MATHAYO 4
4
Yiesû aagerua
(Mko. 1:12-13; Ruka 4:1-13)
1Kuuma agu Yiesû aathûkua i Kîrundu Ûmûtheru amwira rwanda kaingo agerua i Nkoma. 2Akûthiria ntugû mîrongo îna, mûthenya na ûtugû atarûma gîntû, Yiesû aatua kwîgua yûûra. 3Nkoma yathi yamwîra, “Ûkaaya kwîgua ûrî Mwana wa Ngai, uga maiga mama matuîke mîgaate.”
4Yiesû amîîra, “Kwandîkîîtwe *Maandîkooni Maatheru, ‘Mûgaate unka ûtiûmba gûtûûria muntû mwoyo, îndî kiugo kîonthe kîra kiumaga kîrî Ngai kîamûtûûria.’ ”#Kûririkanania Maathana 8:3
5Kaîrî Nkoma yaira Yiesû taûni îra ntheru ya Njerusaremu. Yamwira kûra îgûrû kathûmbîri ka nyomba ya Ngai. 6Yamwîra, “Weegua ûrî Mwana wa Ngai, teebarûkie n'ûntû kwandîkîîtwe Maandîkooni Maatheru, ‘Ngai eerîîte araîka baake bakwambîîrie na njara ciao kaingo ûtathuumûrua nwa mbayo ciaku i maiga.’ ”#Cabuurî 91:11-12
7Yiesû aacookeria Nkoma amîîra, “Maandîko Maatheru kaîrî maugîîte ûûgû, ‘Ûtikaagerie Mwathani Ngai waku.’ ”#Kûririkanania Maathana 6:16
8Kaîrî Nkoma yaira Yiesû kûra îgûrû kîrîmaani kîîraaya mûno. Yamwonia moonene monthe ma nthîgûrû na mwago wa mo. 9Yamwîra, “Ngakwa mama monthe weegua ûgaaturia maru ûngonge.”
10Îgûkinyia agu Yiesû amîîra, “Tigana naani, Saitaani, n'ûntû kwandîkîîtwe Maandîkooni Maatheru, ‘Ûtikaagonge kana ûtûmîkîra ûngî, tatiga Mwathani Ngai waku wenka.’ ”#Kûririkanania Maathana 6:13 11Nkoma yarekana n'we yathi. Araîka baaya bapa Yiesû ûteethio.
Yiesû aacooka Gariiri
(Mko. 1:14-19; Ruka 4:14-15)
12Yiesû akwîgua Njoana akûthaîkwa nceera, aacooka gîteere kîa Gariiri. 13Aumire Nasareethi aathi gûtûûra taûni ya Kaperinaumu rûteere rwa îria rîa Gariiri, mwankaani wa mûgongo wa Saburoni na wa Nabutaari. 14Ûroria bûra Isaaya aaroriirie bwaûyûra, bûra buugîîte,
15“Nthîgûrû ya Saburoni na ya Nabutaari,
na bara batûûraga rûteere rwa ûmotho
rwa muuro wa Njorondani ûtarîîte bwa îria,
Gariiri nthîgûrû ya mîgongo îngî îtarî Ayaundi,
16antû bara batûîre mwinduuni,
ibooneete werû bûûnene.
Bara batûûraga kûra gûkari taka kûrumeene mwindu
n'ûntû bwa ûguaya bwa gîkuû, werû bûkûbamûrîkîra!”#Isaaya 9:1-2
17Kuuma îgiita rîru, Yiesû aanjîîria gûtûmîîria akiugaga, “Îrireeni meeyia meenu n'ûntû ûnene bwa îgûrû bûkûthengeera.”
Arutwa ba mbere ba Yiesû
(Mko. 1:16-20; Ruka 5:1-11)
18Yiesû atambîîte na rûteere rwa îria rîa Gariiri oona ategi ba makûyû baîrî bakîamba neeti ciao bagwata makûyû. Baarî Simioni, ûra kaîrî eetagwa Petûrû, na mûruagina Enderea. 19Yiesû abeera, “Nthingataani mbûtuîkithie ategi ba antû.” 20Bamûthingata warîru baatiga neeti ciao naagu.
21Yiesû akûthiyathiyanga mbere, eethîra antû bangî baîrî. Wana bo baarî muntû na mûruagina. Baarî Njakubu na Njoana. Îthe eetagwa Cabendi. Baarî îtarûûni na îthe bagîtumaga neeti ciao. Yiesû abeeta. 22Warîru baatiga îthe na neeti ciao bamûthingata.
Yiesû aarutana na ooria aayie
(Ruka 6:17-19)
23Yiesû aariûnga Gariiri yonthe akîrutanaga antû *masinagoogiini na agîtûmagîîria mantû ma ûnene bwa îgûrû. Kinya nooragia antû ndwari cia mîthemba yonthe na mbayua cionthe ira beegagua barî na cio. 24Nkuma yake yatamba nthîgûrû ya Sîîria yonthe. Antû bamûreetera aayie bonthe ba mîthemba yonthe, na bara bonthe baathîînaga na njîra ingî inyingî. Kûrî baarî na irundu biithûûku, bangî nkurî, na bangî bonju mîîrî. Yiesû abooria. 25Kîrîndî kingî mûno kuuma Gariiri, Ndikaporis, Njerusaremu, Njundea, na kinya rûgongo rûra rûngî rwa muuro wa Njorondani kîathingata Yiesû.
Currently Selected:
MATHAYO 4: thk
Highlight
Share
Copy
Want to have your highlights saved across all your devices? Sign up or sign in
© 2019, Bible Translation and Literacy