มัดทาย 26
26
เมี่ยน ต๊า หฒะเอ๋ย ไต๋ เยซู
(เป๊ย หมั่ง มาโค 14:1-2; ลูกา 22:1-2; โยฮัน 11:45-53)
1เยซู ก๊อง ลิ์ว น้าย เต๋ย เหยียด ฒู้ง หว่า, นิ่น บั๋ว นิ่น เญย ไซ-ก๋อ, 2“เม่ย บัว ฮิ้ว ตุ๊ ม่าย อี ฮนอย ฮนั้ง เถา เสีย แหม่ง ฒิบ อ๊ะ.#ธ้วด อียิบ 12:1-27 เยีย, ป้าม เมี่ยน เญย ตอน, ฯฒฯ หฒุ เฒาะ จิว ปุน เมี่ยน ตีง เหฒียบ หฑั่ง จ๋า.”
3วั้ว หฒั่น ไซ เมี่ยน เปย๊ย เหธา แปะ ฝีง เญย เมี่ยน โก๋ กั๊บ ฒุ้น เยียม คายาฟ้าด ต้ม ไซ เมี่ยน เญย ติ่น, 4ธ่าง ล่าง ต๊า หฒะเอ๋ย ปี๋ง เจี๊ยน เฒาะ เยซู ไต๋ กวั่ง. 5มป่า นิ่น บัว ก๊อง, “น้าย เต๋ย เจี๋ย ฒิบ เญย ฮนอย กะญั์ว บัว ไม้ ตู๋ง แก้ง เฒาะ. กั้ม เหฑีย หฒวัง เมี่ยน ไฮ่ หลุ่น เหฑ่ง มเปย.”
ม่าย เต้า มเซียะ ตอน โต๋ โย่ว ดาง เยซู เญย มฆ้อง
(เป๊ย หมั่ง มาโค 14:3-9; โยฮัน 12:1-8)
6เยซู เยียม เบทานี ล์าง, ปุ๊ด เจี๋ย ก้ม ฮู้ แป่ง วั้ว เต้า ซีโมน เญย เปย๊า. 7หญั่น เจี๊ยน หฮนาง เญย เฒี่ยง โห่, ม่าย เต้า มเซียะ ตอน ต้อ นอม หละเปย๊ย-แป้ง#26:7 น้าย นอม แป้ง หล่ง เหยียด หญู่ง เหฑว่ย ไห่, จ๋าย ไห่ เญย หละเปย๊ย-เมา โหฒว ต้าย. จั๋น-แคะ เห่ว อี๋ สี่. ตั๊บ ปวั๊ง จ๋าย ไห่ เญย โย่ว ดาง ต้าย โต๋ เยซู เญย มฆ้อง.#ลูกา 7:37-38 8ไซ-ก๋อ บัว ปวัด ฮนั้ง หน่าย โหฒว, นิ่น บัว เฉีย เจี์ย ไห่ ฯฒฯ ก๊อง, “แปะๆ หฒาว กวั่ง โหฒว หาย หญู่ง? 9น้าย เต๋ย โย่ว ดาง ไฮ่ หม่าย ตุ๊ ญ่าน ธั้ม ไห่ ปุน เมี่ยน จ่ม เมี่ยน นีอา.”
10เยซู ฮิ้ว ตุ๊ นิ่น บัว ฮนั้ง หาย นอ ก๊อง นิ่น ฯฒฯ บั๋ว นิ่น บัว, “เม่ย บัว โหฒว หาย หญู่ง หละเญ้า น้าย เต้า มเซียะ ตอน? นิ่น ฮนั้ง น้าย นอ โหฒว ปุน เยีย เซ หลง ไห่ อ๊ะ. 11เม่ย บัว หฒั่นๆ ม่าย เมี่ยน จ่ม เมี่ยน เหธา เม่ย บัว เยียม. มป่า เม่ย บัว ไม้ ตุ๊ เยีย เหธา เม่ย บัว เหยียด ลิ์ว เยียม.#หฑั่ม เล์ย-หลัด 15:11 12นิ่น เฒาะ โย่ว ดาง โต๋ เยีย เญย ซิน, นิ่น โหฒว เหว่ย หลิ่ว เล์ย หฒัง เยีย เญย เซย. 13เยีย ก๊อง เฒียน บั๋ว เม่ย บัว, ไม้ กุ๊น มี่ง เถา ลู่ง เดี๊ย หาย นอม ต๋อง ฒุ่น น้าย คู้ เฝียน, เมี่ยน ฯฒฯ ก๊อง น้าย เต้า มเซียะ ตอน โหฒว เญย เจ๊า-โหล่ว เหว่ย จั๋ง เถา นิ่น.”
ยูดาด แล์ง หม่าย เยซู
(เป๊ย หมั่ง มาโค 14:10-11; ลูกา 22:3-6)
14วั้ว เต๋ย เหฒียบ เหญ่ย เต้า ไซ-ก๋อ ม่าย เต้า, ต้ง บั๋ว เห่ว ยูดาด อิสะคาลิโอด วั้ว เต้า, มี่ง ล์อ ไซ เมี่ยน เปย๊ย 15หน่าย นิ่น บัว, “สี ก๊อง เยีย เฒาะ เยซู จิว ปุน เม่ย บัว, เม่ย บัว ปุน หาย หญู่ง เยีย?” ไซ เมี่ยน เปย๊ย ฯฒฯ ซ้าว ฟ่า เหฒียบ นอม โล์-ฮนอย เญย ฒิ่น#เสคาลิยา 11:12 ปุน ยูดาด. 16เยียม หน่าย ต้าย, ยูดาด ล์อ ฉัง เฒาะ เยซู จิว ปุน นิ่น บัว.
เยซู เหธา นิ่น เญย ไซ-ก๋อ หญั่น เสีย แหม่ง ฒิบ เญย หฮนาง
(เป๊ย หมั่ง มาโค 14:12-21; ลูกา 22:7-13,21-23; โยฮัน 13:21-30)
17เจี๋ย ต้ง ไม้ อัน ปี๊ง เญย ฌั้ว เญย ฒิบ#ธ้วด อียิบ 12:17-20 ต้าว ฮนอย, ไซ-ก๋อ บัว ต้าย หน่าย เยซู, “ไซ-เตี๋ย อ๋อย เยีย บัว เยียม หาย เบ่น เสีย แหม่ง ฒิบ เญย หฮนาง ปุน ไซ-เตี๋ย หญั่น?”
18เยซู บั๋ว นิ่น บัว, “เม่ย บัว เปียะ ฒี่ง มี่ง ล์อ เหยียด ล่าน เมี่ยน, หย่า บั๋ว นิ่น, ‘ไซ-เตี๋ย ก๊อง, เยีย เญย เฒี่ยง โห่ เถา อ๊ะ. เยีย เหธา เยีย เญย ไซ-ก๋อ อ๋อย เยียม เม่ย เญย เปย๊า เจี๋ย เสีย แหม่ง ฒิบ.’” 19ไซ-ก๋อ บัว ฯฒฯ เอย เยซู เญย หว่า โหฒว, มี่ง เบ่น เสีย แหม่ง ฒิบ เญย หฮนาง.
20ลู่ง ม์าน-หฮมวัง, เยซู เหธา นิ่น เญย เหฒียบ เหญ่ย เต้า ไซ-ก๋อ ฝาว เตี้ย หญั่น หฮนาง. 21หญั่น เจี๊ยน หฮนาง วั้ว หฒั่น, เยซู ก๊อง, “เยีย ก๊อง เฒียน บั๋ว เม่ย บัว, เยียม เม่ย บัว บุด๋ง ม่าย เต้า อ๋อย หม่าย เยีย.”
22ไซ-ก๋อ บัว หฒะเก้ง! เฑ่า ไห่ ฯฒฯ เหยียด เต้า เหยียด เต้า เญย หน่าย เยซู, “เฒี้ยว อ่า, ไม้ เฒ์ย เยีย ซ่าะ?”
23เยซู เตา, “ต้ง เหธา เยีย จวั่ง หฑ่อม กั๊วะ ฌั้ว วั้ว เต้า อ๋อย หม่าย เยีย.#สีง ฑูง 41:9 24เยีย, ป้าม เมี่ยน เญย ตอน, อ๋อย หฒุ เกวย เสย ฮนั้ง กีง-โซว ก๊อง นอ. มป่า หม่าย เยีย วั้ว เต้า ฒู้ง หฒุ โค้ว อ๊ะ. นิ่น ไม้ ตู๋ง ธ้วด เสย เก้า หลง.”
25หม่าย เยซู วั้ว เต้า ยูดาด ก๊อง, “ไซ-เตี๋ย อ้า! ไม้ เฒ์ย เยีย ซ่าะ?”
เยซู เตา, “หน่าย เซ เม่ย กั้น ก๊อง อ๊ะ.”
เยซู เหลียบ จั๋ง นิ่น วั้ว ต๋น หฮนาง
(เป๊ย หมั่ง มาโค 14:22-26; ลูกา 22:14-20; 1 โคลินโท 11:23-25)
26หญั่น เจี๊ยน วั้ว หฒั่น, เยซู เฒาะ ฌั้ว ต้าย, แล์ง ฒี่ง ลิ์ว ทิน-ฮู่ง, ฯฒฯ แมะ ฆอย ปุน นิ่น เญย ไซ-ก๋อ บัว, หย่า ก๊อง, “ฒิบ ต้าย หญั่น อ๊ะ. น้าย เซ เยีย เญย ซิน.”
27เยซู แอ๋ง เฒาะ ฒ้าน อะหงุ่น ติ๊ว ต้าย, แล์ง ฒี่ง ลิ์ว ทิน-ฮู่ง, ฯฒฯ ปุน นิ่น บัว, หย่า ก๊อง, “เม่ย บัว เหยียด ฒู้ง กุ๊น ฮบ ม่าะ! 28น้าย เซ เยีย เญย ฑย้าม เหว่ย เหลียบ เจี์ย ทิน-ฮู่ง เญย แหง่ง หว่า. เซ เหลี่ยว ธ้วด เหว่ย ปุน ทิน-ฮู่ง กวั่ง เมี่ยน ธั้ม เญย ฒุ์ย.#ธ้วด อียิบ 24:8; เยเลมี 31:31-34 29เยีย บั๋ว เม่ย บัว, เยียม น้าย มี่ง, เยีย ไม้ เหธา เม่ย บัว ฮบ น้าย อะหงุ่น ติ๊ว. ฒั้ว เถา เยียม เยีย เญย เตีย เญย กั๊วะ หธีง ต้าย ตุ๊ เหธา เม่ย บัว เซียง-ฮบ เจี๋ย.”#26:29 เซียง-ฮบ เจี๋ย น้าย โจ๋ว กีก หว่า ไฮ่ ม่าย อี หญู่ง เอ๋ย เล์ย. ก๊อง เซียง-ฮบ เจี๋ย ไฟ ก๊อง ฮบ เซียง-อะหงุ่น ติ๊ว หย่า ตุ๊.
30นิ่น บัว ป๋าว ลิ์ว ฑูง, ฯฒฯ ธ้วด ต้าย, มี่ง วั้ว กะลั้น บง หมี่ อ๊ะ.
เยซู จา-ด่าง ก๊อง ปีเต ไม้ เหญี่ยม นิ่น
(เป๊ย หมั่ง มาโค 14:27-31; ลูกา 22:31-34; โยฮัน 13:36-38)
31วั้ว หฒั่น เยซู ก๊อง บั๋ว นิ่น เญย ไซ-ก๋อ, “อี้ ม์วน เม่ย บัว เหยียด ฒู้ง อ๋อย กวั่ง เจี๊ยน เยีย เปย๋า, เหว่ย หฒุ กีง-โซว เฟี้ย เจี๊ยน ก๊อง,
‘ทิน-ฮู่ง อ๋อย ไต๋ ปะกี ยู่ง เญย เฒี้ยว.
ปะกี ยู่ง กวั้น ฯฒฯ หฑาน เหฑ่ง หมี่ อ๊ะ.’#เสคาลิยา 13:7
32มป่า เยีย ไต่ มี่ง, ทิน-ฮู่ง แอ๋ง ปุน เยีย นั่ง ต้าย, เยีย ฯฒฯ มี่ง กาลิลี แซ้ง ด่าง เม่ย บัว.”#มัดทาย 28:16
33ปีเต ก๊อง บั๋ว เยซู, “ไม้ กุ๊น นิ่น บัว เหยียด ฒู้ง กวั่ง ไซ-เตี๋ย, เยีย เหยียด ลิ์ว ไม้ กวั่ง.”
34เยซู ก๊อง บั๋ว ปีเต, “เยีย ก๊อง เฒียน บั๋ว เม่ย. อี้ ม์วน, ไจ ฒู้ง ไม้ แก้ง หฆาย, เม่ย ฒู้ง ไม้ เหญี่ยม เยีย ปัว หฑุ่น.”
35ปีเต ก๊อง, “ไม้ กุ๊น เยีย หฒุ เหธา ไซ-เตี๋ย ไต่, เยีย เหยียด ลิ์ว เหญี่ยม, ไม้ กวั่ง เม่ย.” วั้ว เต๋ย ไซ-ก๋อ เหยียด ฒู้ง หย่า ฟี่ ฮนั้ง เญย ก๊อง.
เยซู เยียม เกดเสมานี หฮวีง เต๋า เก๋า
(เป๊ย หมั่ง มาโค 14:32-42; ลูกา 22:39-46)
36เยซู เหธา นิ่น เญย ไซ-ก๋อ มี่ง นอม ต๋อง, บั๋ว เห่ว เกดเสมานี. เยซู บั๋ว นิ่น เญย ไซ-ก๋อ, “เม่ย บัว เฒว์ย เจี๊ยน น้าย ฒั้ว เยีย มี่ง วั้ว แหมง เต๋า เก๋า.” 37นิ่น ฯฒฯ ต้อ ปีเต เหธา เสเบดี เญย อี เต้า ตอน เหธา เจี๊ยน มี่ง. วั้ว หฒั่น เยซู ไฮ์ เฮญี้ยว ฮวาง, เฑ่า ตุ๊ โค้ว ไห่, 38เยซู บั๋ว นิ่น บัว, “เยีย ไฮ์ หฒะเก้ง! เฑ่า ไห่, ฮนั้ง ไฮ่ ไต่ เญย นอ. เม่ย บัว เหธา เยีย เยียม น้าย กีง เฮญี้ยว ฒั้ว เจี๊ยน โอ่.”
39เยซู แอ๋ง เจี๋ย มี่ง เต๋ย ฯฒฯ บ๊าบ เหฌี่ย, เฮมียน เถา เดา เต๋า เก๋า ก๊อง, “เยีย เญย เตีย อ้า! สี ก๊อง หอบ เญย นอ, โท้ เตีย เฒาะ ฆอย เยีย อ๋อย หฒุ ฮบ น้าย นอม ฒ้าน.#26:39 “อ๋อย ฒุ ฮบ น้าย นอม ฒ้าน” เป๊ย อ๋อย หฒุ เสี่ยว โค้ว. มป่า ไม้ ตู๋ง เอย เยีย เญย เอ๋ย. อ๋อย หฒุ เอย เตีย เญย เอ๋ย ฮนั้ง.”
40เยซู แอ๋ง หฑวน เถา วั้ว เต๋ย ปัว เต้า ไซ-ก๋อ วั้ว, ปวัด นิ่น บัว มฌ่อม เหฑ่ง. นิ่น ฯฒฯ บั๋ว ปีเต, “เม่ย บัว โหฒว หาย หญู่ง เหธา เยีย ฒั้ว ไม้ ตุ๊ เหยียด นอม เฒี่ยง โห่? 41อ๋อย หฒุ กีง เจี๊ยน เฮญี้ยว เต๋า เก๋า, โท้ ทิน-ฮู่ง ไม้ ตู๋ง ปุน เม่ย บัว ปวั้ง หฒุ เสย เฮญี้ยว เญย สี่. เม่ย บัว เญย เฮญี้ยว อ๋อย โหฒว หอบ, มป่า ซิน หฒั่ง เมา ไห่.”
42เยซู แอ๋ง มี่ง เต๋า เก๋า ตะเหญ่ย หฑุ่น. นิ่น ก๊อง, “เยีย เญย เตีย อ้า! สี ก๊อง น้าย นอม ฒ้าน#มัดทาย 26:39 เยีย ซิ้ม ไม้ ดุ๊ด, หฒะเก้ง อ๋อย หฒุ ฮบ นอ, โท้ เอย เตีย เญย เอ๋ย โหฒว เหฒียง.” 43เยซู แอ๋ง หฑวน เถา ไซ-ก๋อ บัว วั้ว, ปวัด นิ่น บัว มฌ่อม หมี่ อ๊ะ, เหว่ย หฒุ มฒีง หญุย ไห่, หนูง ไม้ ฆอย.
44เยซู แอ๋ง เล่ย นิ่น บัว, มี่ง เต๋า เก๋า ตะฟาม หฑุ่น, หย่า ฮนั้ง ฒิ่น ด่าง วั้ว หฑุ่น นอ เต๋า เก๋า. 45ฆะฮ้า นิ่น แอ๋ง หฑวน ไซ-ก๋อ บัว วั้ว. นิ่น ก๊อง, “เม่ย บัว หธ่อ เยียม หน่าย เปว๋ย มฌ่อม ฮิด ขวน? หมั่ง ม่าะ! เฒี่ยง โห่ เถา อ๊ะ. เยีย, ป้าม เมี่ยน เญย ตอน, หฒุ จิว ปุน เยียม ฒุ์ย-เมี่ยน เญย ปั์ว-เดี๊ย. 46เจี์ย ซิน ต้าย, บัว มี่ง อ๊ะ. หมั่ง ก๋า วั้ว! หม่าย เยีย วั้ว เต้า เมี่ยน ต้าย เถา อ๊ะ.”
เยซู หฒุ เมี่ยน เฒาะ
(เป๊ย หมั่ง มาโค 14:43-50; ลูกา 22:47-53; โยฮัน 18:3-12)
47เยซู ก๊อง หว่า ฒู้ง ไม้ แก้ง เซ้ด, เหฒียบ เหญ่ย เต้า ไซ-ก๋อ เญย เหยียด เต้า, บั๋ว เห่ว ยูดาด, ต้าย เถา. แอ๋ง ม่าย ไซ เมี่ยน เปย๊ย เหธา แปะ ฝีง เญย เมี่ยน โก๋ พ้าย ต้าย เญย เมี่ยน ธั้ม ต้อ เจี๊ยน หฑุ ด๊าว, นั้น เจี๊ยน เดี๋ยง-ด๋น, กัน เจี๊ยน ต้าย. 48หม่าย เยซู วั้ว เต้า จา-ด่าง บั๋ว เหฒียง วั้ว เต๋ย, นิ่น อ๋อย โหฒว นอม จั๋ง-โห่ ปุน นิ่น บัว ฮิ้ว ตุ๊ เยซู. นิ่น ก๊อง, “เยีย ฒม หาย เต้า, เซ ต้ง เม่ย บัว อ๋อย เฒาะ วั้ว เต้า อ๊ะ. กุ๊น เฒาะ อ๊ะ.”
49ยูดาด แปง หฒะ เญย มี่ง เถา เยซู วั้ว หย่า ก๊อง, “ไซ-เตี๋ย อ้า! แป้ง ออน เญย ซ่าะ?” ฯฒฯ ฒม นิ่น เญย เฮมียน.
50เยซู ก๊อง, “โย์ว อ่า, เม่ย อ๋อย โหฒว หาย หญู่ง ก๊าน โหฒว เซี้ยบ อ๊ะ.”#26:50 ไฟ “เม่ย ต้าย น้าย โหฒว หาย หญู่ง?”
วั้ว เต๋ย เมี่ยน ฯฒฯ ต้าย เหฌี่ย ปั์ว เฒาะ เจี๊ยน เยซู. 51ม่าย เต้า เหธา เยซู เยียม วั้ว เญย เมี่ยน แปง นิ่น เญย หฑุ ด๊าว ธ้วด, ฮงะ ต้ม ไซ เมี่ยน เญย โน่ว, ไพ หฒุ โน่ว เญย เหยียด ปูง มน่อม ดุ๊ด มี่ง. 52เยซู บั๋ว นิ่น บัว, “เฒาะ เม่ย เญย หฑุ ด๊าว ทับ เจี๊ยน ไพ้ ม่าะ! หาย เต้า หล่ง หฑุ ด๊าว, ฒู้ง อ๋อย หฒุ หลาย หฑุ ด๊าว ไต่. 53เม่ย ไม้ ฮิ้ว ไฟ? เยีย ไฮ่ โท้ เยีย เญย เตีย, ดุ ตั้ง ฮนั้ง นิ่น ฯฒฯ พ้าย ฟิน-เมี่ยน แปง เก้า ธั้ม เหฒียบ เหญ่ย กวั้น#26:53 วั้ว จ๋า ลู่ง เดี๊ย เหยียด กวั้น แปง ม่าย 6,000 ธิน เต้า. 12 กวั้น ฯฒฯ ม่าย 72,000 เต้า แปง. ต้าย เถง เยีย. 54มป่า, สี ก๊อง เยีย ฮนั้ง หน่าย โหฒว, สี่ ฮนั้ง หาย นอ ไฮ่ ธ้วด ต้าย ต๋อย กีง-โซว เฟี้ย หอบ หฒุ ธ้วด เญย หว่า?”
55เยซู ฯฒฯ ก๊อง บั๋ว กั๊บ ฒุ้น เญย หฒวัง เมี่ยน, “เม่ย บัว ปวัด เยีย ฮนั้ง หฒะ แปง หธีง ต้าย ต้อ เจี๊ยน หฑุ ด๊าว เหธา เดี๋ยง-ด๋น ต้าย เฒาะ เยีย? เยีย ฮนอยๆ เฒว์ย เจี๊ยน หฒั่ง ทิน-ฮู่ง เญย เปย๊า หฌาว เมี่ยน, เม่ย บัว หย่า ไม้ เฒาะ.#ลูกา 19:47; 21:37 56มป่า น้าย เต๋ย เหยียด ฒู้ง สี่ ธ้วด ต้าย เหว่ย ปุน ต๋อย เหฑ่ง ฒิ่น ด่าง โต่ว หว่า เมี่ยน เฟี้ย เจี๊ยน กีง-โซว วั้ว เต๋ย หว่า.”
วั้ว หฒั่น ไซ-ก๋อ บัว ฯฒฯ กวั่ง เจี๊ยน เยซู, เปย๋า เหฑ่ง หมี่ อ๊ะ.
เยซู เยียม กุ๊น สี่ หวุ่ย หฒุ เซี้ยม
(เป๊ย หมั่ง มาโค 14:53-65; ลูกา 22:54-55,63-71; โยฮัน 18:13-14,19-24)
57เฒาะ เยซู วั้ว เต๋ย เมี่ยน ต้อ นิ่น มี่ง เถา คายาฟ้าด ต้ม ไซ เมี่ยน วั้ว. ม่าย หฌาว เล์ย เญย ฟิน-แซง เหธา เมี่ยน โก๋ กั๊บ ฒุ้น เยียม วั้ว. 58ปีเต กัน เจี๊ยน มี่ง มป่า เล่ย โก เต๋ย เญย, เถา ต้ม ไซ เมี่ยน เญย เปย๊า-เฮลน เปียะ หลาด กะญั์ว. นิ่น เหธา ฒั้ว เปย๊า เญย แปง เฒว์ย เจี๊ยน วั้ว, อ๋อย หมวัง ก๋า, น้าย เต๋ย สี่ ฮนั้ง หาย นอ.
59ไซ เมี่ยน เปย๊ย เหธา กุ๊น สี่ หวุ่ย เญย หฒวัง เมี่ยน ล์อ จ๊า ฒอง-เหฒง โก๋ เยซู เหว่ย ปุน นิ่น หฒุ ไต๋. 60มป่า ไม้ กุ๊น ม่าย เมี่ยน ธั้ม ต้าย โหฒว จ๊า ฒอง-เหฒง, หย่า ล์อ ไม้ ตุ๊ หาย หญู่ง กอน-แป๋ง โก๋ นิ่น. โหฒว เกา, ม่าย อี เต้า ธ้วด ต้าย 61ก๊อง, “น้าย ล่าน เมี่ยน ก๊อง, ‘เยีย ไฮ่ แธะ เหฑ่ง หฒั่ง ทิน-ฮู่ง เญย เปย๊า. ปัว ฮนอย กะญั์ว แอ๋ง กั้น เหธย เจี์ย ต้าย.’”#โยฮัน 2:19
62ต้ม ไซ เมี่ยน ฯฒฯ โซ้ว เจี์ย ต้าย หน่าย เยซู, “น้าย เต๋ย เมี่ยน ฮนั้ง น้าย นอ โก๋ เม่ย, เม่ย ไม้ เตา ไฟ?” 63มป่า เยซู ไม้ โค โล. ต้ม ไซ เมี่ยน แอ๋ง บั๋ว เยซู, “เยีย เฒี้ยง เจี๊ยน เหยียด ลิ์ว เฒี่ยง เญย ทิน-ฮู่ง หัด เม่ย ก๊อง หฒะ บั๋ว เยีย บัว, เม่ย หฒะเก้ง ทิน-ฮู่ง เญย ตอน, กีตู่, เฒ์ย ไฟ ไม้ เฒ์ย?”
64เยซู เตา, “เซ ฮนั้ง เม่ย ก๊อง นอ.” มป่า เยีย บั๋ว เม่ย บัว, ฆะฮ้า ฮี้ง เม่ย บัว อ๋อย ปวัด เยีย, ป้าม เมี่ยน เญย ตอน, เฒว์ย เจี๊ยน เน่น เจี๋ย เญย ทิน-ฮู่ง เญย บย่าว แหมง, หย่า เยียม วั้ว บ๋วน เหฌี่ย ต้าย.”#ดานีเอน 7:13
65ต้ม ไซ เมี่ยน ไฮ์ น้าย เต๋ย หว่า, ฯฒฯ เป๊ด นิ่น กั้น เญย ลุย หย่า ก๊อง, “นิ่น คี ทิน-ฮู่ง! บัว ไม้ หฒุ ล์อ หาย เต้า โหฒว ฒอง- เหฒง อ๊ะ. เม่ย บัว อี้ หฒั่น ฒู้ง ไฮ์ นิ่น คี ทิน-ฮู่ง.#เลวี 24:16 66เม่ย บัว ฮนั้ง หาย นอ ฮนั้ม?”
นิ่น บัว เตา, “นิ่น ต่อง อ๊ะ. หฒี่ ตุ๊ ไต่ อ๊ะ.”
67นิ่น บัว ฯฒฯ ทุ้ย ววม-ฑุ่ย แน้ด เยซู เญย เฮมียน หย่า หล่ง ปั์ว-จ้วน เบ๊าะ. ม่าย เต๋ย หล่ง ปั์ว-ฒ้าง ไบ๋,#อิสะยา 50:6 68หย่า ก๊อง, “เม่ย หน่าย เต้า กีตู่ อ้า! ไธ ก๋า! บั๋ว เยีย บัว ม่าะ! หาย เต้า เบ๊าะ เม่ย?”
ปีเต ไม้ เหญี่ยม เยซู
(เป๊ย หมั่ง มาโค 14:66-72; ลูกา 22:56-62; โยฮัน 18:15-18,25-27)
69ปีเต เฒว์ย เจี๊ยน เปย๊า-เฮลน หลาด กะญั์ว วั้ว หฒั่น, ม่าย เต้า มเซียะ โปว ต้าย ก๊อง, “เม่ย หย่า กัน วั้ว เต้า กาลิลี เมี่ยน, เยซู, ไม้ เฒ์ย?”
70มป่า ปีเต ตอง เจี๊ยน หฒวัง เมี่ยน ไม้ เหญี่ยม. นิ่น ก๊อง, “เยีย ไม้ ฮิ้ว ตุ๊ เม่ย ก๊อง หาย หญู่ง.”
71ก๊อง ลิ์ว, ปีเต ฯฒฯ มี่ง เถา วั้ว หลาด แก้ง. แอ๋ง ม่าย เต้า มเซียะ โปว ปวัด นิ่น ฯฒฯ บั๋ว เยียม วั้ว กะเฮลน เญย เมี่ยน, “น้าย เต้า เมี่ยน หย่า กัน นาซาเล้ด มู้ง เญย เยซู แอ๋.”
72ปีเต แอ๋ง ไม้ เหญี่ยม. นิ่น ก๊อง, “โด๊ว หาย หญู่ง หย่า โด๊ว ตุ๊, เยีย ไม้ ฮิ้ว วั้ว ล่าน เมี่ยน.”
73เหยียด หฒั่น เจี๋ย, โซ้ว เจี๊ยน วั้ว กะเฮลน เญย เมี่ยน ต้าย ก๊อง ปีเต, “เฒ์ย เญย. เม่ย เก้ง เหยียด เต้า วั้ว เต๋ย เมี่ยน อ๊ะ. เม่ย ก๊อง หว่า เญย เฉีย ปุน เม่ย กั้น ปี๋ง ไม้ เบว์ย อ๊ะ.”
74ปีเต ฯฒฯ แอ๋ง โด๊ว เจี์ย เหฒียว ก๊อง, “เยีย หฒะเก้ง! ไม้ ฮิ้ว ตุ๊ วั้ว ล่าน เมี่ยน.”
เลี่ยม เฒ่ย ไจ หฆาย อ๊ะ. 75ปีเต จั๋ง หฒุ เยซู ก๊อง เญย หว่า, “ไจ ฒู้ง ไม้ แก้ง หฆาย, เม่ย ไม้ เหญี่ยม เยีย ปัว หฑุ่น.” ปีเต ฯฒฯ ธ้วด มี่ง เญี้ยม ตุ๊ โค้ว ไห่.
Currently Selected:
มัดทาย 26: IuMiTH
Highlight
Share
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007