MIKA, 6
6
O LE MATAUPU VI.
Ua aoai atu le Atua ia te i latou ona o amio eseese.
1Ina faalogo mai ia i le mea o loo fetalai mai ai Ieova, Tu ia i luga, ina finau atu ia i luma o mauga, ia faalogo foi mauga iti i lou leo. 2Outou mauga e, faalogo mai ia i le finauga a Ieova, outou faavae tumau foi o le lalolagi; auā ua ia Ieova le finauga ma lona nuu, e fefinauai o ia ma Isaraelu. 3Lo‘u nuu e, se a ea sa‘u mea ua ou faia ia te oe? ua ou faatiga ia te oe i ni a? ina momoli ia o a‘u. 4Auā na ou faaae mai ia te oe ai le nuu o Aikupito, ma ou faaola ia te oe ai le mea sa nofo pologa ai, na ou aauina foi i ou luma o Mose, ma Arona, ma Miriama. 5Lo‘u nuu e, ina e manatua ia le mea sa filifilia e Palako le tupu o Moapi, ma le mea sa tali atu ai ia te ia e Palaamo le atalii o Peoro, ia e manatua i mea na faia e afua i Setima e oo i Kilikala; ina ia e iloa le agalelei o Ieova.
6Ou te alu atu ma ni a i luma o Ieova, ou te ifo atu ma ni a i le Atua maualuga? Ou te alu atu ea i ona luma ma taulaga mu, ma tamai povi e tasi lo latou tausaga? 7E fiafia ea Ieova i afe o mamoe poa, ma manomano alia o tafe suāuu? Ou te tuuina atu ea la‘u ulumatua e sui a‘i lo‘u solitulafono, o la‘u fanau to tino e sui a‘i le agasala a lo‘u agaga? 8Sole, ua faaali atu e ia ia te oe le mea lelei; se a foi se mea e finagalo ai Ieova ia te oe, pe a le o ia mea, ia fai le amiotonu, ia naunau i le alofa, ma ia feooai ma lou Atua ma le loto faamaulalo?
9O loo alaga le siufofoga o Ieova i le aai, (o le ua poto e iloa e ia lou suafa;) Ia outou faalogo i le sasa ma le ua pule mai ai. 10O loo i ai pea ea i le fale o le tagata amio leaga o le faaputugāoloa e maua i le amio leaga, ma le efa faaaimago e inosia? 11Ou te amio sao ea a o loo i ai fua faatautau faaletatau, ma le taga o loo i ai maa faaaimago? 12Ua tutumu ona tagata mauoa i le faasaua, ua tala pepelo foi i latou o e mau ai, o latou laulaufaiva foi i o latou gutu ua faa‘ole‘ole ia. 13O lenei foi, ou te ta ia te oe e tupu ai lou ma‘i, ou te faatafunaina oe ona o au agasala. 14E te ‘ai, a e le ma‘ona ai, o lou fia ‘ai e ia te oe lea; e te tua au mea, a e le faasaoina ai; o mea foi ua e faasaoina ou te tuuina atu ai i le pelu. 15E te lulu saito, a e te le seleseleina; e te soli olive, a e te le uu oe i le suāuu; atoa ma le suāvine, a e te le inu i le uaina. 16Auā ua tausiusi sauniga a Omeri, ma mea uma ua faia e le aiga o Aapo, ua outou savavali foi i a latou pule, ina ia ou faatafunaina ai oe, ma ia fai ma mea e uisa ai e o mau ai; tou te tauave foi le luma o lo‘u nuu.
Currently Selected:
MIKA, 6: SOV
Highlight
Share
Compare
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
