Ezekiel 21

Hay Pummoltan Apo Dios ad Judah

1Palpaliwan ya inalin goh Apo Dios ay ha"in di, 2“Ezekiel, hagangom ad Jerusalem ta ipa'innilam nan nappuhin ma'at hinan pundayawandah di ya ta"on hi un nan ma'at hi an amin an babluy hidid Judah. 3At alyom hinan i'ibbam hidid Judah an Ha"in an Dios ya mi'buhula' ay dida. At ten hinu'nut'u tun hanggap'u#21:3 Hay ipa"elna ya nan Alin hi Nebuchadnezzar ya nan titindaluna. an pamatoy'un dida an ta"on hi un nan maphod di ugalida. 4At patayo' didan amin an ete"a' hi appit hi agwan hi un hagangon di buhu'an di algaw hinan numbabluyanyu ta engganah appit hi iggid hi un hagangon di buhu'an di algaw. 5At innilaon an amin nan tataguh nan abablubabluy an Ha"in an Dios ya hinu'nut'u ay nan hanggap'u ya adi mabalin an meh'ot ta engganay un malpah nan a'usalana.

6At hiyanan ngumugngug'a ni', Ezekiel, an dumalat di punlungdayaam ta ipattigmuy anidugah ahan di punha'itan di punnomnomam. 7Ya wa ay ta hanhananday dumalat hi ngumugngugam ya alyom ay dida an dumalat di nanginnilaam hinan atata'ot an ma'at. Ti hay a'atan hana ya ta"on hi un hanan nun'atulid ya lumungtuydah ta'otda, ya mun'a'ulawda, ya wumogwogda, ya mi'id di bumadang ay dida. Ya adi madnoy at ma'at hanan inali' an na'abbagbagtun Dios.”

8Ya inalina goh ay ha"in di, 9“Ezekiel, ipa'innilam hinan tatagun alyom di,

Inalin Apo Dios di wada anu han nidadaan an nahait

ya malita' an hanggap.

10At henen hanggap ya nihamad an nahait,

at ay ilat di atonan pumatoy hi tatagu!#21:9-10a Hay kulugon nan udum ya hiyah ne kantan nidehhan an ikantan ya itayaw nan tindalu ya unda umuy mi'gubat.

At mid ahan di umamlong hi umat hina,

ya manu ay umat hinay ma'at ti nginohoyda din inali'.

11Ya nihamad an nahait ya malita' nongkay henen hanggap,

at matadom hi pamatoy nan pumatopatoy.

12At he"a, Ezekiel, ya oltom an kumila,

ya nun'ug'ugmuy palagpagmu ta ipattigmu nan nidugah an punlungdayaam

ti hanan hanggap ya nidadaan nongkay ta pamatoy'uh nan i'ibbam an tatagu'

ya ta"on un nan a'ap'apuyu.

13Ti magadyuh di pamadaha' hinan tatagu' ta adida ay muntutuyu at umannung an ma'at an amin hana. Ha"in an na'abbagbagtun Dios di nanapit ete.

14At he"a, Ezekiel, ya ipadanmu hatun ma'at hinan tatagu.

Ya timmalpu'a,

ya innalmu nan hanggap,

ya impidwam an pun'ipagit,

ya ta"on hi unmu ipitlu.

Ti henen hanggap ya un hay panglot ya atata'ot an hanggap,

ya do'ol di patayona.

15At nidugah an mumpunlungtuydah ta'otda,

at mi'id di namnamada.

Ti ta"on hi un malgom hinan pantaw di allup di pangipluyanda

ya wah di nan hanggap an nidadaan an mamatoy ay dida

an ay ilat an mun'ennewel.

16At mipagit hi numpinangngel

ya hinan malgom an idongdongana.

17Ya na'at ay hana,

ya ta"on hi un Ha"in ya tumalpu'a'

ya ma'udyaan mahkay di bungot'u.

Ha"in an Dios di nanapit ete.”

Nan Hanggap di Alid Babylon

18Inalin goh Apo Dios ay ha"in di, 19“Ezekiel, iyammam di pangimmatunan hinan duwan kalata an pange'wan nan alid Babylon ta iniladay pangipluyandah nan titindaluna eden nunhappangan nan kalata. 20At iyammam di pangimmatunan nan alih#21:20 Nan Alin hi Nebuchadnezzar an nun'alid Babylon hidin 605-562 B.C., mu immuy ad Rabbah an kapitulyud Ammon (II Ki. 25:6). nan mipluy ad Ammon hinan babluy ad Rabbah. Ya iyammam goh di pangimmatunan hinan mipluy hi ad Jerusalem an ohan babluy ad Judah an na'allup, 21ta wa ay ta dumatong nan alid Babylon hinan way nunhappangan di kalata ya indinongna ta tobotbalona nan bululna, ya hamadonay akbun nan ne'nong an animal ta innilaonay pangipluyana. 22Ya la'tot ya din namalkaan hi Jerusalem di binunutna, at hidiy nangipluyanda. At immuyda nunlongoh nan o"ongol an a'ayiw ta way inusaldan nangitulud hinan pantaw di allup hidi, ya nuntababdah pito' nan allup, ya nun'ammadah toytoy hi pange'wanda. At wa ay ta it'u' nan alih hogponda ya nalakah humgopanda ta pumpatoyda nan tataguh di. 23Mu nan iJerusalem ya adida kulugon nan nipa'innilan ma'at ay dida ti hay inilada ya maphod di niddumandah nan iBabylon. Mu ma'at hatu ta nomnomonda nan numbaholanda. At gubatonda dida ta mumbalin nan udum ay didah balud ad Babylon.

24At hiyanan inali' goh an Dios di, Nibahhaw an amin nan pangatyu, at hiyanay attiganan nidugah di baholyu. Ya gapu ta nun'appuhi nan gunyu aton at iyabulut'un mumbalin ayuh balud hi udum an babluy.

25Ya ta"on hi un he"an alih tud Judah#21:25 Nan Alin hi Zedekiah an nun'alid Judah (597-586 B.C.). ya nadatngan mahkay di amoltaam. 26At anom nan inyuklupmu ya nan enepngotmuh ulum ti naluman an amin di logom. Ti nan nun'a'ampan tagu ya diday mipabagbagtu, ya nan nun'abagtu ya diday mipa'ampa. 27Ya heten babluy ad Jerusalem ya minaynayun di apa"ianah engganah un umali nan pento"un mun'ap'apu#21:27 Hi Jesu Kristu. ya un'u ipaboltan ay Hiya ta Hiyay okod hi atona.”

Hay Ahumalyaan nan Holag Ammon

(Ezek. 25:1-7; Jer. 49:1-6; Am. 1:13-15; Zeph. 2:8-11)

28Ya inalin Apo Dios ay ha"in di, “Ezekiel, ibaagmu nan ma'at hinan holag Ammon an gun mamaibain ay da'yun holag Israel ta alyom ay diday,

Wada han ohan hanggap#21:28 Hay ipa"elna ya nan Alin hi Nebuchadnezzar ya nan tindaluna. an na'ahhait ya humilin umela'elat

an ay ilat an nidadaan an mamatoy ay da'yu.

29Ti adi makulug nan ena'enaponyu ya nan gunyu ipa'innila.

Nidugah di anappuhiyu,

at ten nadatngan di amoltaanyu an nan apatayanyu.

Ya hay hanggap di usalo' an mumpamatoy ay da'yu.

30Ya ipabangngadmun eh'ot nan hanggap

ta humalyaon da'yuh nan babluy an nitungawanyu.#21:30 Agguy impiyuy Nebuchadnezzar nan i'Ammon ad Babylon an adi umat hinan impa'atnah nan Hudyu, at nun'atoy nan i'Ammon hi babluyda tuwali.

31Ya ipa'dam'un da'yu nan nidugah an bungot'un ay apuy an gumelageladaw,

ya idat'un da'yuh nan mun'abungot ya nangipa'enghan pumatoy.

32Ya gohbon da'yu ta mun'atoy ayuh nan numbabluyanyu,

ya mi'id di munnomnom ay da'yu ti Ha"in an Dios di nanapit ete.”

Currently Selected:

Ezekiel 21: NHAD

Highlight

Copy

Compare