ISAIA, 24
24
O LE MATAUPU XXIV
O le malaia o Iuta, ma le manuia e mulimuli ane ai.
1Faauta, o loo sasaaina e Ieova le nuu ia uma, na te faafaōina, na te faataapeapeina foi e o nonofo ai. 2E iu ina tutusa o le nuu ma le ositaulaga; e tutusa le auauna ma lona alii; e tutusa le auauna fafine ma lona matai fafine; e tutusa le ua faatau atu ma le ua faatau mai; e tutusa le ua avatu mea ma le ua aitalafu; e tutusa le ua talia le totogi faasili ma le ua avatu le totogi faasili. 3E matuā sasaaina le nuu, e matuā vetea lava; auā ua fetalai mai Ieova lenei fetalaiga. 4Ua faanoanoa le lalolagi, ua mamae; ua faavaivai le atu laulau, ua mamae; ua faavaivai alii sili o le nuu. 5Ua leaga le nuu i e o nonofo ai; auā ua latou solia tulafono; ua latou liliu ese le sauniga; ua latou solia le feagaiga e faavavau. 6O le mea lea e faaumatia ai le nuu i le faafano, ua faasalaina foi e o nonofo ai; o le mea lea ua susunuina ai e o nonofo i le nuu; e toaitiiti foi tagata ua totoe. 7Ua faanoanoa le sua vine, ua faavaivai le vine; ua mapuitiga i latou uma e sa olioli o latou loto. 8Ua mavae le fiafia o topa; ua uma le pisa o e na olioli; ua mavae le fiafia o le kitara. 9Ua latou le toe inu uaina ma pepese; e oona le ‘ava ia te i latou o e feinu ai. 10Ua lepetia le aai gaogao; ua punitia fale uma, e le uia. 11O i ala le alaga i le uaina; ua mavae atu le olioli uma; ua alu ese le fiafia o le nuu. 12Ua toe i le aai na o le faatafunaina, ua tu‘ipalaina le puipui. 13Auā e faapea ona fai i le laueleele i totonu o le nuu, e pei ona sasaina ifo o le olive, e pei o nai toe fuifui vine pe a uma le tauga vine. 14Latou te leo tetele, latou te alalaga fiafia, ona o le mamalu o Ieova, latou te alalaga mai le sami. 15O le mea lea ia outou vivii atu ai ia Ieova i le afi, i nuu tuloto i le sami, o le suafa lava o Ieova o le Atua o Isaraelu.
16Ua tatou faalogo i pese mai le tuluiga o le lalolagi; o le viiga i le ua amiotonu; a ua ou fai atu, Ua malaia a‘u nei! ua malaia a‘u nei! Aue a‘u nei! O e faasaua ua latou faasaua, o le saua lava ua faasaua mai ai e ua faasaua. 17Ua ia te oe le nofo i le nuu le mata‘u, ma le lua, ma le mailei faasaua. 18O le ua sola i le leo o le mea e faamata‘u a‘i, e paū o ia i le lua; o le ua alu ae foi i le lua e lavea o ia i le mailei; auā ua faaavanoa pupuni i lugā, e luluina foi faavae o le lalolagi. 19Ua matuā gaugauina le nuu, ua matuā nutililii le nuu, ua matuā luluina le nuu. 20Ua tautevateva le nuu e pei o le tagata onā, ua feluea‘iina e pei o le moega tautau; ua mamafa lona fouvale i luga ia te ia; e paū ai o ia, e le toe tu lava. 21O lea aso foi e faasala ai Ieova i ‘au i lugā i le mea maualuga, atoa ma tupu o le lalolagi i le lalolagi. 22E faapotopotoina i latou pei ona faapotopotoina e ua fusifusia i le lua; e puipuia foi i latou i le fale puipui; a mavae foi aso e tele, ona asiasia ai lea o i latou. 23E faamaina le masina, e masiasi foi le la, auā e fai ma tupu Ieova o ‘au i le mauga o Siona ma Ierusalema, i luma foi o ona toeaina ma le mamalu.
Currently Selected:
ISAIA, 24: SOV
Highlight
Copy
Compare
Share
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
