NGÛGÎ 24

Mathitango ma Ayaundi îgûrû rîa Paûrû

1Nyuma ya ntugû itaano, mûthînjîri ûra mûnene wa Ngai eetagwa Anania aaya Kaisaria barî na akûrû bagana ûna na mûgambi ûmwe eetagwa Teetaras. Baathi kîrî ngabana Berîksi bamwîra kîra baathitangîrîte Paûrû. 2Paûrû aareetwa. Teetaras aanjîîria gûtarania kîra baathitangîrîte Paûrû. Auga, “Mûkaathe Berîksi, ûtongoria bwaku bwega ibûtwete ûkiri îgiita rîîraaya na mantû meega maareetwa maateethia nthîgûrû yetû. 3Rîonthe itûgûcookagîria nkaatho inyingî mûno n'ûntû bwa mantû mamu monthe. 4Tûtagûgûteera îgiita, itûgûkûûria wenda ûtûthikîîrie îgiita rîîkai.

5“Muntû ûyû ti mwega. Arîriûnga nthîgûrû yonthe agîtûmaga Ayaundi baûkia gîtuma. N'we mûtongoria wa gîkundi kîra gîkwîbîta Anasarini. 6Na kinya naracûûgagia gwaka nyomba ya Ngai mûgiro. Tûkûmwîthîîria akîrûtha ûgu i rîo tûramûgwatire.#24:6 Mabuku maakai ma Kîîngiriki imoongeereete mîgambo îno: Tûrabangîîte tûmûgiitîre îgamba kûringana na watho bwetû. 7 Îndî Rucias, mûnene wa acikaarî n'we araayire atûtunya we na taka, 8 auga nwa mwanka tûûye kîrî woû. 8Wana woû wamûûria ûkaamenya tûtikûmûtuîrîîra.” 9Ayaundi beetîgîîria bauga mantû mamu i ma mma.

Paûrû eetheteera mbere ya Berîksi

10Ngabana oonia Paûrû na njara aarie. Paûrû auga, “Inkwîgua nkeneete nkîîtheteera ndî mbere yaku n'ûntû imbiyî ûtûîre ûrî mûgambi wa nthîgûrû îno mîanka îmingî. 11Ntugû îkûmi na ciîrî ti nthiru kuuma nkûthi Njerusaremu kûromba. Na ûkeenda kûmenya mantû mama nwa ûmenye. 12Tika antû baba baambîthîîre nyomba ya Ngai ngîturania mbaara. Na tika baambîthîra *sinagoogiini kana taûni nkîngîîra antû baûkia gîtuma. 13Na wana bationa ûkûûyî bwa kwonania wabu indûthîîte mantû mama bakuuga. 14Bûra mbûmba gwîtîgîîria ntagûkwitha n'atî, ndombaga Ngai ûra biûyûûyû beetû baarombaga nkîthingataga ûrutani bûra antû baba baugaga i bwa ûrongo. Kaîrî imbîtîgîîtie bûra bunthe bwandîkîîtwe mabukuuni ma watho na ma iroria. 15Na ndî na wîrîgîîro kîrî Ngai wata antû baba atî antû bakaariûkua, bara baagîru na bara batarî baagîru. 16Kwoogu rîonthe ncûûgagia kwîgua atî, nkorooni yakwa ntikwîgua ndî na mabîtia kîrî Ngai kana kîrî muntû.

17“Nyuma ya mîanka îmingî indacookire Njerusaremu mbirîrîte antû beetû bara nkîa ûteethio na nkîrutîra Ngai kîgongwana. 18Rîru bambîthîîre nyomba ya Ngai, i mantû ma kûtherua ndarûthaga. Gûtirî kîrîndî ndaaragîîria na gûtirî gîtuma kîarî oogo. 19Îndî kûrî Ayaundi bamwe ba kuuma nthîgûrû ya Îcia twarî na bo gûku nyomba ya Ngai. Na babu i bo babatîîrue wîgua barî aaga bakauga mbere yaku kana weegua kûrî bu bûûthûûku ndarûtha. 20Kana tatiga antû baba barî aaga bakwîre weegua kûrî mabîtia boona ndî na mo nkûgambithua i kîama. 21Twanga mîgambo îra ndaugîîrie na inya ndî mbere yao, ndabeera, ‘Bûrîngambithia îmunthî n'ûntû bwa bûra mbîtîgîîtie antû bakaariûkua!’ ”

22Berîksi naiyî bwega mantû ma ûrutani bwa bara baathingatîîte Yiesû. Aarûngamia îgamba. Auga, “Nkaagiita îgamba rîrî rîra Rucias, mûnene wa acikaarî, akaaya.” 23Berîksi aaruta watho eera mûrûngamîîri ûmwe wa acikaarî akarie Paûrû. Îndî auga eeyagwe kaanya ga kwanganga na acoore baake beetîgagîîrue bakaaya bakamûreetera kîra ûkeegua arî na ûbatu bwa kîo.

Paûrû akîaria na Berîksi na Ndurusiira

24Nyuma ya ntugû igana ûna, Berîksi aaya na mwekûrû wake. Mwekûrû wake eetagwa Ndurusiira na aarî Mûyaundi. Berîksi aaruta watho auga Paûrû areetwe. Akûreetwa, amûthikîîria akîarîîria mantû ma wîtîgio kîrî Kîrîstû Yiesû. 25Paûrû akûthi na mbere akîaragîîria mantû ma wagîru, kûrega kwathwa i mwîrî, na mantû ma ntugû îra îkaaya rîra antû bakaagiitîrwa îgamba, Berîksi aagwatwa n'ûguaya. Amwîra, “N'ûûgu îîndî. Îthi, ngagwîta kaîrî rîra ûkeegua ndî na kaanya.” 26Na kaîrî, Berîksi neerîgagîîra Paûrû akamûgukuma. Kwoogu i kîo gîatûmaga akara agîtûmanangaga aaria n'we.

27Mîanka îîrî îkûthira, Pokias Bestas aatuîka ngabana bantû a Berîksi. Na n'ûntû Berîksi neendaga gûkenia Ayaundi, akîthi aatiga Paûrû waarî nceera.

Currently Selected:

NGÛGÎ 24: thk

Highlight

Copy