Ezekiel 27
27
Hay Miyebel ad Tyre
1Inalin goh Apo Dios ay ha"in di, 2“Ezekiel, eyebelmu ni' nan meyebel hi ad Tyre an dumalat nan ma'at enen babluy 3an buhhu'an an umuy hinan baybay an pungkumilduan di abablubabluy an alyom di,
Da'yu an iTyre ya alyon Apo Dios di ipahiyayu anuy
amaphod nan numbabluyanyu.
4An gapu ta mapmaphod di niyamman nan babluyyu
an umat hinan ma"aphod an pupul an wah nan gagwan di baybay
5ti hay dedengna ya bolbol an nalpuh nan Duntug an Hermon,
ya hanan tu'ud an nigagwah nan pupul ya cedar an nalpud Lebanon.
6Ya hana ay an punggaudyu ya hay niyamma ya nan ayiw an oak an nalpud Bashan,
ya nan dotal di pupulyu ya nan ayiw an cypress an na'al'altian hinan ivory#27:6 Hiyah ne ha'gud di elepante. an nalpud Cyprus.
7Ya hana ay goh han naboldaan an linen an nun'itayun an halapan di pupulyu
ta bumadang an mangitulud hinan pupul ya nalpud Egypt.
Ya hana ay goh an punlidumanyun paddungnay bantilayu
an hay niyamma ya nan nun'anginan lo'ob an munggudla#27:7 Unu purple. ya mumpugagaw#27:7 Unu blue.
ya nalpuh nan pingit di baybay ad Elishah.#27:7 Ohan babluy ad Cyprus.
8Ya hana ay an punggaggaudonyuh nan pupulyu ya nan i'ibbayun iSidon, ya i'Arvad,#27:8 Daten duwan siudad ya ad Phoenicia goh an umat hi awadan ad Tyre.
ya hay mangimunihuh nan pupulyu ya nan i'ibbayun iTyre.
9Ya inawityu nan i'ibbayun iGebal#27:9 Unu ad Byblos an oha goh an siudad ad Phoenicia. ta wada ay di napa"ih nan pupul ya impaphodda,
ya an amin nan mumpumbiyahin pupul ya umalidan luma'uh nan ila'uyu.
10Ya nan titindaluyun numpunhapiaw ya numpunhelmet
ya nalpudad Persia, ya ad Lydia,#27:10 Ohan babluy ad Asia (unu ad Turkey). ya ad Libya ta diday mangibaliw ay da'yu.
Ya pun'ihabluyda nan helmetda ya hapiawdah nan allupyu,
at ma"aphod di tigawna.
At gapun dida ya nundongol di aatyuh nan abablubabluy.
11Ya hana ay goh an guwalyayu ya nalpudad Arvad ya ad Helek#27:11 Unu ad Cilicia (unu ad Turkey).
an diday mungguwalyah nan allup ya nan pantaw di allup di babluyyu.
Ya hana ay goh an nalpud Gammad#27:11 Mid nanginnilad ugwan hi awadan ten siudad. ya diday mungguwalyah nan ata'nang an abung an pun'adugan.
Ya nun'ihabluyda goh nan hapiawdah nan allup,
at inyal'allanan ma"aphod di tigaw nan babluyyu.
12Ya nan iTarshish#27:12 Unu nan iSpain. an umalin luma'uh nan ila'uyu ya hay pamayadda ya silver, ya gumo', ya lata, ya nan purbura.#27:12 Unu lead hinan hapit di mumpaha'.
13Ya nan iGreece, ya iTubal,#27:13 Unu nan iPontus (unu nan iTurkey). ya iMeshek#27:13 Hay punhituwanda ya ad Moschian Mountains an wad Asia (unu ad Turkey). ya hay pamayadda goh ya hay himbutda, ya nan gina'udan gambang di niyamma.
14Ya hay ibayad ay nan iBeth Togarmah#27:14 Unu nan i'Armenia. ya kabayu an mabalin an muntamu, ya nan kabayun ma'usal hi gubat, ya nan alyondan mul#27:14 Bahaom nan footnote di I Ki. 10:25. an kabayu goh.
15Ya ta"on hi un nan iRhodes#27:15 Numpunhitudah nan islah nan baybay an neheggon ad Asia (unu ad Turkey). ya nan bimmabluy hinan pingit di baybay ya luma'udan da'yu an hay pumbayadda ya hay ba'git di elepante an ma'alih ivory ya nan ma'ulhin ayiw.
16Ya nan i'Aram#27:16 Unu nan iSyria. ya pun'iyalida nan nun'abalul an batu, ya nan mun'aphod an lo'ob an mumbolah, ya nan nun'aboldaan an lo'ob, ya umat hinan nun'abalul an batun ma'alah baybay an coral#27:16 Hiyay batuh nalpud dolom hinan baybay. ya nan ruby#27:16 Hiyay mumbolah an nanginan batu. ta ihukatdah nan ila'uyu.
17Ya ta"on hi un nan iJudah ya nan i'Israel ya hay ihukatdah nan ila'uyu ya nan wheat an nalpud Minnith, ya nan danum di iyu'an, ya nan kindi, ya nan lanan olibo, ya nan mumpabangluh ma'an.
18Ya hay pumbayad ay goh nan iDamascus#27:18 Didanay numpunhituh nan kapitulyud Syria. hinan alandan ila'uyu ya nan ma'inum an malpud Helbon#27:18 Ohan babluy ad Syria. ya nan dutdut di kalnilu an malpud Zahar.#27:18 Ohan babluy ad Syria.
19Ya nan mumpungkumildun holag Dan an didah nan iGreece an malpud Uzal#27:19 Mid mapto' ya ad Yemen. ya luma'udah nan ila'uyu an hay pumbayadda ya nan pumpabangluh ma'an#27:19 Umat hinan cinnamon ya calamus. ya nan nabohal an gina'u.
20Ya hay pumbayad ay goh nan iDedan#27:20 Diday ohan tribon numpunhitud Edom. hinan alandan ila'uyu ya nan uloh an miyap'ap hi bonog di kabayu.
21Ya hay ihukat ay goh nan i'Arabia an didah nan i'ibbadan a'ap'apud Kedar#27:21 Nan numpunhituh nan tuldan abung hinan mapulun ad Arabia. ya nan uyaw, ya nan manilhig an kalnilu, ya gandeng.
22Ya hay pumbayad ay goh nan iSheba#27:22 iYemenda. ya iRaamah#27:22 Didanay numpunhituh ohan siudad ad Arabia. ya nan nun'abalul an batu an umat hi balitu' ya nan mun'aphod an pumpabangluh ma'an.
23Ya ta"on un nan iHaran,#27:23 Didanay numpunhitud Mesopotamia. ya iKanneh,#27:23 Mid nanginnilad ugwan hi nunhituwanda. ya i'Eden,#27:23 Didanay numpunhitud Mesopotamia, mu bo'on nan Galden an Eden di awadanda. ya iSheba, ya i'Ashur,#27:23 Didanay numpunhituh nan ohan siudad ad Assyria, ya henen babluyday nalpuwan nan ngadan di nasyonda. ya iKilmad#27:23 Mid nanginnilad ugwan hi babluy hi nunhituwanda. an mumpungkumildu ya 24pun'iyalida goh di mun'aphod an lo'ob an munggudlay kolol di udum, ya naboldaan di udum, ya nan abo' an numbino'ob'on di kololna, ya nan nun'ahamad an tali.
25Ya hay pumpangilugananyuh nan do'ol an ila'uyu ya nan pupul di iTarshish,
ya nipaddung nan babluyyun ten pupul an napnuh gina'u.
26Mu hidin awadanyuh gagwana ya paddungnay umali nan mabi'ah an puo',#27:26 Hay ipa"elna ya nan Alin hi Nebuchadnezzar ya nan titindaluna.
ya pina"ina nan pupul an nilugananyu.
27At an amin ayun paddungnay ni'lugan hinan pupul an titindalu,
ya kalpentelo,
ya nan mumpungkumildu,
ya ta"on hi un nan mumpummunihuh nan pupul ya paddungnay mumpunlonong ayu.
Ya paddungnay munlonong hinan baybay nan do'ol an nun'abalul an inadangyanyun wah nan pupul.
At umat hinay ma'at hinan babluyyu.
28At paddungnay mun'alawaaw di tu'u'yun mumpunlonong
an ay ihunay umalyog nan pingit di baybay.
29At nan mumpuntamuh nan udum an pupul ya puntataynanda nan pupulda
ta mumpapanguydah nan pingit di baybay ta amangondah nen ma'at ay da'yu.
30At dumalat enen ma'at ay da'yu ya pun'it'u'day kilada,
ya pun'iloglogday hupu' an gunda mumpunlapug hinan dapul.
31Ya pummukmukanday uluda,
ya numpunlubungdah langgut
ti nidugah di punlungdayaandan nen ma'at ay da'yu.
32Ya umayadyo'dah nan ma'at ay da'yu an alyonday,
Mi'id di mipaddung hi amaphod nan babluy ad Tyre,
mu namengpenghan an na'umah hinan baybay!
33Do'ol din impa'amlongyun mumpungkumildu,
ya do'ol din impa'adangyanyun ali an dumalat nan mun'aphod an ila'uyu.
34Mu ad ugwan ya napogpog ayu an paddungnay nilubu' ayuh bunol di baybay,
ya an amin nan inadangyanyu ya ta"on hi un nan puntamuonyu ya ni'lubu'dan da'yu.
35At awniat manoh'a nan bimmabluy hinan pingit di baybay enen ma'at ay da'yu.
At ta"on hi un nan alida ya ma"attig hi angahda
an nidugah di tuma'tandah pangngolandan nen ma'at ay da'yu.
36Ya umat goh hinan mumpungkumilduh nan abablubabluy
an nidugah di tuma'tandah nan ma'at ay da'yu.
Umat hituy ma'at ay da'yu ta apogpoganyu nongkay an iTyre.”
Currently Selected:
Ezekiel 27: NHAD
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
