GALUEGA, 15
15
O LE MATAUPU XV.
O le finauga i le peritome.
1Na o ifo foi nisi tagata mai Iutaia, ma latou a‘oa‘o atu i le au uso, e faapea atu, Afai e le peritomeina outou pei o le tu a Mose, e le mafai ona faaolaina o outou. 2Sa tele le upu ese ma le fefinauai o i latou ma Paulo ma Panapa, ona latou totofi lea ia Paulo ma Panapa, atoa ma isi o i latou, ia o ae i le au aposetolo ma toeaina i Ierusalema i lenei finauga. 3Ua molia foi i latou e le ekalesia, ua ui atu i latou i Foinie ma Samaria, ua faamatalaina atu ai le liliu mai o nuu ese; ua faatupu atu foi le olioli tele i le au uso uma lava. 4Ua oo i latou i Ierusalema, ona talia lea o i latou e le ekalesia, ma le au aposetolo, ma toeaina, ua la folafolaina atu mea e tele ua faia e le Atua e i laua. 5Ona tutū mai lea o isi o le itu aiga a le au faresaio e ua faatuatua, ua faapea ane, E tatau ona peritomeina i latou, ma fai atu ia te i latou ia tausi le tulafono a Mose.
6Ona faapotopoto lea o le au aposetolo ma toeaina e filifili i lenei mea. 7Ua tele le fefinauai, ona tu lea o Peteru i luga, ua faapea atu ia te i latou, Le au uso e, ua outou iloa ua leva ona filifili e le Atua so tatou, ia logona mai e tagata o nuu ese le upu o le tala lelei i lo‘u nei gutu, ma latou talitonu i ai. 8O le Atua foi o lē silafia loto, ua molimau o ia ia te i latou i lona foai atu o le Agaga Paia ia te i latou, pei o i tatou nei. 9Ua na le faaeseeseina foi o i tatou ma i latou i lona faamamāina o latou loto i le faatuatua. 10O lenei, se a le mea tou te faaonoono atu ai i le Atua i lo outou faaee atu i ua o le au soo le amo ua le lavā tauave e o tatou tamā po o i tatou nei? 11A e peitai ua tatou taofi, o le alofa tunoa o le Alii o Iesu Keriso e faaolaina ai i tatou, faapei o i latou lava. 12Ona faalologo lea o le toatele uma lava, ma faalogologo mai ia Panapa ma Paulo, o loo faamatalaina atu o faailoga ma vavega e tele ua faia e le Atua i nuu ese e i laua. 13Ua uma a la upu, ona fai mai lea o Iakopo, ua faapea mai, Sema e, le au uso e, faalogo mai ia ia te au; 14ua talaina mai e Simona i le uluai silasila o le Atua i nuu ese e maua ai se nuu mo lona suafa. 15Ua ‘au faatasi foi ma lenei mea upu a le au perofeta, pei ona tusia. 16A mavae nei mea ou te foi atu, ma ou toe fai le fale ie o Tavita ua paū, ma ou toe ati ae mea lepetia o i ai, ma toe faatuina; 17ina ia saili atu i le Alii tagata ua totoe, ma nuu uma lava o e ua faaigoaina i lo‘u igoa; ua fetalai mai ai le Alii, o le na te faia nei mea uma. 18Ua silafia e le Atua ana galuega uma lava talu mai le vavau. 19O lenei, o lo‘u lea manatu, ia soia le faalavelave i tagata o nuu ese ua liliu mai i le Atua; 20a ia tusi atu ia te i latou, ia taumamao i latou i mea leaga e fasia mo tupua, ma le faitaaga, ma mea titina, ma le toto. 21Auā talu o tupulaga anamua ua ia Mose e ua tala‘i ia te ia i lea aai ma lea aai, o faitauina i sunako i sapati uma lava.
22Ona lelei ai lea i le au aposetolo, ma toeaina, atoa ma le ekalesia uma, e filifili ma aauina atu i Anetioka faatasi ma Paulo ma Panapa, ni o latou tagata, o Iuta e igoa ia Pasapa atoa ma Sila, o tagata ua ta‘ua i le au uso; 23ua tusi atu nei upu ia ave e i latou, O loo alolofa atu le au aposetolo, ma toeaina, atoa ma le au uso i le au uso o tagata o nuu ese o i Anetioka, ma Suria, ma Kilikia. 24Ua matou faalogo atu, ua faatupuina lo outou atuatuvale e nisi e na o atu sa ia te i matou, i a latou upu, ma latou faaliliu ese o outou loto, ua faapea atu, Ia peritomeina outou, ma ia tausi le tulafono; 25matou te lei poloai atu ai; o le mea lea ua lelei ai ia i matou nei ua faapotopotoina ma le loto gatasi, e filifili ma aauina atu ia te outou tagata faatasi ma o matou uso pele o Panapa ma Paulo, 26o tagata ia ua tuulafoaiina o laua ola ona o le suafa o lo tatou Alii o Iesu Keriso. 27O le mea lea ua matou aau atu ai ia Iuta ma Sila, la te ta‘u atu foi i a laua upu i ia lava mea. 28Auā ua lelei i le Agaga Paia ma i matou nei, ia le faaee atu se tasi avega ia te outou, na o nei mea e tatau; 29ia faamamao outou i mea e fasia mo tupua, ma le toto, ma mea titina, ma le faitaaga; afai tou te taumamao ma nei mea, e lelei ai outou. Ia outou manuia.
30Ua tuuina atu i latou e ō, ona oo atu lea o i latou i Anetioka; ua faapotopoto mai foi e i latou le motu o tagata, ua tuu atu ai le tusi. 31Ua latou faitauina, ona olioli lea o i latou ona o le faamafanafanaga. 32O Iuta foi ma Sila, auā o perofeta i laua, ua la faamafanafana atu, ma faamalosi atu i le au uso i upu e tele. 33Ua la fai po ai, ona tuuina atu lea o i laua e le au uso ia o ma le manuia, i le au aposetolo. 34A ua lelei ia Sila e nofo ai pea. 35O Paulo foi ma Panapa ua nonofo i laua i Anetioka, ma isi foi e toatele, ua a‘oa‘o ma folafola atu le afioga a le Alii.
36Ua mavae isi aso, ona fai atu lea o Paulo ia Panapa, Ina ta foi atu ia, ta asiasi atu i o ta uso i aai uma lava sa ta tala‘i i ai le afioga a le Alii, pe faapefea i latou. 37A ua loto Panapa ia latou o ma Ioane, o le ua igoa ia Mareko. 38A ua manatu Paulo, e le tatau ona latou o ma le na alu ese ia te i laua i Pafulia, ma ua le o ma i laua i le galuega. 39Ona tiga tele lea o loto, ua te‘a eseese ai i lana; ona la o lea o Panapa ma Mareko ua folau atu i Kuperu; 40a ua filifilia e Paulo ia Sila, ma alu atu, ua tuuina atu o ia e le au uso i le alofa tunoa o le Atua. 41Ua ui ane o ia i Suria ma Kilikia, ua faamalosi i ekalesia.
Currently Selected:
GALUEGA, 15: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
