ฮิบลู 7
7
เมนคีเซเดก ไซ เมี่ยน
1น้าย เต้า เมนคีเซเดก โหฒว ซาเลม ฒี่ง เญย ฮู่ง หย่า โหฒว เยียม ฮลัง เจี๋ย เญย ทิน-ฮู่ง เญย ไซ เมี่ยน. อับลาฮัม มี่ง เบ๊าะ ฮี่ง วั้ว เต๋ย เปยย เต้า ฮู่ง เตี๋ย ลิ์ว,#ทิน เต่ย โต้ว 14:17-20 หฑวน วั้ว หฒั่น, เมนคีเซเดก มี่ง ปวั้ง นิ่น หย่า ปวัง หว่า ปุน นิ่น. 2อับลาฮัม หย่า เฒาะ นิ่น เบ๊าะ ฮี่ง ธ้าง ตุ๊ ต้าย เญย เหยียด ฒู้ง กะน้าย, เหฒียบ โก๊ว เญย ปุน เหยียด โก๊ว เมนคีเซเดก. เมนคีเซเดก เญย บั๋ว ตะเยี้ยด หญู่ง เอ๋ย เล์ย เซ “แป้ง ฟิม เญย ฮู่ง.” นิ่น โหฒว ซาเลม ฒี่ง เญย ฮู่ง ฯฒฯ แอ๋ง ม่าย นอม บั๋ว เห่ว “แป้ง ออน เญย ฮู่ง เตี๋ย,” เหว่ย หฒุ ซาเลม วั้ว โจ๋ว หว่า เญย เอ๋ย เล์ย เซ “แป้ง ออน.” 3ไม้ ม่าย โซว ก๊อง หาย เต้า โหฒว เมนคีเซเดก เญย เตีย ไฟ มา, ไฟ นิ่น เญย โต้ว ฒง, หย่า ไม้ ก๊อง นิ่น ธ้วด เสย เหธา เกวย เสย เญย ฮนอย. นิ่น เซ ฮนั้ง ทิน-ฮู่ง เญย ตอน นอ, เหยียด ลิ์ว โหฒว ไซ เมี่ยน.
4ฮนั้ม หมั่ง ก๋า, เมนคีเซเดก ด่ง หาย โฮล! บัว เญย อง-ถาย-แงะ อับลาฮัม ฒู้ง เฒาะ นิ่น เบ๊าะ จ๋า ฮี่ง ธ้าง ตุ๊ ต้าย เญย กะน้าย เหฒียบ โก๊ว ปุน เหยียด โก๊ว เมนคีเซเดก. 5หฒิว เล์ย-หลัด ตี่ง, เลวี เญย ฟุน-ฟะ, ต้ง โหฒว ไซ เมี่ยน วั้ว เต๋ย, อ๋อย หฒุ เซียว อิสะลาเอน เมี่ยน เญย กะน้าย เหฒียบ โก๊ว เญย เหยียด โก๊ว, ไม้ กุ๊น นิ่น บัว ล่ม ฑ่อย โหฒว อิสะลาเอน ฝีง หย่า โหฒว อับลาฮัม เญย เฒ้ย-ฟุน.#ซ้าว เมี่ยน 18:21 6เมนคีเซเดก ไม้ เฒ์ย เลวี เญย โต้ว ฒง, มป่า นิ่น ตุ๊ เซียว อับลาฮัม เญย กะน้าย เหฒียบ โก๊ว เญย เหยียด โก๊ว, หย่า ปวัง หว่า ปุน อับลาฮัม, ต้ง ตุ๊ ฒิบ เอย ทิน-ฮู่ง แล์ง เญย หว่า. 7ปวัง หว่า วั้ว เต้า ด่ง หาย ฒู้ง โหฒว เก้า โฮล ต้ง ตุ๊ นิ่น ปวัง หว่า วั้ว เต้า. 8ก๊อง เถา ไซ เมี่ยน นอ, นิ่น บัว เซียว เหฒียบ โก๊ว เญย เหยียด โก๊ว มป่า นิ่น บัว เซ ไฮ่ ไต่ เญย เมี่ยน. เมนคีเซเดก หย่า เซียว เหฒียบ โก๊ว เญย เหยียด โก๊ว มป่า นิ่น หธ่อ เฒี่ยง เจี๊ยน เญย ฮนั้ง กีง-โซว ก๊อง นอ. 9สี ก๊อง แอ๋ง ก๊อง หญู่ง, ไม้ กุ๊น เลวี เญย เฒ้ย-ฟุน เซียว เหฒียบ โก๊ว เญย เหยียด โก๊ว มป่า อับลาฮัม ธ้วด เหฒียบ โก๊ว เญย เหยียด โก๊ว ปุน เมนคีเซเดก วั้ว หฒั่น, เลวี หย่า เหธา เจี๊ยน ธ้วด. 10เหว่ย หฒุ เมนคีเซเดก ปวั้ง อับลาฮัม วั้ว หฒั่น, เลวี ไม้ แก้ง ธ้วด เสย, มป่า หธ่อ เยียม นิ่น เญย อง-ถาย-แงะ, อับลาฮัม, เญย ซิน.
ม่าย เต้า ไซ เมี่ยน ฮนั้ง เมนคีเซเดก
11ฒิ่น ด่าง ทิน-ฮู่ง ปุน เล์ย-หลัด อิสะลาเอน เมี่ยน วั้ว หฒั่น, ม่าย เลวี วั้ว หญู่ง ไซ เมี่ยน โหฒว เล์ย-หลัด เญย กอน-โด๊ะ. สี ก๊อง เลวี วั้ว หญู่ง ไซ เมี่ยน โหฒว เญย กง ไฮ่ ปุน เมี่ยน ตุ้น ยุ่น นอ, เหว่ย หาย ติ่ว อ๋อย หฒุ แอ๋ง กั้น ม่าย หญู่ง ไซ เมี่ยน ธ้วด ต้าย ฮนั้ง เมนคีเซเดก วั้ว หญู่ง ไซ เมี่ยน, ไม้ ฮนั้ง อาโลน? 12กั้น เหยี่ยน หญู่ง ไซ เมี่ยน นอ, เล์ย-หลัด หย่า อ๋อย หฒุ กั้น เหยี่ยน เจี๋ย. 13บัว เญย เฒี้ยว, ต้ง เยีย บัว ก๊อง เถา วั้ว เต้า, เป๋น กั้น ฝีง เมี่ยน. วั้ว ฝีง หย่า ไม้ ม่าย เหยียด เต้า ตุ๊ โหฒว เจี๋ย ไซ เมี่ยน เยียม เหฒี่ย-ต้อง ฟู-สู. 14เมี่ยน เม่งๆ เญย ฮิ้ว ตุ๊ บัว เญย เฒี้ยว ธ้วด เสย เป๋น ยูดา ฝีง. โมเซ ก๊อง ไซ เมี่ยน เญย เจ๊า วั้ว หฒั่น, นิ่น เลี่ยม ไม้ ที่ เหยียด โจ๋ว ยูดา ฝีง.
15แอ๋ง ม่าย ติ่ว ปุน บัว ฒู้ง เก้า เม่ง แปะ, เซ ม่าย กั้น เต้า ไซ เมี่ยน ธ้วด ต้าย, นิ่น หย่า ฮนั้ง เมนคีเซเดก นอ. 16นิ่น ตุ๊ โหฒว ไซ เมี่ยน เซ ไม้ เฒ์ย เอย โต้ว ฒง โหฒว ไซ เญย เล์ย, เซ เอย ไม้ ไฮ่ เหมียด เญย แหม่ง เญย ชะ โหฒว. 17เหว่ย หฒุ กีง-โซว ก๊อง,
“เม่ย เหยียด ลิ์ว โหฒว ไซ เมี่ยน
ฮนั้ง เมนคีเซเดก วั้ว หญู่ง ไซ เมี่ยน นอ.”#สีง ฑูง 110:4
18ฮนั้ง หน่าย โล์-เล์ย-หลัด หฒุ ถุย ธ้วด หมี่ อ๊ะ เหว่ย หฒุ เมา ไห่, ไม้ ลั่ม หล่ง. 19โมเซ เญย เล์ย-หลัด ไม้ ไฮ่ ปุน หาย หญู่ง ตุ้น ยุ่น. มป่า อี้ หฒั่น ม่าย หญู่ง เก้า หลง, เก้า ม่าย ลั่ม ฮนั้ม ไฮ่ ต้อ บัว นิด ฟัด ทิน-ฮู่ง.
20แอ๋ง ม่าย ทิน-ฮู่ง แล์ง เญย หว่า. นิ่น พ้าย เลวี ฝีง โหฒว ไซ เมี่ยน วั้ว หฒั่น, นิ่น ไม้ เฒี้ยง หาย หญู่ง แล์ง หว่า. 21มป่า พ้าย ฆะฮ้า ต้าย วั้ว เต้า โหฒว ไซ เมี่ยน, ทิน-ฮู่ง เฒี้ยง เจี๊ยน นิ่น กั้น แล์ง หว่า. วั้ว หฒั่น นิ่น ก๊อง,
“เฒี้ยว แล์ง แหง่ง หว่า ก๊อง,
ฆะฮ้า ฒู้ง ไม้ ทิ้ว เฮญี้ยว,
‘เม่ย เหยียด ลิ์ว ตุ๊ โหฒว ไซ เมี่ยน.’”#สีง ฑูง 110:4
22ทิน-ฮู่ง ฮนั้ง หน่าย แล์ง หว่า, เยซู ฯฒฯ ตุ๊ โหฒว ทิน-ฮู่ง เหลียบ เจี๋ย เก้า หลง วั้ว เต๋ย แหง่ง หว่า เญย ดาม-ต้าว.
23วั้ว เต๋ย ไซ เมี่ยน ม่าย ธั้ม เญย, เหว่ย หฒุ นิ่น บัว ไต่ หมี่ อ๊ะ, ฯฒฯ แฆะ เจี๊ยน, ไม้ ไฮ่ เหยียด ลิ์ว โหฒว ไซ เมี่ยน เญย กง มี่ง. 24มป่า เยซู เหยียด ลิ์ว เฒี่ยง เจี๊ยน ฯฒฯ เหยียด ลิ์ว ตุ๊ โหฒว ไซ เมี่ยน. 25เหว่ย น้าย เยซู ไฮ่ เหยียด ลิ์ว เหฌียว เขา นิ่น ต้าย ล์อ ทิน-ฮู่ง วั้ว เต๋ย เหว่ย หฒุ นิ่น เหยียด ลิ์ว เฒี่ยง เจี๊ยน เถง นิ่น บัว โท้ ทิน-ฮู่ง.
26ฮนั้ง หน่าย, เยซู เซ โหฒว บัว เฉียม หล่ง เญย ต้ม ไซ เมี่ยน. นิ่น ธีง-เหฑ่ง, ไม้ ลั่ม เฆ่ม ต๋อง หย่า ไม้ ม่าย ฒุ์ย. นิ่น เล่ย ฆอย ฒุ์ย-เมี่ยน หย่า เยียม เก้า ฮลัง เจี๋ย ลู่ง. 27เยซู ไม้ ฮนั้ง วั้ว เต๋ย ต้ม ไซ เมี่ยน. นิ่น ไม้ เฉียม หฒุ ฮนอยๆ ต้อ กะน้าย มี่ง เหฒี่ย เหว่ย นิ่น กั้น เญย ฒุ์ย ด่าง, ฆะฮ้า เหว่ย หฒวัง แปะ ฝีง เญย ฒุ์ย. เยซู หล่ง นิ่น กั้น เหฒี่ย ดุ หฑุ่น ฮนั้ง เซ ต๋อง เหยียด ลิ์ว.#เลวี 9:7 28เอย โมเซ เญย เล์ย-หลัด พ้าย โหฒว ต้ม ไซ เมี่ยน วั้ว เต๋ย เซ ป้าม เมี่ยน, มต้าย เมา ไห่. มป่า เยียม เล์ย-หลัด ฆะฮ้า, ทิน-ฮู่ง แล์ง แหง่ง หว่า เหลียบ นิ่น เญย ตอน โหฒว เหยียด ลิ์ว ตุ้น ยุ่น เญย ต้ม ไซ เมี่ยน.
Currently Selected:
ฮิบลู 7: IuMiTH
Highlight
Copy
Compare
Share
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
