1 Rois 15

Juuda bɔtiu Abiyaam bɔti

(Kpèè 2 Kroo 13.1-3,22-23)

1Neebaati jipɔɔn Jeerooboowaam nín kāl̀ Isirayeel tiŋki pu dibeel abin saalku nì ata poonee ní Abiyaam kpántì Juuda tiŋki bɔtiu. 2U nìn jíń dibeel Jeerusaleem abin ata ní. U-na nìn sá Abisaloom bisal ní bi yíì-u yii Maaka. 3U nìn pée ŋá ikpitibaanti in u-baa nìn ŋée ní. U-pɔbil kaa nìn bí diba nì ti-Dindaan u-Nimbɔtiu kii u-naanja Daafiidee. 4Daafiidi puee, ti-Dindaan u-Nimbɔtiu nìn tīī-u jipɔɔn un làá nīn sá ubɔti u-kpátam boonee. Mimmee dibeel kaa nyēē u-dicaŋkun ní Jeerusaleem ń nīn gbíntìi bí ki sá ubɔti tiŋki. 5Di sá yii Daafiidi nìn ŋá tin fáatiǹ ti-Dindaanee, ní u-maŋfal wiiŋyi kɔkɔ poonee, waa nìn fātì u-boon ki tīī tin u nìn kpáafì-uee, see ueetija Urii bɔtee baba#15.5 Kpèè 2 Sami 11..

6Rooboowaam maŋfal wiiŋyi kɔkɔ poonee, kujaau nìn pée bí u nì Jeerooboowaam kansikin ní.

7Abiyaam tuuŋŋi ŋin kɔkɔ u túńee ŋmàn̄ ki kā Juuda bɔtiibi tuuŋŋi gbɔntin. Kujaau nìn pée tí bí u nì Jeerooboowaam kansikin ní#15.7 Kpèè 2 Kroo 13.3-21.. 8Abiyaam kpíì ki cūtìi ŋàl̄ u-baabee ní bi síb́-u Daafiidi Tiŋkin. U-jipɔɔn Asaa di fōō u-yil ki kpántì ubɔti.

Juuda bɔtiu Asaa bɔti

(Kpèè 2 Kroo 14.1-2, 15.16-19, 16.1-6,11-14)

9Jeerooboowaam nín kāl̀ Isirayeel tiŋki pu dibeel abin mmuŋku poonee, ní Asaa kpántì Juuda bɔtiu. 10U nìn jíń dibeel abin imuŋku ili nì diba ní Jeerusaleem tiŋkin. U-na di sá Abisaloom bisal Maaka. 11Asaa nìn ŋá tin fáatiǹ ti-Dindaanee, kii u-naanja Daafiidee. 12U nìn jìn̄ bininjab nì binimpoobi bin nìn bí awaadiinni ki ŋáań alaakpaatuunee, ní ki kúntì awaa ŋin u-naanjab nìn mɔ́ɔ́yee#15.12 Kpèè 2 Kroo 15.8-15.. 13U nìn lēē u-na Maaka tinimpubɔtiilin, kun puee u nìn kpítì diwaal ki nántiǹ ntimbiil waal Aseera. Asaa nìn gāā diwaalee ki lúkú ní ki cáá-dì ki cūnnì Seedrɔn buŋgbandi ki tūū ŋŋmi. 14Ama waa nìn kúntì laakin bi tòotī awaa ŋgbantamu puee. Nì míǹ kɔkɔee, Asaa maŋfal wiiŋyi kɔkɔ poonee, u-pɔbil nìn bí diba nì ti-Dindaan ní. 15U nìn cáań ti-Dindaan Diikun tin kɔkɔ ní úǹ u-ba nì u-baa nìn dūu sú Unimbɔtee, an dàkà yii animbil nì sindaariya nì asambil.

16Kujaau nìn pée bí Asaa nì Isirayeel bɔtiu Bayeesa kansikin ní. 17Isirayeel bɔtiu Bayeesa dɔ́miń dalba kí já nì Juuda tiŋki, ní ki máń digundi ki tú Raama timbiliiki kí pìin̄ Juuda bɔtiu Asaa nsan. 18Niinee ní Asaa kɔ́tì animbil nì sindaariya un kɔkɔ nìn bí kunimbɔtidii nimbikpaafidiikun nì ubɔti nimbikpaafidiikunee ki tīī u-tɔntɔnliibi bí cáá cùnnì Damaasi kí tīī Siirii bɔtiu Been-Adaadi, Tabirimɔn jipɔɔn nì Eesiyɔn naantiiu. U nìn bí bí tùkù-u yii: 19«Yàntī mpèé ń nīn bí man nì sii kansikin kii an nín nìn bí man baa nì sii baa kansikin puee. Kpèè animbil nì sindaariya ní m dūu tú bí cáań kí tīī-si nee. Míǹ puee cùú kpìtī mpèé ŋun bí si nì Isirayeel bɔtiu Bayeesa kansikinee ú taa ti dāan̄ kí já nì mi.» 20Been-Adaadi nìn gbìl̄ ki tīī nì ubɔti Asaa ní ki dū u-janjakpilib ki tú bí cùú já nì Isirayeel timmu. Bi nìn jáń ki fōō Iyɔn nì Daani nì Abeel-Beeti-Maaka timmu nì Kiineereeti tiŋki kɔkɔ nì Neefitalii timmu kɔkɔ. 21Bayeesa nín gbìl̄ tibɔti gbantee ní u gbēeǹ kaa ti bíi māā Raama timbiliiki gundi ní ki nín gítí ki cūtìi kāl̀ Tiirsa. 22Niinee ní ubɔti Asaa yíiń Juuda yab kɔkɔ kaa gāntì báà ubɔ. U nìn yāntì bi cáań ataŋkpee nì idɔ in Bayeesa nìn cáa bíi māā Raama gundee. Ubɔti Asaa nìn yāntì bi dū ataŋkpee nì idɔ gbanti ki máń digundi ki tú Beenjameen tiŋki Geeba nì Miisipa timmu.

23Atuun ŋin kɔkɔ ní Asaa nìn túńee nì u-pɔ́ɔǹtam nì ntimu mun u máń agun ki túee kɔkɔ ŋmàn̄ ki kā Juuda bɔtiibi gbɔŋkun. Ama u-puti poonee, u nìn búŋkì ní u-taaŋi dūu fàl̄. 24U kpíì ki cūtìi ŋàl̄ u-baabee ní bi síb́-u ki kɔ́ĺ u-baabi, u-naanja Daafiidi Tiŋkin. U-jipɔɔn Joosafaati di fōō u-yil ki kpántì ubɔti.

Isirayeel bɔtiu Nadaab bɔti

25Juuda bɔtiu Asaa nín kāl̀ dibeel, dibinliliitiil poonee, ní Jeerooboowaam jipɔɔn Nadaab kpántì Isirayeel bɔtiu. U nìn jíń dibeel Isirayeel tiŋki pu abin ali ní. 26U nìn ŋá tin kaa fáatiǹ ti-Dindaanee. U nìn dī u-baa saŋŋu ní ki nóó u-baa nín nìn yāntì Isirayeel yab kɔ́ ikpitin puee tabɔbiliŋ. 27Niinee ní Ayiiya jipɔɔn Bayeesa un sá Isakaar naakookunee bɔ́ntì kí já nì u. Ŋyunti ŋun Nadaab nì Isirayeel janjaliibi cūtì kí já nì Fiiliistii yab tiŋki Giibeetɔn ki māntìi tú-kèe ní Bayeesa kūū-u. 28Juuda bɔtiu Asaa nín kpántì ubɔti dibintataatiil poonee ní Bayeesa kūū Nadaab ní ki fōō u-yil ki kpántì ubɔti. 29U nín pée kpántì ubɔtee ní u kūū Jeerooboowaam dicaŋkun yab kɔkɔ kaa kíǹ báà unibaanti. U nìn kūū ki céetì bi-kɔkɔ ki nóó nì ti-Dindaan nín nìn dī u-bɔnaatiliu usiilooja Ayiiya pu ki sòon̄ puee ní. 30An nìn jítì míǹ kun puee Jeerooboowaam nìn ŋá ikpiti ní ki yāntì Isirayeel nibul mun ŋá ikpiti, ki gbítì ti-Dindaan Isirayeel Nimbɔtiu ŋuul.

31Nadaab tuuŋŋi ŋin u túńee kɔkɔ ŋmàn̄ ki kā Isirayeel bɔtiibi tuuŋŋi gbɔŋkun.

32Asaa maŋfal wiiŋyi kɔkɔ poonee, kujaau nìn pée bí u nì Bayeesa kansikin ní.

Isirayeel bɔtiu Bayeesa bɔti

33Asaa nín kpántì Juuda bɔtiu dibintataatiil poonee ní Ayiiya jipɔɔn Bayeesa kpántì ubɔti. U nìn kóò Tiirsa ní ki jíń dibeel abin mmuŋku nì anaa. 34U nìn ŋá tin kaa fáatiǹ ti-Dindaanee. U nìn dī Jeerooboowaam saŋŋu ní ki nóó u nín nìn yāntì Isirayeel yab kɔ́ ikpitin puee tabɔbiliŋ.

Currently Selected:

1 Rois 15: BASSARDC

Highlight

Copy

Compare