Lamentations 4
4
Hay Nahumalyaan di Tatagud Jerusalem#4:1-22 Hay nahhun an letrah nan nahhun an verse ten chapter ya nete"ah nan letra an A hinan alphabet di Hudyu, ya hay te"an nan netob an verse ya B, ya minaynayun nan umat hinan aat di ma'at hinan hinohhan verse ta engganah negpongan nan letrada an taw. Ya un duwampulu ta duway letrada ya anggay.
1Mipaddung nan tatagud Jerusalem hinan timmiban balitu' an adi mahkay munletaa',
ya umatda goh hinan nun'abalul an batun nun'iwa'atdah nan kalata.
2Ya danen tatagud Jerusalem ya mipaddungdah din hopapnah nahamad an balitu',
mu anakkayah di na'at ta ad ugwan ya mipaddungdah nan lutan bangan inyamman di tagu!
3Nan animal an jakal#4:3 Umat hinan atap an ahuh nan inalahan. ya ipapto'nan iduulan nan bunun an imbaluyna,
mu nan i'ibba' an tatagud Judah ya numbalindah ma'abbungot
an umatdah nan ostrich#4:3 Umat hinan hamutiy tigawna, mu o"ongol an hay anata'nangna ya nipaddung hinan ongol an uyaw an baka. an wah nan mapulun an inganuynay imbaluyna.
4At nan ung'ungungnga atog ya mun'ep'ot di diladah nan tangngutangnguda an dumalat di inuwawda,
ya mumbagada atog hi ononda,
mu mi'id di mangidat.
5Ya nan adadangyan an mun'aphod di tanudda ya lubungdah din hopapna
ya numbalinda goh damdamah mahmo' an mi'id di ononda,
ya un nonongan nolo'dah nan hupu'.
6Ti nidugdugah di moltan nan i'ibba' an tatagud Judah ya un nan moltan din tatagud Sodom
an un namengpenghan di nama"ian Apo Dios ay dida,
ya mi'id di bimmadang.
7Ya din a'ap'apud Jerusalem ya mun'aphod di tigawda
an ma"appaha' ya un nan gatas,
ya mun'ahdol di odolda,
ya mun'abi'ahda.
8Mu ad ugwan ya numpangangititda ya un nan uleng,
at mi'id ah ohah mangimmatun ay dida.
Ya nan up'upda ya nun'iyamit hinan tungalda,
ya na'ammaganan an umat hinan gudah di mamagan ayiw.
9Od'odolna din nun'atoy hinan gubat ya un nan mun'atoy hi batel
ti ma'ahinutdan mun'atoy an dumalat hinan ami'id di ononda!
10At nidugah ahan din nunholholtapanmi,
at hiyanan ta"on un nan ma'ahhimo' an binabai ya nun'ihaangday imbabaluyda ta nun'a'anda
an dumalat di ami'id ahan di ma'an.
11At impale'nan Apo Dios di nidugah an bungotnan dida
hi namuulanad Jerusalem ta engganah un numbalin hi dapul.
12Mu nan tataguh tun luta an ta"on un nan a'ali ya hay inilada
ya adi mabalin an hogpon di buhul nan babluy ad Jerusalem.
13Mu na'at damdama ti dumalat nan numbaholan hanan propeta ya nan papadi
ti impapatoyday tatagun nepto' di pangatdan den babluy an mi'id ah baholda.
14At ad ugwan ya hanan propeta ya papadi ya adida pa'anamuton dida,
at ta"on un hay panapaan ay dida ya paniaw ti nibilangdah pimmatoy
an dumalat di nangipapatayandah nan tatagu.
15Ya pun'it'u' nan tatagun alyondan diday,
“Mun'akak ayuh tu an da'yun tatagun umat hina,
ya adi nginin di umuyyu dapoon!”
At umat hinay na'at an amin hinan babluy an immayanda an punhunihun di tatagu dida
an mi'id di mangipahi'um ay dida.
16At hay inat Apo Dios ay daden papadi ya nun'iwa'atna didah nan abablubabluy
an agguyna mahkay impapto' dida,
ya ta"on un nan tatagu ya agguyda ene'gonan dida,
an ta"on un din nun'ala'ay an papadi ya agguyda hemmo' dida.
17Ya la'tot ya himmiga ami mahkay an nanannod hinan babluy an inhoghogdananmin bumadang,
mu mi'id di abalinandan mangibaliw ay da'mi.
18Ya bebenta' da'mih nan buhulmi,
at hiyanan agguy ami nundaldallanan ti wah didan mamannod an mamatoy ay da'mi.
19Ya danen buhulmi ya nidugah an mabi'bi'ahda ya un nan aton di agilan tumayap ad daya.
Ti ta"on un hinan aduntuduntug ya numpudug da'mi,
ya benta' da'mi goh hinan mapulun.
20Ya din alin pento' Apo Dios#4:20 Nan Alin hi Zedekiah. an hiyay mabalin hi bumadang ay da'mi ya inlayawda,
ya wan hay inilami ya hiyay mangibaliw ay da'mih nan udum an babluy.
21At da'yun holag Edom hi ad Uz ya agayu ta umamlo'amlong ayud ugwan!
Mu gulat at, ya adi ayu umamlong ti nan na'at ad Jerusalem ya hiya goh di ma'at ay da'yu
an pumbalinon da'yun Apo Dios hi umat hinan nabutong an nabladan ta abainanyu.
22Mu ditu'un iJerusalem ya mapogpog mahkay nan pummoltan Apo Dios ay ditu'u
ta mumbangngad tu'u mahkay hinan babluy tu'u.
Mu da'yu ay an holag Edom ya moltaon da'yun Apo Dios
an dumalat nan numbaholanyu ta mipattig an nappuhi ayu.
Currently Selected:
Lamentations 4: NHAD
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
