Lukas 9
9
Nabi Isa mautus kaduablas urang pangikut Sidin.
9:1-6
1-2Wayah itu, Nabi Isa manyuruh kaduablas urang pangikut Sidin bakumpul lalu Sidin baucap,
“Nah, dangarakan baik-baiklah, bubuhan ikam Kusuruh tulak ka kuta-kuta lain, bubuhan ikam Kutugasakan mahabarakan kadatangan karajaan Allah, wan Kubari kuasa sakira kawa manyuruh ruh-ruh jahat bajauh, wan jua Kubari kuasa sakira kawa maampihi urang-urang nang bapanyakitan.
3“Amun bubuhan ikam tulakan kaina, kada usah mambawa tungkat, kada usah mambawa kadut, kada usah mambawa makanan, kada usah mambawa duit, atawa baju tilasan. Pokoknya kada usah basangu napa-napa. 4Amunnya kaina di kuta tu, ada warga nang hakun manarima bubuhan ikam, bubuhan ikam bagana ja di situ sampai tuntung napa nang kutugasakan lawan bubuhan ikam. 5Tagal amun bubuhan ikam kada ditarima di kuta tu, lalui haja kuta nang itu. Kibasakan haja dabu nang ada di salawar bubuhan ikam. Itu cirinya Allah cagar mahukum warga kuta tu lantaran kada hakun manarima utusan Allah.”
6Lalu tulakan ai bubuhannya malaksanakan tugas napa-napa nang diparintahakan Nabi Isa tadi.
Raja Hirudis pusang banar lantaran mujijat-mujijat tadi.
9:7-9
7Wayah itu, Raja Hirudis, nang bakuasa di banua Galilea, marasa pusang banar ada baidabul masalah mujijat-mujijat nang itu. Ada nang manyambat Nabi Yahya sudah hidup pulang. 8Nang lain manyambat Nabi Ilyas atawa nabi nang tadahulu hidup pulang wan maulah mujijat-mujijat di situ.
9Raja Herudis baucap pina pusang, “Maka anak buahku sudah kusuruh mamanggal kapala Nabi Yahya. Ini siapa pulang nang maulah hal-hal nang kaya itu?”
Lantaran itu, Hirudis rancak bausaha handak badapat lawan Nabi Isa.
Nabi Isa mambari makan lima ribu urang, banyaknya.
9:10-17
10Imbah bulikan matan malakuakan tugas-tugas tadi, pangikut-pangikut Sidin mamadahakan lawan Nabi Isa napa-napa nang sudah bubuhannya lakuakan. Lalu Nabi Isa mambawai bubuhannya ka sabuah kampung nang bangaran Betsaida sakira kawa bajauh matan urang banyak. 11Sakalinya katahuan urang banyak, balalu ai urang banyak tu maumpatinya. Tagal Sidin mambulihakan haja bubuhannya umpat, lalu Sidin bacaramah manganai karajaan Allah, imbah itu maampihi urang-urang nang baisi bamacam-macam panyakit.
12Parak sanja, kadua walas pangikut Sidin mandatangi Sidin lalu baucap,
“Guru, suruh pang bubuhannya tu tulakan ka kampung-kampung nang parak sini sakira bubuhannya kawa manukar makanan wan mancari wadah bamalam. Sualnya di sini kadada napa-napa. Lawan pulang, bubuhannya bisa kalaparan.”
13-14“Kada usah gin. Bubuhan ikam haja nang mambari makan urang nang banyak tu” ujar Nabi Isa manyahut.
“Asa kada mungkin Guru ai. Kami cuma baisi lima bigi ruti wan dua ikung iwak haja. Kada kawa pang mambari makan urang sabanyak nang itu! Maka urangnya malima ribu ikung lalakiannya” ujar bubuhan pangikutnya pina pusang.
“Kaya ini ja, suruh bubuhannya dudukan bakalumpuk-kalumpuk, sakalumpuknya kira-kira lima puluh urang” ujar Nabi Isa manyuruh pangikutnya.
15Lalu dilaksanakannya ai napa nang disuruh ulih Nabi Isa tadi. 16Imbah itu, diambil Nabi Isa ruti nang lima bigi tu lawan iwak nang dua ikung tu. Sidin manangadah ka langit, sambil maucap syukur lawan Allah. Imbah itu, ruti tu diribit-ribit Sidin. Lalu dibagiakan Sidin ka bubuhan pangikut Sidin sakira kawa dibagiakan pulang ka urang-urang banyak tu. 17Sakalinya, samunyaan urang marasa kanyang sampai makanan tu balabihan. Imbah labihannya tu dikumpulakan, sakalinya takumpul dua walas bakul labihannya.
Pitrus baucap, “Pian ni Al Masih nang dijanjiakan Allah!”
9:18-21
18Nabi Isa lagi badoa saurangan. Imbah itu datangan pangikut-pangikut Sidin.
Lalu Nabi Isa batakun, “Ujar urang, Aku ni siapa?”
19Lalu, bubuhannya manyahut, “Ada nang manyambat Pian Nabi Yahya. Ada jua nang lain manyambat Pian Nabi Ilyas. Ada jua nang manyambat Pian salah saurang nabi, nang hidup pulang.”
20“Tagal amun pandapat bubuhan ikam pang, Aku ni siapa?” ujar Nabi Isa batakun pulang lawan pangikutnya.
“Pian ni Al Masih nang dijanjiakan Allah!” ujar Pitrus manyahut.#9:20 Dalam kitab Suci Taurat, Al Masih dibari kuasa ulih Allah gasan manjalanakan palayanan suci. Wayah itu, Pitrus wan urang-urang matan juriat Nabi Ibrahim maharapakan Al Masih mambibasakan juriat Nabi Ibrahim matan panjajahan musuhnya. Dalam Quran ada tatulis manganai Al Masih nang husus gasan Nabi Isa haja (Al-Imran 3:45, An-Nisa 4:157,171,172, Al-Maidah 5:17, 72, Al-Tawbah, Al-Baraah 9:30, 31).
21"Nah, amun kaya itu, bubuhan ikam kada usah bakisah-kisah ka urang lain manganai hal ini” ujar Nabi Isa manangati bubuhan pangikutnya.
Nabi Isa mangisahakan pandaritaannya wan wafatnya
9:22-26
22Nabi Isa baucap lawan pangikut-pangikut-Nya, “Nang datang matan di surga#9:22 nang datang matan di surga: Nang ini adalah makna sambatan Nabi Isa gasan Inya saurang. Lihati Luk. 5:24. sudah ditakdirakan Allah gasan banyak mandarita wan ditolak ulih pamuka-pamuka agama, imam-imam basar, wan guru-guru agama. Imbah itu, Inya kaina dimati'i ulih urang, tagal pada hari nang katiga Inya cagar dihidupakan pulang.”
23Imbah itu, Nabi Isa baucap wan urang banyak nang takumpul di situ,
“Amun urang handak jadi pangikutKu, saban hari inya musti mambuang kahandaknya saurang, musti sanggup disambati, sanggup mandarita wan sanggup mati mun inya handak umpat Aku. 24Sualnya nang kada sanggup mati lantaran umpat Aku, inya cagaran kada salamat. Tagal inya nang sanggup mati lantaran umpat Aku, inya cagaran salamat di ahirat kaina.
25Cuba ja ikam bapikir amun ikam panyugihnya di dunia ni, tagal masuk naraka lantaran manolak Aku, napa untungnya gasan ikam? Kadada untungnya! 26Amun urang supan maakui Aku wan ajaranKu, nang datang matan di surga#9:26 nang datang matan di surga: Nang ini adalah makna sambatan Nabi Isa gasan Inya saurang. Lihati Luk. 5:24. supan jua maakui inya wayah Inya datang pulang ka dunia ini lawan malaikat-malaikat Allah. Wayah itu samunyaan urang cagar malihat kuasa wan kamuliaan Inya, kuasa wan kamuliaan Abah Nang di Atas, wan kamuliaan wan tarang malaikat-malaikat-Nya. 27Sabujurannya di antara bubuhan ikam nang badiri di sini, ada nang kada pacangan mati sabalum malihat karajaan Allah" ujar Nabi Isa manutup kisah.
Allah manyataakan Nabi Isa adalah Al Masih nang dijanjiakan.
9:28-36
28Imbah itu, Nabi Isa tulakan lawan Pitrus, Yahya wan Yakub naikan ka bukit handak badoa.#9:28 Yahya di sini lain Nabi Yahya. 29Rahatan badoa, muha Sidin bacahaya wan jubah putih Sidin jadi bagilarap (Indonesia: mengeluarkan cahayah/gemerlapang). 30Bakakajutan ada datang dua urang nang bapander lawan Nabi Isa. Sakalinya, urang tu Nabi Musa wan Nabi Ilyas. 31Kaduduanya bacahaya jua.
“Pian tu cagar mati di kuta Yarusalem gasan mamanuhi kahandak Allah” ujar kaduduanya tadi lawan Nabi Isa.
32Pitrus wan kakawalannya taguringan. Pas tabangun, bubuhannya manjanaki cahaya Nabi Isa wan cahaya kadua nabi nang badiri parak Sidin. 33Wayah Nabi Musa wan Nabi Ilyas handak maninggalakan Nabi Isa, Pitrus mamaraki Nabi Isa.
“Junjungan, nyaman banar kami di sini. Kami tajakakan sarobonglah? Sabuah gasan Pian. Sabuah gasan Nabi Musa, nang sabuahnya lagi gasan Nabi Ilyas" ujar Pitrus ka Nabi Isa.
Tagal Pitrus kada sadar sabujurannya pandirannya tu kada masuk akal. 34Parahatan Pitrus bapandir tadi, kada disangka-sangka ada awan nang turun manukupi bubuhannya. Lantaran itu, bubuhan pangikut Nabi Isa katakutanan. 35Lalu ada tadangar suara matan dalam awan tadi.
“Nabi Isa ni adalah Anak Nang Di Atas nang Kupilih wan Kuutus. Dangari (makna tasirat=tegas) Sidin bujur-bujur!” ujar suara tadi.
36Wayah suara tu tadangar, Nabi Musa wan Nabi Ilyas sudah kadada lagi. Cuma tatinggal Nabi Isa saurangan haja nang kalihatan ulih bubuhan pangikut Sidin. Tagal wayah itu, Yahya, Yakub wan Pitrus bahinipan haja. Kajadian tadi kada dikisahakannya lawan urang.
Nabi Isa mawarasakan saikung anak nang kasarungan ruh jahat.
9:37-43
37Isuknya Nabi Isa wan katiga pangikut Sidin turunan matan bukit nang itu. Wayah itu, banyak urang bajurut-jurut mamaraki Sidin.
38Sakalinya di antara urang banyak tadi, ada saikung nang bakuciak sambil mamaraki Nabi Isa.
“Guru!” ujarnya, “Tolong pang jinguki anak ulun nang saikungannya tu nah! 39Amun inya anu tu, guru ai, disarungi ruh jahat, inya tu bakakajutan bakuciak-kuciak. Matanya manciling. Awaknya kujul-kujul, lawan jua muntungnya babuihan. Sudah lawas banar inya disiksa ulih ruh jahat tu. Sualnya ruh jahat tu kada hakun kaluar pada awaknya. 40Sudah suah haja pang ulun maminta lawan anak buah Pian manyuruh ruh jahat tu sakira bajauh. Tagal ruh jahat tu kada hakun kaluar matan awak anak ulun!”
41Lalu Nabi Isa baucap ka pangikut-pangikut Sidin, “Umailah bubuhan ikam ni, masih baluman parcaya lawan baluman baiman ka Aku. Padahal, sudah lawas banar kita takumpul."
Lalu Nabi Isa bapaling ka urang nang anaknya kasarungan tadi, “Bawa ja anak ikam tu ka sia."
42Wayah dibawa ka Nabi Isa, anak tu dihampas ulih ruh jahat tu lalu awaknya kujul-kujul.
"Ikam, ruh jahat bajauh haja!" ujar Nabi Isa.
Imbah itu, langsung wagas ai anak tu, tabibas matan ruh jahat tadi. Balalu anak tadi disarahakan ai ka abahnya. 43Samunyaan urang tahiran-hiran malihat mujijat Nabi Isa tadi.
Nabi Isa mamandirakan wafatnya pulang.
9:43-45
Wayah urang-urang tadi masih tahiran-hiran malihat mujijat nang hanyar dilihatnya tu, Sidin baucap lawan pangikut-pangikut Sidin, 44“Dangari bujur-bujur nah! Nang datang matan di surga#9:4 nang datang matan di surga: Nang ini adalah makna sambatan Nabi Isa gasan Inya saurang. Lihati Luk. 5:24. ni, kaina cagar dihianati lalu disarahakan ka musuh-musuhNya."
45Tagal pangikut-pangikut Sidin tanganga, hinip, kada kawa baucap. Bubuhannya kada paham napa nang dipandirakan Sidin lantaran ucapan Sidin tadi ada arti nang tasambunyi. Lawan pulang, bubuhannya kada wani manakuni Sidin manganai ucapan Sidin tadi.
Nabi Isa manjalasakan siapa nang paling tahurmat gasan Allah.
9:46-48
46Lalu pangikut-pangikut Sidin bamula bahualan manganai siapa-siapa nang paling tahurmat di hadapan Allah. 47Tagal Nabi Isa sudah tahu pikiran bubuhannya. Lantaran itu, Sidin mangiau saikung kakanakan lalu disuruh badiri di higa-Nya. 48Lalu Sidin baucap ka bubuhannya, “Nah, amun ikam maharagu kakanakan nang kaya ini nang tujuannya mamuliakan Aku, baarti ikam sudah baiman ka Aku. Lalu, amun ikam sudah baiman ka Aku, baarti ikam sudah mantaati Allah nang mautus Aku. Sualnya siapa nang randah hati, inya kaina cagar dihurmati.”
Urang nang mamakai kuasa ngaran Nabi Isa.
9:49-50
49Imbah itu, Yahya datang mamadahakan, “Guru, kami malihat ada urang nang manyuruh ruh-ruh jahat bajauh mamakai kuasa ngaran Pian. Sudah kami tangati sualnya inya tu lain bubuhan kita.” 50Lalu Nabi Isa manyahuti, “Jangan ditangati! Sualnya, siapa haja nang kada mamusuhi kita, baarti urang tu kawal kita.”
Urang-urang nang kada hakun manarima Nabi Isa.
9:51-56
51Wayah Nabi Isa handak diangkat ka surga, Sidin handak banar tulak ka kuta Yarusalem. 52Tagal amun handak tulak ka kuta Yarusalem, urang musti malalui banua Samaria. Maka disuruh Sidin pangikut-pangikut-Nya tulak badahulu ka sabuah kampung di banua Samaria gasan manyiapakan kadatangan Sidin. 53Sakalinya sabarataan warga banua Samaria kadada nang hakunnya manarima kadatangan Sidin lantaran kalompok Sidin lagi baampah ka kuta Yarusalem.#9:53 Wayah zaman Nabi Isa, urang Samaria wan juriat Nabi Ibrahim kada hakun bakawal. Juriat Nabi Ibrahim maanggap urang Samaria najis lantaran kayakinan baagama urang Samaria sudah tacampur lawan adat-adat suku-suku lain. 54Maka, wayah Yakub wan Yahya tahu manganai kalakuan urang Samaria, kaduduanya tu mamaraki Nabi Isa.
“Guru," ujarnya, "kaya apa amun kami manurunakan api tumatan langit gasan mamusnahakan urang-urang Samaria tu? Bulih haja kalo?” #9:54 Dalam babarapa naskah bahari ada jua kata-kata: nang kaya dilakuakan Nabi Elias.
55"Haw! Kada usah gin! Kada usah ikam badua bapikiran nang kaya itu" ujar Nabi Isa manyahuti sambil pina sarik.
56Lalu tulakan ai bubuhanya ka kampung nang lain.
Sarat-sarat manjadi pangikut Nabi Isa
9:57-62
57Parahatan rombongan Nabi Isa baampah ka kuta Yarusalem, ada urang mamaraki Sidin lalu baucap,
“Guru, ulun handak umpat wan pian. Ka mana haja. Bulihlah?"
58Jadi Nabi Isa manyahuti, “Hadupan-hadupan nang hidup di hutan baisian liang wan burung-burung jua baisian sarang, tapi nang datang matan di surga#9:58 nang datang matan di surga: Nang ini adalah makna sambatan Nabi Isa gasan Inya saurang. Lihati Luk. 5:24. kadada baisian rumah saurang."
59Lalu Nabi Isa bapaling ka urang nang lainnya, lalu baucap, “Umpati ja Aku.”
Lalu urang nang lain tadi baucap, “Guru, ulun bulik gin dahulu handak maharagu abah ulun sampai sidin maninggal.”
60Lalu Nabi Isa manyahut, “Biarakan ja urang-urang nang kada mantaati Allah mahadang kamatian kakawalannya. Tagal ikam Kutugasakan gasan mahabarakan manganai Karajaan Allah.”
61Lalu ada jua urang nang lainnya nang mamaraki Nabi Isa.
“Guru" ujarnya "Ulun hakun ai umpat lawan pian. Tagal bulihlah ulun bulik dahulu bapadah lawan kulawarga?"
62Lalu Nabi Isa baucap, “Amun urang maluku di pahumaan, tagal masih manoleh ka balakang inya kada pantas malayani Allah di karajaan-Nya.”
Currently Selected:
Lukas 9: BJN
Highlight
Share
Copy
Want to have your highlights saved across all your devices? Sign up or sign in
© Pioneer Bible Translators