MATAIO, 2
2
O LE MATAUPU II.
O le malaga a makoi e saili ia Iesu.
1Ua fanau Iesu i Peteleema i Iutaia i ona po o Herota le tupu, faauta, ua oo mai ai makoi mai sasae i Ierusalema, ua faapea mai, 2Po o fea o i ai le ua fanau mai o le tupu o tagata Iutaia? Auā ua matou vaaia lona fetu i sasae, ua matou o mai ai e ifo atu ia te ia. 3Ua faalogo i ai Herota le tupu, ona atuatuvale ai lea o ia atoa foi ma Ierusalema uma. 4Ona ia faapotopotoina ai lea o le au faitaulaga sili uma ma le au tusiupu o le nuu, ua fesili atu ia te i latou, po o fea e fanau ai le Keriso. 5Ona latou fai mai ai lea ia te ia, O Peteleema i Iutaia; auā ua faapea ona tusia e le perofeta, 6O oe foi Peteleema i le nuu o Iuta, e te le topito ona faatauvaa i alii o Iuta; auā e tupu mai ia te oe le faipule, o le na te pule i lo‘u nuu o Isaraelu. 7Ua aami lemu ane e Herota o makoi, ona matuā suesue ai lea ia te i latou i ona po na iloa ai le fetu. 8Ona ia aauina atu ai lea o i latou i Peteleema, ua faapea atu, O atu ia outou, ina matuā saili ia i le tama itiiti; pe a outou iloa, ia outou faailoa mai ia te au, o a‘u foi ou te alu atu ai e ifo atu ia te ia. 9Ua latou faalogo atu i le tupu, ona latou o ai lea, faauta foi, o le fetu na iloa e i latou i sasae, ua muamua atu ia te i latou, ua oo ina tu mai i luga o le mea ua i ai le tama itiiti. 10Ua latou iloa le fetu, ona matuā tele ai lea o lo latou fiafia. 11Ua latou ulufale atu i le fale, ua latou iloa ai le tama itiiti ma Maria lona tinā, ona latou faapauu ai lea, ma ifo atu ia te ia; ua talai foi o latou oloa, ona latou avatu ai lea ia te ia o mea alofa, o le auro, ma le pulu lipano, ma le pulu muro. 12Ua faailoa ia te i latou i le miti, aua ne‘i foi atu ia Herota, ona latou o atu ai lea i lo latou nuu i le tasi ala.
13Ua o i latou, faauta, o le agelu a le Alii ua faaali mai ia Iosefa i le miti, ua faapea mai, Tulai ia, ina ave le tama itiiti ma lona tinā, ma sosola i Aikupito, ma nonofo ai seia ou fai atu ia te oe; auā o le a saili Herota i le tama itiiti ina ia fasioti ia te ia. 14Ua tulai ia, ua ave le tama itiiti ma lona tinā i le po, ona o atu lea i Aikupito. 15Sa i ai foi o ia ua oo ina oti o Herota; ina ia taunuu ai le afioga a le Alii i le perofeta, ua faapea mai, Na ou valaauina lo‘u atalii ai Aikupito. 16Ua iloa e Herota ua olegia o ia e makoi, ona tele ai lea o lona ita, ua aauina atu e ia nisi e fasioti i tama tane uma i Peteleema e oo i ona tuaoi uma, e afua i e ua lua o latou tausaga atoa ma e ua pito ane i ai, e faatatau i ona po na na matuā sueina atu ai i makoi. 17Ona taunuu lea o le upu a le perofeta o Ieremia, ua faapea mai, 18Ua lagona le leo i Rama, o le auega, o le fetagisi, ma le tagitu‘i tele; ua tagiaue Rasela i lana fanau, e le mafai foi ona faanaina o ia, ona o i latou ua leai.
19Ua oti Herota, faauta, o le agelu a le Alii ua faaali mai ia Iosefa i le miti i Aikupito, ua faapea mai, 20Tulai ia, ina ave le tama itiiti ma lona tinā, ina o atu ia i le nuu o Isaraelu; auā ua oti e na sailia le tama itiiti e fasioti. 21Ona tulai ai lea o ia, ua ave le tama itiiti ma lona tinā, ona o ai lea i le nuu o Isaraelu. 22A ua faalogo o ia ua fai ma tupu i Iutaia o Arekilao o le sui o Herota lona tamā, ona fefe ai lea i alu i ai. A e peitai ua faailoa ia te ia i le miti, ona alu ai lea o ia i le nuu o Kalilaia. 23Ua oo foi i le tasi aai e igoa ia Nasareta, ua nofo ai; ina ia taunuu ai o le upu a le au perofeta, E igoa o ia o le Nasareta.
Currently Selected:
MATAIO, 2: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.