ISAIA, 38
38
O LE MATAUPU XXXVIII.
O le ma‘i o Esekia, ma lana tatalo; o lana faafetai ina ua malolo.
1O ona po ia na ma‘i ai Esekia, ua tāli oti. Ona sau ai lea ia te ia o le perofeta o Isaia le atalii o Amota, ua fai mai ia te ia, O loo faapea ona fetalai mai o Ieova, Sauni ia sau mavaega i lou aiga, auā o le a e maliu, e te le soifua. 2Ona liliu atu ai lea e Esekia ona fofoga i le pa o le fale, ua tatalo atu o ia ia Ieova, 3ua faapea atu, Ieova e, ou te aioi atu, ia e manatu mai i lo‘u savali i ou luma ma le faamaoni, ma le loto atoa, ua ou faia foi mea ua e finagalo i ai. Ona tagi lotulotu ai lea o Esekia. 4Ona oo mai ai lea o le afioga a Ieova ia Isaia, ua faapea mai, 5Alu ia, ina e fai atu ia Esekia, O loo faapea ona fai mai o Ieova le Atua o Tavita lou tamā, Ua ou faalogo i lau tatalo, ua ou iloa ou loimata; faauta foi, ou te faaopoopo i aso o lou ola o tausaga e sefulu ma le lima; 6Ou te laveai foi ia te oe ma le aai nei ai le lima o le tupu o Asuria; ou te faamamaluina foi lenei aai. 7O lenei foi le faailoga mai ia Ieova ia te oe e te iloa ai, e faia e Ieova lenei lava mea ua na fetalaia mai. 8Faauta, ou te faafoi atu le ata i vaega na uma ona alu ifo i le mea a Aasa e vaevae ai itu la, ia foi atu i vaega e sefulu. Ona foi atu ai lea o le la i vaega e sefulu, o vaega lava ia ua uma ona alu ifo ai.
9O le tusi a Esekia le tupu o Iuta, ina ua malolo o ia sa ma‘i. 10Na a‘u faapea ane, O le tautuluaga o lo‘u ola ou te ulu atu ai i faitotoa o le tuugamau, e aveesea o‘u tausaga ua totoe. 11Na a‘u faapea ane, Ou te le toe iloa Ioa, o Ioa lava, i le nuu o tagata ola; ou te le toe vaavaai i tagata, faatasi ma e o nonofo i le lalolagi. 12Ua liaiina lo‘u fale, ua aveeseina ia te au e pei o le fale ie o le leoleo mamoe; ua ou taataaia lo‘u ola e pei o lē laga ie; ua na vavaeeseina a‘u i pito manoa; o le aso e tasi e te faaumatia ai a‘u. 13Na a‘u fifilemu seia ao, ona ia momomo ai lea o o‘u ivi uma e pei o se leona; o le aso e tasi e te faaumatia ai a‘u. 14E pei o le pe‘ape‘a, po o le akuru, e faapea lava ona ou iī; ou te tagi e pei o le lupe; ua tiga o‘u mata i lo‘u vaavaai ae; Ieova e, ua puapuagatia a‘u, ia fai oe mo‘u fesoasoani. 15Pe se a se mea ou te fai atu ai? na fetalai mai lava o ia ia te au, o ia foi na ia faia; ou te savali ma le faamaulalo i o‘u tausaga uma, ona o le tiga o lo‘u loto. 16Le Alii e, o mea i e ola ai tagata; o mea uma ia e ola ai lou agaga; e te faamalolo ia te au, e te faaola foi ia te au. 17Faauta, ua suia lo‘u tiga tele i le filemu; na e finagalo e laveaiina a‘u i le lua e faaumatia ai; auā ua e lafoaiina a‘u agasala uma i ou tua. 18Auā e le vivii atu le tuugamau ia te oe; e le faaneenee le oti ia te oe; o e o ifo i le lua latou te le faamoemoe i lou faamaoni. 19O le ua ola, o le ua ola, o ia lava e vivii atu ia te oe, e pei o a‘u lava i le aso nei; e faailoa lou faamaoni e le tamā i lana fanau. 20Ua faaolaina a‘u e Ieova; matou te taia a‘u nekina i le fale o Ieova i aso uma o lo matou ola.
21Auā sa fai atu Isaia, Ia latou ave se potopotogāmati, ma tuu ai o tu‘ivaivai i le mea na fulaga‘i, ona malolo ai lea o ia. 22Sa fai atu foi Esekia, Se a se mea ou te iloa ai, ou te alu ae i le fale o Ieova?
Currently Selected:
ISAIA, 38: SOV
Highlight
Copy
Compare
Share
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
