1 Timoteo 2

Mayongweezo ya Paulo dzuu ya mayombo

1D̯ubva chikuu nichonatsaka kumwambia ni kwamba, mukae mukimuyaviza Muungu ḍuḍa kwa dzambo ḍyenu na ḍya wantu wangine na kumuyomba kwa haḍya zenu nywinywi na za wantu wangine wonse. 2Wayombeyeni na mahaju na wonse weo na mamulaka, hupate kuishi maisha ya utuvu na ya naghea. Ni humuhile Muungu na huwe na t̯aḅia nyema kwa wangine. 3Hivi ni urembo, na vinamutsakiza Muungu mupfonya jwehu, 4eyenatsaka kula muntu apfonywe na aimanye hi hachi. 5Koro kuna Muungu mumodza, na kuna na muntu jwa kahi mumodza kahi ya Muungu na wanaad̯amu, nae ni huyu muntu eyenahanwa *Kirist̯o Yesu. 6Jeje kayavya maisha yakwe kuwa ḍiba ḍya kuwapfonya wantu wonse. Na huu ndiwo ushaahiḍi udziyeo na wakati mwema kuyanga kwamba Muungu anatsaka wantu wonse wapfonywe. 7Ndiyo maana nitsanijweyo dza *ntumi na mwaalimu jwa wantu wa vyeet̯i vingine, niwasumwiiye haya maagu ye faro ya hachi. Na haya niyokunenani ni ḍugha, si nsuwe hat̯a!

8D̯ubva, kula saa ya mayombo, natsaka hawa wayume wadziyaviyeo kwa Muungu wawe ndiwo wa kuyomba. Na wepfonanwiiya dzuu mikono yao kuyomba, nawatseewa na ngoro ambu ngongea. 9Na hawa wake natsaka wakae wakivwaa urembo. Ni wakae wakivwaa nguo za hila. Nawatsekaiya kurembosa nywii kuchia chima, ambu kudzifayat̯a na vija vya dhahaḅu, lulu na marinda ghali ghali. 10Ishinu, wake Wakirist̯o, ni had̯i watsakize na mahendo yao mema, dza ivyonawamala wake wahuniyeo kudziyavya kwa Muungu. 11Wake ni had̯i wawe wantu wa kudziyongweeza na ukimyamya na kwa umpowe. 12Sit̯aki muke jwa kuyongweeza ambu jwa kuwa na mamulaka dzuu ya wayume. Wake ni had̯i wakae wakinyamaa mya saa ya mayombo. 13Koro Ad̯amu ndiye aumbijwe d̯ura, kisa kukiumbwa Hawa. 14Na Ad̯amu siye akulijwekulijwe hat̯a. Huyu muke ndiye akulijwekulijwe akigwa nabviseni. 15Ela muke anapfonywa kuchiiya na kwa kuvyaa wana, ikiwa kwamba kait̯isa faroni mwa Yesu, akiwa na matsako na udheru, na wema wa t̯aḅia.

Currently Selected:

1 Timoteo 2: pkb

Highlight

Copy

Compare