ISAIA, 27
27
O LE MATAUPU XXVII.
Ua faamafanafanaina tagata o le Atua.
1O lea aso e faasalaina ai e Ieova o leviatana, o le gata tele vave, o leviatana lava, o le gata taataai, e faasalaina lava i lana pelu maaa, ma le tele ma le malosi; e fasimatea lava e ia le tanimo o loo i le vai. 2O lea aso ia outou pepese ai i le tovine. 3O a‘u o Ieova, ou te leoleo i ai; ou te faasūsū pea lava i ai; ou te leoleo lava i ai i le po ma le ao, ne‘i oo i ai se leaga. 4Ou te le ita lava a‘u; ta fia maua laau tuitui ma laau talatala i le taua; ou te alu atu ia te i latou, ou te susunu faatasi lava i latou. 5Pe se‘i tago o ia i lo‘u malosi, ia mā lelei ma ia, e lelei foi o ia ma a‘u. 6O ona po amuli e sosolo ai aa o Iakopo; e fuga mai ma mātala o Isaraelu, ona tumu ai lea o le fogāeleele uma i ona fua. 7Ua na taia ea o ia, e pei ona taia e ia o i latou na taia o ia? po ua fasia o ia, e pei o le fasi na fasia ai e ia? 8Na e finau faatatau ma ia ina ua tulia o ia; na ia avea o ia i lona matagi tetele i le aso na agi mai ai le matagi mai sasae. 9O le mea lea e faamagaloina ai le agasala a Iakopo i lea mea; o ona iuga uma foi ia, ina ia faateaeseina ai lana agasala; pe a faia e ia o maa uma o le fata faitaulaga ia pei o maa panisina ua nutililiia; e le toe tutū i luga o tupua o Asaira ma tupua o le la. 10Auā e tuufua le aai nofo ‘olo, e le āina fale, a e tuulafoaiina e pei o se nuu tuufua; e tataa ai tamai povi, ma latou taooto ai, latou te aai ona la laau. 11Pe a mamago ona la laau, ona gauieseina ai lea: e o mai fafine latou te susunuina; auā e le se nuu mafaufau lea; o le mea lea e le alofagia ai i latou e le na faia i latou, o ia foi na faia i latou na te le alofa lava ia te i latou. 12O lea lava aso e sasa ifo ai e Ieova ona fua, e afua i le mea e tafe ai le vaitafe, e oo atu i le alia o Aikupito; e faapotopotoina foi outou e taitoatasi, o outou le fanauga a Isaraelu. 13O le aso foi lea e ili ai le pu latele, ona o mai ai lea o i latou na fai a fano i le nuu o Asuria, atoa foi ma e na aunuua i le nuu o Aikupito, latou te ifo ia Ieova i le mauga paia i Ierusalema.
Currently Selected:
ISAIA, 27: SOV
Highlight
Copy
Compare
Share
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
