ESEKIELU, 31
31
O LE MATAUPU XXXI.
O le malaia o Farao ona o lona faamaualuga.
1O lona sefulu ma le tasi o tausaga, o lona tolu o masina, o le aso muamua o le masina, na oo mai ai le afioga a Ieova ia te au, ua faapea mai, 2Le atalii e o le tagata, ia e fai atu ia Farao le tupu o Aikupito, ma ona tagata e toatele. Pe faatusaina oe ia te ai i lou mamalu? 3Faauta, o Asuria o le arasi ia i Lepanona, ua matagofie ona la, ua malu foi lona paolo, ua tele foi lona maualuga; sa i totonu o la felefele lona tumutumu. 4O le vai na tupu tele ai o ia, o vai loloto foi na maualuga ai o ia, o ona vaitafe na tafe faataamilomilo i lana faatoaga, ma ona vaita‘i na tafe atu i laau uma o le vao. 5O le mea lea na faasilisili ai lona maualuga i laau uma o le vao, na tele foi ona lālā, ma ona la na loloa i le vai tetele i lona tupu atu. 6Na ofaga manu felelei uma i ona lālā, na fanafanau foi manu tataa uma i lalo ifo o ona la; sa nonofo foi nuu tetele uma i lalo ifo o lona paolo. 7Na matagofie foi o ia i lona tele, ma le loloa o ona la; auā na i ai ona aa i tafatafa o vai tetele. 8Na le lilo lava ia i arasi o i le faatoaga o le Atua; na le tutusa perosi ma ona lālā; na le tutusa foi aremoni i ona la; e leai foi se tasi laau i le faatoaga o le Atua na tusa ma ia i lona matagofie. 9Na ou faamatagofieina o ia i le tele o ona la, na matataua ai ia te ia o laau uma o Etena i le faatoaga o le Atua. 10O le mea lea o loo faapea ona fetalai mai ai o le Alii o Ieova, Na faasilisili oe i lou maualuga, ma ua avea i luga lona tumutumu i totonu o la felefele, ua faamaualugaina foi lona loto i lona sili. 11O le mea lea ua ou tuuina atu ai o ia i le lima o le ua malosi silisili i nuu; na te faia lona lava loto ia te ia; ua ou tulieseina o ia, ona o lana amio leaga. 12O tagata ese o e ua matautia i nuu, na latou tuu i lalo ia te ia, ma latou tuua o ia; ua pauu foi ona la i mauga ma vanu uma, ua gauia foi ona la i tafatafa o vaitafe uma o le nuu; ua o ese foi tagata uma o le nuu nai lalo ifo o lona paolo, ma latou tuua lava o ia. 13E nonofo foi manu felelei uma i ona luga a o taatia; e i ai foi i ona la o manu tataa uma. 14Ina ia le faasilisili se tasi lava laau i tafatafa o vai ona o lo latou maualuluga, pe avea i luga o latou tumutumu i totonu o la felefele; pe tutū i luga i latou ia te i latou i lo latou sili o i latou uma o e inu vai; auā ua tuuina atu i latou uma ia mamate i mea maulalo o le lalolagi, e faatasi ma le fanau a tagata, e faatasi foi ma e o ifo i le lua. 15Ua faapea ona fetalai mai o le Alii o Ieova, O le aso na alu ifo ai o ia i seoli na ou faatupuina ai le faanoanoa; na ou ufiufitia vai loloto ona o ia, na ou taofi ona tafega, na punitia foi vai tetele, na ou faatupuina foi le faanoanoa o Lepanona ona o ia; na matapogia ai laau uma o le vao ona o ia. 16Na ou faagateteina foi nuu i le taalili o lona paū, ina ua ou lafoina o ia i lalo i seoli faatasi ma e o ifo i le lua; o laau uma foi o Etena o e silisili ma lelei i Lepanona, o i latou uma e inu vai, ua faamafanafanaina i latou i mea maulalo o le lalolagi. 17O i latou lava, na latou o ifo faatasi ma ia i seoli ia te i latou o e ua fasia i le pelu; o lona lima foi, o e sa nonofo i lalo ifo o lona paolo i nuu. 18Pe faatusaina oe ia te ai i le mamalu ma le tele i laau o Etena? a e lafoina oe i lalo faatasi ma laau o Etena i mea maulalo o le lalolagi; e te taatia faatasi ma ē le peritomeina, ma e ua fasia i le pelu. O Farao lea ma lona vao tagata uma, o loo fetalai mai ai le Alii o Ieova.
Currently Selected:
ESEKIELU, 31: SOV
Highlight
Copy
Compare
Share
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
