เสฟันยา 2
2
เว่ย ก๋อม เญย เมี่ยน หฒุ ตี่ง ฒุ์ย
1ไม้ ฮิ้ว ตุ๊ ไญ้ เญย กั๊วะ เญย แปะ ฝีง
ต้าย กั๊บ ฒุ้น, กั๊บ ฒุ้น ม่าะ!
2ต้าย ด่าง เม่ย บัว หฒุ หฒุ่น เปย๋า
ฮนั้ง หฑยาว ป่วน เบี๊ยะ-โธว นอ.
ต้าย ด่าง เม่ย บัว หฒุ เฒี้ยว เญย กะเฉีย แป๊ด ธ้วด,
ต้าย ด่าง เม่ย บัว หฒุ เฒี้ยว โน์ว เมี่ยน เญย ฮนอย.
3เม่ย บัว เหยียด ฒู้ง เยียม เต่ย-ปูง เหญี่ยม กั้น โหฒว ไฝ เญย เมี่ยน,
เซ ต้ง กัน นิ่น เญย เล์ย-หลัด วั้ว เต๋ย,
เม่ย บัว อ๋อย หฒุ ล์อ เฒี้ยว.
ล์อ โหฒว หอบ เญย เจ๊า,
เหญี่ยม กั้น โหฒว ไฝ,
เถา เฒี้ยว เฉีย เจี์ย เญย ฮนอย
เหฑีย เม่ย บัว ไฮ่ ปี๋ง ตุ๊ เจี๊ยน.
ฟีลิสะเตีย หฒุ ตี่ง ฒุ์ย
4กาซา อ๋อย หฒุ กวั่ง ฮวาง,
อัดเคโลน อ๋อย หฒุ ป่าย หว่าย,
ลู่ง เหฒียง อ๋าน อัดโดด เมี่ยน ฒู้ง หฒุ หฒุ่น ธ้วด เหฑ่ง,
เอโคโลน เลี่ยม กอน หฒุ แปง ธ้วด.#อิสะยา 14:29-31; เยเลมี 47:1-7; เอเสเคน 25:15-17; โยเอน 3:4-8; อาโม้ด 1:6-8; เสคาลิยา 9:5-7
5โอ เม่ย บัว เยียม ค้อย-เฮลน เญย เคเลที เมี่ยน อ้า!
เม่ย บัว อ๋อย หฒุ โค้ว อ๊ะ.
โอ คานาอัน, ฟีลิสะเตีย เมี่ยน เญย เต่ย-ปูง อ้า!
เฒี้ยว เญย หว่า ก๊อง เม่ย อ๊ะ.
“เยีย ฒู้ง อ๋อย เหมียด เม่ย,
เถา ไม้ เหฒ่ง เหยียด ล่าน เมี่ยน เยียม.”
6ค้อย-เฮลน อ๋อย หฒุ ทิ้ว เป๋น เมี้ย-เธี้ยง,
เป๋น โก๋ว ยู่ง เมี่ยน เยียม เญย ต๋อง,
หย่า โหฒว ยู่ง กวั้น เญย ล่าน.
7น้าย ค้อย-เฮลน เญย เดา ฯฒฯ เป๋น
ยูดา เญย เฒ้ย-ฟุน เหฒ่ง เหฌี่ย เญย เมี่ยน ตุ๊ เญย ป่วน.
นิ่น บัว ฯฒฯ เยียม วั้ว ปู๋ง ยู่ง.
ลู่ง ม์าน-หฮมวัง นิ่น บัว ตุ๊ เปว๋ย อัดเคโลน ฒี่ง เญย เปย๊า,
เหว่ย หฒุ เฒี้ยว, นิ่น บัว เญย ทิน-ฮู่ง, อ๋อย โก๋ว นิ่น บัว,
อ๋อย ปุน นิ่น บัว ตุ๊ หลง ฮนั้ง โล์ วั้ว นอ.#2:7 ไฟ “ปุน หฒุ ธ้าง มี่ง เญย เมี่ยน ตุ๊ หฑวน ต้าย”.
โมอับ เหธา อัมโมน หฒุ ตี่ง ฒุ์ย
8“เยีย ไฮ์ โมอับ เมี่ยน ก๊อง โตะ,
หย่า ไฮ์ อัมโมน เมี่ยน ก๊อง ฮว้วด.
นิ่น บัว ก๊อง โตะ เยีย เญย แปะ ฝีง,
ปู๋ง หว่า-เหมา ก๊อง อ๋อย แฑง นิ่น บัว เญย กั๊บ-จ๋าย.”#อิสะยา 15:1—16:14; 25:10-12; เยเลมี 48:1—49:6; เอเสเคน 21:28-32; 25:1-11; อาโม้ด 1:13-15
9เน่น เจี๋ย เญย เฒี้ยว, อิสะลาเอน เญย ทิน-ฮู่ง ก๊อง,
“เยีย เฒี้ยง เจี๊ยน เยีย กั้น, ต้ง เฒี่ยง เจี๊ยน เญย ทิน-ฮู่ง, แล์ง หว่า,
โมอับ อ๋อย หฒุ ฮนั้ง โสโดม,
อัมโมน หย่า ฮนั้ง โกโมลา,#ทิน เต่ย โต้ว 19:24
ฯฒฯ เป๋น ธ้วด ฌิ้ม เญย เมี้ย เหธา เฑ้า-ค้วด เญย ต๋อง,
เหยียด ลิ์ว เป๋น เดา-ฮวาง.
เยีย เหฒ่ง เหฌี่ย เญย แปะ ฝีง อ๋อย ลู้ นิ่น บัว,
เยีย เญย กั๊วะ ตุ๊ แหม่ง ธ้วด เญย เมี่ยน
ฒู้ง ตุ๊ หฑิบ นิ่น บัว เญย เต่ย-ปูง.”
10น้าย เต๋ย สี่ อ๋อย หฒุ วิ่น ปุน นิ่น บัว,
หลาย นิ่น บัว เหมา, นิ่น บัว เธง-โฮล ฮว้วด
เน่น เจี๋ย เญย เฒี้ยว เญย แปะ ฝีง.
11 เฒี้ยว อ๋อย โหฒว ปุน นิ่น บัว กั้ม เหฑีย ไห่!
ฒู้ง ปุน ลู่ง เดี๊ย เญย หฒวัง เฒี่ยน ไจ่ เจี๊ยน เหฌี่ย.
นอมๆ กั๊วะ เญย แปะ ฝีง,
เก๊าะ-เมี่ยน อ๋อย เยียม เก๊าะ-เมี่ยน กั้น เญย ต๋อง ป๋าย เฒี้ยว.
เอทีโอเปีย หฒุ ตี่ง ฒุ์ย
12โอ เอทีโอเปีย เมี่ยน อ้า! เม่ย บัว ฟี่ ฮนั้ง เญย
อ๋อย หฒุ เยีย เญย หฑุ ด๊าว ไต๋.#อิสะยา 18:1-7
อัดซีเลีย หฒุ ตี่ง ฒุ์ย
13 เฒี้ยว อ๋อย ซูง ธ้วด นิ่น เญย ปั์ว เบ๊าะ ป๊ะ ปูง, หย่า เหมียด อัดซีเลีย.
นิ่น อ๋อย ปุน นินะเว เป๋น ฒี่ง ฮวาง,
ฮนั้ง นอม ฆาย ไห่ เญย เต่ย-ปูง-ฮวาง,#อิสะยา 10:5-34; 14:24-27; นาฮูม 1:1—3:19
14เป๋น ง่ง กวั้น, ยู่ง กวั้น
เหธา หญู่งๆ แซง-คู้ เปว๋ย เญย ต๋อง.
เหนาะ กู๊ ลง เปน เหธา เหนาะ มล่ม
อ๋อย เยียม วั้ว เดี้ยว เตว๊ย-เมว์ย โหฒว เล์า.
เยียม ฟง ม่วน ม่าย เหนาะ เห่ว เญย เฉีย,
เหนาะ อา เยียม แก้ง ด่าง เห่ว.
หล่ง โหฒว เปย๊า เญย สีดา ฒ่ง เดี๋ยง หย่า อ๋อย หฒุ แธะ เหฑ่ง.#2:14 ม่าย เต๋ย โซว ก๊อง, “หฒุ หญุด พุย, หฒุ บยู่ง เลี่ยม”.
15น้าย เซ เฌียน-โย่ว, ออน-เหลาะ เยียม เญย ฒี่ง,
เมี่ยน แป้ง ออน เยียม เญย ต๋อง.
น้าย นอม ฒี่ง เยียม เฮญี้ยว ฮนั้ม,
“ม่าย เยีย กั้น อ๊ะ.
ธ้วด ลิ์ว เยีย, ไม้ ม่าย กั้น นอม ฒี่ง อ๊ะ.”
อี้ หฒั่น น้าย นอม ฒี่ง หฒุ ป่าย หว่าย,
เป๋น เฮยี่ย กะน้าย เยียม เญย ต๋อง.
ตะฟ่าน เจี๋ย เจ๊า เญย เมี่ยน หฮวัง ปั์ว-จ้วน
หย่า ฮ้าๆ เญย จั๊ด.
Currently Selected:
เสฟันยา 2: IuMiTH
Highlight
Copy
Compare
Share
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
