1 Rois 17

Eelii nāatì yii ŋweel làá nyā

1Unimbɔti bɔnaatiliu ubɔ nìn bí bi yíì-u yii Eelii. U nìn sá Tiisbee timbiliikin, Galaadi tiŋkin. U nìn bí ubɔti yii: «Isirayeel Nimbɔtiu, ti-Dindaan un bí dimaŋfalin m sá u-tɔntɔnliu nee yindi puee, dimalindi àá utaa gíti kpá kí jōō kitiŋ pu abin ŋin làá páanní nee poon, see m yaa láa bí yii dimalindi àá utaa ń nì#17.1 Kpèè Yaku 5.17..»

Eelii bí Keeriiti bùmbiki gbandi

2Niinee ní ti-Dindaan bí Eelii yii: 3«Yīkì doo, nín̄ cá ŋwìiń nyalaŋki pú kí báĺ Keeriiti bùmbiki kin bí Jɔɔdan ŋwìiń nyalaŋki púee caŋin. 4Mimmee a ŋūǹ kí nīn kāntí nnyim mbunee poon ki nyù. M làá tīī agaliŋgaa mara bí nīn cāabìń-si tijin niin.» 5Niinee ní Eelii nín cá ki ŋá kii ti-Dindaan nín bí yii ú ŋá puee. U nìn cūtì ki kíǹ ki kóò Keeriiti bùmbiki caŋin, Jɔɔdan buŋŋu ŋwìiń nyalaŋki pú. 6Agaliŋgaa nìn cāabìń-u tijin nì tinan kutaafaau nì kujoou, ní u nyù kibùmbikee nyim.

Eelii cūtì ki kíǹ ki bí Sareepita ukpiipu ubɔ cee

7Ama an dāa bàn̄ ŋyunti ŋubɔee, kibùmbikee nyim fóotì, kun puee utaa kaa nìn gíti nìn̄ kitiŋee pu. 8Niinee ti-Dindaan bí Eelii yii: 9«Yīkìm̄, nín̄ cá Sareepita tiŋki kin bí Siidɔn tiŋgbaŋkinee kí nīn kíǹ ki kóò niin. Di sá yii m tīī unimpukpiipu ubɔ niin mara ú kpíiǹ-si#17.9 Kpèè Luuki 4.25-26..»

10Ní Eelii kíĺ nsan ki nín cá Sareepita. U bàn̄ kí kɔ́ kitiŋee ní ki ká unimpukpiipu ubɔ bíi píikí idɔ. U nìn yíiń-u ki bí-u yii: «M gbàam̄-si ní, cùú jōoń diboolin nnyim fiii kí pɔ̄-mi ḿ nyɔ̀.» 11Ŋyunti ŋun unimpuee nín cá kí jōō nnyim kí cáań-uee ní u fātìi yíiń-u ki bí-u yii: «M gbàam̄-si, á kpáàa cáań-mi tijin mun.» 12Ní unimpuee kíí-u yii: «Nì ti-Dindaan a-Nimbɔtiu un bí dimaŋfalin nee puee, m pūtì-si yii maa ŋá tijin tiba ki síiǹ. Kun pée kíǹ-mee di sá ŋyim diŋaaŋkul an kā kulɔŋŋun nì ŋkpam fiii mun kā kibaŋŋin. M nín dɔ́miń ki tōō idɔ nee, m làá kɔ́ ní kí dū tin pée kíǹee kí ŋá tijin man nì m-jipɔɔn tí jī kí nīn kíǹ ki kā ki cí ŋkúm.» 13Ní Eelii bí-u yii: «Taa fàŋkì! Nín̄ cá kí ŋá kii a nín lī puee. Ama dū tin a cááyee kí ŋá tijin fiii kí cáań man kí wàatī. Boonee á ŋá kí tīī sii nì a-jipɔɔn mun. 14Di sá yii ti-Dindaan Isirayeel Nimbɔtiu nín sòon̄ puee sèé: <Ŋyim kpá kí lóó kulɔŋŋuee poon, ní ŋkpam mun kpá kí fóotí kibaŋŋee ni kí cáá sāā ŋwiin ŋun ní ti-Dindaan làá yàntī utaa ń nèe.»

15Ní unimpuee nín kóò ki ŋá kii Eelii nín bí yii ú ŋá puee. An ŋá mimmee ní úǹ nì Eelii nì u-jipɔɔn ká ki jíń iwiin kupaau. 16Ŋyim kaa nìn dóò kulɔŋŋun ní ŋkpam mun kaa fóotì kibaŋŋin, kii ti-Dindaan nín nìn dī Eelii pu ki sòon̄ puee.

Eelii fīkitì unimpukpiipuee jipɔɔn

17Míǹ boon an kaa yúntì ní unimpukpiipu un fōō Unimbɔti bɔnaatiliu Eelii u-dumpuee jipɔɔn búŋkì. U-weeŋyee nìn pɔ́ɔkì áli u dāa lántì dimaŋfal. 18Ní unimpuee bí Eelii yii: «Unimbɔti niliu, ba pu ní a ŋá-mi míǹ? A dɔ́miń kí téetí Unimbɔti ikpiti in ní m ŋée kí kpɔ̀ m-jipɔɔn níii?» 19Ní Eelii kíí-u yii: «Cáań-mi a-jipɔɔn!»

U fōō unaacimpɔɔnee unimpuee ŋaan ní ki cáá-u ki kɔ́ǹ kudii kun poon u dɔ̀ee aditɔntɔkɔ yilpu, ní ki dū-u ki bíl̀ u-lambaŋki pu. 20Míǹ boonee ní u mēē Unimbɔti mpɔn ki lī yii: «Ti-Dindaan m-Nimbɔtiu, mimmee a là kí kɔ́ǹ unimpukpiipu un pu m kóò nee dinimbinaamandin ki kūū u-jipɔɔnaaa?»

21Eelii lī mimmee ní ki dōoǹ kibikee pu ŋfunyɔm mita, ní ki mēē ti-Dindaan yii: «Ti-Dindaan m-Nimbɔtiu, gíiǹ kibiki nee fooku kí ŋá ki-ni.» 22Ti-Dindaan nìn fōō Eelii wimmeem ní ki gíiǹ kibikee fooku ki tīī-kì, ní kì kíĺ ki bíi fòotī. 23Eelii yōoǹ kibikee ki nyáń u-diikun ki kpákatì, ní ki dū-kì ki tīī ki-na ki lī yii: «Kpèè, a-jipɔɔn bí dimaŋfalin.» 24Ní unimpuee bí Eelii yii: «Tiŋman, m béè kɔŋkɔnnee yii a lafun sá Unimbɔti niliu, ní tin ti-Dindaan dì a-pu ki sòoǹee mun sá mbaamɔn.»

Currently Selected:

1 Rois 17: BASSARDC

Highlight

Copy

Compare