2 ฒุ่น ต่อย โต้ว 15
15
อาสา ก๊อย เหยี่ยน ปัวะ หฒั่ง เญย เจ๊า
(เป๊ย หมั่ง 1 ฮู่ง โต้ว 15:13-15)
1ทิน-ฮู่ง เญย สีง ลี่ง เหฌี่ย ต้าย เยียม โอเดด เญย ตอน, อาซาลิยา. 2นิ่น ฯฒฯ ธ้วด มี่ง ปวั้ง อาสา, ก๊อง บั๋ว นิ่น, “อาสา ฮู่ง เหธา ยูดา เหธา เบนยามิน เญย เหยียด ฒู้ง เมี่ยน อ้า! โท้ หมวัง เยีย ก๊อง ม่าะ! ตะฟ่าน เม่ย บัว กัน เฒี้ยว, นิ่น ฯฒฯ เหธา เม่ย บัว เยียม. สี ก๊อง เม่ย บัว ล์อ นิ่น, นิ่น ฯฒฯ ปุน เม่ย บัว ล์อ ตุ๊ ปวัด. มป่า สี ก๊อง เม่ย บัว กวั่ง นิ่น, นิ่น ฯฒฯ กวั่ง เม่ย บัว. 3ฒิ่น ด่าง อิสะลาเอน เมี่ยน ไม้ ม่าย เฒียน ทิน-ฮู่ง, ไม้ ม่าย ไซ เมี่ยน หฌาว, หย่า ไม้ ม่าย เล์ย-หลัด เล่า ไห่ อ๊ะ. 4มป่า นิ่น บัว ปวั้ง หฒุ โค้ว เญย เฒี่ยง โห่ นิ่น บัว ฮวิน หฑวน ต้าย ล์อ เฒี้ยว, อิสะลาเอน เมี่ยน เญย ทิน-ฮู่ง. นิ่น ฯฒฯ ปุน นิ่น บัว ล์อ ตุ๊ ปวัด อ๊ะ. 5วั้ว เต๋ย เฒี่ยง โห่, เมี่ยน เปียะๆ ธ้วดๆ ไม้ ม่าย แป้ง ออน เหว่ย หฒุ ม่าย ฟ้าน หลุ่น เญย เจ๊า ธั้ม เญย ห่อย วั้ว เต๋ย นอมๆ กั๊วะ เญย เหยียด ฒู้ง เมี่ยน โค้ว. 6นิ่น บัว หฒุ ปุน ฆอย เหฑ่ง. น้าย นอม กั๊วะ เหธา วั้ว นอม กั๊วะ, น้าย นอม ฒี่ง เหธา วั้ว นอม ฒี่ง ปุน ฆอย, เหว่ย หฒุ ทิน-ฮู่ง ปุน หญู่งๆ เหฒะ หน่าน ห่อย นิ่น บัว หลุ่น. 7มป่า เม่ย บัว อ๋อย หฒุ เฮ้น, ไม้ ตู๋ง เซวย#15:7 ฮิบลู หว่า ก๊อง “ไม้ ตู๋ง ปุน ปั์ว เมา”. เหว่ย หฒุ เม่ย บัว เญย กง อ๋อย ตุ๊ ฒิบ ฒี่ง เหญ่ย.”
8อาสา เยี้ยด ไฮ์ โอเดด เญย ตอน, อาซาลิยา, โต่ว ต้าย น้าย เต๋ย หว่า, นิ่น เญย เฮญี้ยว ฯฒฯ เฮ้น เจี์ย ต้าย. นิ่น ฯฒฯ เยียม ยูดา เต่ย เหธา เบนยามิน เต่ย, เลี่ยม เยียม เอฟาอิม บง- ไอ๊ ต๋อง ธ้าง ต้าย เญย นอมๆ ฒี่ง แธะ ฆอย นิ่น บัว เญย กั้ม เฑี้ย ไห่ เญย หมิ่ว-ฝัง. นิ่น หย่า หฒ่อ เยียม หฒั่ง เฒี้ยว เญย เปย๊า ธับ ธ้วด เญย ต๋อง หฑะเฮมียน แหมง, เฒี้ยว เญย เหฒี่ย-ต้อง.
9นิ่น หย่า เห่ว ยูดา เมี่ยน เหธา เบนยามิน เมี่ยน, หย่า เห่ว ต้ง เหธา นิ่น เยียม วั้ว เต๋ย เอฟาอิม, มะนัดเส เหธา สิเมโอน ต้าย เญย แปะ ฝีง, กั๊บ ฒุ้น ต้าย. ม่าย น้าย เต๋ย เมี่ยน ธั้ม เญย เยียม อิสะลาเอน ธ้วด ต้าย ล์อ นิ่น เหว่ย หฒุ นิ่น บัว ปวัด เฒี้ยว, นิ่น เญย ทิน-ฮู่ง, เหธา นิ่น เยียม.
10อาสา โหฒว ฮู่ง ตุ๊ เหฒียบ ฮม์ หฮญัง วั้ว หฮญัง ฟ่า หฮลา, นิ่น บัว กั๊บ ฒุ้น เยียม เยลูซาเลม. 11ต้ง วั้ว ฮนอย นิ่น บัว เฒาะ เบ๊าะ จ๋า ธ้าง ต้าย เญย กะน้าย, ง่ง เธี้ยด แป๊ะ เต้า, ปะกี ยู่ง เสี่ย ธิน เต้า, ฝ่ง ห่อ ปั๊ว เหฒี่ย ปุน เฒี้ยว. 12นิ่น บัว ฯฒฯ เหลียบ เจี์ย แหง่ง หว่า ก๊อง นิ่น บัว ปวั๊ง เฮญี้ยว ปวั๊ง เอ๋ย อ๋อย ล์อ เฒี้ยว, นิ่น บัว เญย อง-ถาย เญย ทิน-ฮู่ง. 13ตะฟ่าน หาย เต้า ไม้ คั้ง ล์อ เฒี้ยว, อิสะลาเอน เมี่ยน เญย ทิน-ฮู่ง, วั้ว เต้า ฒู้ง อ๋อย หฒุ ไต๋ กวั่ง อ๊ะ, ไม้ กุ๊น โฮล ไฝ, มจั่ง มเซียะ. 14นิ่น บัว ฯฒฯ เฉีย โฮล เญย เห่ว หย่า ปย๊ม หฑัด ปย๊ม จอง โฮ้ว เจี๊ยน แล์ง หว่า ปุน เฒี้ยว. 15ยูดา เญย หฒวัง เมี่ยน เหว่ย นิ่น บัว โฮ้ว เจี๊ยน หว่า อะเฮน้ย, เหว่ย หฒุ นิ่น บัว ปวั๊ง เฮญี้ยว โหฒว. นิ่น บัว หย่า ปวั๊ง เอ๋ย ล์อ เฒี้ยว. นิ่น ฯฒฯ ปุน นิ่น บัว ล์อ ตุ๊ ปวัด. เฒี้ยว หย่า ปุน นิ่น บัว ปูงๆ แป้ง ออน.
16อาสา ฮู่ง หย่า ปุน นิ่น เญย กู๋, มาอาคา, ถุย เหว่ย, ไม้ ตุ๊ โหฒว ฮู่ง กู๋, เหว่ย หฒุ นิ่น โหฒว กั้ม เฑี้ย ไห่ เญย อาเซลา เฒี่ยน เญ์ย เญย ฝัง. อาสา ก๋อย วั้ว นอม ฝัง, เบ๊าะ หม่วน เหฑ่ง, แอ๋ง เยียม ขิดโลน ฮ์อง ปั๊ว กวั่ง. 17ไม้ กุ๊น นิ่น ไม้ แธะ กวั่ง อิสะลาเอน เต่ย-ปูง เยียม ฮลัง หฒั่ง เฒี่ยน เญย ต๋อง, เยียม อาสา เญย เสย เฒ้ย นิ่น เญย เฮญี้ยว เหฒียบ ฒัวะ เญย กัน เฒี้ยว. #15:17 ม่าย เต๋ย โซว ฟาน ต้าย ก๊อง “นิ่น เญย เฮญี้ยว ไม้ ลั่ม เฆ่ม ต๋อง อ๊ะ”. 18นิ่น เฒาะ ต้ง นิ่น เญย เตีย เหธา นิ่น กั้น ฝ่ง ห่อ ปุน เญย เจียม ญ่าน เหธา จา-ต๋อง ฝูง เปียะ หฒั่ง ทิน-ฮู่ง เญย เปย๊า.
19เยียม น้าย มี่ง เถา อาสา โหฒว ฮู่ง ฟ่า เหฒียบ ฮม์ หฮญัง วั้ว หฮญัง, ไม้ ม่าย เบ๊าะ จ๋า เญย สี่.
Currently Selected:
2 ฒุ่น ต่อย โต้ว 15: IuMiTH
Highlight
Copy
Compare
Share
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
