Micah 5
5
Nan Malpud Bethlehem an Nitulag hi Mumpapto'
1Ya ha"in an hi Micah ya alyo' ay da'yun i'ibba' an iJerusalem
ta amungonyu nan tindaluyu ta mundadaan ayu
ti awniat li'ubon ditu'uh nan buhul,
at abakon ditu'u,
ya ta"on un nan ali tu'un mumpapto' hitud Israel ya nidugah di abainana.#5:1 Nan Alin hi Zedekiah di angunuh an alid Judah ti napogpog nan numpapto'anah din 586 B.C., ya binulaw nan iBabylon hiya (II Ki. 25:7).
2Ya inalin Apo Dios di,
“Ya ta"on hi un umat hinay ma'at hinan aliyun iBethlehem ad Ephrathah hi ad ugwan
mu awniat mipabagtuh nen babluy
ti hidiy alpuwan nan Alin Pento"un Dios an mumpapto' ad Israel an holag din alih penghana.”
3Ya ha"in an Micah ya inali' goh di,
“Mu hi Apo Dios ya awniat iyokod ditu'un holag Israel hinan buhul tu'u ta engganah un mitungaw heden ali.
Ya hana ay mahkay an i'ibba tu'un inyuy di buhul hi udum an babluy ya umanamutda.
4Ya Hiyay mangipapto' ya manalimun hinan tataguna
an umat hi pumpapto' di mumpahtul hi kalniluna,
mu hay alpuwan di abalinanan mumpapto' ya hi Apo Dios an Diosna.
Hiya goh di alpuwan di anahamad di pun'ap'apuwana,
at malenggopda mahkay
ti an amin nan tataguh nan abablubabluy ya e'gonanday anabagtun Apo Dios.
5At immannung an Hiya mahkay di mangidat hi alenggopanda.”
Hay Ma'at hi Angunuhna
Ya inali' goh an hi Micah di,
“Wa ay ta gubaton ditu'uh nan i'Assyria#5:5 Hay kulugon nan udum ya hiya ya hi AntiKristun mangitnud hinan titindalunan mi'gubat hinan Hudyuh nan godwan di gutud nan Punligatan di Tatagu (Ezek. 38:1-39:29). an pumpa"ida nan nun'ihamad an a'abung tu'u
ya inhangga tu'u nan mun'abi'ah an a'ap'apun mangipangulun ditu'u.
6At abakon nan mun'abi'ah an tindalu tu'u dida
ta diday mihukat an mumpapto' hi ad Assyria,
ya ibaliw ditu'uh nan pangubatan nan i'Assyria ay ditu'u.
7Ya nan na'angang an i'ibba tu'un holag Israel an niwa'at hinan abablubabluy an hakup di Hentil
ya umatdah nan dulnun nalpun Apo Dios,
ya umatda goh hinan apu' an udan an manebnah nan nitanom ya nan holo'.
Ya bo'on mahkay nan taguy pangiyokodanda ti hi Apo Dios.
8At middumdah nan tataguh tun luta,
mu mun'abi'ahdan umatdah nan layon hinan inalahan.
Ya paddungnay diday imbabaluy di layon hinan awadan di do'ol an kalnilu
an namaag ya numpudugda dida,
ya numpatoyda ti mi'id di mangibaliw ay dida.#5:8 Hay ituduna nin ya nan anidugah an pangabakan nan Hudyuh nan titindalun AntiKristuh nan angunuh di Punligatan di Tatagu.
9At umatdah na nan i'ibba tu'un holag Israel
an abakondan amin nan buhulda!”
10Ya inalin goh Apo Dios di,
“Henen gutud ya ubaho' an amin nan kabayuyun puntakayanyun mi'gubat,
ya pumpa"i' goh nan kalesan punlugananyun mi'gubat.
11Ya pumpa"i' nan babluyyu an ta"on un nan nun'ihamad di allupna,
12ya ubaho' goh an amin nan mumpun'utung
ya nan mumbabbaag hi ma'ma'at hi udum di algaw.
13Ya pumpa"i' nan pina'tanyun bulul ya nan batu
ta mapogpog di pundayawanyuh nan inyammayu,
14ya ta"on un nan bululyu an hi Asherah.
Ya pumpa"i' nongkay goh nan babluyyu
15ti nidugah di bungot'u,
at iballoh'uh an amin hinan tatagun agguy nangunud ay Ha"in.”
Currently Selected:
Micah 5: NHAD
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
