KENESE, 46
46
O LE MATAUPU XLVI.
Ua alu atu Iakopo ia Iosefa i Aikupito.
1Ona alu atu lea o Isaraelu ma ana mea uma, ua oo atu foi i Peresepa; ua fai ai foi o taulaga i le Atua o lona tamā o Isaako. 2Ona fetalai mai lea o le Atua ia Isaraelu i le faaaliga i le po, ua faapea mai, Iakopo, Iakopo e! Ona tali mai ai lea o ia, O a‘u lenei. 3Ona fetalai mai lea o ia, O a‘u nei o le Atua, o le Atua o lou tamā; aua e te fefe i alu ifo i Aikupito, auā ou te faia oe ma nuu tele. 4O a‘u nei ta te o ifo ma oe i Aikupito, ou te toe aveina ae ai foi ia te oe; e tuu foi e Iosefa ona lima i luga ou mata. 5Ona tulai atu lea o Iakopo i Peresepa, ua avea foi e atalii o Isaraelu lo latou tamā o Iakopo, ma o latou tama iti, ma a latou avā i fata faataavalevale na aauina mai e Farao e ave ai o ia. 6Ua latou avea foi a latou manu ma a latou oloa sa maua e i latou i le nuu o Kanana, i loo ua latou oo atu i Aikupito, o Iakopo atoa uma ma ana fanau faatasi ma ia; 7o ona atalii ma atalii o ona atalii faatasi ma ia, o ona afafine foi atoa ma afafine o ona atalii, ma lana fanau uma lava, ua latou o atu faatasi ma ia i Aikupito.
8O igoa nei o atalii o Isaraelu o e na o atu i Aikupito, o Iakopo ma ona atalii; o le ulumatua a Iakopo o Reupena; o atalii o Reupena; 9o Enoka, ma Falu, ma Esarona, atoa ma Karame. 10O atalii foi o Simeona; o Iemuelu, ma Iaminu, ma Oata, ma Iakinu, ma Soaro, atoa ma Saulo, o le tama lea a le fafine Kanana.
11O atalii foi o Levi; o Keresoma, o Koato, atoa ma Merari. 12O atalii foi o Iuta; o Eru, ma Onani, ma Sila, ma Faresa, atoa ma Sera; (a ua oti Eru ma Onani i le nuu o Kanana;) o atalii o Faresa; o Esarona ma Hamulu. 13O atalii o Isakara; o Tulaga, ma Pua, ma Iopu, atoa ma Semarona. 14O atalii foi o Sepulona; o Seretu, ma Aluna, ma Ialelu. 15O tama tane lava i latou a Lea, na ia fanau ia Iakopo i Patanarama, atoa ma lona afafine o Tina; o ona atalii atoa ia ma ona afafine ua toatolugafulu ma le toatolu.
16O atalii o Kato; o Sefiono, ma Haki, ma Suni, ma Eseponu, ma Eri, ma Aroti, atoa ma Areli. 17O atalii foi o Asera; o Iemina, ma Iesiva, ma Iesivi, atoa ma Peria, i le ma lo latou tuafafine o Sera; o atalii foi o Peria; o Kaveru ma Mekielu. 18O tama nei a Selepa, o le na avatua e Lapana i lona afafine o Lea, na ia fanau mai i latou ia Iakopo, o tama e toatinoagafulu ma le toaono.
19O tama a Rasela, le avā a Iakopo; o Iosefa ma Peniamina. 20Na fanau foi ia Iosefa i le nuu o Aikupito, o e na fanau ia te ia ia Asenati o le afafine lea o Potifere le ositaulaga i Onu; o Manase ma Efaraima. 21O atalii foi o Peniamina; o Pela, ma Pekaru, ma Asepelu, o Kira, ma Naamanu, o Aki, ma Roso, o Mepimu, ma Hupimo, atoa ma Aratu. 22O tama tane ia a Rasela na ia fanau ia Iakopo, o i latou atoa, o tagata e toatinoagafulu ma le toafa.
23O le atalii foi o Tanu; o Husimo. 24O atalii o Nafatali; o Iasielu, ma Kuni, ma Iesaru, atoa ma Selimo. 25O tama nei a Pila, o le na avatua e Lapana i lona afafine o Rasela, na ia fanau mai i latou ia Iakopo, o ona atoa ia o tama e toafitu.
26O tagata uma na o mai ma Iakopo i Aikupito, e na tutupu mai ia te ia, a e le faitaulia avā a atalii o Iakopo, o ona atoa o tagata uma e toaonogafulu ma le toaono. 27O atalii o Iosefa e na fanau ia te ia i Aikupito, o tama e toalua; o tagata atoa uma o le aiga o Iakopo e na o mai i Aikupito e toafitugafulu lava i latou.
28Ua ia auina atu foi Iuta e muamua atu ia te ia ia Iosefa, ina ia faasino e ia ia te ia o Kosena; ona oo atu lea o i latou i le laueleele o Kosena. 29Ona sauni lea e Iosefa o lona nofoa faataavalevale, ua alu ae foi i Kosena la te fetaiai ai ma lona tamā o Isaraelu; ua na iloa atu ia te ia, ona fusi ai lea ia te ia, ma tagi pea lava i lona ua. 30Ona fai atu lea o Isaraelu ia Iosefa, Ia a‘u oti nei lava, ina ua ou iloa atu ou mata, auā ua e ola pea lava. 31Ona fai atu lea o Iosefa i ona uso ma le aiga o lona tamā, Ou te alu ae ma ou ta‘u atu ia Farao, ou te fai atu ia te ia, Ua o mai ia te au o‘u uso ma le aiga o lo‘u tamā o e sa i le nuu o Kanana; 32o leoleo mamoe i latou, auā o tagata faga manu i latou; ua au mai a latou lafu mamoe, ma a latou povi, ma mea uma lava o loo ia i latou. 33A aami mai foi Farao ia te outou, ma fesili ia te outou, Se a lo outou faiva? 34Ona outou fai atu ai lea, O tagata faga manu au auauna talu ina o taulelea i matou ua oo mai i ona po nei, o i matou atoa ma o matou tamā; tou te faapea atu, ina ia nofo outou i le laueleele o Kosena; auā ua inosia lava e le nuu o Aikupito o leoleo mamoe uma lava.
Currently Selected:
KENESE, 46: SOV
Highlight
Copy
Compare
Share
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
