MATHAYO 5
5
Ntûmîîri ya Yiesû arî kîrîmaani
(Ruka 6:20-23)
1Yiesû akûraitha oona bûra kîrîndî kîagana, aatwa karîmaani aakara nthîgûrû. Arutwa baake bamwîthîranîra. 2Yiesû abarutana mantû mama,
3“Kîthaarimo i kîrî bara beebonaga bo ti gîntû kîrî Ngai,
ûnene bwa îgûrû i bwao.
4Kîthaarimo i kîrî bara barî na kîîthikîîro nkorooni,
Ngai akabaûmîîria.
5Kîthaarimo i kîrî bara babooreeru,
bakeewa nthîgûrû îtuîke yao.
6Kîthaarimo i kîrî bara barî na yûûra na bûûta
ya kûrûtha bûra kwagîrîte, bakaabaa.
7Kîthaarimo i kîrî bara barî kîao,
Ngai akabeegua kîao.
8Kîthaarimo i kîrî bara batheru nkoro,
bakoona Ngai na meetho.
9Kîthaarimo i kîrî bara bareetaga ûkiri,
bageetwa aana ba Ngai.
10Kîthaarimo i kîrî bara bathîînagua n'ûntû bwa kûrûngama ûmmaani,
ûnene bwa îgûrû i bwao.
11“Kîthaarimo i kîrî biû rîra antû babûruma, rîra babûnyamaaria, kana babûtuîrîîra mantû maingî maathûûku n'ûntû bwa bûra bûrî baakwa. 12Rîra bakûbûrûtha ûgu, kenaani. Gwîruani mûno n'ûntû kîewa kîenu îgûrû i kîînene. Ûgu i ta bu baanyamaariirie bara baarî iroria mbere yenu.”
Mwonyo na werû bwa nthîgûrû
(Mko. 9:50; Ruka 14:34-35)
13Yiesû auga, “Kîrî antû biû bûrî mwonyo. Îndî mwonyo ûkathira mûcamo ûtiîkîrîka uu kaîrî. Ûkarire ûgu ûtirî gîtûmi kaîrî nwa gûteewa nja ûgakinyangwa n'antû.
14“Na kaîrî biû bûrî werû kîrî antû ba nthîgûrû. Bûkari ta bûra ntûûra yakîîtwe karîmaani îtaithîka. 15Naka muntû atimuntagia taa amîkunîkîra. Amîtûûgagîîria bantû aûkîîru kaingo îmûrîkîra bonthe bara barî nyomba înu. 16Ta ûgu i ta bu werû bwenu bûbatîîrue bûmûrîkîra antû kaingo boona mantû mara bûrûthaga i mantû meega, bakumia Abaagu ûra arî îgûrû.”
Yiesû aayire kûûyûrîîria watho
17Yiesû auga, “Bûtikaathûgaanie mbûyîîte kwonania *watho bwa Musa na ûrutani bwa iroria bûtirî gîtûmi. Ntaaya kûbuagîra gîtûmi, ndaayire kûbuûyûrîîria. 18Na mma ga nkûbwîra, mûthiro wa îgûrû na nthîgûrû ûtakinyîîte, gûtirî gatemwa nwa kamwe kana gacuncî nwa kaniini ka watho gakaûra mwanka mantû monthe maingîke. 19Kwoogu muntû ûra aunaga watho bûra bûniini na akarutana bara bangî kûrûtha ta we, agaatuîka ûmûniini ûneneeni bwa îgûrû. Îndî ûra aathîkagîra na akarutana bara bangî gûtuîka aathîki agaatuîka mûnene ûneneeni bwa îgûrû. 20Na ga nkûbwîra, twanga bûkaagîra bûgakûrûka aarimû ba watho na *Abarisai, bûtiikûrûka ûneneeni bwa îgûrû.”
Mûthûûro na matheta
21Yiesû auga, “Ibwiyî Ngai augire kuuma tene, ‘Ûtikaûragane.#Kuuma 20:13 Ûra akaûragana nakagambithua wana aarûtha ata.’ 22Îndî naani ga nkûbwîra, ûra akaathûûrîra ûra ûngî nakagambithua. Na ûra akeera ûra ûngî ‘Ûrî wa ûtheri!’, arî na îgamba na kîama. Na ûra ageeta ûra ûngî, ‘Kîaa gîkî!’, nakaathi îcamaarîro.
23“Kwoogu ûkaaya kûthi kîthînjîrooni, na mbere ya ûruta kîgongwana gîaku ûkaririkana kûrî muntû ûbîtîrîtie, 24tiga kîgongwana agu kîthînjîrooni wambe ûthi bûgwatanîre n'we. Rîru ûcooke kûrutira Ngai kîgongwana gîaku.
25“Gwatanîra na ûra bûrî na ntheto n'we na mpwî mbere akwira îgambaani ûtuîrwa ûnenkanîîrua kîrî acikaarî bakwira nceera. 26Na mma ga ngûkwîra, ûtiuma ku ûtamûrîîte mwanka ndururu ya mûthia.”
Ûthûngîîri
27Yiesû aathi na mbere abeera, “Na kaîrî ibwiyî Ngai augîîte, ‘Ûtikaathûngîîre.’#Kuuma 20:14 28Îndî naani ga nkûbwîra, ûra oonaga mûka akamwîgua bata i ta bûmwe na kûmaama n'we n'ûntû bwa kwîrirîîria we. 29Ûkaaya kwîgua riitho rîaku rîa ûrîo rîtûmaga wîyia, rîtûre. I kaaba wagîîte gacuncî kamwe ka mwîrî waku kîrî mwîrî waku unthe ûgereetwe mwankiini wa îcamaarîro. 30Kana ûkaaya kwîgua njara yaku ya ûrîo îtûmaga wîyia, mîgiite. I kaaba wagîîte gacuncî kamwe ka mwîrî waku kîrî mwîrî waku unthe ûgereetwe mwankiini wa îcamaarîro.”
Gûcookia mûka
(Math. 19:9; Mko. 10:11-12; Ruka 16:18)
31Yiesû abeera, “Kaîrî kwîrîîtwe, ‘Muntû akeenda gûcookia mûka nwa mwanka aandîke baarûa ya kwonania akuumanwa n'we.’#Kûririkanania Maathana 24:1 32Îndî naani ga nkûbwîra, twanga mûka atuîkîîte mûthûngîîri, ûra acookagia mûka natûmaga mûka ûyu athûngîîra. Na ûra agûraga mûka ta ûyu ateetwe i mwene, muntû ûyu neegagua akîthûngîîra.”
Mîthiîtio
33Yiesû auga, “Ibwiyî Ngai augire kuuma tene, ‘Ûtikaathiîtie ûtakîrûtha ûntû. Wathiîtîria Ngai kûrûtha ûntû nwa mwanka ûbwingie.’#Mantû ma Araawî 19:12; Kûririkanania Maathana 23:21 34Îndî naani ga nkûbwîra, ûtikaathiîtie wana gûkari ata. Ûtikaathiîtie na îgûrû n'ûntû i noogo Ngai aathanaga arî, 35na ûtikaathiîtie na nthîgûrû n'ûntû n'yo ûkinyo bwake kana ûthiîtia na Njerusaremu n'ûntû i taûni ya mûnene ûra arî îgweta mûno. 36Ûtikaathiîtie na kîongo gîaku n'ûntû ûtiûmba kûgarûra rûtundu nwa rûmwe rûtuîka rûûyerû kana rûûyirû. 37Weegua ûrîenda kuuga ‘Yîî,’ uga ‘Yîî.’ Na weegua ûrîenda kuuga ‘Arî,’ uga ‘Arî.’ Bûngî nkûrûki ya ûgu i Nkoma abureetaga.”
Kûrîithia
(Ruka 6:29-30)
38Yiesû auga, “Ibwiyî kwîrîîtwe, ‘Ûra agaatûra ûra ûngî riitho wana we natûrwe rîake. Na ûra agaakûûra ûra ûngî îgego wana we nakûûrwe rîake.’#Kuuma 21:24 39Îndî naani ga nkûbwîra, ûtikaarigîîrie muntû akûrûthîra ûthûûku. Muntû akaaya gûkûringa îkoobi rûthea rwa ûrîo, mûgarûrîre kinya rwa ûmotho aringe. 40Muntû agakûthitanga abangîîte gûgûtunya caati yaku, eenda nathûkie kinya kabuuti. 41Muntû akaaya gûgûkamatithia mûrigo wake na taka bantû a mairi îmwe, mûkamatîre mairi îngî îmwe nkûrûki. 42Muntû agakûromba gîntû ûtikaarege kûmûteethia. Na ûra agaagûkooba gîntû ûtikarege kûmûkoobithia.”
Enda anthû baaku
(Ruka 6:27-28, 32-36)
43Yiesû auga, “Kaîrî ibwiyî kwîrîîtwe, ‘Enda mûtûûri waku#Mantû ma Araawî 19:18 ûmene mûnthû.’ 44Îndî naani ga nkûbwîra, endagaani anthû beenu na rombagîraani bara babûnyamaaragia. 45Bûkarûtha ûgu i rîo bûgaatuîka aana ba Abaagu ûra arî îgûrû, n'ûntû we n'we atûmaga riûa rîake rîthararîra baathûûku na beega na akaurithîria mbura bara barûthaga bûra kwagîrîte na bara batarûthaga bûra kwagîrîte. 46Bwenda wabara babwendeete bonka akî rî, i bûrîkû bûûnene bûra bûgaatûma bwewa kîewa? Anga wana arûngithia ûgooti batirûthaga ûgu? 47Î kana weegua bûkeethagia waanyanya beenu bonka akî rî, i bûrîkû bwa mwanya bwarûtha? Anga wana bara bataiyî Ngai batirûthaga ûgu? 48Nwa mwanka bûtuîke baagîru ta bûra Abaagu ûra arî îgûrû arî ûmwagîru.”
Currently Selected:
MATHAYO 5: thk
Highlight
Share
Copy
Want to have your highlights saved across all your devices? Sign up or sign in
© 2019, Bible Translation and Literacy