1 Chroniques 27

Bijanjaliibi kitiŋi

1Isirayeel yab bin bí ubɔti tundinee sɔ̀. Adican kpilib nì bijanjakpilib bin kpòotī binib kutuku kutukuee nì bin kpòotī binib dilaataal dilaataalee nì bikàliŋkpilib. Bíǹ di nìn kpèé ajanjakiti ŋin nìn bí ditundinee, di sá yii dijanjakitil kamaa nìn cáá dibindi poonee uŋmal ubɔ ní kí tɔ̄ ditundi. Dijanjakitil kamaa poonee, binib kutukub mmuŋku nì binaa di nìn bí. 2Dijanjakitipeekaal din nìn yì ditundi uŋmapeepeekaa poonee kpiliu di sá Sabidiyeel jipɔɔn Yasoobaam. U-janjakitil poonee, binib kutukub mmuŋku nì binaa di nìn bí. 3U nìn sá Peereesi maaliŋun ní ki nìn kpèé ajanjakiti kpilib bin cáá kí tɔ̄ ditundi uŋmapeepeekaa poonee. 4Dikitil din nìn yì kí tɔ̄ ditundi uŋmaliliiti poonee kpiliu di sá uakooliija Doodayii. Miikilooti di nìn kpòotī dijanjakitil gbanti ní di nìn cáá binib kutuku mmuŋku nì binaa. 5Dijanjakitil ditataatiil din nìn yì kí tɔ̄ ditundi uŋmatataati poonee kpiliu di nìn sá usaraaŋakpil Yooyadaa jipɔɔn Beenayawuu. U-janjakitil nìn cáá binib kutukub mmuŋku nì binaa ní. 6Beenayawuu gbanti nìn kútì Bibaatandambi Mmuŋku nì Saalaa kitil pu ní ki nìn sá di-kpiliu. U-janjakitil poonee u-jipɔɔn Amiisafaadi nìn bí. 7Dijanjakitil dinanaatiil din nìn yì kí tɔ̄ ditundi uŋmananaati poonee kpilib di nìn sá Joowaab naal Asayeel nì u-jipɔɔn Seefadiya. Bi-janjakitil nìn cáá binib kutukub mmuŋku nì binaa ní. 8Dijanjakitil diŋmooŋmootiil din nìn yì kí tɔ̄ ditundi uŋmaŋmooŋmooti poonee kpiliu di nìn sá uiseerayiitija Sameekuuti. U-janjakitil nìn cáá binib kutukub mmuŋku nì binaa ní. 9Dijanjakitil diluluutiil din nìn yì kí tɔ̄ ditundi uŋmaluluuti poonee kpiliu di sá uteekooyiija Yiira, Ikeesi jipɔɔn. U-janjakitil nìn cáá binib kutukub mmuŋku nì binaa ní. 10Dijanjakitil diluluútiil din nìn yì kí tɔ̄ ditundi uŋmaluluúti poonee kpiliu di sá upeelooniija Eeleesi, Eefiraayiim naantiibi kansikin ubɔ. U-janjakitil nìn cáá binib kutukub mmuŋku nì binaa ní. 11Dijanjakitil dininiitiil din nìn yì kí tɔ̄ ditundi uŋmaniniiti poonee kpiliu di sá ukusatiija Sibeekayii, Saarkii maaliŋun ubɔ. U-janjakitil nìn cáá binib kutukub mmuŋku nì binaa ní. 12Dijanjakitil diwawaatiil din nìn yì kí tɔ̄ ditundi uŋmawawati poonee kpiliu di nìn sá uanatootija Afiyeeseer, Beenjameen naakookun yɔu ubɔ. U-janjakitil nìn cáá binib kutukub mmuŋku nì binaa ní. 13Dijanjakitil disaalaatiil din nìn yì kí tɔ̄ ditundi uŋmasaalaati poonee kpiliu di sá uneetoofatiija Maarayii, Saarkii maaliŋun ubɔ. U-janjakitil nìn cáá binib kutukub mmuŋku nì binaa ní. 14Dijanjakitil saalaa nì dipeepeekaal din nìn yì kí tɔ̄ ditundi uŋmal saalaa nì upeepeekaa poonee kpiliu di sá upiiratooniija Beenaya, Eefiraayiim naakookun yɔu ubɔ. U-janjakitil nìn cáá binib kutukub mmuŋku nì binaa ní. 15Dijanjakitil saalaa nì dililiitiil din nìn yì kí tɔ̄ ditundi uŋmal saalaa nì uliliiti poonee kpiliu di nìn sá uneetoofatiija Eeldayii, Ootiniyeel maaliŋun ubɔ. U-janjakitil nìn cáá binib kutukub mmuŋku nì binaa ní.

Isirayeel yab naakɔti kpilib yiŋŋi

16Isirayeel yab naakɔti kpilib yiŋŋi sɔ̀.

Rubeen naakookunee, Sikirii jipɔɔn Eeliyeeseer di sá ukpil.

Simeeyɔn naakookunee, Maaka jipɔɔn Seefatiyawuu di sá ukpil.

17Leefii naakookunee, Keemuyeel jipɔɔn Asabiya di sá ukpil.

Aarɔn dicaŋkunee, Sadooki di sá ukpil.

18Juuda naakookunee, Eeliiwuu un sá Daafiidi maanee di sá ukpil.

Isakaar naakookunee, Miikayeel jipɔɔn Oomirii di sá ukpil.

19Sabulɔn naakookunee, Oobadiya jipɔɔn Isimaya di sá ukpil.

Neefitalii naakookunee, Asiriyeel jipɔɔn Yeereemooti di sá ukpil.

20Eefiraayiim naakookunee, Asasiyawuu jipɔɔn Ooseeya di sá ukpil.

Manasee naakooku dijandi din bí Jɔɔdan buŋŋu ŋwìiń jeetilaŋki púee, Peedaya jipɔɔn Jooweel di sá ukpil.

21Manasee naakooku dijandi din kóòń Galaadi tiŋkinee, Seekariyawuu jipɔɔn Idoo di sá ukpil.

Beenjameen naakookunee, Abineer jipɔɔn Yasiyeel di sá ukpil.

22Daani naakookunee, Yeeroowaam jipɔɔn Asareeyeel di sá ukpil.

Isirayeel naakɔti kpilib dee.

23Daafiidi kaa nìn yāntì bi kàan̄ binipɔmbi bin cáá abin mmuŋku kí nīn cáa sìntēe. Di sá yii ti-Dindaan nìn lī yii u làá yàntī Isirayeel yab ń bùtī kii iŋmalbijaa in bí kutaa puee ní#27.23 Kpèè Diny 15.5, 22.17, 26.4.. 24Seeruya jipɔɔn Joowaab nìn kíĺ ki bíi kàaǹ Isirayeel yab, ama waa nìn púntì. Unimbɔti nìn gíí Isirayeel yab pu diŋuul dikàandi gbanti pu. An pu ní Isirayeel nibul kɔkɔ nyɔkɔm kaa ŋmàn̄ ki kā Daafiidi Tuuŋŋi gbɔŋkun#27.24 Kpèè 21.1-14, 2 Sami 24.1-15..

Binib bin kpèé ubɔti gaajawantee

25Adiyeel jipɔɔn Asimafeeti di nìn sá un kpèé ubɔti gaajawantee.

Oosiyasi jipɔɔn Yoowanan di nìn kpèé tikpaajin tin bi kpáafì ntiŋkpaamun nì ntimbilimun nì laakin sintil difɔkɔŋi bée.

26Keeluub jipɔɔn Eesirii di nìn sá bikpaabi kpiliu Isirayeel tiŋki kɔkɔn.

27Simeeyii un sá Raama tiŋkinee di nìn kpèé fiinyi sufii kpaaŋŋi kɔkɔ.

Sabidii un sá Seefam tiŋkinee di nìn kpèé ndamam min nyánní akpaan gbantin bi cāabìń ki kpáafée.

28Baal-Anan un sá Beeti-Geedeer tiŋkinee di nìn kpèé ɔliifi sufii nì siikoomɔɔr sufii kpaaŋŋi ŋin bí Seefeelaayee.

Yoowasi di nìn kpèé ŋkpam min bi cāabìń ki kpáafée.

29Siitirayi un sá Saarɔn tiŋkinee di nìn kpèé tinacaŋkpun tin bi kpàá Saarɔn naakpaapɔɔkunee.

Adilayi jipɔɔn Safaati di nìn kpèé tinacaŋkpun tin bi kpàá ditantakalinee.

30Ɔbiil un sá Isimaayeel maaliŋunee di nìn kpèé igutaamu.

Yeediya un sá Meerɔnɔti tiŋkinee di nìn kpèé mmansalimu.

31Yasiisi un sá Agaar maaliŋunee di nìn kpèé ipii nì iŋoobu.

Binib bin nìn kpèé ubɔti Daafiidi gaajawantee dee.

Binib bin pìlīǹ ubɔti Daafiidee

32Daafiidi wee Joonatan nìn sá unyil ki ŋá sukul. Úǹ di nìn sá ubɔti saŋkiliu. Yeeyeel un baa nìn sá Akimoonii tiŋkee di nìn kpèé ubɔti jipɔmbi. 33Ubɔti saŋkiliu ubɔ mun di sá Ayiitoofeel. Usayii un sá Arkii maaliŋunee di nìn sá ubɔti bɔɔ un u cáá u-poon bɔti ki tùkùee. 34Ayiitoofeel kúm boonee, Beenayawuu jipɔɔn Yooyadaa nì Abiyataar di nìn fōō u-yil. Joowaab di nìn sá ubɔti janjakitil kpiliu.

Currently Selected:

1 Chroniques 27: BASSARDC

Highlight

Copy

Compare