1 Rois 19

Eelii wunti yɔ̄tì

1Akaab máafì u-nimpuu Jeesabeel tin kɔkɔ ní Eelii ŋée nì u nín kūū diwaal Baal bɔnaatiliibi kɔkɔ puee. 2Niinee ní Jeesabeel tú bí cùú tùkù Eelii yii: «Fool naŋkɔnampu, m yaa kaa fu ŋá-si kii a nín ŋá bibɔnaatiliibi nee puee, awaa ń dáaĺ m-tafal kí gíti kūtì!» 3Eelii gbìl̄ mimmee ní ki yíkìi kátì kí fīī u-ba. U bàn̄ Beerseeba, Juuda yab tiŋkinee ní ki dū u-tɔntɔnliu ki kāaǹ niin. 4Ama ní úǹ u-ba dū ŋwimmɔn ki cōom̀ kuteeun, ní ki cūtìi kāl̀ kisugbooi kiba taapu ki mèé yii ŋkúm ń dāá dū-u. U nìn bí yii: «Ti-Dindaan, kɔŋkɔnnee an gíti lákatì! Lēē m-maŋfal, di sá yii maa jítiǹ m-naanjab.» 5U lī mimmee ní ki tātìi dōoǹ kisugbooyee taapu ki dūu gèen̄. Kpalaayee ntuun ŋubɔ gbēē-u ní ki bí-u yii: «Yīkìm̄ kí jī tijin.» 6U kpēē u-yil púee, kantaalku nì dinyimbool di sée. U jíń ki nyùn̄ ki dóòyee ní ki fātìi dōoǹ. 7Ama ní ti-Dindaan tuuŋŋuee fātìi gítìń nliliitiim ki gbēē-u ní ki bí-u yii: «Yīkì kí jī tijin, di sá yii a-saŋŋu dá láá fɔ̀kɔ̀.» 8Eelii yíkèe ní ki jíń ki nyùn̄ ní ki ká mpɔn ki cōom̀ iwiin imuŋku ili ŋwiimpu nì kunyeeu ki tin nyáń Unimbɔti jool Ooreeb pu.

Unimbɔti fātìi tīī Eelii kunyannyaau

9Eelii bàn̄ Ooreebee ní ki kɔ́ ki dōoǹ ntaŋkpalɔkɔ ŋubɔn kunyeeu. Niinee ní ti-Dindaan bālifì-u yii: «Eelii, ba ní a tūǹ doo?» 10Ní Eelii kíí yii: «Ti-Dindaan, ipɔn kɔkɔ Nimbɔtiu, m cáá a-pu difaŋgiil, ní an páb́-mi Isirayeel yab nín fātì bi-boon ki tīī a-poondee. Bi gbáń ki wīī a-saraafaŋyi, ki kūū a-bɔnaatiliibi. M pée kíǹ m-baba ní, ní bi bíi nyàab̀ kí lēē ma mun maŋfal#19.10 Kpèè Room 11.3..» 11Ní ti-Dindaan bí-u yii: «Nyānní kí sīĺ dijool pu m-nimbiin yéèyaa, m làá jītí.»

Kpalaayee kubuŋkpaaŋŋu kubɔ dɔ́miń ki jítì, kubuŋuee nìn pɔ̄ɔ̄ ki yàntī ajoon fátí iween ki wìil̄ ataŋkpee. Ama ti-Dindaan kaa nìn bí kubuŋuee poon. Kubuŋu jítì ki dóòyee ní kitiŋ cīŋkì. Ama ti-Dindaan kaa nìn bí kitiŋ nín cīŋkì puee poon. 12Kitiŋ cīŋkì míǹ ki dóòyee ní ŋŋmi dɔ́miń, ama ti-Dindaan kaa nìn bí ŋŋmee poon. Ŋŋmi boonee ní u gbìl̄ nneen ŋubɔ pu ŋu bí dìmmm. 13Ŋyunti ŋun Eelii gbìl̄ nneenee puee ní u dū u-bɔkutikpaandi ki bīiǹ u-nimbiin, ní ki nyáń ki sí ntaŋkpalɔkɔee nyɔkɔpu. Niinee ní nneen ŋubɔ gíti sòon̄ nì u yii: «Eelii, ba ní a ŋáań doo ní?» 14Ní u kíí yii: «Ti-Dindaan, ipɔn kɔkɔ Nimbɔtiu, m cáá a-pu difaŋgiil, ní an páb́-mi Isirayeel yab nín fātì bi-boon ki tīī a-poondee. Bi gbáń ki wīī a-saraafaŋyi, ki kūū a-bɔnaatiliibi. Man baba di pée kíǹ, ní bi bíi nyàab̀ kí lēē ma mun maŋfal.»

15Niinee ní ti-Dindaan bí-u yii: «Nín̄ gítí, yòon̄ Damaasi teeku saŋŋu. A yaa bàn̄ee, á bàtī ŋkpam kí sìtī Asayeel yil pu kí kàan̄-u Siirii bɔtiu#19.15 Kpèè 2 Bib 8.7-13.. 16A yaa dóòyee, á bàtī ŋkpam kí sìtī Nimisii jipɔɔn Jeewuu yil pu kí kàan̄-u Isirayeel bɔtiu, ní kí bàtī ŋkpam kí sìtī Safaati jipɔɔn Eeliisee un sá Afeel-Meewoola tiŋkinee yil pu ú fōō a-paaŋŋu kí kpántí m-bɔnaatiliu#19.16 Kpèè 2 Bib 9.1-6.. 17Unil un yaa ŋúń ki sáǹ ki ŋmátì ní Asayeel kaa kūū-uee, Jeewuu làá kpɔ̀-u, ní un yaa ŋúń ki ŋmátì Jeewuu kaa kūū-uee, Eeliisee làá kpɔ̀-u. 18Ama m làá kíń Isirayeel tiŋkin binib kutukub biluli, an dàkà yii bin kɔkɔ tabiŋyiliŋ kaa gbāaǹ diwaal Baal nimbiin kaa móotì-dèe#19.18 Kpèè Room 11.4..»

Eelii lēē Eeliisee ú fōō u-yil

19Niinee Eelii kíĺ nsan ki nín cá. U cée ní ki ká Safaati jipɔɔn Eeliisee ŋúb́ inaa in bi kpàl̄ i kù tikpaalee mmuŋku nì inaa ki bíi kù tikpaal. Eelii jítì u-ceeyee ní ki tɔ́ u-bɔkutikpaandi ki páaǹ Eeliisee pu#19.19 Dūú ŋmàntī nì 2 Bib 2.13.. 20Niinee Eeliisee yāntì u-naayee ki nín cá Eelii cee ki bí-u yii: «Yàntī ḿ cùú kpàl̄ m-baa nì m-na kí kàan̄-bi ní kí dāan̄ kí nīn nóó-si.» Ní Eelii bí-u yii: «Nín̄ gítí a-tundi pu, m lī-si tibaaa?» 21Eeliisee nín gítí u-saakun. U bàn̄ee ní ki cúú inaa ili ki ŋá saraa. Idɔ in bi nìn dūu kpàl̄-iee ní u nìn dūu kpāā ŋŋmi ki tɔ́kɔǹ tinan ki tīī u-yab. U ŋá míǹ ki dóòyee ní ki yíkìi páaǹ Eelii boon ní ki kpántì u-tɔntɔnliu.

Currently Selected:

1 Rois 19: BASSARDC

Highlight

Copy

Compare