AIBIRANIA 1
1
Mwana wa Ngai
1Tene Ngai aatûmîîre iroria magiita maingî na njîra inyingî kwaria na biûyûûyû. 2Îndî ntugûûni ino cia kwingia mûbango wake, Ngai atûmîrîte Mwana wake kwaria naati. Ngai aûmbire nthîgûrû gûkûrûkîîra kîrî Mwana wake, na amûthuura akaathûkia bionthe birî rûgai rwake. 3Mwana wa Ngai oonanagia mwago wa Îthe na amûtuatîîtie kûrû. N'we atûmaga bionthe bithi na mbere kwîgua birî oogo kwa inya ya kiugo gîake. Nyuma ya kwîruta atûthambia meeyia meetû, eetiirie îgûrû aakara nthî rûteere rwa ûrîo rwa Ngai ûra arî mûnene mûno.
Mwana wa Ngai n'we mûnene kîrî araîka
4Kwoogu itakwonania Mwana wa Ngai n'we mûnene mûno kîrî araîka, n'ûntû wana kinya riîtwa rîra Ngai aamwîtire rîrî gîtîîyo nkûrûki ya rîao. 5Gûtirî rîo Ngai eera mûraîka,
“Woû ûrî mwana wakwa.
Îmunthî ngûtuîka abaagu.”#Cabuurî 2:7
Na kaîrî Ngai augire,
“Ûkeegua ndî îthe,
n'we eegue arî mwana wakwa.”#2 Samweri 7:14
6Na kaîrî rîra Ngai agaatûma Mwana wake wa mbere nthîgûrû, augîîte,
“Araîka bonthe ba Ngai ibamûgonge.”#Kûririkanania Maathana 32:42; Cabuurî 97:7
7Îgûrû rîa araîka, *Maandîko Maatheru maugîîte,
“Ngai atuîkithagia araîka baake ruuo,
na aruti ngûgî baake ndîrîmbî cia mwanki.”#Cabuurî 104:4
8Îndî îgûrû rîa Mwana, Ngai augîîte,
“Wathani bwaku, woû Ngai, bûtikooro bûthira rî kana rî.
Wathanaga ûgîtûmagîra ûmma.
9Wendeete wagîru, ûtiendeete ûthûûku.
Na i kîo n'ûntû Ngai, Ngai waku, akûthuurîîte,#1:9 Kîîngiriki kiugîîte: agwîtûûrîrîtie maguta
na akwa gîkeno nkûrûki ya bara bangî.”#Cabuurî 45:6-7
10Na kaîrî Maandîko Maatheru maugîîte,
“Mwathani, i woû waûmbire nthîgûrû kîambîrîriani,
na îgûrû i yûmba rîa njara ciaku.
11Cio ikeenyangua, îndî woû ûgaatûûra.
Ikaathira cionthe ta nguo,
12wikûnje, ûthûkie ingî.
Îndî woû ûtigarûkaga.
Ûgaatûûra tene na tene.”#Cabuurî 102:25-27
13Îndî gûtirî rîo Ngai eera mûraîka,
“Kara nthî rûteere rwakwa rwa ûrîo,
mwanka ntuîkithie anthû baaku
ûkinyo bwa magûrû maaku.”#Cabuurî 110:1
14Kwoogu araîka i ba ûû? Bo n'irundu bira Ngai atûmaga birî aruti ngûgî, biteethia bara akaa rûgai rwa wonokio.
Currently Selected:
AIBIRANIA 1: thk
Highlight
Copy
Compare
Share
Want to have your highlights saved across all your devices? Sign up or sign in
© 2019, Bible Translation and Literacy
