ESOTO 29
29
O LE MATAUPU XXIX.
O le taulaga e fai pe a tofia Arona ma ona atalii i le faiva o faitaulaga.
1O lenei foi le mea e te faia e faapaiaina ai i latou, ina ia latou auauna mai ia te au i le faiva o le ositaulaga; e te ave le povi poa taanoa e tasi, ma mamoe poa e lua e sao ona lelei; 2ma le areto e le faafefeteina, ma potoi areto e le faafefeteina, e palua ma le uu, ma areto manifinifi e le faafefeteina, ua nini i le uu; o le falaoa o le saito e te fai ai ia mea. 3E te tuuina foi ia mea i le ato e tasi, ma e au mai ai ma le ato, atoa ma le povi poa taanoa, ma mamoe poa e lua. 4O Arona foi ma ona atalii, e te faalatalataina mai i latou i le faitotoa o le fale fetafai o le faapotopotoga, ma ia e faataele ia i latou i le vai. 5E te ave foi ofu, ma faaofuina ai Arona i le ofu tino, ma le ofu talaloa o le efota, ma le efota, ma le ufifatafata, ma e fusi ia te ia i le fusi faalanu eseese o le efota. 6E te faapulou foi ia te ia i le pulou ie, ma e fusi le pale paia i le pulou ie; 7ona e ave lea le uu e faauu ai, ma liligi i luga o lona ulu, ma ia e faauuina ai o ia.
8E te faalatalata mai foi ona atalii, ma faaofuina i latou i ofu tino. 9E te fusi ia te i latou i fusi, o Arona atoa ma ona atalii, ma faamau o latou pulou; e fai foi mo latou le faiva o ositaulaga, o le tulafono e faavavau; e te tofia foi Arona ma ona atalii. 10E te ta‘ita‘iina mai foi le povi poa taanoa i luma o le fale fetafai o le faapotopotoga; e faaee foi e Arona ma ona atalii o latou lima i luga o le ulu o le povi poa taanoa. 11Ona e fasi lea o le povi poa taanoa i luma o Ieova i le faitotoa o le fale fetafai o le faapotopotoga. 12Ona e ave lea nisi toto o le povi poa taanoa, ma tuuina i luga o nifo o le fata faitaulaga i lou tamatamai lima; a o le toto uma e te sasaaina lea i lalo o le fata faitaulaga. 13E te ave foi le ga‘o alo uma lava, atoa ma le ga‘o punipu o i luga o le finagalo, ma ona fatuga‘o e lua, ma ga‘o o i ai, ma ia e susunu ai i luga o le fata faitaulaga; 14a o le aano o le povi poa taanoa, ma lona pa‘u, ma lona otaota, ia e susunuina lava i le afi i tua o le toagālauapi; o le taulaga lea mo le agasala. 15Ona e ave lea o le tasi mamoe poa; e faaee foi e Arona ma ona atalii o latou lima i luga o le ulu o le mamoe poa. 16E te fasi foi le mamoe poa, ma ave lona toto, ma sausau ia soo ai i le fata faitaulaga. 17E te pena foi le mamoe poa i ona tufaaga, ma ia e mulumulu ona tōtōga ma ona alaga, ona tuuina ane lea i ona tufaaga, ma lona ulu. 18Ia e susunu foi le mamoe poa atoa uma i le fata faitaulaga; o le taulaga mu lea ia Ieova, o le mea manogi lelei, o le taulaga e fai i le afi ia Ieova.
19E te ave foi lona lua o mamoe poa; e faaee foi e Arona ma ona atalii o latou lima i luga o le ulu o le mamoe poa. 20E te fasi le mamoe poa, ma ia ave sina ona toto, ma tuu i le tumutumu o le taliga taumatau o Arona, ma le tumutumu o taliga taumatau o ona atalii, o lima matua foi o latou lima taumatau, ma vae matua o latou vae taumatau, ma ia sausau ia soo le fata faitaulaga i le toto. 21E te ave foi nisi toto o i luga o le fata faitaulaga, ma nisi uu e faauu ai, ma ia e sausau ai i luga o Arona ma ona ofu, atoa ma ona atalii ma ofu o ona atalii faatasi ma ia; ona faapaiaina lea o ia, ma ona ofu, ma ona atalii, atoa ma ofu o ona atalii faatasi ma ia.
22Ia e ave foi tufaaga o le mamoe poa, o le ga‘o, ma le iu, ma le ga‘o alo, ma le ga‘o punipu i luga o le finagalo, ma ona fatuga‘o e lua, ma ga‘o o i ai, ma le alaga taumatau; auā o le mamoe poa ia o le tofiga; 23ma le areto e tasi, ma le potoi areto e tasi e fai i le uu, ma le areto manifinifi e tasi mai le ato o le areto e le faafefeteina o i luma o Ieova. 24E te faaee foi ia mea uma i alofilima o Arona ma alofilima o ona atalii; ma ia e luluina, o le taulaga lulu lea i luma o Ieova. 25E te talia foi ia mea ai o latou lima, ma e susunuina i le fata e fai ai taulaga mu, e fai ma mea manogi lelei i luma o Ieova; o le taulaga lea e fai i le afi ia Ieova. 26Ia e ave foi le fatafata o le mamoe poa i mea e tofia a‘i Arona, ma e luluina, o le taulaga lulu lea i luma o Ieova; e fai foi lea ma ou tufaaga. 27E te faapaia foi le fatafata o le taulaga lulu, ma le alaga o le taulaga sii, o loo luluina ma siitia, o tufaaga ia o le mamoe poa i mea e tofia a‘i Arona atoa ma ona atalii; 28e fai ia mo Arona ma ona atalii, mai le fanauga a Isaraelu o le tulafono e faavavau; auā o le taulaga sii lea; e fai foi lea ma taulaga sii, mai le fanauga a Isaraelu ai o latou taulaga faafetai, o la latou taulaga sii lea ia Ieova.
29O ofu sa foi o Arona, e fai mona atalii pe a mavae atu o ia, ina ia faauuina ai i latou, ma tofia ai i latou. 30O sona atalii e sui a‘i o ia i le faiva o ositaulaga, e ofu ai o ia e fitu ona aso, pe a alu ia i le fale fetafai o le faapotopotoga e auauna ai i le mea paia.
31E te ave foi le mamoe poa o le tofiga, ma tunu lona tino i le mea paia. 32E aai foi Arona ma ona atalii le tino o le mamoe poa, ma le areto ua i le ato, i le faitotoa o le fale fetafai o le faapotopotoga. 33Latou te aai foi ia mea ua fai a‘i togiola, e tofia ai ma faapaiaina ai i latou; a e aua le ‘ai ai se tagata ese, auā e paia lava ia mea. 34Pe afai foi e toe sina aano i taulaga o le tofiga, po o le areto, e oo i le taeao, ona e susunu ai lea o le mea e toe i le afi; e le ‘aina, auā e paia lava lea mea. 35Ia e fai faapea lava ia Arona ma ona atalii, e pei o mea uma lava na ou fai atu ai ia te oe; o aso e fitu ia e fai ai le tofia o i latou. 36Ia e saunia foi le povi poa taanoa i lea aso ma lea aso, e fai ma taulaga ona o le agasala e togiola a‘i; ia e faamamā foi le fata faitaulaga, pe a e faia le togiola i ona luga, e te faauu ai ia faapaiaina a‘i. 37E fitu aso e te fai ai le togiola i le fata faitaulaga, ma faapaiaina ai, e fai ai ma fata faitaulaga e sili ona paia; o mea uma foi e papai ane i le fata faitaulaga e paia lava ia.
38O lenei foi le mea e te faia i luga o le fata faitaulaga, e tailua tamai mamoe e tasi lo la tausaga i lea aso ma lea aso, e le aunoa. 39O le tasi tamai mamoe e te saunia i le taeao, o le tasi foi tamai mamoe e te saunia i le afiafi. 40O le tamai mamoe e tasi ma le omera e tasi o falaoa lelei, e palua ma lona vaega e fa o le sinu o uu ua tu‘ia; o lona vaega e fa foi o le sinu o uaina mo le taulaga i mea e inu. 41O le tasi foi tamai mamoe e te saunia i le afiafi, e tusa ma le taulaga i mea e a‘i i le taeao, e tusa foi ma le taulaga i mea e inu e te faia; o le mea manogi lelei lea, o le taulaga e fai i le afi ia Ieova. 42E faia lenei ma taulaga mu e le aunoa i o outou tupulaga amuli i le faitotoa o le fale fetafai o le faapotopotoga i luma o Ieova, o le mea tatou te fetaiai ai ma outou, ina ia ou tautala atu ia te oe i lea mea. 43Tatou te fetaiai ai ma le fanauga a Isaraelu i lea mea; e faapaiaina ai foi i lo‘u mamalu. 44Ou te faapaiaina foi le fale fetafai o le faapotopotoga ma le fata faitaulaga; o Arona foi ma ona atalii ou te faapaiaina i latou e fai le faiva o ositaulaga ia te au. 45Ou te nofo faatasi ma le fanauga a Isaraelu; e fai a‘u mo latou Atua; 46latou te iloa foi, o a‘u o Ieova o lo latou Atua, o le na aumaia i latou nai le nuu o Aikupito, ina ia ou nofo ma i latou; o a‘u o Ieova lo latou Atua.
Currently Selected:
ESOTO 29: SOV
Highlight
Copy
Compare
Share
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
