มัดทาย 27
27
เยซู หฒุ จิว ปุน ปีล้าด
(เป๊ย หมั่ง มาโค 15:1; ลูกา 23:1-2; โยฮัน 18:28-32)
1ลู่ง ดอม เฑี้ยว, หฒวัง ไซ เมี่ยน เปย๊ย เหธา ยิวไท เมี่ยน เญย เมี่ยน โก๋ กั๊บ ฒุ้น ธ่าง ล่าง เหฒียง ฮนั้ง หาย นอ ไฮ่ ไต๋ เยซู. 2นิ่น บัว ฯฒฯ โด้ เยซู, เคน มี่ง จิว ปุน โลมา หฒูง, ปีล้าด.
ยูดาด ไต่ หมี่ อ๊ะ
(เป๊ย หมั่ง กง-โฒ่ 1:18-19)
3หม่าย เยซู วั้ว เต้า ยูดาด ปวัด เยซู หฒุ ตี่ง ฒุ์ย วั้ว หฒั่น, นิ่น เฮญี้ยว มุน ไห่ แอ๋ง ต้อ วั้ว เต๋ย ฟ่า เหฒียบ นอม ฒิ่น ต้าย ถุย ปุน ไซ เมี่ยน เปย๊ย เหธา เมี่ยน โก๋.#กง-โฒ่ 1:18-19 4นิ่น ก๊อง, “เยีย โหฒว ต่อง ฒุ์ย อ๊ะ, เหว่ย หฒุ เยีย หม่าย ไม้ ม่าย ฒุ์ย เญย เมี่ยน ปุน นิ่น หฒุ ไต่.”
วั้ว เต๋ย เมี่ยน เตา, “หน่าย ม่าย หาย หญู่ง ผาน เถา เยีย บัว? น้าย เม่ย กั้น เญย สี่ อ๊ะ.”
5ยูดาด ฯฒฯ ฒอย วั้ว เต๋ย ญ่าน กวั่ง วั้ว หฒั่ง ทิน-ฮู่ง เญย เปย๊า กะญั์ว ธ้วด มี่ง, ฯฒฯ มี่ง ดิ๋ว จาง ไต่ หมี่ อ๊ะ.
6ไซ เมี่ยน เปย๊ย เฑ์า น้าย เต๋ย ญ่าน ต้าย ก๊อง, “น้าย เต๋ย ญ่าน เซ ม์าย แหม่ง ญ่าน ฯฒฯ ฮนั้ง กั๊วะ เจี๊ยน ฑย้าม นอ. เหธา เจี๊ยน หฒั่ง ทิน-ฮู่ง เญย เปย๊า วั้ว เต๋ย ญ่าน ตั๊บ เซ ต่อง เล์ย.” 7นิ่น บัว ฯฒฯ ธ่าง ล่าง ต้าย หล่ง น้าย เต๋ย ญ่าน ม์าย ฑง วั้ว เต้า นั้น เนีย หฒั่ง เญย เดา, โหฒว กั้น ฝีง เมี่ยน เญย โฒ้ว-เก้ม. 8เหว่ย น้าย วั้ว ฑง เดา ม่าย บั๋ว เห่ว “ม่าย ฑย้าม เญย เดา” ต้าย เถา อี้ จ๋า ฮนอย.
9น้าย เต๋ย สี่ ธ้วด ต้าย ต๋อย-ติ่ว โต่ว หว่า เมี่ยน, เยเลมี, ก๊อง เญย หว่า. เยเลมี ก๊อง,
“นิ่น บัว เฒาะ ฟ่า เหฒียบ นอม ฒิ่น,
ต้ง อิสะลาเอน เมี่ยน เหว่ย นิ่น ตี่ง เญย จ๋า-ฒิ่น,#เสคาลิยา 11:12-13; เยเลมี 32:6-9
10หล่ง ม์าย นั้น เนีย หฒั่ง เญย เดา,
ฮนั้ง เฒี้ยว บั๋ว เยีย โหฒว นอ.”
ปีล้าด เซี้ยม เยซู
(เป๊ย หมั่ง มาโค 15:2-5; ลูกา 23:3-5; โยฮัน 18:33-38)
11วั้ว หฒั่น, เยซู เยียม ปีล้าด หฒูง เญย หฑะเฮมียน. ปีล้าด หน่าย นิ่น, “เม่ย โหฒว ยิวไท เมี่ยน เญย ฮู่ง?”
เยซู เตา, “เฒ์ย เญย. เซ ฮนั้ง เม่ย ก๊อง นอ.”#27:11 ไฟ “น้าย เซ เม่ย กั้น ก๊อง”. 12มป่า เมี่ยน โก๋ เหธา ไซ เมี่ยน เปย๊ย โก๋ นิ่น วั้ว หฒั่น, นิ่น ไม้ เตา หาย หญู่ง.
13ปีล้าด ฯฒฯ หน่าย นิ่น, “นิ่น บัว โก๋ เม่ย น้าย เต๋ย เหยียด ฒู้ง สี่ เม่ย ไม้ ไฮ์ ไฟ?” 14มป่า เยซู เหยียด โจ๋ว หว่า ไม้ เตา นิ่น. ปีล้าด หฒะเก้ง บัวะ ฮ่อง ไห่.
ปีล้าด ตี่ง จิว เยซ ปุน เมี่ยน ไต๋
(เป๊ย หมั่ง มาโค 15:6-15; ลูกา 23:13-25; โยฮัน 18:39—19:16)
15หฮญังๆ เถา เสีย แหม่ง ฒิบ, โลมา หฒูง ม่าย เล์ย ปู๋ง เต้า หววน โล่ เญย เมี่ยน หฒิว หฒวัง เมี่ยน โท้ ปู๋ง หาย เต้า. 16วั้ว หฒั่น ม่าย เต้า หฒุ หววน เจี๊ยน โล่ เญย ฒุ์ย- เมี่ยน บั๋ว เห่ว บาลับบัด. หาย เต้า หย่า ฮิ้ว ตุ๊ นิ่น เญย. 17หฒวัง เมี่ยน กั๊บ ฒุ้น วั้ว หฒั่น, ปีล้าด หน่าย ก๋า นิ่น บัว, “เม่ย บัว อ๋อย เยีย ปู๋ง หาย เต้า? ปู๋ง บาลับบัด ไฟ ปู๋ง เยซู, ต้ง เมี่ยน เห่ว กีตู่ วั้ว เต้า?” 18ปีล้าด ฮิ้ว ตุ๊ โหฒว โฮล วั้ว เต๋ย ยิวไท เมี่ยน เหมว่ย เจี๊ยะ เยซู หธีง ต้าย เฒาะ เยซู จิว ปุน นิ่น.
19ปีล้าด เฒว์ย เจี๊ยน เซี้ยม ฒุ์ย เหว่ย วั้ว หฒั่น, นิ่น เญย เอ๊า ปุน หว่า มี่ง บั๋ว นิ่น, “ไม้ ตู๋ง โหฒว หาย หญู่ง ปุน วั้ว ล่าน คู้ เมี่ยน เหว่ย หฒุ อะหฮมวัง#27:19 ไฟ อี้ ฮนอย. เยีย เบ๋ยๆ เถา น้าย ล่าน เมี่ยน ฯฒฯ ไฮ์ เฮญี้ยว ไม้ หลง เหยียด เต๋ย.”
20ไซ เมี่ยน เปย๊ย เหธา เมี่ยน โก๋ ดั๊ว หฒวัง เมี่ยน โท้ ปีล้าด ปู๋ง บาลับบัด, ไต๋ เยซู กวั่ง. 21ปีล้าด ฯฒฯ หน่าย หฒวัง เมี่ยน, “น้าย เต๋ย อี เต้า, เม่ย บัว อ๋อย เยีย ปู๋ง หาย เต้า?”
นิ่น บัว เตา, “ปู๋ง บาลับบัด.”
22ปีล้าด ฯฒฯ หน่าย, “วั้ว หญู่ง, เยซู, ต้ง เมี่ยน เห่ว กีตู่ วั้ว เต้า, เม่ย บัว อ๋อย เยีย ฮนั้ง หาย นอ โหฒว?”
นิ่น บัว เหยียด ฒู้ง เตา, “เฒาะ นิ่น ตีง เจี๊ยน เหฒียบ หฑั่ง จ๋า!”
23ปีล้าด แอ๋ง หน่าย นิ่น บัว, “วั้ว หญู่ง, นิ่น โหฒว ต่อง หาย หญู่ง ฒุ์ย?”
หฒวัง เมี่ยน จา เห่ว เก้า บุย, “เฒาะ นิ่น ตีง เจี๊ยน เหฒียบ หฑั่ง จ๋า ม่าะ!”
24ปีล้าด ปวัด นิ่น ก๊อง เจี๊ยน มี่ง หย่า ไม้ ลั่ม หล่ง, ฒู้ง กั้ม เหฑีย หฒวัง เมี่ยน อ๋อย หลุ่น เหฑ่ง. นิ่น ฯฒฯ เฒาะ ววม ตอง เจี๊ยน หฒวัง เมี่ยน หฑาว ปั์ว หย่า ก๊อง, “น้าย เต้า เมี่ยน หฒุ ไต่ เซ ไม้ ผาน เถา เยีย. น้าย เหยียด ฒู้ง ด๊อด หฒุ เม่ย บัว กั้น อ๊ะ.”#หฑั่ม เล์ย-หลัด 21:6-9
25หฒวัง เมี่ยน ต้ง โจ๋ว หว่า เตา, “น้าย เต้า เมี่ยน ไต่, เหลี่ยว ธ้วด นิ่น เญย ฑย้าม, โย่ว เยีย บัว เหธา เยีย บัว กั้น เญย ฟุน-ฟะ ดาม-ตอง.”
26ปีล้าด ฯฒฯ ปู๋ง บาลับบัด ปุน นิ่น บัว. มป่า เยซู, นิ่น ปุน หฒุ ปย๊า-ปิน เบ๊าะ ลิ์ว, จิว ปุน แปง ต้อ มี่ง ตีง เหฒียบ หฑั่ง จ๋า.
แปง กวัด โตะ จั๊ด เยซู
(เป๊ย หมั่ง มาโค 15:16-20; โยฮัน 19:2-3)
27ปีล้าด หฒูง เญย แปง แอ๋ง ต้อ เยซู เปียะ หฒูง เญย ติ่น กะญั์ว. วั้ว กวั้น แปง เหยียด ฒู้ง ฯฒฯ มี่ง เว่ย เจี๊ยน นิ่น. 28นิ่น บัว ไจ๊ ฆอย เยซู เญย ลุย-โหว แอ๋ง เฒาะ เต๋ย ลุย-ด๊าว-ซิ เถง นิ่น ปุ๋ย เจี๊ยน, 29หย่า หล่ง ฌิ้ม ธิ นอม ฮู่ง นี้ง ด๋ง เจี๊ยน นิ่น เญย มฆ้อง. นิ่น บัว แอ๋ง เฒาะ หลัวะ ติ แกว๊ง ปุน นิ่น เญย บย่าว เจี๊ยะ ปั์ว นั้น เจี๊ยน, แอ๋ง เกว่ย เหฌี่ย นิ่น เญย หฑะเฮมียน กวัด โตะ จั๊ด นิ่น, หย่า ก๊อง, “ยิวไท เมี่ยน เญย ฮู่ง อ้า! เฒี่ยง ตุ๊ หม่าน ฝุย อ๊ะ!” 30นิ่น บัว แอ๋ง ทุ้ย ววม-ฑุ่ย แน้ด นิ่น, เฒาะ วั้ว ติ้ว หลัวะ ติ แกว๊ง เบ๊าะ นิ่น เญย มฆ้อง. 31กวัด โตะ จั๊ด ลิ์ว, นิ่น บัว ฯฒฯ ไจ๊ ฆอย ลุย-ด๊าว-ซิ, แอ๋ง เฒาะ นิ่น กั้น เญย ลุย เถง นิ่น ฒุ เจี๊ยน ฯฒฯ ต้อ นิ่น มี่ง ตีง เหฒียบ หฑั่ง จ๋า.
เยซู หฒุ ตีง เหฒียบ หฑั่ง จ๋า
(เป๊ย หมั่ง มาโค 15:21-32; ลูกา 23:26-43; โยฮัน 19:17-27)
32นิ่น บัว ธ้วด มี่ง วั้ว หฒั่น, ปวั้ง หฒุ เต้า ไซลีน เมี่ยน, บั๋ว เห่ว ซีโมน. แปง ฯฒฯ อ๊าบ ซีโมน ดาม เยซู เญย เหฒียบ หฑั่ง จ๋า. 33นิ่น บัว มี่ง เถา นอม ต๋อง, บั๋ว เห่ว โกนโกทา, เอ๋ย เล์ย เซ มฆ้อง-เคาะ ต๋อง. 34เถา วั้ว นิ่น บัว เฒาะ อะหงุ่น ติ๊ว เผว เจี๊ยน อิม เญย กะน้าย ปุน เยซู ฮบ.#สีง ฑูง 69:21 มป่า เยซู เสย ลิ์ว, ฯฒฯ ไม้ ฮบ.
35นิ่น บัว เฒาะ เยซู ตีง เจี๊ยน เหฒียบ หฑั่ง จ๋า, แอ๋ง เฒาะ นิ่น เญย ลุย-โหว ต้าย โด๊ว หมั่ง เหว่ย ปุน ฆอย.#สีง ฑูง 22:18 36ฆะฮ้า นิ่น บัว เฒว์ย เจี๊ยน วั้ว ฒั้ว หมั่ง เจี๊ยน นิ่น. 37เยียม เยซู เญย มฆ้อง กู้ หงว่าย นิ่น บัว เฟี้ย เจี๊ยน โก๋ นิ่น วั้ว เต๋ย หว่า. หว่า ก๊อง, “น้าย เซ ยิวไท เมี่ยน เญย ฮู่ง, เยซู.” 38นิ่น บัว แอ๋ง ตีง อี เต้า หฒะ แปง เยียม เยซู เญย กะเฮลน. ม่าย เต้า เยียม บย่าว แหมง. ม่าย เต้า เยียม หฒาย แหมง.
39เจี๋ย เจ๊า เญย เมี่ยน คี นิ่น, หฮวัง เจี๊ยน มฆ้อง ก๊อง,#สีง ฑูง 22:7; 109:25 40“อ๊า, เม่ย อ๋อย แธะ หฒั่ง ทิน-ฮู่ง เญย เปย๊า, ฆะฮ้า ปัว ฮนอย แอ๋ง กั้น เหธย เจี์ย ต้าย นี! เหฌียว เม่ย กั้น อ๊ะ. สี ก๊อง เม่ย โหฒว ทิน-ฮู่ง เญย ตอน, เหฌี่ย เหฒียบ หฑั่ง จ๋า ต้าย ม่าะ!”#มัดทาย 26:61; โยฮัน 2:19
41ไซ เมี่ยน เปย๊ย เหธา หฌาว เล์ย เญย ฟิน-แซง เหธา เมี่ยน โก๋ ฟี่ ฮนั้ง เญย จั๊ด นิ่น. 42นิ่น บัว ก๊อง, “นิ่น เหฌียว ตุ๊ เมี่ยน มป่า ไม้ ไฮ่ เหฌียว นิ่น กั้น เอาะ! นิ่น โหฒว อิสะลาเอน เมี่ยน เญย ฮู่ง! สี ก๊อง นิ่น อี้ หฒั่น เยียม เหฒียบ หฑั่ง จ๋า เหฌี่ย ต้าย, เยีย บัว ฯฒฯ เสียน นิ่น อ๊ะ. 43นิ่น เขา ทิน-ฮู่ง หย่า ก๊อง นิ่น โหฒว ทิน-ฮู่ง เญย ตอน. วั้ว หญู่ง, บัว หมั่ง ก๋า ทิน-ฮู่ง อี้ หฒั่น หฒะเก้ง อ๋อย เหฌียว นิ่น ไฟ ไม้ เหฌียว.”#สีง ฑูง 22:8 44เลี่ยม ตีง นิ่น เญย กะเฮลน วั้ว เต๋ย หฒะ แปง ฟี่ ฮนั้ง เญย ก๊อง คี นิ่น.
เยซู ไต่ หมี่ อ๊ะ
(เป๊ย หมั่ง มาโค 15:33-41; ลูกา 23:44-49; โยฮัน 19:28-30)
45ลู่ง เหฒียง อ๋าน เญย เฒี่ยง โห่, วั้ว นอม เต่ย-ปูง หฮมวัง เหฑ่ง เถา เหฌี่ย อ๋าน ปัว นอม เฒี่ยง โห่. 46เล่ย ไม้ โก เหฌี่ย อ๋าน ปัว นอม เฒี่ยง โห่, เยซู เห่ว เฉีย โฮล เญย ก๊อง, “เอลี, เอลี, ลามาซาบักทานี!” เอ๋ย เล์ย เซ, “เยีย เญย ทิน-ฮู่ง อ้า! เยีย เญย ทิน-ฮู่ง! เม่ย เหว่ย หาย ติ่ว กวั่ง เยีย?”#สีง ฑูง 22:1
47ม่าย เต๋ย โซ้ว เจี๊ยน วั้ว เญย เมี่ยน ไฮ์ นิ่น ก๊อง น้าย เต๋ย หว่า ฯฒฯ ก๊อง, “โอ๊, นิ่น เห่ว เอลียา.” 48ม่าย เต้า เยียม วั้ว เญย เมี่ยน เลี่ยม เฒ่ย ถิว มี่ง เฒาะ ไล-เหฑย-ซ้อด เหฒียม อะหงุ่น ติ๊ว-ซุย ต้าย, หล่ง หลัวะ ติ แกว๊ง ป๊ะ เจี๊ยน ธุ้น ปุน เยซู ฮบ.#สีง ฑูง 69:21 49มป่า ม่าย เต๋ย เยียม วั้ว เญย เมี่ยน ก๊อง, “บัว ฒั้ว หมั่ง ก๋า, เอลียา เก้ง ต้าย เหฌียว นิ่น เญย ไฟ?”
50เยซู แอ๋ง เห่ว หฑุ่น บุย เญย ลิ์ว, ฯฒฯ ตั๋ง เฉีย หมี่ อ๊ะ. 51เยียม หฒั่ง ทิน-ฮู่ง เญย เปย๊า กะญั์ว วั้ว คว้าย แบะ แก้ง เดีย เยียม กู้ หงว่าย บ๋าย ตอง กะเดี๊ย, โหฒว อี แหมง หมี่ อ๊ะ. เดา หย่า ต์ง, หละเปย๊ย หย่า บ๋าย เหฑ่ง.#ธ้วด อียิบ 26:31-33 52จั๋น-ไต่ โฒ้ว หย่า ฆอย หมี่ อ๊ะ. ทิน-ฮู่ง เญย ธีง-เหฑ่ง แปะ ฝีง, ต้ง ไต่ มี่ง วั้ว เต๋ย, ม่าย ธั้ม เญย นั่ง ต้าย 53ธ้วด โฒ้ว มี่ง. เยซู นั่ง ต้าย วั้ว หฒั่น, วั้ว เต๋ย เมี่ยน เปียะ วั้ว นอม ธีง-เหฑ่ง เญย ฒี่ง, เยลูซาเลม. ม่าย เมี่ยน ธั้ม เญย ตุ๊ ปวัด นิ่น บัว.
54ฒั้ว เยซู วั้ว เต้า แปง-เปย๊ย เหธา นิ่น เญย แปง ปวัด เดา ต์ง หย่า ปวัด หญู่งๆ สี่ ธ้วด, แฮะ นิ่น บัว กั้ม เหฑีย ไห่. นิ่น บัว ก๊อง, “น้าย เต้า หฒะเก้ง ทิน-ฮู่ง เญย ตอน อ๊ะ.”
55เยียม กาลิลี กัน เจี๊ยน เยซู ต้าย ฟู-สู นิ่น วั้ว เต๋ย มเซียะ ตอน ธั้ม เญย หย่า เยียม วั้ว โก เต๋ย เญย หมั่ง.#ลูกา 8:2-3 56วั้ว เต๋ย มเซียะ ตอน ม่าย เต้า มักดาลา มู้ง เญย มาลียา, ม่าย ยากอบ เหธา โยเซ้บ เญย มา มาลียา, หย่า ม่าย เสเบดี เญย อี เต้า ตอน เญย มา.
นิ่น บัว หฒัง เยซู
(เป๊ย หมั่ง มาโค 15:42-47; ลูกา 23:50-56; โยฮัน 19:38-42)
57ลู่ง ม์าน-หฮมวัง อ๊ะ, ม่าย เต้า เยียม อาลิมาเทีย มู้ง เญย ปุ๊ด-ฒ่อย เมี่ยน, บั๋ว เห่ว โยเซ้บ, ต้าย เถา. นิ่น หย่า โหฒว เยซู เญย ไซ-ก๋อ. 58โยเซ้บ มี่ง ล์อ ปีล้าด, โท้ เยซู เญย เซย. ปีล้าด ฯฒฯ ฆอย ฑุ่ย จิว เยซู เญย เซย ปุน โยเซ้บ. 59โยเซ้บ ฯฒฯ หล่ง เซียง-ล่าม่า เดีย เปว เจี๊ยน เยซู เญย เซย, 60ต้อ มี่ง หฒัง เซียง-หละเปย๊ย-โฒ้ว. น้าย นอม โฒ้ว โยเซ้บ โธะ โหะ หฒุ ต้าย เลี่ยว นิ่น กั้น หล่ง. หฒัง ลิ์ว, นิ่น ทุย คว้าย ต้ม หละเปย๊ย แบะ เจี๊ยน โฒ้ว-แก้ง, ฯฒฯ มี่ง หมี่ อ๊ะ. 61มักดาลา มู้ง เญย มาลียา แอ๋ง เหธา กั้น เต้า มาลียา เฒว์ย วั้ว, เฮมียน ฮวิน มี่ง โฒ้ว วั้ว ปูง.
แปง ฒั้ว โฒ้ว
62ตะเหญ่ย ฮนอย, เซ เถา ตี้ง กง ฮนอย, ไซ เมี่ยน เปย๊ย เหธา ฟาลิสี เมี่ยน มี่ง ล์อ ปีล้าด, 63หย่า ก๊อง, “ต้ม ก๋อ อ่า, เยีย บัว จั๋ง หฒุ ฒิ่น ด่าง ดั๊ว เมี่ยน วั้ว เต้า โล้ ไม้ แก้ง ไต่ วั้ว หฒั่น นิ่น ก๊อง, ‘ฆะฮ้า ปัว ฮนอย เยีย แอ๋ง นั่ง ต้าย.’#มัดทาย 16:21; 17:23; 20:19; มาโค 8:31; 9:31; 10:33-34; ลูกา 9:22; 18:31-33 64ฮนั้ง หน่าย, โท้ ต้ม ก๋อ เหฌี่ย หลี่ง พ้าย แปง มี่ง หลงๆ ฒั้ว เจี๊ยน โฒ้ว เถา ตะฟาม ฮนอย. เหฑีย นิ่น เญย ไซ-ก๋อ ไฮ่ มี่ง หนิ่ม เซย. ฆะฮ้า ไฮ่ บั๋ว หฒวัง เมี่ยน, ‘นิ่น ไต่ มี่ง แอ๋ง นั่ง ต้าย อ๊ะ.’ สี ก๊อง ฮนั้ง หน่าย, ก๊อง-แปะ น้าย หฑุ่น เก้า หว่าย ฒิ่น ด่าง วั้ว หฑุ่น อ๊ะ.”
65ปีล้าด บั๋ว นิ่น บัว, “วั้ว หญู่ง, กุ๊น ต้อ แปง มี่ง เอย เม่ย บัว ไฮ่ โหฒว เญย หลงๆ เญย ฒั้ว เจี๊ยน โฒ้ว ม่าะ!”
66นิ่น บัว ฯฒฯ มี่ง ฆ้าบ เจี๊ยน เหยียน โฒ้ว-แก้ง, หย่า ปุน แปง หลงๆ เญย ฒั้ว เจี๊ยน.
Currently Selected:
มัดทาย 27: IuMiTH
Highlight
Share
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007