1 Rois 13

1Ŋyunti ŋun Jeerooboowaam dá láá sí nsaraafan caŋin ki ŋáań saraayee ní Unimbɔti yāntì u-bɔnaatiliu ubɔ nyánní Juuda tiŋkin ki dɔ́miń. 2U bāańee ní ki sòon̄ ti-Dindaan nyɔɔbundi nee ki tɔ́ nsaraafan pu yii: «Nsaraafan! Nsaraafan! Pīlifì tin ti-Dindaan bíi sòoǹee! Bi làá dāá màal̀ kibininjabiki kiba Daafiidi dicaŋkun. Bi làá dāá pɔ̄-kì diyindi yii Joosiyaasi. U làá dāá kpɔ̀ ŋgbantamu pu saraaŋaliibi bin tùutī a-pu talaalutuukaabee kí ŋá saraa a-pu. Bi làá dāá dū anikpab kí páań a-pu kí wà ŋŋmi#13.2 Kpèè 2 Bib 22–23..» 3Ŋwiin gbanti mbaantee ní Unimbɔti bɔnaatiliuee gíti lī yii: «Kudaaŋŋu kun ti-Dindaan tīīyee sɔ̀. Nsaraafan làá wīī, ní ŋkpam min pá ŋu-puee ń lítí kitiŋ.»

4Ŋyunti ŋun ubɔti gbìl̄ tin Unimbɔti bɔnaatiliuee sòon̄ ki tɔ́ Beeteel saraafaŋŋuee puee, ní u tāntì u-ŋal nsaraafan pu ki bí yii: «Cúúmaan-u!» Ama ní u-ŋal ŋun u tāntèe dūu fáká, waa ti ŋúń ki gúkúǹ-ŋu. 5Dibòol pu niin niin ní nsaraafan wīī ní ŋkpam min pá ŋu-puee lítì kitiŋ kii Unimbɔti nín bàà yāntì u-bɔnaatiliu sòon̄ puee. 6Niinee ní ubɔti bí Unimbɔti bɔnaatiliuee yii: «M gbàam̄-si, mèè ti-Dindaan a-Nimbɔtiu ú dū m-kpitii kí pɔ̄-mi kí cáaǹ m-ŋal kí tīī-mi.» Unimbɔti bɔnaatiliuee nìn mēē ti-Dindaan ní ubɔti ŋal fātìi ŋáŋkì ki gítì kii ŋu nín nìn bí puee.

7Niinee ní ubɔti bí Unimbɔti bɔnaatiliuee yii: «Dāan̄ tí cù man dumpu á jī tijin, ḿ kpáàa pɔ̄-si tiba.» 8Ama ní Unimbɔti bɔnaatiliuee bí ubɔti yii: «Báà a yaa yākatì a-gaajawanti mili ki dū dijandi ki tīī-mi, maa làá kɔ́ a-dumpuɔɔɔ, kaa làá jī tijinaaa, kaa làá nyɔ̀ nnyim mpaan nee pu. 9Di sá yii ti-Dindaan nín tùkū-mi puee dee yii: <A taa jī tibaaa, kí taa nyɔ̀ tibaaa, kí taa fàtīí dī nsan ŋun pu a dī ki cūtèe kí gítiń.>» 10U lī mimmee ní ki dī nsan ŋubɔ ki nín gítí. Waa nìn gíti dī nsan ŋun ní u dī ki dɔ́miń Beeteelee.

Unimbɔti bɔnaatiliu yīntiǹ Unimbɔti

11Unimbɔti bɔnaatiliu ubɔ nìn kóò Beeteel tiŋkin ki púĺ. U-jipɔmbi nìn dɔ́miń ki máafì-u tin kɔkɔ ní Unimbɔti bɔnaatiliuee ŋá ŋwiin gbanti Beeteel tiŋkin nì tin u tùkū ubɔtee. 12Niinee bi-baa bālifì-bi yii: «Nsan ŋulɔŋu ní u dī ki nín gítí?» Ní u-jipɔmbi dàkā-u nsan ŋun Unimbɔti bɔnaatiliu un nyánní Juuda tiŋkin ki dɔ́mińee dēe. 13Ní u bí u-jipɔmbi yii: «Kpàl̄maan m-maŋki kí tīī-mi.» Ní u-jipɔmbee kpàl̄ kimaŋ ki tīī-u ní u máĺ ki kāl̀ ki-pu. 14Niinee ní u nín jì Unimbɔti bɔnaatiliuee boon ní ki tin ká-u u kā teereebinti subu bubɔ taapu, ní u bālifì-u yii: «Sii di sá Unimbɔti bɔnaatiliu un nyánní Juuda tiŋkineeee?» Ní u kíí yii: «An sá man.» 15Ní Unimbɔti bɔnaatiliu un kóò Beeteelee bí-u yii: «Dāan̄ tí cù man dumpu á ká tiba kí jī.» 16Ní u kíí-u yii: «Maa ŋūǹ kí táá-si kí gítáaa, kaa tí máaǹ kí jī tijinaaa, kí nyɔ̀ tiba doo. 17Di sá yii ti-Dindaan bí-mi yii: <A taa jī tibaaa, kí taa nyɔ̀ tibaaa, kí taa fàtīí dī nsan ŋun pu a dī ki cūtèe kí gítiń.>» 18Ama ní Unimbɔti bɔnaatiliu utikpilee bí-u yii: «Ma mun sá Unimbɔti bɔnaatiliu kii siiyee ní. Ntuun ŋubɔ di dɔ́miń ki dū ti-Dindaan nyɔɔbundi nee ki tùkū-mi yii ḿ fàtīí gíiǹní-si á jī tijin kí nyɔ̀ nnyim.» Ama Unimbɔti bɔnaatiliu utikpilee nìn bíi mɔ́ntí-u ní. 19Niinee Unimbɔti bɔnaatiliu un nyánní Juuda tiŋkinee táá-u ki nín gítí ki jíń tijin ki nyùn̄ nnyim.

Unimbɔti dáaĺ u-bɔnaatiliuee tafal

20Ŋyunti ŋun bi-liitil kā ki jīǹee ní ti-Dindaan sòon̄ nì u-bɔnaatiliu un fātìi gíiǹní un béeyee. 21Niinee ní úǹ dūu nāatì Unimbɔti bɔnaatiliu un nyánní Juuda tiŋkinee. U nìn bí-u yii: «A yīntiǹ ti-Dindaan. Aa tɔ́ ti-Dindaan a-Nimbɔtiu marau un u tīī-see. 22A gítìń Beeteel ki jíń tijin ki nyùn̄ nnyim. Ama ti-Dindaan mun nìn bí-si yii a taa ŋá míǹ. A nín ŋá mimmee puee, a làá kpú ní baa làá síb́-si a-naanjab kaakulin.>»

23Bi jíń ki nyùn̄ ki dóòyee ní Unimbɔti bɔnaatiliu utikpilee kpàl̄ u-maŋki ki tīī Unimbɔti bɔnaatiliu un u fātìi gíiǹnée 24ní u nín cá. U cée ní gbikinti ubɔ kíntì-u nsanni ki kūū-u. U nìn dɔ̄ nsanni ní kimaŋ nì gbikintee yú ki kɔ́ĺ-u. 25Bisanjitiliibi nìn ká dinikpilee dɔ̄ nsanni gbikinti yú ki kɔ́ĺ, ní bi dɔ́miń ki dū tibɔtee ki máafì kitiŋin, laakin Unimbɔti bɔnaatiliu utikpilee nìn kóòyee. 26Unimbɔti bɔnaatiliu un nìn cūtì ki gíiǹní-uee nín gbìl̄ tin jítèe ní u bí yii: «Unimbɔti bɔnaatiliu un nyánní Juuda tiŋkinee dee, úǹ di yīntiǹ ti-Dindaan maraauee. Ti-Dindaan dū-u ki tīī gbikinti ní u cúú-u ki kūū, kii ti-Dindaan nín nìn tùkū-u puee.» 27U lī mimmee ní ki bí u-jipɔmbi yii: «Kpàl̄maan-mi kimaŋ!»

Ŋyunti ŋun bi kpàl̄ kimaŋ ki dóòyee, 28ní u nín cá ki bàn̄ ki ká dinikpilee dɔ̄ nsanni, kimaŋ nì gbikinti yú ki kɔ́ĺ. Gbikintee kaa nìn ŋmɔ́ dinikpileeyaaa, kaa ŋá kimaŋ mun tiba. 29Niinee ní Unimbɔti bɔnaatiliu utikpilee yōoǹ dinikpilee ki dūu páaǹ kimaŋ pu ki gíiǹní Beeteel. U nìn súń u-kpool, ní ki síb́-u. 30U nìn dū-u ki ŋá úǹ u-ba kaakulin, ní ki gāā nlan yii: «Áù, m-nabiki kpíì!» ki súń u-kpool.

31U síb́-u míǹ ki dóòyee ní ki bí u-jipɔmbi yii: «M yaa láa kpíìyee, ní dāá síb́-mi dikaakul din poon ní m síb́ Unimbɔti bɔnaatiliu neeyee. Ní dāá dū m-kpabiŋ kí bíĺ kí kɔ́ĺ u-kpabiŋ. 32Di sá yii ti-Dindaan bɔti tin u dī u-pu ki sòon̄ ki tɔ́ Beeteel saraafaŋŋu pu nì awaadiin ŋin bí ŋgbantamu pu Samaarii timmunee làá lafun ŋá míǹ.»

33Nì míǹ kɔkɔee, Jeerooboowaam kaa nìn fá u-bimbikpitim. U nìn gbíntìi nìkì ki lèekī binib samaa kansikin ki kàantí-bi bisaraaŋaliibi ŋgbantamu pu. Ubɔ yaa nìn lèe, u nìn bàtī ŋkpam kí sìtī udaan yil pu ní kí kàan̄-u ú nīn sá usaraaŋal ŋgbantamu pu waadiiŋŋin. 34An bimbim nìn yāntì Jeerooboowaam dicaŋku kɔkɔ nib kɔ́ ikpitin, an pu ní Unimbɔti nāaǹ kudicaŋu gbanti ki céetì-kù kitiŋ pu.

Currently Selected:

1 Rois 13: BASSARDC

Highlight

Copy

Compare