สีง ฑูง 119
119
สีง ฑูง 119
เฒี้ยว เญย เล์ย-หลัด เซ หลง ไห่
อาเล้บ#119 เซ ฮิบลู หว่า เญย หฑั่ง-หม่า เญย ต้าว นอม หฑั่ง เญย บั๋ว. น้าย ติ้ว ฑูง หล่ง ฮิบลู หว่า เญย เหยียด นอม เจี๋ย เหยียด นอม หฑั่ง-หม่า โหฒว เหยียด โต่ว เหยียด โต่ว เญย หฑั่ง-กอน. โต่วๆ เญย เหยี่ยม หย่า หล่ง วั้ว โต่ว เญย หฑั่ง-หม่า.
1ตะฟ่าน นิ่น บัว โหฒว เญย เจ๊า ไม้ ม่าย ต๋อง เฆ่ม,
เซ กัน เฒี้ยว เญย เล์ย-หลัด ยั่ง วั้ว เต๋ย, ม่าย ออน-เหลาะ.
2กัน หลง นิ่น ก๊อง เญย หว่า,
เซ หล่ง เหฑ่ง เฮญี้ยว ล์อ นิ่น วั้ว เต๋ย, ม่าย ออน-เหลาะ.
3น้าย หญู่ง เมี่ยน ไม้ โหฒว ต่อง หาย หญู่ง,
นิ่น บัว ขูง ยั่ง เฒี้ยว เญย เจ๊า ฮนั้ง.
4เม่ย เฒาะ เม่ย หัด เญย หว่า
พ้าย ปุน เยีย บัว เจี้ยน เอย เจี๊ยน โหฒว.
5โท้ ปุน เยีย เญย เจ๊า ว้วน,
ไฮ่ กัน หลง เม่ย เญย เล์ย-เหญ่ย.
6เยีย เญย มฒีง หมั่ง เจี๊ยน เม่ย เญย เหยียด ฒู้ง หลี่ง,
เยีย ฯฒฯ ไม้ หฒุ ไญ้.
7เยีย โหะ ลิ์ว เม่ย แป้ง ฟิม เญย เล์ย,
เยีย ฯฒฯ หล่ง ธีง-เหฑ่ง เฮญี้ยว เธง เม่ย.
8เยีย อ๋อย กัน เม่ย เญย เล์ย-เหญ่ย.
โท้ เหยียด ลิ์ว ไม้ ตู๋ง กวั่ง เฒี่ยง เยีย.
อ๋อย หฒุ หมวัง เฒี้ยว เญย เล์ย-หลัด
เบด
9โฮ่ว แซง เมี่ยน อ๋อย หฒุ ฮนั้ง หาย นอ โก๋ว ตุ๊ นิ่น กั้น เญย เจ๊า ธีง-เหฑ่ง?
เซ อ๋อย หฒุ เอย เจี๊ยน เม่ย เญย หว่า โหฒว.
10เยีย หล่ง เหฑ่ง เฮญี้ยว ล์อ เม่ย.
โท้ ปุน เยีย ไม้ ตู๋ง เล่ย ฆอย เม่ย เญย หลี่ง.
11เยีย เฒาะ เม่ย เญย หว่า ฒ่าง เจี๊ยน เยีย เญย เฮญี้ยว,
เหว่ย ปุน เยีย ไม้ ป์าม ฒุ์ย ต่อง เม่ย.
12โอ เฒี้ยว อ่า, เยีย เธง เม่ย.
โท้ หฌาว เม่ย เญย เล์ย-เหญ่ย เยีย.
13เยีย อ๋อย หล่ง เยีย เญย ฑุ่ย เหมย ฒุ่น ย่าง
เม่ย เญย ฑุ่ย ก๊อง เญย เหยียด ฒู้ง เล์ย.
14เยีย อะเฮน้ย เม่ย ก๊อง เญย หว่า
ด่ง อะเฮน้ย เหยียด ฒู้ง ฒิ่น ฒ่อย.
15เยีย อ๋อย เฟย-ฟั้ง เม่ย หัด เญย หว่า
หย่า หมั่ง ตี่ง เม่ย เญย เจ๊า-โหล่ว.
16เยีย อะเฮน้ย เม่ย เญย เล์ย-เหญ่ย,
เยีย ไม้ ไฮ่ หละคุ เม่ย เญย หว่า.
กัน เฒี้ยว เญย เล์ย ตุ๊ ออน-เหลาะ
ฆีเมน
17โท้ โหฒว หลง ปุน เม่ย เญย โปว,
เหว่ย ปุน เยีย ตุ๊ เฒี่ยง เจี๊ยน หย่า กัน เม่ย เญย หว่า.
18โท้ ปุน เยีย เญย มฒีง หมั่ง ตุ๊ ธ้วด
เยียม เม่ย เญย เล์ย-หลัด บัวะ ฮ่อง เญย สี่.
19เยีย เยียม ลู่ง เดี๊ย โหฒว ตี้ง เฒ้บ ตั้ง ป๊า เญย เมี่ยน,
โท้ ไม้ ตู๋ง เฒาะ เม่ย เญย หลี่ง ปี๋ง เยีย.
20เยีย เก้ง! จอม เฮญี้ยว หฒั่นๆ จั๋ง เม่ย เญย เล์ย,
เถา บะฑิว ฒู้ง อ๋อย บ๋าย เญย.
21เม่ย เหม เธง กั้น โฮล, เซ หฒุ เหฒียว เญย เมี่ยน,
ต้ง ยั่ง เพียน, เล่ย เม่ย เญย หลี่ง วั้ว เต๋ย.
22โท้ เฒาะ กวั่ง เยีย หฒุ ไญ้ หฒุ เมี่ยน หมั่ง เผีย เญย สี่,
เหว่ย หฒุ เยีย กัน หลง เม่ย เญย หว่า.
23ไม้ กุ๊น โหฒว โฮล เญย เมี่ยน เฒว์ย เจี๊ยน ธ่าง ล่าง ห่อย เยีย,
เม่ย เญย โปว เฟย-ฟั้ง เม่ย เญย เล์ย-เหญ่ย.
24เม่ย หฌาว เญย เหยียด ฒู้ง หว่า ปุน เยีย อะเฮน้ย,
หย่า โหฒว เยีย ธ่าง ล่าง เญย เมี่ยน.
เหลียบ เอ๋ย กัน เฒี้ยว เญย เล์ย-หลัด
ดาเล้ด
25เยีย เญย แหม่ง เซ ฮนั้ง หฒุ เหฌี่ย เถา เนีย-บูง.
โท้ หฒิว เม่ย เญย หว่า เถง เยีย เญย แหม่ง แอ๋ง ฟี้ง เจี์ย ต้าย.
26เยีย ก๊อง เยีย โหฒว เญย เจ๊า, เม่ย หย่า เตา เยีย.
โท้ เฒาะ เม่ย เญย เล์ย-เหญ่ย หฌาว เยีย.
27โท้ เม่ย เถง เยีย เม่ง แปะ เม่ย หัด เญย หว่า,
เยีย ฯฒฯ เฟย-ฟั้ง เม่ย โหฒว เญย บัวะ ฮ่อง สี่.
28เยีย เญย เฮญี้ยว เฑ่า ตุ๊ โค้ว ฮนั้ง หยุ เหฑ่ง นอ,
โท้ หฒิว เม่ย เญย หว่า เถง เยีย เฮ้น เจี์ย ต้าย.
29โท้ เม่ย ปุน เยีย เล่ย ฆอย จ๊า เญย เจ๊า
หย่า ฆอย เอ๋ย หฌาว เม่ย เญย เล์ย-หลัด เยีย.
30เยีย กิ๊น เหฒียบ ฒัวะ เญย เจ๊า ยั่ง.
เยีย เฒาะ เม่ย เญย เล์ย อัน เจี๊ยน เยีย เญย หฑะเฮมียน.
31โอ เฒี้ยว อ่า, เยีย เขา ว้วน เม่ย หฌาว เญย หว่า,
โท้ ไม้ ตู๋ง ปุน เยีย หฒุ ไญ้.
32เยีย อ๋อย ถิว กัน เจี๊ยน เม่ย เญย หลี่ง เญย เจ๊า,
เหว่ย หฒุ เม่ย ปุน เยีย เปียะ เฮญี้ยว ธั้ม เจี๊ยน ฝาว.
เต๋า เก๋า โท้ เถง เปียะ เฮญี้ยว
เฮ
33โอ เฒี้ยว อ่า, โท้ หฌาว เยีย กัน เม่ย เญย เล์ย-เหญ่ย,
เยีย ฯฒฯ กัน เม่ย เถา ต้าว เถา เมว์ย.
34โท้ ปุน เยีย เม่ง แปะ เหว่ย ปุน เยีย ไฮ่ กัน เม่ย เญย เล์ย-หลัด,
หย่า หล่ง เหฑ่ง เฮญี้ยว เอย เจี๊ยน โหฒว.
35โท้ ต้อ เยีย กัน เม่ย เญย หลี่ง เญย เจ๊า,
เหว่ย หฒุ น้าย ติ้ว เจ๊า เยีย อะเฮน้ย ไห่.
36โท้ ปุน เยีย ม่าย เฮญี้ยว อ๋อย หล่ง เม่ย หฌาว เญย หว่า,
ไม้ เฒ์ย ขูง โต้ว เหล่ย ฒิ่น.
37โท้ ไม้ ตู๋ง ปุน เยีย ฮวิน หมั่ง ไม้ ลั่ม หล่ง เญย สี่.
โท้ ปุน เยีย เยียม เม่ย เญย เจ๊า ตุ๊ เฒี่ยง แหม่ง.
38โท้ เม่ย เอย เจี๊ยน เม่ย แล์ง เญย หว่า โหฒว เหว่ย เยีย, เม่ย เญย โปว,
เซ เหว่ย ท่าย เม่ย วั้ว เต๋ย แล์ง เญย หว่า.
39โท้ เถง เยีย เล่ย ฆอย กั้ม เหฑีย หฒุ ไญ้ เญย สี่,
เหว่ย หฒุ เม่ย เญย เล์ย เซ หลง ไห่.
40เยีย หง่อ เม่ย หัด เญย หว่า.
เหว่ย หฒุ เม่ย แป้ง ฟิม เญย, โท้ ปุน เยีย ตุ๊ เฒี่ยง เจี๊ยน.
เขา เฒี้ยว เญย เล์ย-หลัด
วาว
41โอ เฒี้ยว อ่า, โท้ ปุน ธีง เม่ย เหฒียบ ฒัวะ เญย ฮนั้ม เยีย,
โท้ หฒิว เม่ย แล์ง เญย หว่า เหฌียว เยีย.
42เยีย ฯฒฯ ม่าย หว่า เตา ฮว้วด เยีย วั้ว เต๋ย เมี่ยน,
เหว่ย หฒุ เยีย เขา เม่ย เญย หว่า.
43โท้ เม่ย ไม้ ตู๋ง เฒาะ เฒียน เล์ย เญย หว่า ธ้วด เหฑ่ง เยีย เญย ฑุ่ย,#119:43 ไฟ “โท้ ปุน เยีย หฒั่นๆ ไฮ่ ก๊อง เฒียน เล์ย เญย หว่า”.
เหว่ย หฒุ เม่ย เญย เล์ย ปุน เยีย ม่าย ลั่ม ฮนั้ม ต๋อง.
44เยีย อ๋อย หฒั่นๆ เอย เจี๊ยน เม่ย เญย เล์ย-หลัด
เถา เหยียด ลิ์ว เหยียด เสย.
45เยีย ฯฒฯ ยั่ง ปู๋ง ฆอย เญย เจ๊า,
เหว่ย หฒุ เยีย เอย เจี๊ยน#119:45 ฮิบลู หว่า ก๊อง ล์อ. เม่ย หัด เญย หว่า.
46เยีย อ๋อย เยียม ฮู่ง เตี๋ย เญย หฑะเฮมียน ก๊อง เม่ย หัด เญย หว่า,
เยีย ฒู้ง ไม้ หฒุ ไญ้,
47เหว่ย หฒุ เยีย อะเฮน้ย เม่ย เญย หลี่ง,
เซ ต้ง เยีย ฮนั้ม เญย.
48เยีย ท่าย เม่ย เญย หลี่ง,
เซ ต้ง เยีย ฮนั้ม เญย,
เยีย หย่า เฟย-ฟั้ง เม่ย เญย เล์ย-เหญ่ย.
เล์ย-หลัด เซ เขา ตุ๊ ว้วน เญย
ฒายิน
49จั๋ง เจี๊ยน เม่ย เหธา เม่ย เญย โปว แล์ง เญย หว่า,
เหว่ย หฒุ เม่ย เญย หว่า ปุน เยีย ม่าย ลั่ม ฮนั้ม ต๋อง.
50เม่ย แล์ง เญย หว่า ปุน เยีย ม่าย แหม่ง เฒี่ยง,
เยีย หฒุ หน่าน ฒี่ง เญย เฒี่ยง โห่ ฯฒฯ ออน เยีย เญย เฮญี้ยว.
51โหฒว เหมา เญย เมี่ยน ไม้ ตี้ง เลี่ยว เญย ฮว้วด เยีย,
มป่า เยีย ไม้ เล่ย ฆอย เม่ย เญย เล์ย-หลัด.
52โอ เฒี้ยว อ่า, เยีย จั๋ง ตุ๊ เม่ย โล์-ฮนอย ปุน ต้าย เญย เล์ย,
ฯฒฯ ออน เยีย เญย เฮญี้ยว.
53เยีย ปวัด เมี่ยน หว่าย เมี่ยน กวั่ง เม่ย เญย เล์ย-หลัด,
เยีย เฉีย เจี์ย ไห่ ฮนั้ง อ๋อย หฌบ โต์ว นอ.
54เยีย เยียม ลู่ง เดี๊ย ตี้ง เฒ้บ เญย ต๋อง,
เม่ย เญย เล์ย-เหญ่ย เป๋น เยีย เญย ฑูง.
55โอ เฒี้ยว อ่า, เยีย ลู่ง ม์วน หฒั่น จั๋ง เม่ย เญย เม่ง,
หย่า เอย เจี๊ยน เม่ย เญย เล์ย-หลัด.
56เยีย เอย เจี๊ยน เม่ย หัด เญย หว่า โหฒว.
น้าย เซ เยีย เญย ออน-เหลาะ.
จอม เฮญี้ยว หมวัง เฒี้ยว เญย เล์ย-หลัด
เหด
57 เฒี้ยว เป๋น เยีย เญย ป่วน,
เยีย แล์ง เอย เจี๊ยน เม่ย เญย หว่า.
58เยีย หล่ง เหฑ่ง เฮญี้ยว โท้ เม่ย
หฒิว เม่ย แล์ง เญย หว่า ค้อ-เลี่ยน เยีย.
59เยีย ฮนั้ม เถา เยีย ยั่ง เญย ติ่วๆ เจ๊า,
เยีย ฯฒฯ ฮวิน หฑวน ต้าย ล์อ เม่ย หฌาว เญย เหยียด ฒู้ง หว่า.
60เยีย เซี้ยบๆ เญย กัน เม่ย เญย หลี่ง,
ฒู้ง ไม้ ไง่.
61ไม้ กุ๊น เอ๊าะ เมี่ยน แฒง ฮลาง โด้ เยีย,
เยีย ฒู้ง ไม้ หละคุ เม่ย เญย เล์ย-หลัด.
62ด๊าม ม์วน เยีย เจี์ย ซิน ต้าย เธง เม่ย,
เหว่ย เม่ย แป้ง ฟิม เญย เล์ย.
63ตะฟ่าน ท่าย เม่ย, เอย เจี๊ยน เม่ย หัด เญย หว่า โหฒว วั้ว เต๋ย,
เยีย เหธา นิ่น บัว โหฒว ต่อย.
64โอ เฒี้ยว อ่า, เม่ย เหฒียบ ฒัวะ เญย ฮนั้ม ลู่ง เดี๊ย เมี่ยน,
โท้ หฌาว เม่ย เญย เล์ย-เหญ่ย เยีย.
เฒี้ยว เญย เล์ย-หลัด ม่าย จ๋า-ฒิ่น
เถด
65โอ เฒี้ยว อ่า, เม่ย หฒิว เม่ย เญย หว่า
โหฒว หลง ปุน เม่ย เญย โปว.
66โท้ เหธย ปุน เยีย ม่าย ธง-เม่ง เหธา ว่วน ฒาง,
เหว่ย หฒุ เยีย เสียน เม่ย เญย หลี่ง.
67เยีย ไม้ แก้ง หฒุ โค้ว วั้ว หฒั่น, เยีย ป์าม ฒุ์ย โหฒว ต่อง,
มป่า อี้ หฒั่น เยีย เอย เจี๊ยน เม่ย เญย หว่า.
68เม่ย เซ หลง, เม่ย โหฒว เญย หย่า โหฒว หลง,
โท้ หฌาว เม่ย เญย เล์ย-เหญ่ย เยีย.
69โหฒว เหมา เญย เมี่ยน ก๊อง-แปะ ห่อย เยีย,
มป่า เยีย หล่ง เหฑ่ง เฮญี้ยว กัน เม่ย หัด เญย หว่า.
70นิ่น บัว เญย เฮญี้ยว หฮงง,#119:70 ฮิบลู หว่า ก๊อง โฮ์ ฮนั้ง เฮมย นอ.
มป่า เยีย อะเฮน้ย เม่ย เญย เล์ย-หลัด.
71เยีย หฒุ โค้ว เซ หลง เญย,
เหว่ย ปุน เยีย โหะ หลิ่น เม่ย เญย เล์ย-เหญ่ย.
72เม่ย เญย ฑุ่ย ก๊อง ธ้วด เญย เล์ย-หลัด
เหว่ย เยีย เก้า ม่าย ลั่ม หล่ง เจี๋ย ธินๆ หว่านๆ เจียม ญ่าน.
เฒี้ยว เญย เล์ย-หลัด เซ แป้ง ฟิม เญย
ยด
73เม่ย เญย ปั์ว เหฒย เยีย ต้าย แอ๋ง เหลียบ เยีย,
โท้ ปุน เยีย เปียะ เฮญี้ยว เหว่ย ปุน เยีย ตุ๊ โหะ หลิ่น เม่ย เญย หลี่ง.
74ท่าย เม่ย วั้ว เต๋ย เมี่ยน ปวัด เยีย ฯฒฯ อะเฮน้ย ไห่,
เหว่ย หฒุ เยีย เขา เม่ย เญย หว่า ม่าย ลั่ม ฮนั้ม ต๋อง.
75โอ เฒี้ยว อ่า, เยีย ฮิ้ว ตุ๊ เม่ย เซี้ยม เญย หว่า เซ แป้ง ฟิม เญย,
หย่า ฮิ้ว ตุ๊ เยีย หฒุ เสี่ยว โค้ว เซ เม่ย เหฒียบ ฒัวะ เญย โหฒว.
76โท้ หฒิว เม่ย แล์ง ปุน เม่ย เญย โปว เญย หว่า
หล่ง เม่ย เหฒียบ ฒัวะ ฮนั้ม เมี่ยน เญย เฮญี้ยว ออน เยีย เญย เฮญี้ยว.
77โท้ เม่ย ค้อ-เลี่ยน เยีย, ปุน เยีย ตุ๊ เฒี่ยง เจี๊ยน,
เหว่ย หฒุ เม่ย เญย เล์ย-หลัด ปุน เยีย อะเฮน้ย.
78โท้ ปุน เธง-โฮล เญย เมี่ยน หฒุ ไญ้,
เหว่ย หฒุ นิ่น บัว ไม้ หล่ง เล์ย เญย ห่อย เยีย.
มป่า เยีย กั้น แอ๊ะ, เยีย เฟย-ฟั้ง เม่ย หัด เญย หว่า.
79โท้ ปุน ท่าย เม่ย วั้ว เต๋ย ฮวิน หฑวน ต้าย ล์อ เยีย,
เหว่ย ปุน นิ่น บัว ฮิ้ว ตุ๊ เม่ย เญย หว่า.
80โท้ ปุน เยีย เญย เฮญี้ยว เอย เจี๊ยน เม่ย เญย เล์ย-เหญ่ย หย่า ไม้ ม่าย ต๋อง เฆ่ม,
เหว่ย ปุน เยีย ไม้ หฒุ ไญ้.
เต๋า เก๋า โท้ เฒี้ยว เหฌียว
คับ
81เยีย เญย เฮญี้ยว หฒะเก้ง ฒั้ว เจี๊ยน อ๋อย ตุ๊ เม่ย เญย เหฌียว เอน,
เยีย เขา เม่ย เญย หว่า ม่าย ลั่ม ฮนั้ม ต๋อง.
82เยีย ฒั้ว เกา เม่ย เอย เม่ย แล์ง เญย หว่า โหฒว, มฒีง ฒู้ง บั๊ว หมี่ อ๊ะ.
เยีย หน่าย ก๋า, “เม่ย หาย หฒั่น หธีง ออน เยีย เญย เฮญี้ยว?”
83เยีย เซ ฮนั้ง นอม ตั๊บ อะหงุ่น ติ๊ว เญย ด๊บ-บัวะ ขัง เจี๊ยน โต์ว-เสียว กู้ หงว่าย,
มป่า เยีย ไม้ หละคุ เม่ย เญย เล์ย-เหญ่ย.
84เม่ย เญย โปว อ๋อย หฒุ เตี๊ย ด่ง หาย เล่า?#119:84 ฮิบลู หว่า ก๊อง “เม่ย เญย โปว เญย ฮนอย-เหญียะ ม่าย ด่ง หาย เล่า?”
เม่ย เถา หาย หฒั่น หธีง เซี้ยม ห่อย เยีย วั้ว เต๋ย เมี่ยน เญย ฒุ์ย?
85โหฒว เหมา, ไม้ เอย เม่ย เญย เล์ย-หลัด เญย เมี่ยน,
เว้ด ค้วด อ๋อย ห่อย เยีย ด๊อด.
86เม่ย เญย เหยียด ฒู้ง หลี่ง เขา ตุ๊ ว้วน เญย.
นิ่น บัว ก๊อง-แปะ ห่อย เยีย, โท้ เถง เยีย.
87นิ่น บัว ค้า เต๋ย เหมียด เยีย, ปุน เยีย ไม้ ม่าย แหม่ง เยียม ลู่ง เดี๊ย,
มป่า เยีย ไม้ กวั่ง เม่ย หัด เญย หว่า.
88เม่ย เหฒียบ ฒัวะ เญย ฮนั้ม เมี่ยน ฯฒฯ โท้ เสีย ธ้วด เยีย เญย แหม่ง
เหว่ย ปุน เยีย ไฮ่ เอย เจี๊ยน เม่ย เญย ฑุ่ย ก๊อง เญย หว่า.
เสียน เฒี้ยว เญย เล์ย-หลัด
ลาเม้ด
89โอ เฒี้ยว อ่า, เม่ย เญย หว่า เยียม ลู่ง กู้ หงว่าย
เหลียบ ว้วน เถา เหยียด ลิ์ว.
90ต่อย เจี๋ย ต่อย เม่ย เซ เหฒียบ ฒัวะ เญย.
เม่ย เหลียบ ป้าม เกน ต้าย, ป้าม เกน ฯฒฯ เยียม เจี๊ยน เถา อี้ หฒั่น.
91หฒิว เม่ย หัด เญย หว่า เหยียด ฒู้ง เยียม เจี๊ยน เถา อี้ ฮนอย
เหว่ย หฒุ หม่าน หมวด เซ เป๋น เม่ย เญย โปว.
92สี ก๊อง เม่ย เญย เล์ย-หลัด ไม้ เฒ์ย ปุน เยีย อะเฮน้ย,
เยีย เยียม โค้ว หน่าน กะญั์ว ฒู้ง หฒุ เหมียด หมี่ อ๊ะ.
93เยีย เหยียด ลิ์ว ไม้ หละคุ เม่ย หัด เญย หว่า,
เหว่ย หฒุ เม่ย หล่ง เม่ย หัด เญย หว่า ปุน เยีย ตุ๊ เฒี่ยง เจี๊ยน.
94เยีย เป๋น เม่ย เญย เมี่ยน, โท้ เหฌียว เยีย,
เหว่ย หฒุ เยีย เอย เจี๊ยน#119:94 ฮิบลู หว่า ก๊อง ล์อ. เม่ย หัด เญย หว่า.
95เอ๊าะ เมี่ยน ฒั้ว เจี๊ยน อ๋อย ไต๋ เยีย,
มป่า เยีย อ๋อย สัม หมั่ง เม่ย เญย เล์ย-หลัด.
96เยีย ปวัด หม่าน สี่ ม่าย นิ่น เญย โสว โหม่ว,
มป่า เม่ย เญย หลี่ง หฒะเก้ง! จั๊ง ไห่.
ฮนั้ม เฒี้ยว เญย เล์ย-หลัด
เมม
97โอ เยีย หฒะเก้ง ฮนั้ม เม่ย เญย เล์ย-หลัด,
เยีย เฒี่ยง ฮนอย ไม้ ตี้ง เลี่ยว เญย เฟย-ฟั้ง.
98เม่ย เญย หลี่ง หฒั่นๆ เยียม เยีย เญย เฮญี้ยว,
ฯฒฯ ปุน เยีย ม่าย ธง-เม่ง เก้า ธั้ม เยีย เญย วิน-วั้ง.
99เยีย เก้า ฮนั้ม ตุ๊ ทง เยีย เญย เหยียด ฒู้ง ฟิน-แซง,
เหว่ย หฒุ เยีย เฟย-ฟั้ง เม่ย หฌาว เญย หว่า.
100เป๊ย เมี่ยน โก๋ เมี่ยน เยีย เก้า เม่ง แปะ
เหว่ย หฒุ เยีย เอย เจี๊ยน เม่ย หัด เญย หว่า.
101เยีย หัด เจี๊ยน ไม้ ปุน เยีย เญย เหฒา ยั่ง เหยียด ฒู้ง เอ๊าะ เญย เจ๊า,
เหว่ย ปุน เยีย เอย เจี๊ยน เม่ย เญย หว่า โหฒว.
102เยีย ไม้ เล่ย ฆอย เม่ย เญย เล์ย
เหว่ย หฒุ เม่ย กั้น หฌาว เจี๋ย เยีย.
103เยีย เสย ลิ์ว เม่ย เญย หว่า, หฒะเก้ง กาม ไห่,
เยียม เยีย เญย ฑุ่ย ฒู้ง เก้า กาม เมว์ย-ต้อง.
104เยีย เขา เม่ย หัด เญย หว่า เถง เยีย เปียะ เฮญี้ยว,
เหว่ย น้าย เยีย ฑอง ไห่ เหยียด ฒู้ง จ๊า เญย เจ๊า.
เฒี้ยว เญย เล์ย-หลัด เซ ฮนั้ง นอม ตัง
นุน
105เม่ย เญย หว่า เซ ฮนั้ง ตัง หฒิว เยีย เญย เหฒา-เบี่ย,
หย่า โหฒว เยีย เจ๊า หฒั่ง เญย ฌัง.
106เยีย โฮ้ว เจี๊ยน เหลียบ แหง่ง หว่า
หย่า แล์ง เอย เจี๊ยน แป้ง ฟิม เญย เล์ย โหฒว.
107โอ เฒี้ยว อ่า, เยีย หฒะเก้ง เสี่ยว โค้ว หน่าน เฮนี้ย ไห่,
โท้ เม่ย หฒิว เม่ย เญย หว่า ปุน เยีย ตุ๊ เฒี่ยง เจี๊ยน.
108โอ เฒี้ยว อ่า, โท้ ฒิบ เยีย เญย ฑุ่ย เธง เญย หว่า เป๋น เหฒี่ย เญย กะน้าย,
หย่า หฌาว เยีย ฮิ้ว ตุ๊ เม่ย เญย เล์ย.
109เยีย เญย แหม่ง หฒั่นๆ หฒุ กั้ม เหฑีย เญย สี่,#119:109 ไฟ “เยีย หฒั่นๆ ไม้ ฝุน แหม่ง เญย เยียม.” ฟาน หฒะ ก๊อง “เยีย เญย แหม่ง หฒั่นๆ เยียม เยีย เญย ปั์ว กะญั์ว”.
มป่า เยีย ไม้ หละคุ เม่ย เญย เล์ย-หลัด.
110เอ๊าะ เมี่ยน แฒง โขว อ๋อย ฮลบ เยีย,
มป่า เยีย ไม้ เล่ย ฆอย เม่ย หัด เญย หว่า.
111เม่ย หฌาว เญย หว่า เซ เยีย เหยียด ลิ์ว หฑิบ เญย ป่วน,
หย่า ปุน เยีย เญย เฮญี้ยว อะเฮน้ย ไห่.
112เยีย เหลียบ ตี่ง เฮญี้ยว กัน เม่ย เญย เล์ย-เหญ่ย,
เหยียด ลิ์ว กัน เถา ต้าว เถา เมว์ย.
เขา เฒี้ยว เญย เล์ย-หลัด ตุ๊ หลง
ซาเม้ก
113ม่าย อี ติ่ว เฮญี้ยว เญย เมี่ยน เยีย ฑอง ไห่,
มป่า เยีย ฮนั้ม เม่ย เญย เล์ย-หลัด.
114เม่ย โหฒว เยีย ปี๋ง เญย ต๋อง หย่า โหฒว เยีย เญย ท้อง-ป้าย.
เยีย เขา เม่ย เญย หว่า ม่าย ลั่ม ฮนั้ม ต๋อง.
115โหฒว เอ๊าะ เญย เมี่ยน อ้า! เปย๋า ฆอย เยีย ม่าะ!
เหว่ย ปุน เยีย ไฮ่ กัน หลง เยีย เญย ทิน-ฮู่ง หัด เญย หลี่ง.
116โท้ หฒิว เม่ย แล์ง เญย หว่า ป๊า เจี๊ยน เยีย, ปุน เยีย ตุ๊ เฒี่ยง เจี๊ยน.
เยีย ม่าย ลั่ม ฮนั้ม เญย หย่า โท้ ไม้ ตู๋ง ปู๋ง ด๊อด เหว่ย ปุน เยีย ไม้ หฒุ ไญ้.
117โท้ ป๊า เจี๊ยน เยีย, เยีย ฯฒฯ เยียม ตุ๊ หลง
หย่า หฒั่นๆ ท่าย เม่ย เญย เล์ย-เหญ่ย.
118เม่ย เฆ่ม ไม้ เอย เม่ย เญย เล์ย-เหญ่ย เญย เมี่ยน.
นิ่น บัว กู๊ ไกว๋ เญย หฒะเอ๋ย เซ ไม้ ลั่ม หล่ง.
119เม่ย เฒาะ ลู่ง เดี๊ย เญย เอ๊าะ เมี่ยน ฝุน ฮนั้ง เฮลียะ-ไฆ้ นอ,
เหว่ย น้าย เยีย ฮนั้ม เม่ย หฌาว เญย หว่า.
120เยีย ซิน หฒิน เหว่ย หฒุ เยีย กั้ม เหฑีย เม่ย.
เยีย หย่า กั้ม เหฑีย เม่ย เซี้ยม เญย หว่า.
อ๋อย หฒุ เอย เจี๊ยน เฒี้ยว เญย เล์ย-หลัด
อายิน
121เยีย โหฒว เญย เซ แป้ง ฟิม, หอบ เญย.
โท้ ไม้ ตู๋ง กวั่ง เยีย เยียม เหฒย เยีย วั้ว เต๋ย เญย ปั์ว-เดี๊ย.
122โท้ เปว เจี๊ยน เม่ย เญย โปว ปุน เยีย ตุ๊ หลง,
ไม้ ตู๋ง ปุน โหฒว เหมา เญย เมี่ยน เหฒย เยีย.
123เยีย ฒั้ว เกา เม่ย เญย เหฌียว เอน,
เหธา เม่ย โหฒว เหฒียง เม่ย แป้ง ฟิม แล์ง เญย หว่า,
เยีย มฒีง ฒู้ง ไม้ ฌัง อ๊ะ.
124โท้ เม่ย หฒิว เม่ย เหฒียบ ฒัวะ เญย ฮนั้ม เมี่ยน ต้อ เม่ย เญย โปว,
หย่า โท้ หฌาว เม่ย เญย เล์ย-เหญ่ย เยีย.
125เยีย เซ เม่ย เญย โปว. โท้ ปุน เยีย เปียะ เฮญี้ยว,
เหว่ย ปุน เยีย เม่ง แปะ เม่ย หฌาว เญย หว่า.
126 เฒี้ยว ตี่ง ฒุ์ย เญย เฒี่ยง โห่ เถา อ๊ะ,
เหว่ย หฒุ เมี่ยน ป์าม เม่ย เญย เล์ย-หลัด.
127เยีย หฒะเก้ง ฮนั้ม เม่ย เญย หลี่ง เก้า ธั้ม เจียม,
ฒู้ง เก้า ธั้ม เฒียน เจียม.
128เหว่ย น้าย เยีย ยั่ง เม่ย หัด เญย หว่า,#119:128 น้าย โจ๋ว ฮิบลู หว่า เซ ไม้ หนั่ง เม่ง.
เยีย ฑอง ไห่ เหยียด ฒู้ง จ๊า เญย เจ๊า.
อ๋อย ยั่ง เฒี้ยว เญย เล์ย-หลัด
เพ
129เม่ย หฌาว เญย หว่า เก้ง เผย ฝู่ ไห่,
เหว่ย น้าย เยีย หล่ง เฮญี้ยว กัน เจี๊ยน มี่ง.
130เม่ย เญย หว่า พ้อ ฆอย เซ ฮนั้ง หฒิว ฌัง นอ,
ปุน ไม้ หนั่ง ฮิ้ว ธั้ม เญย เมี่ยน เปียะ เฮญี้ยว.
131เยีย หมอง ฆอย ฑุ่ย เท้า เฉีย แฮๆ เญย,
เหว่ย หฒุ เยีย หฒะเก้ง อ๋อย เม่ย เญย หลี่ง.
132โท้ ฮวิน หมั่ง เยีย หย่า ค้อ-เลี่ยน เยีย,
ฮนั้ง เม่ย โหฒว เจี๋ย เหว่ย ฮนั้ม เม่ย เญย เม่ง วั้ว เต๋ย เมี่ยน.
133โท้ เม่ย หล่ง เม่ย เญย หว่า ปุน เยีย เญย เหฒา-เบี่ย ไฮ่ ธ้าย ตุ๊ เจี๊ยน,
หย่า ไม้ ตู๋ง ปุน หาย หญู่ง ฒุ์ย กุ๊น เยีย.
134โท้ เถง เยีย เปย๋า ดุ๊ด เหฒย เยีย วั้ว เต๋ย เมี่ยน,
เหว่ย ปุน เยีย ไฮ่ เอย เจี๊ยน เม่ย หัด เญย หว่า.
135โท้ เม่ย เญย เฮมียน หฒิว ฌัง เม่ย เญย โปว,
หย่า โท้ หฌาว เม่ย เญย เล์ย-เหญ่ย เยีย.
136เยีย เญย ววม-เหมว่ย เหลี่ยว เหฌี่ย ฮนั้ง โด๊ะ นอ,
เหว่ย หฒุ เมี่ยน ไม้ เอย เม่ย เญย เล์ย-หลัด.
เฒี้ยว เญย เล์ย-หลัด เซ แป้ง ฟิม เญย
ฒาเด
137โอ เฒี้ยว อ่า, เม่ย เซ แป้ง ฟิม เญย,
เม่ย เญย เล์ย-หลัด หย่า หฒีง เญย.
138เม่ย ตี่ง ต้าย เญย เล์ย-เหญ่ย เซ หอบ เญย,
หย่า แป้ง ฟิม เหฑ่ง.
139เยีย เญย เฮญี้ยว เฉีย เจี์ย ไห่ ฮนั้ง โต์ว ปั๊ว เจี๊ยน นอ,
เหว่ย หฒุ เยีย เญย วิน-วั้ง หละคุ เม่ย เญย หว่า.
140เม่ย แล์ง เญย หว่า เสย ลิ์ว, ฮิ้ว ตุ๊ เขา ตุ๊ ว้วน เญย,
เยีย, เม่ย เญย โปว, หย่า ฮนั้ม ไห่.
141เยีย โหฒว ไฝ, หฒุ เมี่ยน หมั่ง เผีย,
มป่า เยีย ไม้ หละคุ เม่ย หัด เญย หว่า.
142เม่ย เซ แป้ง ฟิม เญย, หย่า เหยียด ลิ์ว แป้ง ฟิม.
เม่ย เญย เล์ย-หลัด หย่า เฒียน.
143เยีย หฒุ โต้ หน่าน, เฑ่า โค้ว,
มป่า เม่ย เญย หลี่ง ปุน เยีย เฌียน-โย่ว.
144เม่ย หฌาว เญย หว่า เหยียด ลิ์ว แป้ง ฟิม เญย,
โท้ ปุน เยีย เม่ง แปะ เหว่ย ปุน เยีย ตุ๊ เฒี่ยง เจี๊ยน.
เต๋า เก๋า โท้ เฒี้ยว เหฌียว
คบ
145โอ เฒี้ยว อ่า, เยีย หล่ง เหฑ่ง เฮญี้ยว เห่ว เจี๊ยน เม่ย. โท้ เตา เยีย,
เยีย ฯฒฯ เอย เจี๊ยน เม่ย เญย เล์ย-เหญ่ย.
146เยีย เห่ว เจี๊ยน เม่ย, โท้ เหฌียว เยีย,
เหว่ย ปุน เยีย ไฮ่ เอย เจี๊ยน เม่ย หฌาว เญย หว่า.
147ลู่ง ไม้ แก้ง ฌัง เยีย เจี์ย ซิน เห่ว เม่ย เถง.
เยีย เขา เม่ย เญย หว่า ม่าย ลั่ม ฮนั้ม ต๋อง.
148เยีย เฒี่ยง ม์วน หนูง เจี๊ยน มฒีง
เหว่ย เฟย-ฟั้ง เม่ย แล์ง เญย หว่า.
149หฒิว เม่ย เหฒียบ ฒัวะ เญย ฮนั้ม เมี่ยน โท้ หมวัง เยีย เญย เฉีย.
โอ เฒี้ยว อ่า, โท้ หฒิว เม่ย เญย เล์ย เปว เยีย เญย แหม่ง.
150ต๊า เอ๊าะ หฒะเอ๋ย เหฒย เยีย วั้ว เต๋ย เมี่ยน เถา ฟัด อ๊ะ.
นิ่น บัว เล่ย โก เม่ย เญย เล์ย-หลัด.
151มป่า เฒี้ยว อ่า, เม่ย เยียม นิด ฟัด.
เม่ย เญย เหยียด ฒู้ง หลี่ง หย่า เฒียน.
152เยีย เหว่ย โหะ เม่ย หฌาว เญย หว่า ฮิ้ว ตุ๊ เล่า อ๊ะ,
เม่ย หฌาว เญย หว่า เหยียด ลิ์ว เหลียบ ว้วน.
เต๋า เก๋า โท้ เฒี้ยว เถง
เล้ด
153โท้ หมั่ง ปวัด เยีย เญย โค้ว หน่าน หย่า เหฌียว เยีย,
เหว่ย หฒุ เยีย ไม้ หละคุ เม่ย เญย เล์ย-หลัด.
154โท้ เถง เบ่น เยีย เญย สี่ หย่า หฒัวะ เยีย.
หฒิว เม่ย แล์ง เญย หว่า โท้ ปุน เยีย ตุ๊ เฒี่ยง เจี๊ยน.
155โหฒว เอ๊าะ เญย เมี่ยน ไม้ ไฮ่ ตุ๊ เหฌียว,#119:155 ไฟ “เหฌียว เอน เล่ย ตุ๊ เอ๊าะ เมี่ยน โก”.
นิ่น บัว ไม้ กัน เม่ย เญย เล์ย-เหญ่ย.
156โอ เฒี้ยว อ่า, เม่ย หฒะเก้ง ค้อ-เลี่ยน เมี่ยน ไห่.
โท้ หฒิว เม่ย เญย เล์ย ปุน เยีย ม่าย แหม่ง เฒี่ยง เจี๊ยน.
157เหฒย เยีย, เหธา เยีย ต๋อย-เตก เญย เมี่ยน ธั้ม ไห่,
มป่า เยีย ไม้ เล่ย ฆอย เม่ย หัด เญย หว่า.
158เยีย ปวัด ไม้ เหฒียบ ฒัวะ เญย เมี่ยน ฯฒฯ โหยว ไห่
เหว่ย หฒุ นิ่น บัว ไม้ เอย เม่ย เญย หว่า.#119:158 ไฟ เม่ย หัด เญย หว่า.
159สัม หมั่ง ก๋า เยีย ด่ง หาย ฮนั้ม เม่ย หัด เญย หว่า.
โท้ หฒิว เม่ย เหฒียบ ฒัวะ เญย ฮนั้ม เมี่ยน เปว เยีย เญย แหม่ง.
160เม่ย เญย หว่า ฑุด ฒุ้น ก๊อง เซ เฒียน เล์ย,
เม่ย เญย เหยียด ฒู้ง กง-ฟิม เญย เล์ย เหยียด ลิ์ว เยียม.
ตี่ง เฮญี้ยว กัน เฒี้ยว เญย เล์ย-หลัด
ซิน
161โหฒว โฮล เญย เมี่ยน ไม้ หล่ง เล์ย เญย ห่อย เยีย,
มป่า เยีย เญย เฮญี้ยว กั้ม เหฑีย เญย เซ เม่ย เญย หว่า.
162เยีย เหว่ย เม่ย เญย หว่า อะเฮน้ย,
ฮนั้ง เมี่ยน ตุ๊ ธ้าง ต้าย เญย กะน้าย ธั้ม นอ.
163เยีย ฑอง ไห่, โหยว ไห่ เหยียด ฒู้ง ก๊อง-แปะ เญย หว่า,
มป่า เยีย ฮนั้ม ไห่ เม่ย เญย เล์ย-หลัด.
164เหว่ย เม่ย แป้ง ฟิม เญย เล์ย
เยีย เหยียด ฮนอย เธง เม่ย เสี่ย หฑุ่น.
165ฮนั้ม เม่ย เญย เล์ย เญย เมี่ยน ตุ๊ แป้ง ออน ธั้ม,
หย่า ไม้ ม่าย หาย หญู่ง ไฮ่ ปุน นิ่น บัว ดิ๊ หฒุ ดอบ.
166โอ เฒี้ยว อ่า, เยีย ฒั้ว เจี๊ยน เม่ย เหฌียว เยีย,
เยีย หย่า เอย เม่ย หัด เญย หลี่ง โหฒว.
167เยีย เญย เฮญี้ยว เอย เจี๊ยน เม่ย เญย หว่า.
เยีย หฒะเก้ง! ฮนั้ม ไห่ เม่ย เญย หว่า.
168เยีย เอย เจี๊ยน เม่ย หัด เญย, พ้าย เญย หว่า,
เหว่ย หฒุ เยีย เญย ติ่วๆ เจ๊า เยียม เม่ย เญย หฑะเฮมียน.
โท้ เฒี้ยว เถง
เทา
169โอ เฒี้ยว อ่า, โท้ ปุน เยีย เห่ว เญย ซีง-เฉีย เถา เม่ย เญย หฑะเฮมียน,
หย่า หฒิว เม่ย เญย หว่า ปุน เยีย เปียะ เฮญี้ยว.
170โท้ ปุน เยีย โจ้ว เญย หว่า เถา เม่ย เญย หฑะเฮมียน,
โท้ หฒิว เม่ย เญย หว่า เหฌียว เยีย.
171เยีย เญย ฑุ่ย เหมย อ๋อย ก๊อง ธ้วด เธง เญย หว่า,
เหว่ย หฒุ เม่ย หฌาว เม่ย เญย เล์ย-เหญ่ย เยีย.
172เยีย เญย เบียด อ๋อย ป๋าว ฑูง ก๊อง เม่ย เญย หว่า,
เหว่ย หฒุ เม่ย เญย เหยียด ฒู้ง หลี่ง เซ แป้ง ฟิม เญย.
173โท้ หลิ่ว เล์ย เหฒียง เม่ย เญย ปั์ว เถง เยีย,
เหว่ย หฒุ เยีย กิ๊น ลิ์ว เม่ย หัด เญย หว่า.
174โอ เฒี้ยว อ่า, เยีย เก้ง อ๋อย ตุ๊ เม่ย เญย เหฌียว เอน,
เม่ย เญย เล์ย-หลัด หย่า ปุน เยีย อะเฮน้ย.
175โท้ ปุน เยีย ตุ๊ เฒี่ยง เจี๊ยน เหว่ย ปุน เยีย ไฮ่ เธง เม่ย,
โท้ ปุน เม่ย เญย เล์ย เถง เยีย.
176เยีย มี่ง ต่อง เจ๊า ฮนั้ง ปะกี ยู่ง ตี๋ง ล่าย นอ,
โท้ ต้าย ล์อ เม่ย เญย โปว,
เหว่ย หฒุ เยีย ไม้ หละคุ เม่ย เญย หลี่ง.
Currently Selected:
สีง ฑูง 119: IuMiTH
Highlight
Share
Compare
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
