1 Corinthiens 13

Dineendi di jítiǹ tikɔkɔ

1Báà m yaa sòoǹ isooncaan, binib nì ituun sooŋyi, ní kaa cáá dineendee, tin m sòoǹee sá fám ní kii dawula àá diwaŋkilindi nín sūǹ pu fám an kaa cáá taapu puee ní. 2M ŋūǹ kí fōō dipɔl kí nīn nàatī Unimbɔti nyɔɔbundi, ki ŋūǹ kí nīn cáá dinyil kɔkɔ nì di-nyɔkɔm kí béé tin kɔkɔ bí dibalinee, kí nīn cáá fookii tiŋan án nīn kpìkitī ajoon#13.2 Dūú ŋmàntī nì Maat 17.20, 21.21, Maar 11.23., míǹ kɔkɔee m yaa kaa cáá dineendee, m sá fám ní. 3Báà m yaa dū tiwan tin m cááyee kɔkɔ ki yākatì bifalaadambi, ki yaa dū m-ba gba ki tīī bi wùn̄ ŋŋmi, ama ní kaa cáá dineendee, tin kɔkɔ m ŋée sá fám ní, maa cáá ipaati.

4Un cáá dineendee cáá kimɔtii ní ki cáá tiniti. Waa cáá nnimbitaataam, kaa dàkà u-ba, kaa cáá dilambil. 5Un cáá dineendee kaa ŋáań min kaa kítèe, kaa cáá ikummunti, kaa cáá diŋuul, kaa díkì unil pu. 6Tin kaa bí deedeeyee kaa tìì un cáá dineendee dipɔɔpindi, see tin bí deedeeyee. 7Úǹ pūǹ binib yìntitam kɔkɔ ní, ki cáá fookii nì dimákal, nì kimɔtii ŋyunti kamaa.

8Unimbɔti nyɔɔbundi nàatitam làá dāá gbèen̄, isooncaan sòontam làá dāá gbèen̄, dinyil làá dāá kúntí, ama dineendi kpá kí kúntí jaanjaan. 9Di sá ti-nyil din ti nyée cáá di-gbeennyɔkɔm ní, míǹ ní Unimbɔti nyɔɔbundi nàatitam mun cáá mi-gbèenlaŋki, kun puee taa nyí ki dóò, kaa tí ŋūǹ kí sòoǹ kí dóó tikɔkɔ mun. 10Ama tikɔkɔ yaa láa dɔ́ntì ki ŋá mmɔmmee, tin nìn wɔ̀b̄ee làá dāá wāŋkì.

11M nín nìn dáá sá kibikee, m nìn sòoǹ kii kibikee, ní ki dàkafī kii kibikee, ní ki kítí m-bɔti kii kibikee. Ama, m nín wíiǹ ki kpántì ukpaanee, m fá m nín nìn sá kibiki ki ŋáań min miŋyee. 12Kɔŋkɔnnee, ti nín dáá wāĺ puee bí pùuu kii bi nín kpèé digitikpil poon ki wāĺ puee ní, ama ŋyunti dòoń, ti làá dāá wāl̀ bɔ́iii. Díǹ pu nee, maa nyí ki dóò, ama ŋyunti dòoń, m làá dāá béé nyíki nyiki kii Unimbɔti nín nyí-mi pu nan ní.

13Kɔŋkɔnnee tiwan tita di bí: fookii, dimákal nì dineendi, ama tiwan titee kansikinee, dineendi di līī.

Currently Selected:

1 Corinthiens 13: BASSARDC

Highlight

Copy