Ezekiel 30

Hay Pummoltaan Apo Dios ad Egypt

1Inalin goh Apo Dios ay ha"in di, 2“Ezekiel, agam ta ipa'innilam tun ibaga' ay he"a ta alyom di,

Inalin nan na'abbagbagtun Dios di,

Magadyuh man an madatngan han atata'ot an ma'ma'at!”

3At ha"in an hi Ezekiel ya alyo' an manu ay umat hinay inalin Apo Dios

ti nadatngan mahkay nan gutud an apa"ian di abablubabluy,

at mi'id ahan di namnama tu'uh nan umat hina.

4Ti waday umalin mangubat ad Egypt ta pumpatoyday udum ay dida,

ya nun'aladay inadangyanda,

ya numpa"ida nan babluy hidi.

At nan i'Ethiopia ay ya nunheglay tuma'tandah pangngolandan nen ma'at hinan i'ibbadad Egypt.

5Ya ta"on hi un nan nalagbuan an titindalun di i'Ethiopia, ya iLibya, ya iLydia,#30:5 Ohan babluy ad Africa. ya i'Arabia, ya umat goh hinan i'ibbamin titindalun holag Israel ya mun'a'atoydan den gubat.

6Ti inalin tuwalin nan na'abbagbagtun Dios di,

“Hanan bumadang hinan i'Egypt ya mun'a'atoydah gubat

an mete"ad Migdol hi engganad Aswan.

At adida mahkay mumpahiya.

7At heten babluy ad Egypt ya nidugdugah di apa"iana

ya inganuyana ya un nan udum.

8Ya iyabulut'un hi Apo Dios an puulandad Egypt,

ya ipapatoy'u nan malpuh udum hi babluy an bumadang nongkay ay dida.

At hiyay panginnilaanda an Ha"in di immannung an Dios.

9Ya waday honogo' an munlugan hi pupul an umuy mangibagah nan i'Ethiopia ta adida mange'el. Ya hitun amoltaandad Egypt ya nunheglay ta'otda.

10At Ha"in an nan na'abbagbagtun Dios

ya honogo' nongkay nan alid Babylon an didah nan titindaluna

ta umuyda gubaton ad Egypt ta pumpatoyda nan tataguh di,

ya nun'alada nan inadangyanda.

11At awalitang di mun'a'atoy hi pangatda,

ya ta"on hi un nan babluy ya pumpa"ida.

Ti da Nebuchadnezzar ya nan titindaluna ya nundongol di aatda tuwalin mun'abungot.

12Ya tud'o' nan Wangwang an Nile,

ya impaboltan'u nan babluy ad Egypt hinan malpuh udum hi babluy an nappuhiy pangatda.

At pumpa"i' nongkay henen babluy ya an amin nan wah di ta mumbalin ad Egypt hi mi'id di hulbina.

Ha"in an hi Apo Dios di nanapit ete.”

13Ya inalin goh nan na'abbagbagtun Dios di,

“Pumpa"i' an amin nan inyamman di tagun dayawondad Memphis#30:13 Hiyay kapitulyuh nan ohan provinciad Egypt. an hakup ad Egypt,

ya mi'id mahkay di mun'ap'apun dida.

Ya nunheglay ta'ot nan tataguh di.

14Ya pa"io' ad Pathros an wah appit hi iggid did Egypt,

ya pinuula' ad Zoan an din kapitulyudad Egypt hidin hopapna.

Ya pa"io' goh ad Thebes#30:14 Hiyay oha goh an kapitulyuh nan ohan provinciad Egypt, ya hay ngadanad ugwan ya Luxor. an oha goh an babluy ad Egypt,

ya impapatoy'u nan tataguh di.

15Ya umat goh an pa"io' ad Pelusium an ihi'uganda

ti hidi ya nahamad di allupnan babluy ad Egypt.

16At umat hinay ma'at an puula' ad Egypt,

ya punholholtapo' nan iPelusium,

ya pa"io' nan nahamad an na'allup an babluy ad Thebes,

ya patata'to' nan iMemphis.

17Ya hanan ungungan linala'in nunhituh nan udum an babluy ad Egypt

an umat hinan iHeliopolis ya iBubastis#30:17 Hay punhituwanda ya ohan kapitulyuh nan ohan provinciad Egypt. ya mun'a'atoydah gubat,

ya hanan ma'angang ya miyuydah udum an babluy.

18Ya hay apa"ian ad Tahpanhes ya paddungnay humelong nan babluyda

ti mi'id mahkay di namnaman nan i'Egypt ti miyuydah udum an babluy.

19At umat hina goh an moltao' nan i'Egypt

ta panginnilaanda nongkay an Ha"in nan immannung an Dios.”

20Hidin miyapitun algaw hinan hopap di bulan eden miyapulu ta ohan tawon#30:20 Unu hidin April 29, 587 B.C. hi niyayanmid Babylon ya inalin goh Apo Dios ay ha"in di, 21“Ezekiel, inilam an paddungnay inipung'uy ta'lay nan alid Egypt.#30:21 Hay ipa"elna ya nan nangabakan nan iBabylon hinan tindalun nan Alin hi Hophra ad Egypt hidin 588 B.C. Ya paddungnay mi'id di nan'up ta way atonan mapoyanan ta way atona goh an mangdon hinan hanggapna. 22At Ha"in an na'abbagbagtun Dios ya mi'buhula' hinan alid Egypt ta ipungo' goh nan ohan ta'layna ta mi'id di atonan mangdon hinan hanggapna. 23Ya pun'iwa'at'u nongkay nan i'Egypt hinan abablubabluy hitun luta. 24Ya nan alid Babylon#30:24 Unu nan Alin hi Nebuchadnezzar. ya pabi'aho' ta ipadon'un hiya nan hanggap'u. Mu henen alid Egypt ya paddungna nongkay di pun'ipung'u nan duwan ta'layna ta mundamuda ay hi gubat ya un nonong ya un pumalapala' ti mi'id di abalinanan mangdon hinan hanggapna. 25Ya pabi'aho' nongkay nan alid Babylon, ya impadon'un hiya nan hanggap'u ta usalonan mi'gubat hinan alid Egypt an mid di abalinana. Umat hinay ato' ta panginnilaandan Ha"in nan immannung an Dios. 26Ya pun'iwa'at'u nongkay hinan abablubabluy nan i'Egypt ta panginnilaandan Ha"in nongkay di immannung an Dios.”

Currently Selected:

Ezekiel 30: NHAD

Highlight

Copy

Compare