โยฮัน 8
8
มเซียะ ตอน เหฮยียน โหฆ หฒุ เมี่ยน เฒาะ ต้าย
1มป่า เยซู มี่ง วั้ว กะลั้น บง. 2ตะเหญ่ย ดอม เฑี้ยว เญย, เยซู แอ๋ง มี่ง หฒั่ง ทิน-ฮู่ง เญย เปย๊า. หฒวัง เมี่ยน ต้าย กั๊บ ฒุ้น นิ่น วั้ว. นิ่น ฯฒฯ เฒว์ย เจี๊ยน หฌาว นิ่น บัว. 3ม่าย เต๋ย หฌาว เล์ย เญย ฟิน-แซง เหธา ฟาลิสี เมี่ยน ต้อ เต้า เหฮยียน เจี๊ยน โหฆ เฒาะ ต้าย เญย มเซียะ ตอน, ปุน นิ่น โซ้ว เจี๊ยน หฒวัง เมี่ยน เญย หฑะเฮมียน. 4นิ่น บัว ก๊อง บั๋ว เยซู, “ฟิน-แซง อ้า! น้าย เต้า มเซียะ ตอน เหฮยียน เจี๊ยน โหฆ วั้ว หฒั่น เมี่ยน เฒาะ ต้าย. 5โมเซ เญย เล์ย-หลัด หัด บัว อ๋อย หฒุ หล่ง หละเปย๊ย ฒง น้าย หญู่ง เมี่ยน ไต่. เม่ย นี? ฮนั้ง หาย นอ ก๊อง?”#เลวี 20:10; หฑั่ม เล์ย-หลัด 22:22-24 6นิ่น บัว ฮนั้ง น้าย นอ หน่าย เซ อ๋อย ดั๊ว เยซู ก๊อง ต่อง ฯฒฯ ไฮ่ ล์อ กอน-แป๋ง โก๋ นิ่น. มป่า เยซู โด๊ะ เหฌี่ย หล่ง ปั์ว-โด๊ะ เฟี้ย กะเดี๊ย เดา.
7วั้ว เต๋ย เมี่ยน ไม้ ตี้ง เลี่ยว เญย หน่าย. เยซู ฯฒฯ เธา เจี์ย ต้าย ก๊อง บั๋ว นิ่น บัว, “เม่ย บัว หาย เต้า ไม้ ป์าม เจี๋ย ฒุ์ย, กุ๊น เฒาะ หละเปย๊ย ฒง ด่าง ม่าะ!” 8ก๊อง ลิ์ว, เยซู แอ๋ง โด๊ะ เหฌี่ย หล่ง ปั์ว-โด๊ะ เฟี้ย เดา.
9นิ่น บัว ไฮ์ เยซู ฮนั้ง น้าย นอ ก๊อง, นิ่น บัว ฯฒฯ โหฒะ เต้า โหฒะ เต้า เญย ธ้วด. เก้า โก๋ วั้ว เต๋ย ธ้วด ด่าง, ธ้วด เหฑ่ง อ๊ะ. ขูง เยซู กั้น เยียม วั้ว ฮนั้ง. มป่า วั้ว เต้า มเซียะ ตอน หธ่อ โซ้ว เจี๊ยน วั้ว เญย. 10เยซู แอ๋ง เธา เจี์ย ต้าย หน่าย วั้ว เต้า มเซียะ ตอน, “ต่อ อ้า! วั้ว เต๋ย เมี่ยน เจี๋ย หาย เหฑ่ง หมี่ อ๊ะ. ไม้ ม่าย หาย เต้า ตี่ง เม่ย เญย ฒุ์ย?”
11วั้ว เต้า มเซียะ ตอน เตา, “ต้ม ก๋อ อ้า! ไม้ ม่าย หาย เต้า อ๊ะ.”
เยซู ก๊อง, “เยีย หย่า ไม้ ตี่ง เม่ย เญย ฒุ์ย. กุ๊น มี่ง อ๊ะ. ยั่ง น้าย เจี๋ย ไม้ ตู๋ง แอ๋ง ป์าม ฒุ์ย โอ่.”
เยซู เซ ฌัง หฒิว ป้าม เกน
12เยซู แอ๋ง หฌาว หฒวัง เมี่ยน. นิ่น ก๊อง, “เยีย เซ ฌัง หฒิว ป้าม เกน. หาย เต้า กัน เยีย, วั้ว เต้า เหยียด ลิ์ว ไม้ หฒุ ยั่ง หฮมวัง กะญั์ว, ฒู้ง ตุ๊ ฌัง หฒิว นิ่น เญย แหม่ง.”#มัดทาย 5:14; โยฮัน 9:5
13ฟาลิสี เมี่ยน แอ๋ง ก๊อง, “เม่ย เถง เม่ย กั้น โหฒว ฒอง-เหฒง, เม่ย ก๊อง เญย หว่า เซ ไม้ เฒียน.”#โยฮัน 5:31
14เยซู เตา, “ไม้ กุ๊น เยีย เถง เยีย กั้น โหฒว ฒอง-เหฒง, เยีย เญย หว่า หฒะเก้ง เฒียน เญย, เหว่ย หฒุ เยีย ฮิ้ว ตุ๊ เยีย เยียม หาย ต้าย หย่า ฮิ้ว ตุ๊ เยีย อ๋อย มี่ง หาย. มป่า เม่ย บัว ไม้ ฮิ้ว ตุ๊ เยีย เยียม หาย ต้าย หย่า อ๋อย มี่ง หาย.
15“เม่ย บัว เอย ป้าม เมี่ยน เญย หฒะเอ๋ย เซี้ยม เมี่ยน. เยีย ไม้ เซี้ยม หาย เต้า. 16มป่า สี ก๊อง เยีย เซี้ยม เมี่ยน นอ, เยีย เซี้ยม ตุ๊ หอบ, เหว่ย หฒุ ไม้ เฒ์ย เยีย กั้น เซี้ยม. หฒั่ง เตี๋ย พ้าย เยีย ต้าย หย่า เหธา เยีย เซี้ยม. 17เม่ย บัว กั้น เญย เล์ย-หลัด เฟี้ย เจี๊ยน ก๊อง, ‘ม่าย อี ล่าน เมี่ยน โหฒว ฒอง-เหฒง, ก๊อง เญย หว่า ต๋อย นอ, เสียน ตุ๊ อ๊ะ.’#หฑั่ม เล์ย-หลัด 19:15 18เยีย เถง เยีย กั้น โหฒว ฒอง-เหฒง. แอ๋ง ม่าย เยีย เญย เตีย, ต้ง พ้าย เยีย ต้าย วั้ว เต้า, หย่า เถง เยีย โหฒว ฒอง-เหฒง.”
19นิ่น บัว หน่าย, “เม่ย เญย เตีย เยียม หาย?”
เยซู เตา, “เม่ย บัว ไม้ ฮิ้ว เยีย, หย่า ไม้ ฮิ้ว เยีย เญย เตีย. สี ก๊อง เม่ย บัว ฮิ้ว ตุ๊ เยีย นอ, เม่ย บัว ฯฒฯ ฮิ้ว ตุ๊ เยีย เญย เตีย.” 20เยซู เยียม หฒั่ง ทิน-ฮู่ง เญย เปย๊า, นิด เมี่ยน ฝ่ง ห่อ ญ่าน วั้ว เต๋ย ฟาง เญย ต๋อง หฌาว เมี่ยน วั้ว หฒั่น, นิ่น ก๊อง น้าย เต๋ย หว่า. หย่า ไม้ ม่าย หาย เต้า เฒาะ นิ่น เหว่ย หฒุ นิ่น เญย เฒี่ยง โห่ ไม้ แก้ง เถา.
เยีย มี่ง เญย ต๋อง เม่ย บัว มี่ง ไม้ ตุ๊
21เยซู แอ๋ง ก๊อง บั๋ว นิ่น บัว, “เยีย อ๋อย มี่ง อ๊ะ. เม่ย บัว อ๋อย ล์อ เยีย, มป่า เม่ย บัว ไต่ เม่ย บัว หธ่อ ม่าย เจี๊ยน ฒุ์ย เญย. เยีย มี่ง เญย ต๋อง เม่ย บัว ไม้ ไฮ่ มี่ง.”
22โหฒว โฮล เญย ยิวไท เมี่ยน ก๊อง, “นิ่น อ๋อย ไต๋ นิ่น กั้น ไต่ ไฟ? เหว่ย หฒุ นิ่น ก๊อง นิ่น มี่ง เญย ต๋อง บัว มี่ง ไม้ ตุ๊.”
23เยซู บั๋ว นิ่น บัว, “เม่ย บัว เป๋น ลู่ง เดี๊ย เญย, เยีย เป๋น ทิน-ต้อง เญย. เม่ย บัว เกวย ป้าม เกน, เยีย ไม้ เกวย ป้าม เกน. 24เหว่ย น้าย เยีย ก๊อง บั๋ว เจี๋ย เม่ย บัว, เถา ไต่ วั้ว หฒั่น เม่ย บัว หธ่อ ม่าย เจี๊ยน ฒุ์ย เญย. สี ก๊อง เม่ย บัว ไม้ เสียน เยีย โหฒว ต้ง เยีย ก๊อง เยีย โหฒว วั้ว เต้า นอ, เม่ย บัว ไต่ มป่า หธ่อ ม่าย เจี๊ยน ฒุ์ย เญย.”
25นิ่น บัว หน่าย เยซู, “เม่ย ต้ง หาย เต้า แล่?”
เยซู เตา, “ฒิ่น ด่าง เยีย บั๋ว เจี๋ย เม่ย บัว เยีย ต้ง หาย เต้า, เยีย เซ ต้ง วั้ว เต้า อ๊ะ. 26เยีย แอ๋ง ม่าย ธั้ม-หญู่ง เจ๊า ก๊อง เม่ย บัว, ตี่ง เม่ย บัว เญย ฒุ์ย. มป่า พ้าย เยีย ต้าย วั้ว เต้า เซ เฒียน เญย. เยีย ไฮ์ นิ่น ก๊อง เจี๋ย เญย หว่า, เยีย หย่า ก๊อง บั๋ว ป้าม เมี่ยน.”
27วั้ว เต๋ย เมี่ยน ไม้ เม่ง แปะ เยซู ก๊อง เถา หฒั่ง เตี๋ย. 28เยซู ฯฒฯ ก๊อง, “เม่ย บัว เหลียบ เยีย, ป้าม เมี่ยน เญย ตอน, ฝาว ฮลัง วั้ว หฒั่น, เม่ย บัว ฯฒฯ ฮิ้ว ตุ๊ เยีย เซ เหยียด ลิ์ว เฒี่ยง เจี๊ยน วั้ว เต้า.#ธ้วด อียิบ 3:14 วั้ว หฒั่น เม่ย บัว ฯฒฯ ฮิ้ว ตุ๊ เยีย ไม้ เฒ์ย เซว่ย เอ๋ย โหฒว หาย หญู่ง. หฒั่ง เตี๋ย หฌาว เยีย ฮนั้ง หาย นอ ก๊อง, เยีย ฯฒฯ ฮนั้ง วั้ว นอ ก๊อง. 29พ้าย เยีย ต้าย วั้ว เต้า หย่า เหธา เยีย เยียม. นิ่น ไม้ กวั่ง ปุน เยีย กั้น เยียม เหว่ย หฒุ เยีย หฒั่นๆ โหฒว หอบ นิ่น เญย เฮญี้ยว.” 30เมี่ยน ธั้ม เญย ไฮ์ เยซู ก๊อง น้าย เต๋ย หว่า ฯฒฯ เสียน นิ่น.
อับลาฮัม เญย เฒ้ย-ฟุน
31เยซู ก๊อง บั๋ว เสียน นิ่น วั้ว เต๋ย ยิวไท เมี่ยน, “สี ก๊อง เม่ย บัว หฒั่นๆ เอย เจี๊ยน เยีย หฌาว เญย หว่า โหฒว, เม่ย บัว หฒะเก้ง โหฒว เยีย เญย ไซ-ก๋อ. 32เม่ย บัว ฯฒฯ ฮิ้ว ตุ๊ เฒียน เล์ย. เฒียน เล์ย หย่า อ๋อย ปู๋ง ฆอย เม่ย บัว.”
33นิ่น บัว เตา, “เยีย บัว โหฒว อับลาฮัม เญย เฒ้ย-ฟุน, เหยียด ลิ์ว ไม้ เถง หาย เต้า โหฒว เจี๋ย โน่ว. วั้ว หญู่ง, เม่ย ฝู่ง ก๊อง เยีย บัว ตุ๊ ปู๋ง ฆอย?”#มัดทาย 3:9; ลูกา 3:8
34เยซู เตา นิ่น บัว, “เยีย ก๊อง เฒียน บั๋ว เม่ย บัว, หาย เต้า ป์าม ฒุ์ย, วั้ว เต้า โหฒว ฒุ์ย เญย โน่ว. 35โหฒว โน่ว เญย เมี่ยน ไม้ ไฮ่ เหยียด ลิ์ว เหธา เปย๊า-เฒี้ยว เยียม. ขูง เธียน ตอน ตุ๊ เหยียด ลิ์ว เยียม ฮนั้ง. 36สี ก๊อง ทิน-ฮู่ง เญย ตอน ปู๋ง ฆอย เม่ย บัว, เม่ย บัว หฒะเก้ง เป๋น ปู๋ง ฆอย เญย เมี่ยน. 37เยีย ฮิ้ว ตุ๊ เม่ย บัว โหฒว อับลาฮัม เญย เฒ้ย-ฟุน. มป่า เม่ย บัว หธ่อ อ๋อย ไต๋ เยีย เหว่ย หฒุ เยีย หฌาว เญย เล์ย เม่ย บัว ไม้ หมวัง. 38เยีย ก๊อง เญย เซ เยียม หฒั่ง เตี๋ย วั้ว ปวัด เจี๋ย เญย สี่. เม่ย บัว โหฒว เญย เซ เม่ย บัว เญย เตีย บั๋ว เม่ย บัว โหฒว.”
39นิ่น บัว เตา, “เยีย บัว เญย เตีย เซ อับลาฮัม.”
เยซู แอ๋ง เตา นิ่น บัว, “สี ก๊อง เม่ย บัว หฒะเก้ง โหฒว อับลาฮัม เญย เฒ้ย-ฟุน นอ, เม่ย บัว โหฒว เญย สี่ ฯฒฯ ฮนั้ง อับลาฮัม โหฒว เญย. 40เยีย ขูง ก๊อง ต้ง เยีย ไฮ์ ทิน-ฮู่ง ก๊อง เจี๋ย เญย เฒียน เล์ย บั๋ว เม่ย บัว, มป่า เม่ย บัว อ๋อย ไต๋ เยีย. อับลาฮัม ไม้ ฮนั้ง หน่าย โหฒว. 41เม่ย บัว ขูง โหฒว ฮนั้ง เม่ย บัว เญย เตีย นอ โหฒว.”
นิ่น บัว เตา, “เยีย บัว เซ ไม้ เฒ์ย กู้งว์า-ทอย. เยีย บัว ม่าย ดุ เต้า เตีย ฮนั้ง, เซ ทิน-ฮู่ง.”
เมี้ยน เญย ฮู่ง เญย เฒ้ย-ฟุน
42เยซู ก๊อง บั๋ว นิ่น บัว, “สี ก๊อง ทิน-ฮู่ง หฒะเก้ง โหฒว เม่ย บัว เญย เตีย นอ, เม่ย บัว ฯฒฯ ฮนั้ม เยีย เหว่ย หฒุ เยีย เยียม นิ่น ต้าย, อี้ หฒั่น เยีย เยียม น้าย. เยีย ไม้ เฒ์ย เอย เยีย กั้น เญย เอ๋ย ต้าย. นิ่น พ้าย เยีย ต้าย. 43เม่ย บัว เหว่ย หาย ติ่ว ไม้ เม่ง แปะ เยีย ก๊อง เญย หว่า? เซ เหว่ย หฒุ เม่ย บัว ไม้ ไฮ่ หมวัง เยีย เญย โต์. 44เม่ย บัว เญย เตีย เซ เมี้ยน เญย ฮู่ง. เม่ย บัว ขูง อ๋อย เอย เจี๊ยน เม่ย บัว เญย เตีย เญย เอ๋ย โหฒว ฮนั้ง. เยียม กอน วั้ว นิ่น มต้าย ไต๋ เมี่ยน. นิ่น เหยียด ลิ์ว ไม้ อะเฮน้ย เฒียน เล์ย, เหว่ย หฒุ เยียม นิ่น กั้น ไม้ ม่าย เฒียน เล์ย. นิ่น ก๊อง-แปะ เหว่ย หฒุ นิ่น เอย นิ่น กั้น เญย เฟียม-ฝีง มต้าย ก๊อง-แปะ. นิ่น ขูง ก๊อง-แปะ ฮนั้ง หย่า โหฒว ก๊อง-แปะ เญย เตีย. 45มป่า เยีย ก๊อง เฒียน เญย, เม่ย บัว หธีง ต้าย ไม้ เสียน เยีย. 46เม่ย บัว หาย เต้า ไฮ่ ฒ่า ตุ๊ ธ้วด เยีย ม่าย ฒุ์ย? วั้ว หญู่ง, สี ก๊อง เยีย ก๊อง เฒียน เล์ย, เม่ย บัว เหว่ย หาย ติ่ว ไม้ เสียน เยีย? 47หาย เต้า เยียม ทิน-ฮู่ง ต้าย, วั้ว เต้า ฒู้ง หมวัง ทิน-ฮู่ง เญย หว่า. เม่ย บัว ไม้ เฒ์ย เยียม ทิน-ฮู่ง ต้าย หธีง ต้าย ไม้ หมวัง นิ่น เญย หว่า.”
เยซู เยียม ด่าง อับลาฮัม
48วั้ว เต๋ย ยิวไท เมี่ยน เตา เยซู, “น้าย เยีย บัว ก๊อง ตุ๊ หฒุ เญย ซ่าะ? เยีย บัว ก๊อง เม่ย เซ สะมาเลีย จั๋น หย่า ม่าย เมี้ยน เยียม เม่ย เญย ซิน.”
49เยซู เตา, “เยีย ไม้ เฒ์ย ม่าย เมี้ยน เยียม เยีย เญย ซิน. เยีย ท่าย เยีย เญย เตีย, มป่า เม่ย บัว หมั่ง เผีย เยีย. 50เยีย ไม้ เฒ์ย ล์อ เมี่ยน ท่าย เยีย, มป่า ม่าย เต้า เถง เยีย ล์อ, หย่า ต้ง น้าย เต้า อ๋อย เถง เยีย เซี้ยม. 51เยีย ก๊อง เฒียน บั๋ว เม่ย บัว, หาย เต้า เอย เจี๊ยน เยีย หฌาว เญย หว่า โหฒว, วั้ว เต้า เหยียด ลิ์ว ไม้ ไต่.”
52ยิวไท เมี่ยน ก๊อง บั๋ว นิ่น, “อี้ หฒั่น เยีย บัว หฒะเก้ง ฮิ้ว ตุ๊ เม่ย ม่าย เมี้ยน เยียม เม่ย เญย ซิน. อับลาฮัม ไต่ หมี่ อ๊ะ. ทิน-ฮู่ง เญย หฒวัง โต่ว หว่า เมี่ยน หย่า ไต่ เหฑ่ง หมี่ อ๊ะ. มป่า เม่ย ก๊อง หาย เต้า เอย เจี๊ยน เม่ย หฌาว เญย หว่า โหฒว, วั้ว เต้า เหยียด ลิ์ว ไม้ ไต่. 53บัว เญย อง-ถาย-แงะ, อับลาฮัม, ฒู้ง ไต่ หมี่ อ๊ะ. เม่ย โหฒว เก้า โฮล เจี๋ย นิ่น ไฟ? ทิน-ฮู่ง เญย หฒวัง โต่ว หว่า เมี่ยน หย่า ไต่ หมี่ อ๊ะ. เม่ย ก๊อง เม่ย กั้น โหฒว หาย เต้า?”
54เยซู เตา นิ่น บัว, “สี ก๊อง เยีย กั้น ท่าย เยีย กั้น นอ, น้าย ไม้ ม่าย หาย หญู่ง เอ๋ย เล์ย. ท่าย เยีย วั้ว เต้า เซ เยีย เญย เตีย, ต้ง เม่ย บัว ก๊อง โหฒว เม่ย บัว เญย ทิน-ฮู่ง วั้ว เต้า. 55เม่ย บัว เหยียด ลิ์ว ไม้ ฮิ้ว ตุ๊ นิ่น, มป่า เยีย ฮิ้ว ตุ๊ นิ่น เญย. สี ก๊อง เยีย ก๊อง เยีย ไม้ ฮิ้ว ตุ๊ นิ่น นอ, เยีย ฯฒฯ ฮนั้ง เม่ย บัว นอ ก๊อง-แปะ. มป่า เยีย ฮิ้ว ตุ๊ นิ่น, หย่า เอย เจี๊ยน นิ่น เญย หว่า โหฒว. 56เม่ย บัว เญย อง-ถาย, อับลาฮัม, อะเฮน้ย อ๋อย ตุ๊ ปวัด เยีย ต้าย เญย ฮนอย-เหญียะ. นิ่น ตุ๊ ปวัด ลิ์ว ฯฒฯ ออน-เหลาะ ไห่.”
57นิ่น บัว แอ๋ง ก๊อง นิ่น, “อา, เม่ย ฒู้ง ไม้ แก้ง ตุ๊ ฮม์ เหฒียบ หฮญัง. เม่ย ปวัด เจี๋ย อับลาฮัม เญย?”
58เยซู เตา, “เยีย ก๊อง เฒียน บั๋ว เม่ย บัว, อับลาฮัม ไม้ แก้ง ธ้วด เสย, เยีย ฒู้ง เยียม เญย.”
59นิ่น บัว ไฮ์ น้าย เต๋ย หว่า ฯฒฯ เฒาะ หละเปย๊ย อ๋อย ฒง นิ่น, มป่า นิ่น ปี๋ง เจี๊ยน ธ้วด หฒั่ง ทิน-ฮู่ง เญย เปย๊า หมี่ อ๊ะ.
Currently Selected:
โยฮัน 8: IuMiTH
Highlight
Share
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007