Nahum 2
2
Hay Apogpogan nan iNineveh
1Ya ha"in an hi Nahum ya inali' goh di,
“Da'yun iNineveh ya mundadaan ayun mi'gubat ti na'uyda nan mangubat ay da'yu!#2:1 Bahaom nan footnote di Nah. 1:14 ta innilaom di ngadanda.
At mumpumbota' ayun amin hinan kalata ta hodonyuy umali,
ya guwalyaanyu nan allupyu!
2Ti hi Apo Dios ya ipabangngadnay a'e'gonan ad Judah ta umat hinan amaphod di Israel hidin hopapna
ti ad ugwan ya pina"iyuh din nunggugubatanyu,
at ninganuy an numbalin hi mapulun an ay adi mababluyan.
3Hanan buhulyun iNineveh ya ahibobollah di hapiawda,
ya umat goh hinan lubungda.#2:3 Manu ay mumbobollahda ti na"apnuy dalan di tagun nitapal.
Ya malita' an omela'elat nan gumo' an kalesadan punluganan di mi'gubat,
ya gunda eyela'elat goh din pahulda.
4Ya mumpupuddug nan kalesadah nan kalata an omela'elat nongkay
an umat hinan dilag ya nan ilat.
5At nun'ayagan din alid Nineveh nan u'upihyalna,
mu nun'ihubagday udum ti nunnaudondan immuy hinan allup ta mun'ammadah pananggada.#2:5 Nan iNineveh ya inyammaday damunan ala' an nele'woh hinan siudadda, ya 150 an umpiy inambilogna. Ya nan allup ad Nineveh ya waday himpulu ta leman ongol an pantawna, ya himpulu ta tuluy kilomitlu di lukud ten allup. Ya nan ni'gubat hinan iNineveh ya pinnudah nahhun nan ala' ta mapnu ya unda meheggon hinan allup.
6Mu naladawda ti nan pantaw hi appit hi wangwang ya nibughul,#2:6 Waday ohan nuntudo' hi historyn di i'Assyria, ya intudo'nah nan libluna an Babylonian Chronicles an impa'aan nan buhulda nan numbino'ob'on an ongol an batu an nanawan hi danum hinan Wangwang an Khoser ya Wangwang an Tigris an mumpa'uy hinan siudad ad Nineveh ta napa"i nan allupna, at hiya anuy nange'wan nan buhulda.
at numpangahigupda din buhulda.
At pina"ida din palasyu.
7Ya niyuldin an miyuy nan iNineveh hinan udum an babluy ta mibaluddah di,
at hiyanan din tatagalan binabai ya nun'ug'ugday boga'da,
ya ma'angngugngugda an umat hi alin di balug.
8At ad Nineveh ya umat hinan muntudun tangkin gun matdu' di danum hi nittu
ti numpangalayaw din bimmabluy.
Mu waday nun'ali an inalinay,
Adi ayu lumayaw!
Mu adida dongdonglon an undaat goh gun ipadeh.
9Ya muntu'u' goh din titindalun nan buhul an inaliday,
Adangyan heten babluy an do'ol di silver ya balitu',
at punhamham tu'un amin!
10At pimmuhid Nineveh ti mi'id mahkay din inadangyana,#2:10 Nitudo' hinan Babylonian Chronicles an hidin na'abakan ad Nineveh ya hinamham nan buhuldah di do'ol ahan an gina'uh di.
at hiyanan din tatagu ya wumogwogda,
ya numpanga'uphatdah ta'otda.
11Daad mahkay din babluyda
an nipaddung hinan layon an ta'tan din tataguh nan abablubaluy?
12Ti hidin hopapna ya umat hinan atata'ot an layon
an wada ay di dapoponah nan animal ya pinatoyna,
ya numbetadyana ta ipihdanah nan imbaluyna ya nan i'ibbana.
Ti manu ay ya do'ol din impibaludda an nalpuh nan udumnan babluy,
ya pinnuda goh nan babluydah din nahamham an gina'un nan udumnan tatagu.
13Mu hi Apo Dios an nidugah di abalinana ya alyonan da'yun iNineveh di,
Ha"in di buhulyu!
At punggohob'u nan kalesayun punluganan di mi'gubat,
ya numpatoy'u nan ungungan linala'in imbabaluyyuh nan way gubat!
Ya ta"on un din hinamhamyuh nan abablubabluy an ginubatyu ya ubaho',
ya mapogpog mahkay nan abalinanyu ti adi da'yu unudon hinan tatagu!”
Currently Selected:
Nahum 2: NHAD
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
