IONA, 1
1
O LE MATAUPU I.
Ua auina Iona e Ieova i Nineva. Ua maua e le afā ina o sola i Tasesa.
1Ua oo mai le afioga a Ieova ia Iona le atalii o Amitai, ua faapea mai, 2Ina tulai ia, ina alu i Nineva le aai tele, ma alaga atu i ai; auā ua oo mai a latou agasala i o‘u luma. 3A ua tulai Iona e sola i Tasesa ai luma o Ieova, ua alu ifo foi o ia i Iopa, ma na maua le vaa a alu i Tasesa; ona avatu ai lea e ia o le totogi, ma alu ifo i ai, e o ma i latou i Tasesa ai luma o Ieova. 4A ua tuuina ifo e Ieova le matagi tetele i le vasa, ona afā tetele ai lea i le vasa, se manū a lepetia le vaa. 5Ona matatau ai lea o le auvaa, ma latou taitasi ma valaau i lona atua; ua latou lafo foi le oloa na i le vaa i le sami, e faamāmāina ai. A e peitai o Iona na alu ifo o ia i totonu lava o le vaa; na taoto foi o ia, ma moegase. 6Ona alu atu lea o le aliivaa ia te ia, ma fai atu ia te ia, A faapefea ea oe, lē moe gase? ina tulai ia, ina valaau i lou Atua, atonu e manatu mai le Atua ia te i tatou, ina ia le oti i tatou. 7Ona latou fetautalatalai lea, Ina o mai ia, se‘i tatou faia le vili, ina ia tatou iloa po o ai ua oo mai ai lenei malaia ia te i tatou. Ona latou faia lea o le vili, ua faasaga foi le vili ia Iona. 8Ona latou fai atu ai lea ia te ia, Ina ta‘u mai ia ia te i matou, po o ai ua oo mai ai lenei malaia ia te i tatou? o le a ea lou faiva? o fea ea na e sau ai? o ifea ea lou nuu? o ai ea tagata na e tupu mai ai? 9Ona fai mai ai lea o ia ia te i latou, O a‘u o le Eperu; ou te mata‘u ia Ieova le Atua o le lagi, o le na faia le sami ma le eleele matutu. 10Ona matuā fefefe ai lea o ia tagata, ma latou faapea atu ia te ia, Se a lenei mea ua e faia? Auā na iloa ia tagata ua sola o ia ai luma o Ieova, auā na ia ta‘u atu ai ia te i latou. 11Ona latou fai atu ai lea ia te ia, Se a se mea matou te faia ia te oe, ina ia malū ai le sami mo i matou? Auā ua tuputupu pea le sousou o le vasa. 12Ona fai mai lea o ia ia te i latou, Ina sii ia ia te au, ma lafo ifo ia te au i le sami, ona malū ai lea o le vasa ia te outou; auā ua ou iloa o a‘u ua oo mai ai lenei afā tetele ia te outou. 13A ua taualo faamalosi lava o ia tagata, ina ia toe oo i uta; a ua le mafaia e i latou, auā ua tuputupu pea le sousou o le vasa sa tiga ai i latou. 14Ona latou valaau atu lea ia Ieova, ua faapea atu, Matou te aioi atu ia te oe, Ieova e, aua ne‘i fano i matou ona o le ola o lenei tagata o le aveesea, auā foi ne‘i faaee i luga ia i matou le toto o le tagata e le sala; auā o oe Ieova e, ua e faia le mea ua e finagalo i ai. 15Ona latou sii ae lea ia Iona, ma lafo ia te ia i le sami, ona mavae lea o le sousou o le sami. 16Ona matuā matatau ai lea o ia tagata ia Ieova, ma latou faia le taulaga ia Ieova, ma latou tauto i ni tautoga. 17Na tofia e Ieova le i‘a tele e foloina Iona. Na i ai foi Iona i le manava o le i‘a e tolu ao e tolu foi po.
Currently Selected:
IONA, 1: SOV
Highlight
Share
Compare
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
