ซ้าว เมี่ยน 31
31
อิสะลาเอน เมี่ยน เหธา มีเดียน เมี่ยน เบ๊าะ จ๋า
1 เฒี้ยว ก๊อง บั๋ว โมเซ, 2“อ๋อย หฒุ เหว่ย อิสะลาเอน เมี่ยน จ๊าว วิน ปุน มีเดียน เมี่ยน, ฆะฮ้า เม่ย ฯฒฯ เกวย เสย อ๊ะ.”#31:2 เป๊ย หมั่ง ทิน เต่ย โต้ว 49:33.
3โมเซ ฯฒฯ ก๊อง บั๋ว แปะ ฝีง, “อ๋อย หฒุ กิ๊น เต๋ย เม่ย บัว เญย เมี่ยน, หย่า หลิ่ว เล์ย หวัวะ กิ่น ปุน นิ่น บัว ต้อ มี่ง เหธา มีเดียน เมี่ยน เบ๊าะ จ๋า เหว่ย เถง เฒี้ยว จ๊าว วิน. 4ฝีงๆ อิสะลาเอน เมี่ยน, เหยียด ฝีง อ๋อย หฒุ พ้าย เหยียด ธิน เต้า.” 5ฮนั้ง หน่าย, โม์ว ฝีง อิสะลาเอน เมี่ยน กิ๊น ธ้วด เหยียด ธิน เต้า. เหยียด ฒู้ง ม่าย เหยียด หว่าน อี ธิน เต้า ต้อ เจี๊ยน เบ๊าะ จ๋า เญย หวัวะ กิ่น. 6โมเซ ฯฒฯ พ้าย นิ่น บัว ธ้วด มี่ง เบ๊าะ จ๋า, เหยียด ฝีง เหยียด ธิน เต้า. แอ๋ง ม่าย เอเลอาซา ไซ เมี่ยน เญย ตอน, ฟีเนหัด, ต้อ เจี๊ยน สีง ติ่น เญย จา-สี่ หย่า นั้น เจี๊ยน หฑัด ปย๊ม เหว่ย โหฒว จั๋ง-โห่.
7นิ่น บัว หฒิว เฒี้ยว บั๋ว โมเซ เญย หว่า เบ๊าะ มีเดียน เมี่ยน, หย่า ไต๋ เหฑ่ง นิ่น บัว เญย เต้าๆ มจั่ง ตอน. 8เยียม นิ่น บัว ไต๋ เญย น้าย เต๋ย เมี่ยน, ม่าย มีเดียน เมี่ยน เญย ปยา เต้า ฮู่ง, เอวี, เลเคม, สูอา, ฮูอา เหธา เลบา. นิ่น บัว หย่า หล่ง หฑุ ด๊าว ไต๋ เบโอ เญย ตอน, บาลาอัม.
9อิสะลาเอน เมี่ยน เฒาะ มีเดียน มเซียะ ตอน เหธา ฝุเจว๊ย หย่า กว๊าด เหฑ่ง มีเดียน เมี่ยน เญย แซง-คู้, ง่ง กวั้น ยู่ง กวั้น, หย่า ลู้ เหฑ่ง นิ่น บัว เญย เหยียด ฒู้ง กะน้าย. 10อิสะลาเอน เมี่ยน หย่า ปั๊ว เหฑ่ง มีเดียน เมี่ยน เญย ฒี่ง เหธา เหยียด ฒู้ง ด๊บ-ลิ่ว เธี้ยง. 11นิ่น บัว เฒาะ เหฑ่ง นิ่น บัว ธ้าง ต้าย ลู้ ต้าย เญย กะน้าย, เลี่ยม เมี่ยน, เลี่ยม แซง-คู้, 12ต้อ เถา โมเซ เหธา เอเลอาซา ไซ เมี่ยน เหธา อิสะลาเอน หฒวัง เมี่ยน เญย ด๊บ-ลิ่ว เธี้ยง วั้ว, เยียม โมอับ เดา-แป้ง, จอแดน ด้าย เฮลน, เยลีโค ฒี่ง ต๋อย-หง่าน.
13โมเซ เหธา เอเลอาซา ไซ เมี่ยน เหธา หฒวัง เมี่ยน เญย เปย๊ย เฒ้ย ธ้วด ด๊บ-ลิ่ว เธี้ยง มี่ง ปวั้ง นิ่น บัว. 14โมเซ เฉีย เจี์ย ไห่ น้าย เต๋ย เบ๊าะ จ๋า หฑวน ต้าย เญย แปง-เปย๊ย, ต้ง กุ๊น เหยียด ธิน เต้า แปง เหธา เหยียด แป๊ะ เต้า แปง เญย แปง-เปย๊ย. 15โมเซ หน่าย นิ่น บัว, “เม่ย บัว เหว่ย หาย ติ่ว เลี่ยว เจี๊ยน น้าย เต๋ย มเซียะ ตอน เญย แหม่ง? 16เซ ต้ง น้าย เต๋ย มเซียะ ตอน หมวัง บาลาอัม เญย หว่า, เยียม เปโอ วั้ว หฒั่น ต้อ อิสะลาเอน เมี่ยน เล่ย ทิน-ฮู่ง ฯฒฯ ม่าย ต้ม ววน-แป่ง ห่อย เฒี้ยว เญย เมี่ยน.#ซ้าว เมี่ยน 25:1-9 17เหว่ย น้าย อ๋อย หฒุ ไต๋ เหฑ่ง น้าย เต๋ย เหยียด ฒู้ง ตอน เหธา เปว๋ย เจี๋ย มจั่ง ตอน เญย มเซียะ ตอน. 18มป่า ไม้ เปว๋ย เจี๋ย มจั่ง ตอน วั้ว เต๋ย เซียะ เซ เลี่ยว เจี๊ยน เหว่ย เม่ย บัว กั้น.
19“ตะฟ่าน ไต๋ เมี่ยน ไฟ มัวะ หฒุ จั๋น-ไต่ วั้ว เต๋ย, อ๋อย หฒุ เยียม กะเหญี่ย หฒิ ด๊บ-ลิ่ว เธี้ยง ปวั๊ง เสี่ย ฮนอย. ตะฟาม ฮนอย เหธา ตะเธี้ยด ฮนอย อ๋อย หฒุ สา เหฑ่ง กั้น เญย หวุย เหธา ธ้าง ต้าย วั้ว เต๋ย เมี่ยน เญย หวุย. 20หย่า อ๋อย หฒุ สา เต๋ยๆ ลุย-โหว เหธา เหยียด ฒู้ง หล่ง ด๊บ, ยู่ง เปยย ไฟ เดี๋ยง โหฒว ต้าย เญย กะน้าย.”
21เอเลอาซา ไซ เมี่ยน หย่า บั๋ว มี่ง เบ๊าะ จ๋า หฑวน ต้าย เญย แปง, “น้าย เซ หฒิว เฒี้ยว จิว ปุน โมเซ เญย เล์ย. 22เจียม, ญ่าน, ต้ง ซิ, เฮลียะ, ยั่ง เถี่ย, เหธา จู์ง,#31:22 จู์ง จั๋น-ไท้ เห่ว ตะกั่ว. 23ตะฟ่าน ไฮ่ หฒุ ตุ๊ โต์ว เญย เหยียด ฒู้ง อ๋อย หฒุ เจี๋ย โต์ว, ฯฒฯ ธีง-เหฑ่ง อ๊ะ. มป่า หธ่อ อ๋อย หฒุ หล่ง สา หวุย เญย ววม สา. หฒุ ไม้ ตุ๊ โต์ว เญย, อ๋อย หฒุ เจี๋ย ววม. 24เถา ตะเธี้ยด ฮนอย วั้ว ฮนอย อ๋อย หฒุ โหฑ เหฑ่ง ลุย-โหว, เม่ย บัว ฯฒฯ ธีง-เหฑ่ง หมี่ อ๊ะ. เปียะ ด๊บ-ลิ่ว เธี้ยง ตุ๊ อ๊ะ.”
ปุน ฆอย เบ๊าะ จ๋า ธ้าง ต้าย เญย กะน้าย.
25 เฒี้ยว ก๊อง บั๋ว โมเซ, 26“เม่ย เหธา เอเลอาซา ไซ เมี่ยน เหธา แปะ ฝีง เญย หฒวัง เปย๊ย เฒ้ย อ๋อย หฒุ ซ้าว เหฑ่ง ธ้าง ต้าย เญย กะน้าย, เลี่ยม เมี่ยน เลี่ยม แซง-คู้. 27อ๋อย หฒุ ปุน ฆอย โหฒว อี โก๊ว. ปุน เหยียด โก๊ว มี่ง เบ๊าะ จ๋า เญย แปง. ปุน เหยียด โก๊ว หฒวัง เมี่ยน. 28มี่ง เบ๊าะ จ๋า เญย แปง ตุ๊ เญย ป่วน, ไม้ กุ๊น เมี่ยน, ง่ง, ล่อ, ปะกี ยู่ง ไฟ ยู่ง, ฮม์ แป๊ะ เต้า อ๋อย หฒุ แมะ ธ้วด เต้า เหว่ย ฝูง ปุน เฒี้ยว. 29เยียม แปง เญย ป่วน แมะ ธ้วด น้าย เต๋ย, อ๋อย หฒุ จิว ปุน เอเลอาซา ไซ เมี่ยน เป๋น เฒี้ยว เญย ป่วน. 30เยียม อิสะลาเอน เมี่ยน เญย ป่วน, เลี่ยม เมี่ยน, ง่ง, ล่อ, ปะกี ยู่ง, ยู่ง เหธา หญู่งๆ แซง-คู้, ฮม์ เหฒียบ เต้า อ๋อย หฒุ แมะ ธ้วด เหยียด เต้า ปุน เลวี เมี่ยน, ต้ง โก๋ว เฒี้ยว เญย ด๊บ-ลิ่ว เญย เมี่ยน.” 31โมเซ เหธา เอเลอาซา ไซ เมี่ยน ฯฒฯ เอย เจี๊ยน เฒี้ยว บั๋ว โมเซ เญย หว่า โหฒว.
32ธี่ ธ้วด แปง กั้น หล่ง เญย, ธ้าง ต้าย เหฒ่ง เหฌี่ย เญย ปะกี ยู่ง ม่าย จุ๊ สิน เสี่ย หว่าน ปยา ธิน เต้า, 33ง่ง, เสี่ย หว่าน อี ธิน เต้า, 34ล่อ, จุ๊ หว่าน เหยียด ธิน เต้า, 35ไม้ เปว๋ย เจี๋ย มจั่ง ตอน เญย เซียะ, ปัว หว่าน อี ธิน เต้า.
36มี่ง เบ๊าะ จ๋า เญย แปง ตุ๊ เญย ป่วน เซ ฮนั้ง น้าย.
ปะกี ยู่ง, ตุ๊ ปัว สิน ปัว หว่าน เสี่ย ธิน ฮม์ แป๊ะ เต้า. 37ฝูง ปุน เป๋น เฒี้ยว เญย ป่วน ม่าย หลัวะ แป๊ะ เธี้ยด เหฒียบ ฮม์ เต้า.
38ง่ง, ตุ๊ ปัว หว่าน จุ๊ ธิน เต้า. ฝูง ปุน เป๋น เฒี้ยว เญย ป่วน ม่าย เธี้ยด เหฒียบ เหญ่ย เต้า.
39ล่อ, ตุ๊ ปัว หว่าน ฮม์ แป๊ะ เต้า. ฝูง ปุน เป๋น เฒี้ยว เญย ป่วน ม่าย หลัวะ เหฒียบ เยี้ยด เต้า.
40เมี่ยน, ตุ๊ เหยียด หว่าน จุ๊ ธิน เต้า. ฝูง ปุน เป๋น เฒี้ยว เญย ป่วน ม่าย ฟ่า เหฒียบ เหญ่ย เต้า.
41โมเซ เฒาะ แมะ ต้าย ฝูง ปุน เฒี้ยว เญย ป่วน จิว ปุน เอเลอาซา ไซ เมี่ยน หฒิว เฒี้ยว บั๋ว โมเซ เญย หว่า.
42โมเซ เฒาะ มี่ง เบ๊าะ จ๋า ธ้าง ต้าย เญย กะน้าย แมะ ต้าย ปุน เหยียด ป่วน อิสะลาเอน เมี่ยน. 43หฒวัง แปะ ฝีง ตุ๊ เญย ป่วน, ปะกี ยู่ง ม่าย ปัว สิน ปัว หว่าน เสี่ย ธิน ฮม์ แป๊ะ เต้า, 44ง่ง, ปัว หว่าน จุ๊ ธิน เต้า, 45ล่อ, ปัว หว่าน ฮม์ แป๊ะ เต้า, 46เมี่ยน, เหยียด หว่าน จุ๊ ธิน เต้า. 47หฒิว เฒี้ยว เญย หว่า, เยียม อิสะลาเอน เมี่ยน เญย ป่วน, เลี่ยม เมี่ยน, เลี่ยม แซง-คู้, ฮม์ เหฒียบ เต้า แมะ ธ้วด เต้า จิว ปุน เลวี เมี่ยน, ต้ง โก๋ว หฒั่ง เฒี้ยว เญย ด๊บ-ลิ่ว เญย เมี่ยน.
48กุ๊น แปง-กวั้น เญย หฒวัง แปง-เปย๊ย, ต้ง กุ๊น เหยียด ธิน เต้า เญย เปย๊ย เหธา เหยียด แป๊ะ เต้า เญย เปย๊ย, มี่ง เถา โมเซ วั้ว 49ก๊อง บั๋ว นิ่น, “เยีย บัว, เม่ย เญย โปว, ซ้าว เหฑ่ง เยียม เยีย บัว เญย ปั์ว-เดี๊ย เญย แปง, หย่า ไม้ หฒิด เหยียด เต้า. 50เยีย บัว เก๊าะ-เมี่ยน ฯฒฯ ต้อ เยีย บัว ตุ๊ ต้าย เญย เจียม-เซียว-เซ้ด, เซ โคว ปั์ว เญย โคว, เจี้ยม, ม่าย เหยียน เญย ปั์ว-โด๊ะ-แฑง, มน่อม ฮยุน, เหธา หลิ่ม, ฝ่ง ห่อ ปุน เฒี้ยว เหว่ย เยียม เฒี้ยว เญย หฑะเฮมียน ฟิ เยีย บัว เญย ฒุ์ย.”
51โมเซ เหธา เอเลอาซา ไซ เมี่ยน ฯฒฯ ฒิบ นิ่น บัว จิว ปุน เญย เจียม, เซ ต๊า ต้าย เญย เซียว-เซ้ด. 52กุ๊น เหยียด ธิน เต้า แปง เหธา เหยียด แป๊ะ เต้า แปง เญย แปง-เปย๊ย จิว ปุน โมเซ เหธา เอเลอาซา เว่ย ฝ่ง ห่อ ปุน เฒี้ยว, เญย เหยียด ฒู้ง เจียม, เฑียง ต้าย ม่าย เหยียด แป๊ะ เหฒียบ จั๊ว จ้อย.#31:52 ฮิบลู หว่า ก๊อง 16,750 เซเขน. เซ เล่ย ไม้ โก 190 กีโล. 53(น้าย เต๋ย เบ๊าะ จ๋า เญย แปง, เก๊าะ-เมี่ยน ธ้าง ต้าย เญย กะน้าย เก๊าะ-เมี่ยน กั้น หล่ง.) 54โมเซ เหธา เอเลอาซา ไซ เมี่ยน ฯฒฯ ฒิบ กุ๊น เหยียด ธิน เต้า แปง เหธา เหยียด แป๊ะ เต้า แปง เญย เปย๊ย จิว ปุน เญย เจียม, ต้อ เปียะ หวุ่ย ปวั้ง เญย ด๊บ-ลิ่ว อัน เจี๊ยน เฒี้ยว เญย หฑะเฮมียน เหว่ย ปุน เฒี้ยว จั๋ง อิสะลาเอน เมี่ยน.
Currently Selected:
ซ้าว เมี่ยน 31: IuMiTH
Highlight
Share
Compare
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
