เอเสเคน 43
43
เฒี้ยว เญย ฌัง-หล่าง ปวั๊ง หฒั่ง เฒี้ยว เญย เปย๊า
1ฆะฮ้า วั้ว ล่าน เมี่ยน ต้อ เยีย มี่ง เถา ฮวิน มี่ง ตง ปูง เญย หลาด แก้ง. 2เยีย หมั่ง ปวัด อิสะลาเอน เญย ทิน-ฮู่ง เญย ฌัง-หล่าง เยียม ตง ปูง แหมง ต้าย. นิ่น เญย เฉีย บุย ฮนั้ง ววม ธั้ม โฒ์ๆ เญย บุย. เดา-เป้ย หย่า แอ๊ง ธ้วด นิ่น เญย ฌัง-หล่าง.#เอเสเคน 10:3-4,18-19; 11:22-23; หล่าว ย่าง 1:15 3เยีย ปวัด น้าย เต๋ย หล่าว ย่าง เญย สี่ ฮนั้ง ฒิ่น ด่าง เยีย ปวัด นิ่น ต้าย เหมียด วั้ว นอม ฒี่ง, หย่า ปวัด ฮนั้ง ฒิ่น ด่าง เยีย เยียม เคบา ด้าย เฮลน วั้ว เต๋ย หล่าว ย่าง เญย สี่. เยีย ฯฒฯ พัวะ เหฌี่ย เดา. 4เฒี้ยว เญย ฌัง-หล่าง เยียม ตง ปูง แหมง เญย หลาด แก้ง เปียะ หฒั่ง เฒี้ยว เญย เปย๊า กะญั์ว วั้ว หฒั่น, 5สีง ลี่ง โป้ว เยีย ฝาว, ต้อ เยีย เปียะ กะญั์ว วั้ว คัง ฒี่ง หลาด. เฒี้ยว เญย ฌัง-หล่าง หย่า ปวั๊ง หฒั่ง ทิน-ฮู่ง เญย เปย๊า หมี่ อ๊ะ.
6วั้ว ล่าน เมี่ยน โซ้ว เจี๊ยน เยีย เญย กะเฮลน วั้ว หฒั่น, เยีย ไฮ์ ม่าย เต้า เยียม หฒั่ง ทิน-ฮู่ง เญย เปย๊า กะญั์ว เหธา เยีย ก๊อง หว่า. 7นิ่น ก๊อง บั๋ว เยีย, “ป้าม เมี่ยน อ้า! น้าย เซ เยีย เญย เหว่ย เหธา เยีย เญย เหฒา-เป๊น ธ้าย เญย ต๋อง. เซ เยีย เหยียด ลิ์ว เยียม อิสะลาเอน เมี่ยน บุด๋ง เญย ต๋อง. เยียม น้าย มี่ง อิสะลาเอน เมี่ยน, เลี่ยม นิ่น บัว กั้น เหธา นิ่น บัว เญย ฮู่ง เตี๋ย, ไม้ ปุน เยีย เญย ธีง-เหฑ่ง เม่ง ม่าย หวุย. นิ่น บัว ไม้ หอบ หฒุ หฒั่ง เหญี่ย เญย เฒี่ยน.#43:7 ไฟ ไม้ ม่าย เฮยี่ย เฮญี้ยว. นิ่น บัว เญย ฮู่ง เตี๋ย เกวย เสย, ไม้ ตู๋ง ต้อ เซย หฒั่ง ทิน-ฮู่ง เญย เปย๊า เญย หลาด กะญั์ว หฒัง.#43:7 ไม้ ฮิ้ว ตุ๊ น้าย เต๋ย ฮิบลู หว่า ก๊อง หฒุ หฒัง เซย ไฟ โหฒว นอม จั๋ง-โห่ ไฟ เหว่ย ฮู่ง เตี๋ย เกวย เสย ฝ่ง ห่อ เหฒี่ย เญย กะน้าย. 8ฮู่ง เตี๋ย ปุน นิ่น บัว เญย แก้ง แบ๊ะ ต๋อย เยีย เญย แก้ง แบ๊ะ หย่า ปุน นิ่น บัว เญย แก้ง โหฒ่ว เยียม นิด เยีย เญย แก้ง โหฒ่ว, ขูง ม่าย ดุ เพง หฌ่ง เหฆน เจี๊ยน บุด๋ง. นิ่น บัว โหฒว กั้ม เฑี้ย เญย สี่ ปุน เยีย เญย ธีง-เหฑ่ง บั๋ว ม่าย หวุย. เยีย ฯฒฯ เฉีย เจี์ย, เหมียด นิ่น บัว. 9อี้ หฒั่น นิ่น บัว อ๋อย หฒุ กวั่ง, ไม้ หฒั่ง เหญี่ย เญย เฒี่ยน.#43:9 ไฟ ไม้ ม่าย เฮยี่ย เฮญี้ยว. นิ่น บัว เญย ฮู่ง เตี๋ย เญย เซย หย่า อ๋อย หฒุ หฒัง เล่ย โก เยีย. เยีย ฯฒฯ เหยียด ลิ์ว เยียม นิ่น บัว บุด๋ง.
10“ป้าม เมี่ยน อ้า! เม่ย อ๋อย หฒุ ก๊อง เม่ง น้าย นอม หฒั่ง ทิน-ฮู่ง เญย เปย๊า เญย เจ๊า-โหล่ว ปุน อิสะลาเอน เมี่ยน หมวัง, ปุน นิ่น บัว หลงๆ เญย ฮนั้ม เถา ฯฒฯ ไญ้ นิ่น บัว โหฒว เญย เอ๊าะ สี่. 11สี ก๊อง นิ่น บัว ไญ้ นิ่น บัว โหฒว เญย เหยียด ฒู้ง สี่, อ๋อย หฒุ ปุน นิ่น บัว ฮิ้ว ตุ๊ โหฒว หฒั่ง ทิน-ฮู่ง เญย เปย๊า เญย เหยียด เหญ่ย, เซ เปย๊า ฮนั้ง หาย นอ เยียม, เปียะ ธ้วด เญย ต๋อง ฮนั้ง หาย นอ, เหธา เหยียด ฒู้ง โมว เฒ้ย ฮนั้ง หาย นอ. หย่า อ๋อย หฒุ ปุน นิ่น บัว ฮิ้ว ตุ๊ หฒั่ง ทิน-ฮู่ง เญย เปย๊า เญย เล์ย-หลัด เหธา เหยียด ฒู้ง เล์ย. อ๋อย หฒุ ตอง เจี๊ยน นิ่น บัว เฟี้ย เหฌี่ย เหว่ย ปุน นิ่น บัว เอย เจี๊ยน หฒั่ง ทิน-ฮู่ง เญย เปย๊า เญย เล์ย-หลัด เหธา เหยียด ฒู้ง เล์ย โหฒว.
12“น้าย เซ หฒั่ง ทิน-ฮู่ง เญย เปย๊า เญย เล์ย. เยียม บง-นี้ง กู้ หงว่าย เว่ย ก๋อม เญย ต๋อง เหยียด ฒู้ง เป๋น ธีง-เหฑ่ง เญย ต๋อง. หมั่ง ม่าะ! น้าย เซ หฒั่ง ทิน-ฮู่ง เญย เปย๊า เญย เล์ย-หลัด.
เหฒี่ย-ต้อง
13“เยียม น้าย มี่ง ก๊อง เหฒี่ย-ต้อง เญย ธิ-หธุน, ก๊อง เป๋น เดาะ. (น้าย เต๋ย เดาะ เซ เหยียด เดาะ เล่ง เหยียด ปั์ว-ฒ้าง.)#43:13 โพว-ทง เญย เดาะ เซ ด๊าม-เม้ด (500 เซน). เหฒี่ย-ต้อง เญย กอน-โด๊ะ ฮลัง เหยียด เดาะ, จั๊ง เหยียด เดาะ. ฮวีง ก๋อม กะเฮลน ฮลัง เหยียด หนาม. เหฒี่ย-ต้อง เซ แบ่ง น้าย ฮลัง.#ธ้วด อียิบ 27:1-2; 2 ฒุ่น ต่อย โต้ว 4:1 14เยียม เดา-เป้ย, กอน-โด๊ะ กู้ หงว่าย ฝาว ตะเยี้ยด คัง เถา ควัง เปียะ กะญั์ว ฮลัง อี เดาะ. ควัง เปียะ กะญั์ว เญย ต๋อง จั๊ง เหยียด เดาะ. เยียม ไฝ วั้ว คัง เถา โฮล วั้ว คัง ฮลัง เปยย เดาะ. ควัง เปียะ กะญั์ว จั๊ง เหยียด เดาะ. 15เหฒี่ย-ต้อง กู้ หงว่าย, ปั๊ว เหฒี่ย เญย โหฑ, ฮลัง เปยย เดาะ. น้าย เต๋ย ต๋อง เญย เปยย นอม เก๊าะ, เหยียด นอม เก๊าะ ม่าย เหยียด นอม จอง ฮลัง เหยียด เดาะ. 16เหฒี่ย-ต้อง เญย โหฑ เฝย-ปูง, ด๊าว เหฒียบ เหญ่ย เดาะ, จั๊ง เหฒียบ เหญ่ย เดาะ. 17บุด๋ง วั้ว คัง, ควัง เปียะ กะญั์ว เญย ต๋อง กะเฮลน, หย่า เฝย-ปูง เญย, ด๊าว เหฒียบ เฝย เดาะ, จั๊ง เหฒียบ เฝย เดาะ. ฮวีง ก๋อม กะเฮลน ฮลัง ด๊าม-เดาะ. เหฒี่ย-ต้อง เญย กอน ควัง เปียะ เญย ต๋อง หย่า จั๊ง ธ้วด เหยียด เดาะ. เหฒี่ย-ต้อง เญย เทย ฮวิน มี่ง ตง ปูง แหมง.”
ฝูง เหฒี่ย-ต้อง ปุน เฒี้ยว
18นิ่น แอ๋ง ก๊อง บั๋ว เยีย, “ป้าม เมี่ยน อ้า! เฒี้ยว ทิน-ฮู่ง ฮนั้ง น้าย ก๊อง, ‘น้าย เซ เหธย เหฒียง เหฒี่ย-ต้อง วั้ว ฮนอย ปั๊ว เหฒี่ย เญย กะน้าย หย่า หล่ง แซง-คู้ ฑย้าม ฟุ เหฒี่ย-ต้อง เญย เล์ย.#ธ้วด อียิบ 29:35-37 19เฒี้ยว ทิน-ฮู่ง ฮนั้ง น้าย นอ ก๊อง, ‘เม่ย อ๋อย หฒุ เฒาะ เหยียด เต้า ง่ง โก๊ว ปุน เลวี ฝีง, สาโดก เญย เฒ้ย-ฟุน วั้ว เต๋ย ไซ เมี่ยน, เหฒี่ย เหว่ย ฟิ ฒุ์ย. นิ่น บัว ต้าย นิด ฟัด ฟู-สู เยีย. 20อ๋อย หฒุ เฒาะ เต๋ย น้าย เต้า ง่ง โก๊ว เญย ฑย้าม ไหฒ เหฒี่ย-ต้อง เญย เก๊าะ วั้ว เต๋ย เปยย นอม จอง แอ๋ง เหธา ควัง เปียะ เญย ต๋อง เปยย ปูง เก๊าะ, หย่า ไหฒ ก๋อม เปยย ปูง กะเฮลน ฝาว ฮลัง เญย ต๋อง. ฮนั้ง น้าย นอ สา ลิ์ว เหฒี่ย-ต้อง, เหฒี่ย-ต้อง ฯฒฯ ธีง-เหฑ่ง หมี่ อ๊ะ. 21เม่ย หย่า อ๋อย หฒุ เฒาะ เหฒี่ย เหว่ย ฟิ ฒุ์ย วั้ว เต้า ง่ง โก๊ว เยียม หฒั่ง ทิน-ฮู่ง เญย เปย๊า กะเหญี่ย, ต้ง พ้าย เหฒียง เป๋น ทิน-ฮู่ง เญย เปย๊า เญย ธีง-เหฑ่ง ต๋อง กะเหญี่ย แหมง, ปั๊ว.
22“‘ตะเหญ่ย ฮนอย เม่ย อ๋อย หฒุ เฒาะ เต้า ไม้ ม่าย ต๋อง เฆ่ม เญย ยู่ง โก๊ว ฝ่ง ห่อ เหฒี่ย ฟิ ฒุ์ย, เหว่ย สา เหฒี่ย-ต้อง ธีง-เหฑ่ง ต้าย ฮนั้ง หล่ง ง่ง โก๊ว สา นอ. 23เม่ย สา ลิ์ว เหฒี่ย-ต้อง, เม่ย อ๋อย หฒุ เฒาะ เต้า ไม้ ม่าย ต๋อง เฆ่ม เญย ง่ง โก๊ว ตอน เหธา เยียม ปะกี ยู่ง กวั้น เฒาะ เต้า ไม้ ม่าย ต๋อง เฆ่ม เญย ปะกี ยู่ง โก๊ว ฝ่ง ห่อ. 24อ๋อย หฒุ ต้อ เถา เฒี้ยว เญย หฑะเฮมียน. ไซ เมี่ยน ฯฒฯ เฒาะ เฑ้า หฮยาม เจี๊ยน แอ๋ง ฝ่ง ห่อ เป๋น ปั๊ว เหฒี่ย เญย กะน้าย ปุน เฒี้ยว.
25“‘เสี่ย ฮนอย กะญั์ว อ๋อย หฒุ ฮนอยๆ ฝ่ง ห่อ เต้า ยู่ง โก๊ว เหฒี่ย เหว่ย ฟิ ฒุ์ย. เม่ย หย่า อ๋อย หฒุ ฝ่ง ห่อ เต้า ง่ง โก๊ว เหธา เต้า เยียม ยู่ง กวั้น ไม้ ม่าย ต๋อง เฆ่ม เญย ปะกี ยู่ง โก๊ว. 26ไซ เมี่ยน อ๋อย หฒุ สา เหฒี่ย-ต้อง ธีง-เหฑ่ง ปวั๊ง เสี่ย ฮนอย หธีง สา เหฑ่ง. หย่า อ๋อย หฒุ ฝูง ปุน เฒี้ยว เหว่ย เป๋น ธีง-เหฑ่ง เญย ต๋อง. 27น้าย เต๋ย ฮนอย-เหญียะ เจี๋ย ลิ์ว, เยียม ตะเป๊ด ฮนอย เจี๋ย มี่ง, ไซ เมี่ยน อ๋อย หฒุ เยียม เหฒี่ย-ต้อง ปั๊ว เม่ย บัว ฝ่ง ห่อ ปั๊ว เหฒี่ย เหธา ฝ่ง ห่อ เหว่ย จิว ทง เญย กะน้าย. เยีย ฯฒฯ หอบ เฮญี้ยว เม่ย บัว.’”#43:27 ไฟ ฒิบ เม่ย บัว. น้าย เซ เฒี้ยว ทิน-ฮู่ง ก๊อง เญย หว่า.
Currently Selected:
เอเสเคน 43: IuMiTH
Highlight
Copy
Compare
Share
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
