Ibəranəŋkowen 2

Məpəsew tatak uwana Zəzagəla apə̀h à anu aw

1Tsa Zəzagəla aɓaɗanumà la Kona aŋha kà, məpəzl sləm gami à gay uwana apə̀h à anu à ahəŋ, kà anu aŋa maz à tetəvi delga la tsəh ala dogdogog aw. 2Məsəl kà gay uwana azlamalika tasə̀lla à waŋ kà, agə̀ɗ à afik. Azlauwana tafàl sləm aw, ŋgaha la azlauwana takə̀s aw kà, seriya uwana Zəzagəla adùkwatàŋ à gəl, kà azlawla atà ndzer. 3Kakay mətəfay à baŋa mapak gay aŋa maɓəlay ala kà gay deyday ma? Gay aŋa maɓəlay uwana Sufəl Yesu azàŋ kà, azlaməna mazəŋ la uwana tagəɗàŋ à afik: ‘Fida la abà aw’, Zəzagəla agòɗ. 4Zəzagəla la gəl aŋha babay apə̀hla ala kà gay uwaga kà ndzer, la maɗehəŋ azlamasəlay anik anik, ŋgaha la azlatatak nadzipo gà, avà maslay kà à Masasəɗok tsiɗaŋa, kà atà aŋa maɗàh azlatatak bokuba uwana asal.

Yesu apə̀hanula tetəvi uwana anaka məɓəl ala

5Uwaga kà azlamalika à uwana Zəzagəla aɓə̀k atà à ahəŋ, kà aŋa makor gudəŋ uwana adàsa à waŋ aw, ŋgaha à uwana məpəhay babay la abanay aw. 6Tekeɗika la wakità Zəzagəla la abà kà tatsetsèr kà:

ˈMana à dza asik kà mafal sləm la mazlakəŋ ma.

7Kazàŋ à vəɗah la tsəh aŋa azlamalika, kà aŋa kaslà ŋuv la lig la ahəŋ kà, kavàl masləkaway bokuba uwana tasləkawla məŋ sufəl.

8Kà madegolay uwaga à uwana, tafà tatak gesina à tsəh asik aŋha.ˈ#Mahabay 8.4-6

Uwaga kà apəhay kà lakəl aŋa Yesu uwana Kona aŋa dza. Kà uwana tapə̀h kà kiya uwanay, Zəzagəla afà tatak gesina à tsəh aŋha. Uwaga asal magoɗay kà, tatak gesina kà la tsəh aŋha pəra. Ama aŋa lagonay kà, mənaŋa akor azlatatak uwaga la dazuwaya dadàŋ aw. 9Ama məsəl kà Yesu akor azlatatak gesina uwarà. Kà aŋa kaslà ŋuv, Zəzagəla afà à tsəh aŋa azlamalika kà, la vok mahamay aŋa Zəzagəla amə̀ts kà aŋa azladza gesina, kà mas ŋgərpa. La mamətsay aŋa Yesu la uwana, Zəzagəla avàl məŋga, kiya masləkaw sufəl. 10Tatak gesina kà aguwà à waŋ kà la slaka Zəzagəla, aɗahà à atà kà kà aŋha. Kiya uwaga asal kà mapakYesu ala sətaka la ŋgərpa uwana asà, ŋgaha azladza aŋuvaw aŋa magay azlabəza aŋha, ŋgaha kà atà aŋa mad à slaka mazləɓay aŋha à abà. Uwaga kà Yesu la uwana aga atà la huma kà maɓəl atà.

11Yesu la gəl aŋha apaka azladza ala sətaka, atà la Baba tekula, Zəzagəla la uwana Baba aŋatà. Gay gà la uwaga Yesu azala atà ala: Azladeda. Ziruwi azəŋ kà aŋa uwaga aw. 12Gay gà la uwaga agòɗ:

ˈ‘Gədàpəhla sləm aŋak ala la slaka azladeda gulo, ŋgaha la huma maham à ahəŋ aŋa tsəhay aŋak kà mazləɓ ka.’ˈ

13Ŋgaha kà:

ˈ‘Gədàfa vok gulo à kak Zəzagəla à afik.’ˈ

Ŋgaha aya kà:

ˈ‘Gi la uwanay la azladza uwana asakà, kà gəɓəl atà.’ˈ#Mahabay 22.22; Yesayya 8.17-18

14Azladza uwana apəhay la abanay kà, uwaga kà anu uwana la sləɓ vok. Kà uwaga Yesu la gəl aŋha adapakay babay bokuba dza la sləɓ vok, ŋgaha kà la mamətsay aŋha kà aslàla vok aŋa makalàh ndzəɗa aŋa seteni à ahəŋ, uwana aga la maslay kà makaɗ azladza. 15Yesu aɗahàŋ kiya uwanay, kà guba makəs azladza kà mamətsay aya aw. Dagay uwarà tadzadzàràhà vok la guba aŋa mamətsay la abà, la abà gà kà, masla azə̀ɓ guba uwaga ala. 16Ndzer, wakità Zəzagəla apə̀h kà azlamalika la uwana tasà à waŋ kà aŋa mapəhay aw, ama asà à waŋ aŋa mazlak mayyi à tsəh ala aŋa Abəraham. 17Baməraka akə̀s vok kà apakay kiya azladeda aŋha gesina, kà magay məŋ madzahaga uwana aɗàh sləray kà aŋa Zəzagəla, kà masla aŋa mazəɓ tsakana à azladza lakəl ala, ŋgaha asəlla atà vok la masla. Uwaga məŋ madzahaga delga gà ŋgaha masla vok mahamay gà. 18Lagwa aslala vok azlak azlauwana mapapatay apapat atà, kà uwana asà ŋgərpa, ŋgaha agà mapapatayga.

Currently Selected:

Ibəranəŋkowen 2: mfh

Highlight

Copy

Compare