ESEKIELU, 25
25
O LE MATAUPU XXV.
O le faatafunaina o Amoni, ma Moapi, ma Etoma, ma Filisitia.
1Ua oo mai foi le afioga a Ieova ia te au, ua faapea mai, 2Le atalii e o le tagata, ia faasaga ou mata i le fanauga a Amoni, ma vavalo atu ia te i latou; 3ma fai atu i le fanauga a Amoni, Faalogo mai ia i le afioga a le Alii o Ieova. O loo faapea ona fetalai mai o le Alii o Ieova, Sa e fai mai, Ue! i lo‘u malumalu ina ua faaleagaina, ma le laueleele o Isaraelu ina ua faatafunaina, ma le aiga o Iuta ina ua latou o i le tafeaga; 4o le mea lea, faauta, ou te tuuina atu ai oe i tagata mai sasae e fai mo latou tofi, latou te faatuina o latou ‘olo i lou nuu, ma fai o latou fale i lou nuu; latou te aai foi i au fua, ma inu i lau suāsusu. 5Ou te tuuina foi Rapa e fai ma lotoā a kamela, ma le laueleele o le fanauga a Amoni e fai ma mea e taooto ai lafu mamoe; tou te iloa ai o a‘u lava o Ieova. 6Auā ua faapea ona fetalai mai o le Alii o Ieova, Na e pati lima, ma tatū lou vae, ma ua e olioli ma le matuā ‘ino‘ino lava o lou loto i le laueleele o Isaraelu; 7o le mea lea, faauta, ou te faaloaloa ai lo‘u lima i luga ia te oe, ma ou tuuina atu oe e fai ma vete mo nuu ese, ou te vavae ese ia te oe i nuu, e fano foi oe ia te au ai atu nuu; ou te faaumatia oe; ona e iloa ai lea o a‘u lava o Ieova. 8Ua faapea ona fetalai mai o le Alii o Ieova, Ua fai mai Moapi ma Seira, Faauta, e tusa le aiga o Iuta ma nuu uma. 9O le mea lea, faauta, ou te faaavanoaina ai le itu o Moapi i aai, o ona aai foi i ona tuaoi, o le matagofie foi o le nuu, o Petesemota, o Paalameona, ma Kiriataima; 10ou te faaavanoa ai i tagata mai sasae, ma ou tuuina atu ai e faatasi ma le fanauga a Amoni e fai mo latou tofi, ina ia le toe manatua le fanauga a Amoni i nuu. 11Ou te faasalaina foi ia Moapi; ona latou iloa ai lea o a‘u lava o Ieova.
12Ua faapea ona fetalai mai o le Alii o Ieova, Ua matuā taui ma sui e Etoma i le aiga o Iuta, ma ua matuā nofo sala lava, ua latou taui atu lava ia te i latou; 13o le mea lea ua faapea ona fetalai mai ai o le Alii o Ieova, Ou te faaloaloa atu foi lo‘u lima i luga o Etoma, ma ou faaumatia tagata atoa ma manu o i ai; ou te faatafunaina ai, e pau mai i Timanu, e pau atu i Titana, e oti i latou i le pelu. 14Ou te faaoo foi le taui ia Etoma i le lima o lo‘u nuu o Isaraelu; latou te faia ia Etoma e tusa ma lo‘u ita, e tusa foi ma lo‘u ita tele, latou te iloa ai le taui mai ia te au, o loo fetalai mai ai le Alii o Ieova. 15Ua faapea ona fetalai mai o le Alii o Ieova, Ua taui atu e Filisitia, ua matuā taui ma sui ma le ‘ino‘ino o le loto e faaumatia ai i le itatuu; 16o le mea lea ua faapea ona fetalai mai ai o le Alii o Ieova, Faauta, ou te faaloaloa atu lo‘u lima i luga o Filisitia, ma ou faaumatia Kereti, e fano foi ia te au e o totoe i nuu tu matafaga. 17Ou te faaoo atu ia te i latou le taui tele ma aoaiga e ogo lava; latou te iloa ai o a‘u lava o Ieova, pe a ou faaoo atu ia te i latou le taui mai ia te au.
Currently Selected:
ESEKIELU, 25: SOV
Highlight
Copy
Compare
Share
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
