Zechariah 7

Hay Aat di Punlangduan

1Hidin miyapat an algaw hinan miyahiyam an bulan an ma'alih Kisleb#7:1 Unu December 7, 518 B.C. At hi'itangan duway tawon di naluh hidin nangenapan Zechariah hinan walun nipa'enap ay hiya. an miyapat hi tawon hi nun'alian Darius ya himmapit goh hi Apo Dios ay ha"in. 2Ya manu ay himmapit hi Apo Dios ya ta tabolona nan hennag nan iBethel an da Sharezer, ya hi Regem-Melech, ya nan baalda ta umuydah nan Timplun Apo Dios an mumpahmo', 3ya ta wada goh di hanhanandah nan papadi ya nan numbino'ob'on an propetan alyonday, “Unmi dan inaynayun an munlungdaya ya munlangduh un madatngan nan miyaleman bulan#7:3 Unu Ab (July-August). hi atawotawon hi panginomnomanmih napa"ian nan Timplu an umat hidin gunmi inat hi atawotawon?”

4At hiyanan inalin nan nidugah di abalinanan Dios ay ha"in di, 5“Ibagam an amin hinan tataguh nan abablubabluy ya hinan papadi di, Manu ti gun ayu nunlungdaya ya nunlangduh din gun miyalema ya miyapitu#7:5 Unu Ethanim unu Tishri (September-October). an bulan#7:5 Bahaom nan footnote di Zech. 8:19 ta innilaom di na'at eden duwan bulan. hi atawotawon hidin naluh an napitun tawon.#7:5 Hiyah ne ma'alih round number ti hay immannung an tawon an naluh an nipalpuh din napa"ian nan Timplun Apo Dios ad Jerusalem hidin 586 B.C. ta engganan den gutud an 518 B.C. ya 68 an tawon ya anggay. Mu undan immannung an Ha"in di dumalat hi nangatanyu? 6Ya hinan gunyu goh anganan ya uminuman ya undan bo'on hay odolyuy impa'amlongyu? 7Ya undan agguy'u tuwali ina'alli hatuh din nun'ahhun an propeta' hidin gutud di immadangyanan ya ado'lan di tatagud Jerusalem, ya nan udum an babluy ad Judah, ya ad Negev, ya nan babluy hinan aluhadhad di duntug ad Judah?”

8Ya innayun Apo Dios an ni'hapit ay ha"in an inalinay, 9“Mahapul an nahamad di atonyun munhumalya, ya ipattigyuy ama'ahhimo'yu ya nan ama'ma'ullayyun hinohha. 10Ya adiyu abohlan nan umu'utun, ya nan nguhu, ya nan bunag an ni'babluy ay da'yu, unu nan nun'awotwot, ya adi ayu munnomnom hi apa"ian di i'ibbayu. 11Ya ta"on hi un umat hinay inali'ali' hidin o'ommodyuh din penghana mu nginohoyda. 12Ya paddungnay unda impa'odhol di puhuda an umat hinan moheng an batu ta adida ahan donglon nan mitudtudun impehnag nan Lennawa' hidin numbino'ob'on an nun'ahhun an propeta. At hiyanan nidugah di bimmungta' ay dida. 13At dumalat nan agguyda nangunudan hinan inali' at Ha"in an Dios ya adi' goh donglon di luwaluda. 14Ya umata' goh hinan mabi'ah an puo' an nun'iwa'at'u didah nan adadagwin babluy an agguyda inila, at umatdah nan mangili. Ya din tinaynandan babluyda ya natawan, at mi'id ah umuy munle'le'od unu mundaldalan ti numbalin hi mapulun.”

Currently Selected:

Zechariah 7: NHAD

Highlight

Copy