FAATAOTO, 20
20
O LE MATAUPU XX.
1O le uaina, o le faatauemu lea; o le ‘ava, o le faapisapisao lea; o i latou uma o e faaseseina ai, e le popoto i latou. 2O le matautia o le tupu, e tusa lea ma le tagi o le leona taanoa; o lē faaonoono ia te ia, e agasala o ia ia te ia lava. 3E fai ma viiga o le tagata, ina ua nofo sa‘o o ia e le faamisa; a o vale uma, latou te faatuputeleina. 4E le suatia le eleele e le paie, ona o le tausaga maalili; e aiisi o ia i le tausaga e selesele ai saito, a e le maua. 5O le atamai i le loto o le tagata, o le vai loloto lea; a o le tagata faautauta, na te utufia mai ai. 6O le toatele o tagata, e taitasi o i latou ma alagaina lona agalelei; a o ai se na te iloa se tagata faamaoni? 7E savali ma le tonu le ua amiotonu; e manuia lana fanau pe a mavae atu o ia. 8O le tupu o loo nofo i le nofoa faamasino; na te faataapeina mea leaga uma i ona fofoga. 9O ai ea se faapea, Ua ou faamamāina lo‘u loto; ua te‘a a‘u ma a‘u agasala? 10O maa eseese e fua a‘i, ma efa eseese, e faatau inosia ia mea e lua e Ieova. 11E mafai ona iloa o le tama i lana amio; pe sao ona lelei ma le tonu o lana mea e fai. 12O taliga e faalogo ai, ma mata e vaai ai; o Ieova o le na faia ia mea e lua. 13Aua e te naunau i le moe, ina ne‘i faamativaina ai oe; ia e mataala, e te ma‘ona ai i le mea e ‘ai. 14Ua fai mai le e faatau, E leaga, e leaga; ua alu ese o ia, ona mitamita ai lea. 15O i ai auro ma penina e tele; a o laugutu e i ai le poto, o le ipu tāua lea. 16Ia e talia le ofu o le ua fai ma moni o le tagata ese; ma ia talia lana mea e tuu faafaatau ona o le tagata ese. 17E suamalie i le tagata le areto na maua i le pepelo; a e mulimuli ane, ua tumu lona gutu i le iliili. 18E faatumauina mafaufauga i le filifiliga; o le filifili lelei foi ia fai ai taua. 19Ua faaali upu faalilo le ua fealuai ma feaveaveai; o lea aua ne‘i fefaauoai ai ma le ua faamaga pea ona laugutu. 20O le ua fetuu i lona tamā ma lona tinā, e tineia lona lamepa i le pouliuli lava. 21O le oloa ua maua faataalise i le amataga, e le manuia lea i le gataaga. 22Aua e te faapea ane, Ou te taui atu i le leaga; ia e faatalitali ia Ieova, ona faaolaina lea o oe e ia. 23E inosia e Ieova maa eseese e fua a‘i; o fua faatāutau faaaimago e le lelei ia. 24Mai ia Ieova le mea e ui atu ai le tagata; o ai ea le tagata na te iloa lona lava ala? 25O le mailei o le tagata pe a tautala taalise i le mea e faasa; a uma foi ana tautoga, ona suesue ai lea e ia. 26E faataapeapeaina e ua agasala e le tupu poto; e aumaia foi e ia le mea faataavalevale i o latou luga. 27O le mafaufau o le tagata o le lamepa lea a Ieova; o loo suesue i mea uma i totonu o le loto. 28O le alofa ma le faamaoni, la te leoleoina le tupu; e fatumauina lona nofoālii i le alofa. 29O le matagofie o taulelea, o lo latou malosi lea; o le mamalu foi o toeaina, o le ulusinā lea. 30O faalavalava o le manua e faamamaāina ai le leaga; e faapea foi ta i totonu o le loto.
Currently Selected:
FAATAOTO, 20: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
