LEVITIKO 5
5
O LE MATAUPU V.
O taulaga mo le sese.
1Afai e agasala se tasi i lona faalogologo i upu o le tautoga, o ia lava le molimau, pe na vaai, pe na iloa; afai na te le ta‘ua, e nofo sala lava ia. 2Pe afai foi e pai atu se tasi i se mea leaga, po o le tino mate o se manu o le vao ua leaga, po o le tino mate o se manu fanua ua leaga, po o le tino mate o se mea totolo ua leaga, a ua lilo ia te ia; ona leaga ai lea o ia, ma ua nofo sala ai. 3Pe afai e pai atu i se mea o i le tagata e leaga ai, so se mea leaga e leaga ai o ia, a ua lilo ia te ia; a iloa e ia, ona nofo sala ai lea o ia. 4A tauto foi se tasi, ma le tautala faalemafaufau i ona laugutu e fai se mea leaga, po o se mea lelei, o mea uma ua tautala faalemafaufau ai le tagata i le tautoga, ua lilo foi ia te ia; a iloa e ia, ona nofo sala ai lea o ia i se mea o ia mea. 5A oo ina nofo sala o ia i se mea o ia mea, ia faaali mai e ia ua agasala o ia i lea mea; 6na te au mai foi ia Ieova lana taulaga mo le sese ona o lana agasala ua ia agasala ai, o se manu fafine mai le lafu mamoe, o se tamai mamoe, po o se tamai ‘oti, e fai ma taulaga mo le agasala; e faia foi e le faitaulaga se togiola mo ia ona o lana agasala.
7A le maua e ia se tamai mamoe, ona au mai ai lea e ia ia Ieova ona o lona sese ua ia agasala ai, o le uluga manutagi, po o tamai lupe e lua fua; o le tasi e fai ma taulaga mo le agasala, ma le tasi e fai ma taulaga mu. 8Ona au mai ai lea i le faitaulaga, na te muai avatu foi le manu e fai ma taulaga mo le agasala, ona gagau ese ai lea o lona ulu, ae aua ne‘i motu. 9Na te sausauina atu foi nisi o le toto o le taulaga mo le agasala i le itu o le fata faitaulaga, a o le toto ua totoe, na te tatau ifo ai i lalo o le fata faitaulaga; o le taulaga mo le agasala lea. 10A o lona lua o manu na te fai ai le taulaga mu, e tusa ma le sauniga; e faia foi e le faitaulaga se togiola mo ia ona o lana agasala ua ia agasala ai, ona faamagaloina ai lea o ia.
11A le maua foi e ia le uluga manutagi, po o tamai lupe e lua fua, ona au mai ai lea e le ua agasala o lana taulaga, o lona vaega e sefulu o le efa o falaoa lelei e fai ma taulaga mo le agasala; aua ne‘i tuuina atu i ai ni suāuu, aua ne‘i tuuina atu foi i ai ni pulu lipano; auā o le taulaga mo le agasala lea. 12Ona au mai ai lea e ia i le faitaulaga, ona luluu ai lea e le faitaulaga lana luutaga, o lana faamanatuga lea, ma susunu ai i le fata faitaulaga, e pei o taulaga e fai i le afi ia Ieova; o le taulaga mo le agasala lea. 13E faia foi e le faitaulaga se togiola mo ia ona o lana agasala ua ia agasala ai i se mea o ia mea, ona faamagaloina ai lea o ia; o le falaoa ua toe e faia lea mā le faitaulaga, e pei o le taulaga i mea e ‘ai.
14Ua fetalai mai foi Ieova ia Mose, ua faapea mai, 15A soli tulafono e se tasi, ua agasala foi ma le sese i mea paia a Ieova; ona au mai ai lea e ia ia Ieova se mamoe poa e sao ona lelei mai le lafu mamoe ona o lona sese, i lou lava faatatau i sekeli ario, e tusa ma le sekeli o le malumalu, e fai ma taulaga mo le sese; 16na te taui atu foi ona o le mea ua ia agasala ai i mea paia, ma faaopoopo i ai e tusa ma lona vaega e lima, ma avatu ai i le faitaulaga; e faia foi e le faitaulaga se togiola mo ia i le mamoe poa o le taulaga mo le sese, ona faamagaloina ai lea o ia.
17Afai foi e agasala se tasi, ua faia foi se mea e le tusa ma poloaiga a Ieova i mea uma e le tusa ona fai; e ui lava ina le iloa, e nofo sala lava ia, e ia te ia foi lana agasala. 18Na te au mai foi i le faitaulaga se mamoe poa e sao ona lelei mai le lafu mamoe, e tusa ma lou lava faatatau, e fai ma taulaga mo le sese; ona fai ai lea e le faitaulaga se togiola mo ia ona o le mea ua ia sese ai, ma na le iloa, ona faamagaloina ai lea o ia. 19O le taulaga mo le sese lea; ua ia matuā sese lava i luma o Ieova.
Currently Selected:
LEVITIKO 5: SOV
Highlight
Copy
Compare
Share
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
