เอเซเท 4
4
โมเดไค โท้ เอเซเท เถง
1โมเดไค ฮิ้ว ตุ๊ ธ้วด ต้าย น้าย เต๋ย เหยียด ฒู้ง สี่ ฯฒฯ เป๊ด นิ่น เญย ลุย-โหว, ฒุ เจี๊ยน ล่าม่า เดีย-โธว, แอ๋ง เฒาะ ซ้าย หฮยาม เจี๊ยน มฆ้อง, ยั่ง สุสา ฒี่ง เญย เฮย-ห่อง, ปู๋ง-ซีง ปู๋ง-เฉีย เญย เญี้ยม ตุ๊ เฮญี้ยว มุน ไห่. 2นิ่น มี่ง เถา ฮู่ง ติ่น เญย หลาด แก้ง มป่า ไม้ เปียะ หลาด กะญั์ว, เหว่ย หฒุ หาย เต้า ฒุ เจี๊ยน ล่าม่า เดีย-โธว ไม้ ม่าย เล์ย เปียะ. 3เยียม นอมๆ แซ้ง, ตะฟ่าน ฮู่ง เญย หลี่ง ฒุ่น เถา หาย นอม ต๋อง, ยิวไท เมี่ยน เฑ่า ตุ๊ โค้ว ไห่, เบี้ยวๆ เญย เญี้ยม. นิ่น บัว หย่า เฒย ไม้ หญั่น หาย หญู่ง. เมี่ยน ธั้ม เญย ฒุ เจี๊ยน ล่าม่า เดีย-โธว เปว๋ย เจี๊ยน ซ้าย-ดุย.
4ฟู-สู เอเซเท เญย มเซียะ โปว เหธา เจียน#4:4 เป๊ย หมั่ง เอเซเท 1:10. เยียม 4:5 ฟี่ ฮนั้ง เญย. ต้อ โมเดไค โหฒว เญย สี่ ต้าย บั๋ว เอเซเท. เอเซเท เก้ง! เฑ่า ไห่. นิ่น ฝูง ลุย-โหว มี่ง ปุน โมเดไค เหว่ย ปุน นิ่น เหยี่ยน ฆอย ล่าม่า เดีย-โธว, มป่า โมเดไค ไม้ คั้ง ฒิบ. 5เอเซเท ฯฒฯ เห่ว เต้า ต้ง ฮู่ง เตี๋ย พ้าย ต้าย ฟู-สู เอเซเท เญย เจียน, บั๋ว เห่ว ฮาท้าก, ต้าย บั๋ว นิ่น มี่ง ล์อ โมเดไค หมวัง ก๋า นิ่น เญย สี่ ฮนั้ง หาย นอ. อ๋อย ฮิ้ว ตุ๊ โมเดไค เหว่ย หาย ติ่ว ฮนั้ง หน่าย นอ โหฒว.
6ฮาท้าก ฯฒฯ ธ้วด เถา ฒี่ง เญย ต้ม หฒวัง หฒ่าม เยียม ฮู่ง ติ่น เญย หลาด แก้ง ด่าง ล์อ โมเดไค. 7โมเดไค เฒว่ย เยี้ยด เฒว่ย เหญ่ย เญย ก๊อง เหฑ่ง นิ่น ปวั้ง เญย สี่, หย่า ก๊อง ฮามาน แล์ง ญ่าน บัวะ เหฒีย ฝูง เปียะ ฮู่ง เตี๋ย เญย ญ่าน ลั์ม, เหว่ย ไต๋ เหฑ่ง ยิวไท เมี่ยน. 8โมเดไค แอ๋ง เฒาะ เฒ้ย เธว ต้าย เญย โซว, ต้ง เยียม สุสา ฒี่ง ฒุ่น ธ้วด อ๋อย เหมียด ยิวไท เมี่ยน เญย หลี่ง, จิว ปุน ฮาท้าก, เห่ว นิ่น ปุน เอเซเท หมั่ง แอ๋ง ก๊อง เม่ง ปุน นิ่น หมวัง. โมเดไค หย่า บั๋ว ฮาท้าก ขวิน เอเซเท มี่ง เถา ฮู่ง เตี๋ย เญย หฑะเฮมียน โท้ นิ่น ค้อ-เลี่ยน, โจ้ว ฮู่ง เตี๋ย เถง เหธา ฮู่ง หม่า จวั่ง ฝีง เญย เมี่ยน.
9ฮาท้าก หฑวน มี่ง แอ๋ง เฒาะ โมเดไค เญย หว่า บั๋ว เหฑ่ง เอเซเท. 10เอเซเท ฯฒฯ พ้าย ฮาท้าก ต้อ น้าย เต๋ย หว่า มี่ง บั๋ว โมเดไค. 11นิ่น ก๊อง, “ฮู่ง เตี๋ย เญย หฒวัง เจียน เหธา เยียม ฮู่ง เตี๋ย กุ๊น นอมๆ แซ้ง เญย แปะ ฝีง, ไม้ กุ๊น มจั่ง มเซียะ, ตะฟ่าน ไม้ เฒ์ย ฮู่ง เตี๋ย เห่ว เปียะ ฮู่ง ติ่น กะญั์ว เญย ทีง มี่ง ปวั้ง ฮู่ง เตี๋ย, เซ เมี่ยน กั้น เปียะ นอ, ม่าย ดุ ติ้ว หลี่ง ฮนั้ง. อ๋อย หฒุ เฒาะ วั้ว ล่าน เมี่ยน ไต๋ กวั่ง. ขูง ม่าย เหยียด หญู่ง หฒะเอ๋ย ไฮ่ ปุน ตุ๊ แหม่ง ธ้วด ฮนั้ง, เซ ฮู่ง เตี๋ย ซูง นิ่น เญย เจียม-ปย๊า ฒิบ วั้ว ล่าน เมี่ยน. มป่า เยีย แอ๊ะ, ตุ๊ ฟ่า เหฒียบ ฮนอย ฮู่ง เตี๋ย ไม้ เห่ว เยีย เปียะ มี่ง ปวั้ง.”
12เมี่ยน ต้อ เอเซเท เญย หว่า มี่ง บั๋ว โมเดไค. 13โมเดไค ฯฒฯ ปุน น้าย เต๋ย หว่า หฑวน มี่ง บั๋ว เอเซเท, “ไม้ ตู๋ง ฮนั้ม เหว่ย เม่ย เยียม น้าย ฮู่ง ติ่น, เป๊ย เม่ย เหธา ยิวไท เมี่ยน เหยียด ฒู้ง, เซ เม่ย กั้น เก้า ไฮ่ เปย๋า ตุ๊ ดุ๊ด. 14อี้ หฒั่น สี ก๊อง ต๋อย น้าย เต๋ย เฒี่ยง โห่ เม่ย เซ้กๆ เญย เยียม, ฒู้ง ไฮ่ ม่าย หฒะเอ๋ย เยียม กั้น นอม ต๋อง ต้าย เถง ยิวไท เมี่ยน ตุ๊ เหฌียว. มป่า เม่ย กั้น เหธา เม่ย เญย เตีย เญย มั์ว-ต่อย อ๋อย หฒุ เหมียด เหฑ่ง. ไม้ ม่าย หาย เต้า ฮิ้ว ตุ๊ มป่า เหฑีย เม่ย ตุ๊ โหฒว ฮู่ง หม่า เซ เหว่ย ธ้วด น้าย เต๋ย สี่ เญย เฒี่ยง โห่.”
15เอเซเท ปุน เมี่ยน มี่ง วุ่ย โมเดไค เญย หว่า ก๊อง, 16“กุ๊น มี่ง ล์อ ตะฟ่าน เยียม สุสา ฒี่ง เญย ยิวไท เมี่ยน กั๊บ ฒุ้น เหว่ย เยีย เฒย ไม้ หญั่น หาย หญู่ง. ปัว ฮนอย ปัว ม์วน ไม้ ตู๋ง หญั่น, ไม้ ตู๋ง ฮบ หาย หญู่ง. เยีย เหธา เยีย เญย มเซียะ โปว หย่า อ๋อย ฮนั้ง เม่ย บัว นอ เฒย. ฆะฮ้า เยีย ฯฒฯ เปียะ มี่ง ล์อ ฮู่ง เตี๋ย ไม้ กุ๊น เซ ต่อง เล์ย. สี ก๊อง เยีย หฒุ ไต่, ธิ่น นิ่น ไต่ อ๊ะ.”
17โมเดไค ฯฒฯ มี่ง อ๊ะ, หย่า เอย เจี๊ยน เอเซเท พ้าย เญย เหยียด ฒู้ง หว่า โหฒว.
Currently Selected:
เอเซเท 4: IuMiTH
Highlight
Copy
Compare
Share
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
