Micah 2
2
Hay Pumbalinan nan Pamilupiluh hinan Nun'awotwot
1Ya ha"in an hi Micah ya inali' goh di,
“Nan tatagun tumu'al an mumplanuh atondah nappuhi ya mahmo'da!
Ya hinan mabiggat hi bumangunanda ya inatda nan implanuda
ti hiyah ne an implanuda ya abalinandan aton.
2Ya wada ay di lutah amnawanda ya nonong ya hinakupda,
ya wada ay goh di abung hi amnawanda ya un nonong ya penlohda.
At un nonong ya nunhamhamda nan gina'u ya tawid nan i'ibbada!”
3At inalin Apo Dios di,
“Idadaan'uy nidugah hi punligatanyun tatagu ta mi'id ah melwang ay da'yu,
at mapogpog nan panaldalanyun mumpahiya ti hiyah ne gutud di punligligatan.
4At henen a'atana ya ikankantan di buhulyuy paneldeladan da'yun alyonday,
Nidugah ahan di nummoltan Apo Dios ay dida!
Ya penlohnay lutada ta indatnah nan namalud ay dida.
(Mu un hanulda.#2:4 Nan munhanul ya nan i'Assyria an mangabak ay didah pidwa.)”
5Ya ha"in an hi Micah ya inali' di,
“Henen algaw hi pangipabangngadan Apo Dios hinan tatagunah nan babluyda
ya mi'id di midat hi tawidyu#2:5 Hay pangibaagan Micah ya nan Hudyun mamaligat hinan i'ibbadan Hudyu. an anggay nan tataguna.”
Nan Nibahhaw an Propeta
6Ya inalin nan mumpunlayah an propetan ha"in di,
“Ammunah nen gunmu ipa'innila!
At adim hapiton hanan amin ay da'mi
ti immannung an adi iyabulut Apo Dios di abainanmi!”
7Mu inali' ay diday,
“Undan hi Apo Dios di numbalin hi buhul nan holag Israel ta iyabulutna hanan ma'at?
Gadya an waday hapiton Apo Dios ay da'yun inalinay,
Undan agguyyu inilan maphod di ato' hinan tagun mangat hi maphod?
8Da'yu ahan di numbalin hi buhul nan tatagu' an bo'on Ha"in!
Ti innalyu nan lubungdan pamatangdah nan bennohdan pihhun da'yu,
ya umat ayuh nan mangakaw
ti ini ya adiyu ibangngad nan innalyun lubungdah nan gutud di pangibangngadanyu!
9Gadya an pumpakakyu goh nan binabain nan tatagu' hinan ma"aphod an nunhituwanda,
ya penlohyu nan imbabaluyda an nan wagah'un didah mid pogpogna!#2:9 Hay wagahda kuma ya nan biyangdan mumpunhitud Israel ya ad Judah, ya nan biyangda goh an mumpundayaw ay Apo Dios hinan Timpludad Jerusalem.
10At mala"uy ayu ta makak ayu!
Ti bo'on heten lugal di pun'eblayanyu ti paddungnay linugityu,
at nun'apa"i an dumalat nan baholyu!
11Ya gulat ta umali nan munlayah an propetan bumalbali ta alyonan da'yuy,
Ipa'innila' an mawaday do'ol hi bayahyu!
Gadya an nan umat hina an propetay pohpohdonyu!”
Hay Pangamungan Apo Dios hinan Holag Israel ta Baliwana Dida
12Ya inali' an hi Micah di wada pay di hinapit Apo Dios ay ditu'un inalinay,
“Amungo' damdama da'yun amin an holag Israel an na'angang an din nipiyuy hi udum an babluy,
ta umat hinan kalniluh nan kolal an malammung.
At dumo'ol ayuh nan babluyyu.
13Ya paddungnay ibughul Apo Dios di pantaw nan babluy ta hiyay pange'wan tu'u.
At Hiya an Ali tu'u ya ipangulu ditu'u ta mumbangngad tu'uh nan babluy tu'u.”#2:12-13 Itududay ma'at hinan Hinlibuy Tawon.
Currently Selected:
Micah 2: NHAD
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
