Titus 3

Maday delga aŋa masla madiŋal gəl à vok

1Wulà à azlaməna gay Zəzagəla à gəl kà, takəs gay à azlasufəl la ahàl ala, la azlagumna aŋatà la maɗàh uwana tapəhatàla. Tawoya maɗàh azlatatak delga. 2Gòɗ à atà babay kà tatsəɗ gay mawisiga à azladza à tsəh aw, tagazlla aw, taga tələmma, takəs gay à azladza anik la ahàl ala babay. 3Pə̀h à atà kiya uwaga, kà uwana anu babay uwarà məga azlakusoŋu babay, mədzadzàŋàhà gəl gami ala. Tetəvi dziriga aŋa Zəzagəla azà anu à adi, kà uwana mətawàh kà maɗàh azlatatak mawisiga à tsəh pəra, məgà kà azlamawisiga, tetuw tetuw məfàhà à adi à tatak aŋa azladza anik à tsəh. Azladza tapəsèwàh anu, ŋgaha anu babay məpəsèwàh atà suwaŋ. 4Baməraka məɗàh kiya uwanay kà, kaslà anik, Zəzagəla uwana aɓə̀l anu, apə̀hla ala kà aɗàh delga à azladza, ŋgaha awoya anu kaykay. 5Aɓə̀l anu kà deyday, awkà aɓə̀l anu kà kà sləray delga gami uwana məɗahàŋ aw, ama aɓə̀l anu kà, kà vok mahamay uwana akə̀s kà anu. Azə̀ɓ anu tsakana gami lakəl ala, aɗahà uwaga kà la ndzəɗa aŋa Masasəɗok tsikasla, kiya uwaga məgà mayyi vok mawga la maɓəz sifa mawga. 6Zəzagəla ahə̀nanula pawaslwasl la Masasəɗok tsikaslaga, la ahàl aŋa Yesu Kristu uwana maɓəl anu. 7Aɗahàŋ kiya uwaga kà, kà anu aŋa maɓəz sifa, ŋgaha məsəl kà masla adàvà à anu sifa uwana adəv à gay aw, uwana apakà vok kiya uwanay kà, Zəzagəla aɗahà delga, ŋgaha apakànula tsiɗaŋa la huma aŋha. 8Gay uwanay gəpə̀h à ka, kà dziriga.

Ŋgaha asa à gi kà katapla à azladza uwaga koksikoksi, kà azlauwana tadiŋ gəl à Zəzagəla à vok makəs azlatatak delga uwanay. Gay uwana məpəhla ala kà dzəɓa aŋha səla aw, azlaka azladza babay. 9Baŋa azladza tabay vok gay deydayga kà, kada à abà aw. Baŋa tapəhay lakəl aŋa azlababa madzidziga aŋa uwarà, kada à abà aw, kabay vok gay lakəl aŋa mapəhay aŋa Musa bay aw, kagazllaw akul nna aw, uwaga kà tatak kusoŋuga deyday gà pəra. 10Baŋa dza atsalla mavàhla à tataka azlaməna gay Zəzagəla à abà kà, slə̀hal ala vok asik tekula, baŋa atsənà aw kà, kafal sləm aya aw, gòlla à lig à gay. 11Kasəl kà azladza uwana tavàh azlaməna gay Zəzagəla ala kiya uwaga kà, atà kà, tasakà tetəvi mawisiga, tsakana aŋatà adàpəhla vok ala la paraka.

Ayyi makəɗ gəl à ahəŋ

12Gədàsləl dza anik à slaka aŋkul, zlahaw Arətemas, baŋaw Tisik, à uwana gədàsləl à awtày. Baŋa adàbəzà à awtày kà, wàɗ vok à uda la katskats kà mad à mabəz gi vok la Nikopoləs. Gədzugw kà, la təla awkusa kà, gədàday kà madz à ahəŋ la abatà. 13Zlakà Senas masla masəl mapəhay, ŋgaha zlakà Apolos babay, và à atà tatak uwana akəs vok kà aŋa mauguzahay aŋatà uwana tadàday lagwa, kà atà aŋa manəkuɗa aŋa tatak aw. 14Azlauwana tadiŋ gəl à Yesu à vok bokuba anu tasəlay babay, kà atà aŋa maɗaɗàh azlatatak dzəɓa aŋha səla aw gà uwaga kà, atà mazlakàh azlauwana la kuɗa la abà. Baŋa taɗehəŋ kiya uwaga kà, madz à ahəŋ aŋatà adàgay deyday aw.

15Azladza uwana anina la abanay, taɗaha à ka: ‘Ayyi’ gesina. ‘Ayyi’, məgoɗ à azladeda uwana tawoya anu la madiŋal gəl à vok la abà, ŋgaha vok mahamay aŋa Zəzagəla apis à akul à gay à vok gesina.

Currently Selected:

Titus 3: mfh

Highlight

Copy

Compare