AUEGA, 5
5
O LE MATAUPU V.
O le tatalo a Siona i le Atua.
1Ieiova e, ia e manatua le mea ua oo ia te i matou; ina e silasila mai ia, ma ia e silafia le faalumaina o i matou. 2Ua avea lo matou tofi mo tagata ese, ma o matou fale mo nuu ese. 3Ua mātuaoti i matou, ua leai ni tamā; o matou tinā ua pei o fafine ua oti a latou tane. 4Ua matou feinu i vai ua faatauina i tupe; o la matou fafie ua aumaia i le faatau. 5Ua faasauaina i matou i le amo i o matou ua; ua lailoa i matou, ua leai sina mapu ia te i matou. 6Ua matou tuuina atu le lima ia Aikupito ma Asuria, ina ia maoona ai i mea e ‘ai. 7Ua agasala o matou tamā, ua leai foi i latou; a o i matou, ua tauave e i matou a latou sala. 8Ua pule auauna ia te i matou; ua leai se tasi e laveai ia te i matou ai o latou lima. 9O le toa‘i ua matou maua ai la matou mea e ‘ai, ona o le pelu ua i le vao. 10Ua mu o matou pa‘u e peiseai se ogaumu, ona ua velavela o le oge. 11Ua latou fetoso fafine i Siona, o taupou foi i aai o Iuta. 12Na faatautauina alii i o latou lima; sa le ava i toeaina. 13Na latou aveina atu taulelea e olo i maaolo; na taupaū foi tama i avegā fafie. 14Ua tuua e toeaina o le faitotoa, o taulelea foi ua tuu a latou pese. 15Ua mavae le fiafia o matou loto; ua liua la matou siva ma faanoanoa. 16Ua paū le palealii i lo matou ulu; oi talofa ia te i matou nei, auā ua agasala i matou. 17O le mea lea ua vaivai ai o matou loto; o mea ia ua faapouliuligia ai o matou mata; 18auā o le mauga o Siona ua tuufua, ua feoai ai alope. 19O oe, Ieova e, e tumau oe e faavavau; o lou nofoālii e auga tupulaga lea. 20Po o le a ea le mea e te faagalogaloina ai o i matou e faavavau? e te tuua ea o i matou i aso e tele? 21Ieova e, ia e faaliliuina o i matou ia te oe, ona faaliliuina ai lea o i matou; ia e faafouina o matou aso e pei o anamua. 22Auā ua e matuā lafoai ia te i matou; ua toasa tele lava oe ia te i matou.
Currently Selected:
AUEGA, 5: SOV
Highlight
Copy
Compare
Share
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
