KÛGWÛRÎRWA 18
18
Mûthia wa Mbabironi
1Nyuma ya kîoneki gîku, ndoona mûraîka ûngî eendamîîte kuuma îgûrû arî na inya înene ya wathani. Mwago wake waamûrîka nthîgûrû. 2Augîîria na inya, auga,
“Taûni îra nene ya Mbabironi
îkwomorangwa, îkwomorangwa!
Îgûtuîka gîkaro gîa nkoma
na kîa irundu bionthe biithûûku.
Îgûtuîka gîkaro kîa nyoni
na nyamû cionthe irî nting'o.
3Mîgongo yonthe ya nthîgûrû îranyua
ndibei ya wîrirîîria bwa ûmaramari bwake.
Anene ba nthîgûrû baramaama n'we
baaruta ngûgî ya ûmaramari n'we.
Abiacaara ba nthîgûrû batongeetue i wîrirîîria
bûra arî bwingî mûno bwa kwenda
into nkûrûki ya kîthimi.”
4Ndacooka ndeegua kayû kangî kauma îgûrû kauga,
“Umaani taûni înu, biû antû baakwa,
bûtikaagwetanîrue na wîyia bwake,
na kaingo bûtagwatwa i kînyamaara kîra gîkaamûgwata.
5Wîyia bwake i kîthûmba gîkinya îgûrû matuuni,
na Ngai atiiriganagîrua i mabîtia maake.
6Newe ta bûra eeyanaga,
narûthîrwe maita maîrî nkûrûki ya bûra aarûthaga.
Nakundue gîkombe kîa ndibei îndûru
maita maîrî nkûrûki ya îra aakundagia antû.
7Nanyamaarue na eekîrwe kîeba kûringana na
bûra eendeete into nkûrûki ya kîthimi na îgweta.
N'ûntû arîîbîîra na nkoro,
‘Nkari nthî ta mûnene wa mûka
akarîrîte gîtî gîake kîa ûnene.
Niû ntirî ntigwa, gûtirî rîo nkaagwatwa i kîeba.’
8Kwoogu akoona kinyamaara na ntugû îmwe -
gîkuû, kîeba na yûûra.
Akaabîîthua na mwanki n'ûntû ûra akaagiita
îgamba rîake i Mwathani Ngai mwene inya.”
9Anene ba nthîgûrû boona ntoogo ya îrwaya rîrî rîkîbîîthua ibakaarîrîrîra bagwetwe i kîeba. Anene babu i bara ûkeegua baamaamîîte na rîo baaruta ngûgî ya ûmaramari na beenda into nkûrûki ya kîthimi bûra rîendeete. 10Boona bûra rîkûnyamaara bûgana bakaamaka beebûmbe gataaria bauge,
“Irû! Irû! Yîî kûrû, taûni îra nene,
woomboranua na îthaa rîmwe,
Mbabironi, taûni îrî inya!”
11Na abiacaara ba nthîgûrû boona rîkîbîîthua kinya bo ibakaarîrîrîra bagwetwe i kîeba n'ûntû bationa muntû wa kûgûra into biao kaîrî. 12Gûtirî we akaabagûrîra thaabu, fetha, twiga twa goro, ruru, nguo cia goro, cia rangi ya ûkûyû, intuune, na ikûmetameta. Kana mbaaû cia mîtî ya mîthemba yonthe, into bia mîthemba yonthe bira birûthagwa na mîguongo, bira birûthagwa na mbaaû cia ûgûri bûûmo, yûmba rîra rîrûthagwa gîkama, into bia mathaga, bira birûthagwa na twiga tûkengakengaga tûûtenderu mûno, 13into bia gwîkîra irio mûrîo, mîtaa, ndibei, maguta ma ncabiibû, mîtu, ngano, ng'ombe, ng'ondu, mbaraathi, nkaarî cia ndûa ira ikururagua i mbaraathi, na nkombo—mîoyo ya antû.
Abiacaara bakauga,
14“Mantû mara ûreendeete ûtimoona kaîrî.
Ûtonga bwaku bunthe na mwago bikûthira.
Ûtibiona kaîrî.”
15Abiacaara bara bagaatonga kuumania n'we boona bûra akûnyamaara bûgana bakaamaka beebûmbe gataaria barîre barî na kîeba 16bauge,
“Irû! Irû! Yîî kûrû taûni îra nene!
Îreekagîra nguo inthongi cia rangi ya ûkûyû na intuune,
îkeegemia na thaabu, twiga twa goro na ruru.
17Îndî ûtonga bûbu bunthe bwathira na îthaa rîmwe!”
Anene ba meeri, bara bathiyaga na meeri, bara barutaga ngûgî meeriini, na bara bonthe bathûkûmaga kuumania na îria batiithengeera Mbabironi. 18Boona ntoogo Mbabironi îkîbîa bakauga na inya,
“Gûtooneka taûni îngî înene ta îno!”
19Bageetûûrîria mûthetu biongo biao barîre barî na kîeba bauge na inya,
“Irû! Irû! Yîî kûrû, taûni îra nene!
Bara bonthe barî meeri batongeete
kuumania na ûtonga bwa yo!
Îndî yomorangwa na îthaa rîmwe.
20Îgûrû, keneera ûgu Mbabironi yarûthwa!
Keneeraani ûgu antû ba Ngai, atûmwa na iroria,
n'ûntû Ngai akûmîkaanûkia
n'ûntû bwa bûra yabûrûthire.”
21Ndoona mûraîka ûmwe aarî na inya mûno ooya iiga rîînene mûno rîkari ta rîa kûthia, arîgera îriani. Auga,
“Ta ûgu i bu Mbabironi taûni îra nene îkaarûkua,
na îtikooro yonwa kaîrî.
22Tûyû twa antû bakiina na wandîndî
ira cia ndigi inyingî,
kana into bingî bia wini, mîtûûrirû,
kana tûrumbeeta tûtiîguîka kîrî woû kaîrî.
Gûtirî mûruti ngûgî akoonwa kîrî woû kaîrî.
Na gûtiîguîka iiga rîkîthia kîrî woû kaîrî.
23Gûtioneka taa îmûrîkîîte kîrî woû kaîrî,
na kayû ka mûgûrani na mwiki
gatiîguîka kîrî woû kaîrî.
Abiacaara baaku i bo baraarî
abiacaara bara banene nthîgûrû
na ûrogi bwaku i bu bûrakangayîtie mîgongo yonthe.
24Na ikwoonekanire i woû weetûûrithiirie nthakame ya iroria,
antû ba Ngai, na bara bonthe baûragirwe nthîgûrû.”
Currently Selected:
KÛGWÛRÎRWA 18: thk
Highlight
Copy
Compare
Share
Want to have your highlights saved across all your devices? Sign up or sign in
© 2019, Bible Translation and Literacy
