1 Corinthiens 8

Tiwaatootinan bɔti

1Tiwaŋkuti tin bi tōotì awaayee nanti bɔtee#8.1 Dūú ŋmàntī nì Atuun 15.20,29., ti nyí yii báà ŋma nyí, ama dinyil cāabìń dilambil ní, ní dineendi yàntī binib cá nyɔkɔpu nnimbɔtisan poon. 2Un dàkafī yii u nyí tibee kaa láá béè min sá ú bééyee. 3Ama un yaa néeń Unimbɔtee, Unimbɔti béè udaan dee.

4Ni nín bālifì yii ni ŋūǹ kí ŋmɔ́ tiwaatootinanaaayee, ti nyí yii diwaal kaa sá tiba duulinya poon, míǹ ní báà unimbɔti ubɔ gíti kpá see Unimbɔtibaantee. 5Binib dàkafī yii inimbɔti wīikí, iba bí yilpu ní iba bí taapu. Tiŋman, bíǹ ceeyee, inimbɔti wīikí ní bidindambi mun wīikí. 6Timbee, ti cáá Unimbɔtibambaanti ní, úǹ di sá Ubaati un náań tikɔkɔee. Úǹ pu ní ti bí. Ní ti-Dindaan sá ubaanti, úǹ di sá Yeesu Kriisitoo. Úǹ pu ní tiwan kɔkɔ bí, u-pu ní ti mun bí.

7Ama bi-kɔkɔ kaa nyí míǹ. Di sá yii awaatuun mántiǹ biba, ní bi gbíntì ki ŋmóò tiwaatootinan, a lì kii diwaal di lafun baasii yì tinan gbantee, ní bi-pɔbiliŋ nín kaa pɔ̄ɔ̄ puee ní bí ŋá ikpiti. 8Di sá yii tijin di kaa làá yàntī tí sútí kí pìl̄ Unimbɔti. Ti yaa jíńaaa, an kaa làá bàtī-ti tiba, ti yaa kaa jíńaaa, an kaa làá gbéeǹ-ti tiba#8.8 Dūú ŋmàntī nì Room 14.17..

9Ama ní nīn nyíǹ ni-ba nì ni nín tɔ́ ni-ba ki ŋáań miŋyee, án taa yàntī bin kaa pɔ̄ɔ̄ nnimbɔtisan poonee ń lítí. 10Un kaa pɔ̄ɔ̄ nnimbɔtisan poonee yaa ká sii un nyí Unimbɔti bɔti tiŋanee yaa kā ditaŋgbandi diba taapu ki jīǹee, an kaa téekí-u ú ŋmɔ́ tiwaatootinanaaa? 11Ní sii nyítam puee, kinabiki kin kaa láá béè ki dóòyee, kinabiki kin pu Kriisitoo kpíìyee ń wāŋkàaa? 12Ni nín bí ki ŋáań ni-nabiyaamu ikpiti min ki kɔ̄ntí bin kaa láá béè ki dóòyee landɔkɔi iweenee, an sá Kriisitoo ní ni ŋáań ikpiti gbanti. 13An puee, tijin jītam di yaa làá yàntī m-nabiki ń lítée, m kpá kí ŋmɔ́ tinan, án nín làá ŋá pu m-nabiki ń taa lítée.

Currently Selected:

1 Corinthiens 8: BASSARDC

Highlight

Copy

Compare