfi kpá kí gbēē ki-yikpiti: kpèè Dikà 6.1-21..» 12Aana nìn mēē ti-Dindaan ki yúntì tikpil. Eelii nìn kā ki kpèé u-nyɔkɔ nín tábití puee. 13Aana kaa nìn sòoǹ anyɔɔbun nyēē. U-nyunculiŋ di nìn pée tábití, di sá yii u nìn mèé u-pɔbilin ní. Eelii nìn dākafì yii u gbí ndaam ní. 14Eelii nìn bí-u yii: «Kí cáá sāā ŋyunti ŋulɔŋu ní a-daam nee làá cèetī-si ní? Kpáaǹ a-danyɔgbibɔtee kí nyā doo!» - 15Niinee ní Aana kíí-u yii: «Aayee m-dindaan, m sá unimpu un pɔbil bíil̀ee ní. Maa nyùn̄ ndaam min pɔ̀fèeyaaa, kaa tí nyùn̄ min pɔ̄ɔ̄yee mun. M dɔ́miń ki fūtì m-gìńdi ki bíl̀ ti-Dindaan nimbiin ní. 16Taa dū man a-tɔntɔnliu kí yíiń kunimpufaŋu. Kunimbaau nì takaasi di gíti lákatì m-pu, an pu ní m mēē ki yúntì míǹ.» 17Niinee ní Eelii kíí-u yii: «Nín̄ cá nì ŋgbansɔŋfi, Isirayeel Nimbɔtiu ń tīī-si tin a mēē-uee.» - 18Ní Aana kíí-u yii: «Ḿ pée ká diyimɔɔl a-cee di sá.» U lī mimmee ní ki kíĺ u-saŋŋu. U bàn̄ee ní ki jíń tijin ní u-nimbiin cúu kpántì.
19Ku wúntì kutaafaau pɔ̀lpɔlee ní Eelkana nì u-dicaŋku péé ki cūtì ki gbāaǹ ti-Dindaan nimbiin ki jáam̀-u, ní ki nín fàtī bi-dumpu Raama tiŋkin.
Samiyeel màaltam nì u-biyati
Eelkana nì u-nimpuu Aana kpáfì ní ti-Dindaan fōō u-wimmeem. 20Aana cáá dipool ní ki màl̄ kibininjabiki. U nìn pú-kì diyindi yii Samiyeel, di sá u lī yii: «M mēē-kì ti-Dindaan cee ní.»
21Míǹ boonee Eelkana nì u-dicaŋku kɔkɔ gítì Siiloo kí cùú ŋá dibindi kamaa saraau, nì ipoon in u nìn pōoǹee saraau. 22Ama min bí nee, Aana kaa nìn táá u-cal ki cūtì. U nìn tùkū-u yii: «M làá cīití m yaa gíí kibiki dibiilee ní ḿ cáá-kì kí cùnnì Siiloo kí tīī ti-Dindaan, ní kí nīn kíǹ ki bí niin jaanjaan.» 23Ní u-cal Eelkana kíí-u yii: «An ŋān̄, ŋá min a ká yii an ŋān̄ee. Kàl̄ doo kí cīití ŋyunti ŋun a yaa láa gíí-kì dibiilee. Tin bée di sá ti-Dindaan nín pōoǹ puee, ú ŋá míǹ.» Ní Aana kāl̀ Raama ki lōō u-biki áli ki dāa gíí-kì dibiil.
24Ŋyunti ŋun Aana gíí kibikee dibiilee, ní u yōoǹ-kì ki cūnnì Siiloo ti-Dindaan circir Kɔŋkooŋŋun, nì min kamaa kì dáá sá kiwaayee. U nìn kpáaǹ abin ata najau nì ŋyim kuloou nì ndaam ntúun. 25Eelkana nì Aana nìn dū unajee ki ŋá saraa, ní ki yōoǹ kibikee ki cūnnì Eelii cee. 26Aana nìn bí Eelii yii: «Ukpil m gbāam̀-si, ibaamɔn ní m làá sòoǹ, man di sá unimpu un nìn dɔ́miń dalba doo ki yú a-caŋin ki mèé ti-Dindaanee. 27Kibiki nee ní m nìn mèé ki nyàab̀ee. Ti-Dindaan tīī-mi kun m nìn mèé ki nyàab̀ee. 28Ma mun dū-kì ki sú ti-Dindaan. Ki-maŋfal wiiŋyi kɔkɔ poonee, kì làá nīn pée sá ti-Dindaan yɔu ní.» Ní Eelkana nì u-dicaŋku gbāaǹ ti-Dindaan nimbiin niin ki jáam̀-u.
Currently Selected:
1 Samuel 1: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
